Mateus 28 - Eibangeilhos en Mirandês

Palabras de l anjo que staba sentado na sepultura

¹ A la purmanhana cedo de l die apuis de l sábado, bieno Marie Madalena i la outra Marie a ber la sepultura.

² Ende, dou-se un grande terramoto, porque un anjo de l Senhor abaixou de l cielo i, achegando-se, arrunsou la piedra i sentou-se anriba deilha.

³ L calantriç del era cumo un relhampo i la bestimienta del branca cumo la niebe.

⁴ Cul miedo del als guardas dou-le ũa cousa i quedórun-se cumo muortos.

⁵ Mas l anjo dixo-le a las mulhieres: «Bós nun téngades miedo, puis bien sei que andais a saber de Jasus, que fui curceficado.

⁶ Nun stá eiqui, porque rucecitou, cumo el habie dezido. Beni acá a ber l sítio adonde staba puosto.

⁷ Ide debrebe i dezi-le als deciplos del: “Rucecitou de ls muortos i bai alantre de bós pa la Galileia; alhá l bereis.” Ponei bien tento ne l que bos dixe.»

⁸ Eilhas salírun debrebe de la sepultura chenas de miedo i, mui cuntentas, botórun-se a fugir a dá-le la nobidade als deciplos del.

Jasus aparece-le a las mulhieres

⁹ Anton, Jasus saliu-le al camino, dezindo: «Dius mos dé buonos dies.» Eilhas achegórun-se i agarrórun-se-le als pides i adorórun-lo.

¹⁰ Adepuis, dixo-le Jasus: «Nun téngades miedo; ide-bos a dar la nobidade a mius armanos, pa que báian pa la Galileia que alhá me beran.»

La mintira de ls saçardotes

¹¹ Quando íban pul camino, alguns guardas benírun a la cidade i cuntórun-le als xefes de ls saçardotes todo l que se habie passado.

¹² Anton eilhes ajuntórun-se culs mais bielhos, fazírun l cunceilho i dórun-le bun denheiro als suldados,

¹³ dezindo-le: «Dezi: “Ls deciplos del benírun de nuite i roubórun-lo anquanto nós stábamos a drumir.”

¹⁴ I se las amboras chegáren als oubidos de l gobernador, podeis quedar çcansados que nós mos ancargaremos de l cumbencir.»

¹⁵ Eilhes, mal apenas recebírun l denheiro, fazírun tal i qual cumo le habien ansinado. I esta cuonta spalhou-se antre ls judius até al die d’hoije.

Ide i cuntai-le a todo mundo

¹⁶ Ls onze deciplos fúrun-se ambora pa la Galileia, pa l cabeço que Jasus le habie andicado.

¹⁷ Assi que l bírun, adorórun-Lo. Mas alguns dubidórun.

¹⁸ I achegando-se, Jasus falou cun eilhes dezindo-le: «A mi fui-me dado todo l poder ne cielo i na tierra.

¹⁹ Ide, antoce, ansinai a todas las naciones i batizai-las an nome de l Pai, de l Filho i de l Sprito Santo,

²⁰ ansinando-las a respeitar todo l que bos mandei. I sabei que you stou cun bós todos ls dies até la fin de l mundo.»