Mateus 21 - Eibangeilhos en Mirandês

Çcuçones an Jarusalen. Jasus entra an Jarusalen

¹ Quando yá íban acerca de Jarusalen, al passar por Betfagé, ne l Monte de las Oulibeiras, Jasus mandou dous deciplos

² dezindo-le: «Ide a la tierra que stá delantre de bós i lhougo a l’antrada achareis ũa burra presa i un burrico cun eilha; çprendei-los i traiei-me-los.

³ I se ũa pessona bos preguntar algo, dezi-le que l duonho ten percison deilhes i lhougo ls mandará.»

⁴ Todo se dou para que se cumpra l que fui anunciado pul porfeta, que diç:

⁵ Dezi-le a la filha de Sion: Mira, l tou rei ben até ti, manso i a cabalho nũa burra i un burrico, filho dũa béstia de carga.

⁶ Anton, ls deciplos fúrun-se alhá i fazírun l que Jasus le habie mandado,

⁷ traírun la burra i l burrico i ponírun-le pul lhombo las sues capas i el scarranchou-se neilha.

⁸ Muita soma de giente stendiu la sue capa ne l camino i outros cortában galhos de las arbles i spalhában-los pul camino.

⁹ Anton todo aquel juntouro de giente, tanto ls que íban delantre cumo ls que benien por trás, boziában dezindo: «Houssana al filho de Dabide! Bendito l que ben an nome de l Senhor! Houssana nas alturas!»

¹⁰ Quando antrou an Jarusalen, to la cidade quedou albrotada, dezindo: «Quien ye este?»

¹¹ Mas la giente dezie: «Este ye Jasus, porfeta de Nazaré de la Galileia.»

Bota ls bendedores para fuora de l templo

¹² Jasus antrou ne l templo i botou pa la rue todos ls que alhá cumprában i bendien, scachou las mesas de ls cambistas i ls talhos de ls bendedores de palombas,

¹³ i dixo-le: «Stá screbido: La mie casa chamará-se casa de ouracion, mas bós fazistes deilha ũa curriça de lhadrones.»

¹⁴ Apuis benírun a tener cun el, al templo, ciegos i tolhidos i el sanou-los.

¹⁵ Quando ls xefes de ls saçardotes i ls scribas bírun las marabilhas que fazira i ls garoticos a gritar ne l templo i a dezir: «Houssana al filho de Dabide», quedórun mui anrabiados

¹⁶ i dezírun-le: «Oubes l que estes stan a dezir?» Mas Jasus dixo-le: «Claro! Nunca listes: «De la boca de ls pequeinhos i de ls ninos de teta saquestes l lhoubor purfeito?»

¹⁷ I bolbiu-le las cuostas, saliu para fuora de la cidade i fui-se para Betánia i ende quedou a drumir.

La figueira sien figos

¹⁸ Lhougo a la purmanhana, al bolber pa la cidade, dou-le la fame.

¹⁹ Bendo ũa figueira acerca l camino, fui-se alhá mas nun achou mais nada a nun ser fuolhas i dixo-le a eilha: «Que nunca mais de ti torne a nacer fruito.» I mal apenas acabou de falar, la figueira secou-se.

²⁰ Al béren l feito, ls deciplos quedórun admirados i dezien: «Cumo fui que la figueira se secou tan debrebe?»

²¹ Jasus respundiu-le, dezindo: «Quedai bien ciertos de l que bos digo: Se tubirdes fé i nun dubidardes, nun fazereis solo l que le passou a la figueira, mas tamien se le dezirdes a este monte, “Sal dende i bota-te al mar”, assi se passará.

²² I alcançareis todo l que pedirdes cun fé na ouracion.»

L poder de Jasus i l batismo de Juan

²³ Apuis, antrou ne l templo i puso-se a ansinar. Benírun a tener cun el ls xefes de ls saçardotes i ls mais antigos de l pobo i dezírun-le: «Cun que outeridade fais estas cousas? I quien te dou este poder?»

²⁴ Mas Jasus respundiu-le, dezindo: «Tamien you bos bou a poner ũa question i, se me respundirdes, tamien bos dezirei qual l’outeridade cun que fago estas cousas:

²⁵ L batismo de Juan d’adonde era? De l cielo ou de ls homes?» Eilhes falában antre eilhes dezindo: «Se le dezirmos, “de l cielo”, el dezirá-mos, “anton porque nun acraditestes nel?”

²⁶ mas se le dezirmos, “de ls homes”, tenemos miedo de l pobo, pus todos ténen a Juan na cuonta de porfeta.»

²⁷ Anton, respundírun-le a Jasus: «Nun sabemos.» I el dixo-le tamien: «Anton, tamien you nun bos digo cun que outeridade fago estas cousas.»

Parábola de ls dous filhos

²⁸ «Dezi-me, agora, l que bos parece: Habie un home que tenie dous filhos. Achegou-se al purmeiro i dixo-le: “Filho, bai hoije a trabalhar pa la mie binha.”

²⁹ El respundiu-le, dezindo: “Nun quiero.” Mas, apuis, lhebado pul arrependimiento, alhá fui.

³⁰ Apuis, achegando-se an pie de l segundo, dixo-le la mesma cousa. I el respundiu-le, dezindo: “Bou, si senhor.” Mas nun fui.

³¹ Qual de ls dous le fizo la buntade al pai?» Eilhes respónden: «L purmeiro.» Dixo-le Jasus: «Quedai bien ciertos de l que bos digo: Ls recebidores de la décima i las putas éntran delantre de bós ne l Reino de Dius.

³² Porque Juan bieno a tener cun bós, pul camino de la justícia, i nun acraditestes nel; mas ls recebidores de la décima i las putas acraditórun nel. I bós, que bistes, nien assi fazistes apuis peniténcia, para que acraditárades nel.»

Parábola de ls lhabradores malos

³³ Oubi outra parábola. «Habie un pai de família que puso ũa binha, amuralhou-la, scabou neilha un lhagar i alhebantou ũa torre. Apuis arrendou-se-la a uns lhabradores i fui-se para loinge.

³⁴ Quando yá era quaijeque tiempo de bendímia, mandou ls sous criados a tener culs lhabradores para recebir ls fruitos.

³⁵ Mas ls lhabradores agarrórun ls criados del i a un anchírun-lo de porradas, a outro matórun-lo i a outro acantiórun-lo.

³⁶ Anton, mandou outra beç a outros criados i an mais grande númaro que ls purmeiros, mas eilhes fazírun-le la mesma cousa.

³⁷ Na fin mandou-le l filho del, dezindo: “Han de tener respeito pul miu filho.”

³⁸ Mas ls lhabradores, al ber l filho, dezírun uns pa ls outros: “Este ye l ardeiro. Ala, bamos a matá-lo i quedaremos cula ardança del.”

³⁹ I mal apenas l agarrórun, botórun-lo para fuora de la binha i matórun-lo.

⁴⁰ Anton, quando benir l duonho de la binha l quei le bai a fazer a aqueilhes lhabradores?»

⁴¹ Eilhes dízen-le: «Dará-le ũa muorte mala als malos i arrendará la binha a outros lhabradores que le antréguen ls fruitos ne l tiempo debido.»

⁴² Jasus dixo-le: «Nunca listes nas Scrituras: La piedra que ls pedreiros nun quejírun, essa bai a quedar de squineira? L Senhor fizo estas cousas i ye ũa marabilha pa ls nuossos uolhos?

⁴³ Assi, tamien bos digo que bos será tirado l reino de Dius i será-le dado a giente que le faga dar ls sous fruitos.

⁴⁴ I quien cair anriba desta lhastra quedará spaporrado; i anriba de quien eilha cair, smagará-lo.»

⁴⁵ Quando alguns de ls saçardotes i ls fariseus oubírun las parábolas del, antendírun que staba a falar deilhes

⁴⁶ i tenien gana de l prender, mas tubírun miedo de l pobo porque l tenie na cuonta de porfeta.