Mateus 23 - Eibangeilhos en Mirandês

Zgraciados de ls scribas i de ls fariseus

¹ Antoce, Jasus falou-le assi a la giente i als sous deciplos,

² dezindo-le: «Na cadeira de Moisés sentórun-se ls scribas i ls fariseus.

³ Fazei i cumpri cun todo l que eilhes bos dezíren; mas nun fágades al modo de ls feitos deilhes, porque eilhes fálan mas nun fázen.

⁴ Anféixan cargas mui pesadas i cun que naide puode i pónen-las a las costielhas de las pessonas, mas nun le quieren topar nien que seia cun un dedo.

⁵ Porque fáien todas las obras deilhes para que séian bistos pulas pessonas: pónen las sues fitas mais anchas i alhárgan las franjas;

⁶ gústan de ls campos de la delantreira nas cenas i de ls purmeiros sentalhos nas sinagogas;

⁷ i que los salúden na praça i las pessonas le chámen “mestre”.

⁸ Mas bós nun quérgades que bos chámen “mestre”, porque solo un ye buosso Mestre i bós sodes todos armanos.

⁹ I nun quérgades chamar pai a naide eiqui na tierra, porque solo un ye buosso pai, l de l cielo.

¹⁰ Nien quérgades que bos chámen de xefe, porque l buosso xefe ye un solo, l Cristo.

¹¹ L mais grande de bós todos, que steia al buosso serbício.

¹² Puis quien se dir l galardon a el mesmo será houmildado i quien se houmildar recebirá l galardon.

¹³ Cuitadicos de bós, scribas i fariseus falsos, porque cerrais l reino de ls cielos a las pessonas! Nien bós antrais nien deixais als outros antrar.

¹⁴ Cuitadicos de bós, scribas i fariseus falsos, que zgraciais las casas de las biúdas, cula çculpa de fazer lhargas ouraciones. Mas inda sereis mais cundanados por bias desses feitos.

¹⁵ Cuitadicos de bós, scribas i fariseus falsos, que le dais la buolta al mar i a la tierra para achar un seguidor i, apuis de lo haberdes arranjado, tornais-lo filho de l einfierno, dues bezes pior do que bós.

¹⁶ Ai de bós, xefes ciegos, que dezis: “Quien fazir ũa jura pul templo, essa jura nun antressa; mas quien fazir la jura pul ouro de l templo, ende queda oubrigado.”

¹⁷ Sodes burros i ciegos. Anton, l que bal mais: l ouro ou l templo que torna l ouro santo?

¹⁸ I tamien: “Quien fazir ũa jura pul altar, essa jura nun antressa; mas quien fazir la jura pula oufierta que stá anriba del, ende queda oubrigado.”

¹⁹ Ciegos! Anton, l que bal mais: l’oufierta ou l altar que torna santa l’oufierta?

²⁰ Porque quien tubir jurado pul altar, jura por el i por todo l que stá anriba del;

²¹ i quien tubir jurado pul templo, jura por el i por aquel que alhá mora;

²² i quien jurar pul cielo, jura pul trono de Dius i por aquel que alhá stá sentado.

²³ Ai de bós, scribas i fariseus falsos, que pagais la décima de l’hourtelana, de l finolho i de ls queminos i deixais l que ye mais amportante na Lei: la justícia, la mezericórdia i la lhealdade. Habiedes de fazer estas cousas sien bos squecerdes daqueilhas.

²⁴ Xefes ciegos, que colais un cínfano, mas angolhis un camelo.

²⁵ Ai de bós, scribas i fariseus falsos, porque lhimpais l copo i l prato pul lhado de fuora, mas andrento stan chenos de lhadronaige i de malfazer.

²⁶ Fariseu ciego, lhimpa purmeiro la parte d’andrento de l copo para que la parte de fuora quede tamien lhimpa.

²⁷ Ai de bós, scribas i fariseus falsos, que sodes acumparados a sepulturas ancaliadas que pul lhado de fuora parécen mui guapas, mas andrento stan chenas de uossos de ls muortos i de toda la culidade de cousas pochas.

²⁸ Tamien bós pul lhado de fuora pareceis homes buonos, mas, andrento, stais chenos de falsidade i de maldade.

²⁹ Ai de bós, scribas i fariseus falsos, que custruís las sepulturas de ls porfetas i anfeitais ls menumentos de ls justos,

³⁰ i dezis: “Se tubíramos bibido ne l tiempo de nuossos pais, nun mos haberiemos ajuntado a eilhes para arramar l sangre de ls porfetas.”

³¹ Assi, sodes teçtemunhas contra bós mesmos porque sodes filhos daqueilhes que matórun ls porfetas.

³² Acabai agora d’anchir la medida de buossos pais.

³³ Serpientes, raça de bíesperas, cumo bos ides a scapar de la cundanaçon de ls einfiernos?

³⁴ Ye por essa rezon que bos mando porfetas, homes sabidos i scribas: A uns matareis-los i curceficareis-los, a outros anchireis-los de baradas nas buossas sinagogas i eireis atrás deilhes de cidade an cidade,

³⁵ para que se caia anriba de bós todo l sangre einocente que yá fui arramado subre la tierra, zde l sangre de l justo Abel até al sangre de Zacarias, filho de Baraquias, que l matestes antre l templo i l altar.

³⁶ Quedai bien ciertos de l que bos digo: Todas estas cousas se han de caier anriba desta giraçon.

³⁷ Jarusalen, Jarusalen, que matas ls porfetas i acántias ls que te fúrun ambiados! Quanta beç you quije ajuntar ls tous filhos tal i qual cumo la pita ajunta ls piticos ambaixo las alas i bós nun quejistes!

³⁸ Mirai, ende bos queda la buossa casa sien naide.

³⁹ Mas tamien bos digo: Nun me tornareis a ber até que dígades: “Bendito seia l que ben an nome de l senhor.”»