Mateus 4 - Eibangeilhos en Mirandês

Tentaçon pul demonho

¹ Anton, l Sprito lhebou a Jasus pa l zerto para que ende fura atentado pul demonho.

² Apuis de haber ayunado quarenta dies i quarenta nuites, dou-le la fame.

³ Ende, l atentador achegou-se al pie de Jasus i dixo-Le: «Se sós l filho de Dius diç-le a estas piedras que se fágan an pan.»

⁴ Jasus respundiu-le: «Stá screbido: Nien solo de pan bibe un home, mas de toda la palabra que sal de la boca de Dius.»

⁵ Anton l diabro lhebou-lo a la cidade santa, puso-lo anriba la parte más alta de l templo

⁶ i dixo-Le: «Se sós l filho de Dius bota-te deiqui abaixo, puis stá screbido: Dará-le orde als anjos del que te apáren culas manos, nun firas por ende ls pies nalgũa piedra.»

⁷ Jasus dixo-le: «Tamien stá screbido: Nun atentarás al Senhor tou Dius.»

⁸ L demonho lhebou-lo outra beç para un monte mui alto i amostrou-le todos ls reinos que habie pul mundo i las sues riquezas

⁹ i dixo-Le: «Darei-te todas estas cousas se te botares por tierra i me adorares.»

¹⁰ Ende, Jasus dixo-le: «Bai-te ambora Satanás, puis stá screbido: Al Senhor tou Dius adorarás i solo a el serbirás.»

¹¹ Anton, l diabro deixou-lo. Lhougo a seguir, benírun ls anjos de l Cielo i serbírun-lo.

A PREGAR I A SANAR NA GALILEIA Jasus ampeça a eibangelizar

¹² Quando oubiu dezir que Juan fura preso, Jasus tornou pa la Galileia.

¹³ Apuis, deixou la cidade de Nazaré i fui-se a morar para Cafarnaún, an pie l lhago, an tierra de Zabulon i Neftali,

¹⁴ pa que se cumprira l que fui dezido pul porfeta Eisaías:

¹⁵ Tierra de Zabulon i tierra de Neftali, yá a camino de l mar i daquel lhado de l riu Jordan, Galileia de ls gentius;

¹⁶ l pobo que bibie na scuridon biu ũa lhuç mui grande, i pa ls que bibien na region selumbrie de la muorte acendiu-se-le ũa lhuç.

Chamamiento de ls purmeiros deciplos

¹⁷ Dende an delantre, Jasus ampeçou a pregar, dezindo: «Arrependei-bos, puis ben ende l reino de ls cielos.»

¹⁸ Ũa beç, andaba Jasus an pie l lhago de la Galileia, biu dous armanos, Simon, que le chamában Pedro i Andrés, armano del, que andában a botar la rede al lhago, puis éran pescadores.

¹⁹ I dixo-le: «Beni cumigo i fazerei de bós pescadores de homes.»

²⁰ Eilhes lhougo deixórun las redes i fúrun-se cun el.

²¹ Fui andando i un cachico más alantre, biu outros dous armanos: Tiago, filho de Zebedeu, i l armano Juan, que stában na barca cul pai, Zebedeu, a cumponer las redes. Jasus chamou-los

²² i eilhes lhougo deixórun la barca i l pai i fúrun-se atrás del.

Juntouros de pessonas ban a tener cun Jasus

²³ Jasus andaba por to la Galileia, a ansinar nas sinagogas deilhes, pregando l Eibangeilho de l Reino i sanando todos ls achaques i males de l pobo.

²⁴ La fama del spalhou-se por toda la Síria i tráien-le todos ls que sufrien de malinas, ls que padecien de achaques i termientos, ls que tenien l demonho cun eilhes, ls lhunáticos i ls coixos, i sanou-los.

²⁵ I muita soma de giente fui atrás del, de la Galileia, de la Decápole, de Jarusalen i daquel lhado de l Jordan.