Mateus 20 - Eibangeilhos en Mirandês

La parábola de ls oubreiros de la binha

¹ «Assi, l Reino de ls Cielos ye acumparado a un home pai de família, que saliu pula manhana cedo a chamar oubreiros pa la sue binha;

² i apuis de fazer l cumben culs oubreiros de le pagar a un denheiro a cada die, mandou-los pa la sue binha.

³ Arrimado a las nuobe de la manhana, saliu de casa i biu outros que stában na praça sien fazer nada

⁴ i dixo-le: “Ide tamien bós pa la mie binha i pagarei-bos l que fur justo.”

⁵ Eilhes, anton, fúrun. Saliu outra beç arrimado a meidie i a las trés de la tarde i fizo la mesma cousa.

⁶ Saliu inda acerca de las cinco de la tarde i achou alhá outros parados i dixo-le: “Porque stais assi to l die sien fazer nada?”

⁷ Eilhes respónden-le: “Porque naide mos chamou.” El dixo-le: “Ide tamien bós pa la binha.”

⁸ Anton quando s’ampeçou a fazer de nuite, l duonho de la binha diç-le al sou alcabuete: “Chama ls oubreiros i dá-le la paga, ampeçando puls redadeiros até als purmeiros.”

⁹ I habendo chegado ls de las cinco de la tarde, recebiu un denheiro cada un.

¹⁰ Anton, quando chegórun ls purmeiros eilhes cuidórun que íban a recebir mais, mas recebírun tamien eilhes un denheiro.

¹¹ I al recebir falában contra l duonho,

¹² dezindo: “Estes últimos fazírun solo ũa hora i eigualeste-los a nós que aguantemos la fuorça i la calor de l die.”

¹³ Mas el, respundendo-le a un deilhes, dixo-le: “Amigo, nun te fago qualquiera oufénsia; nun ye berdade que faziste cumigo l cumben de un denheiro?

¹⁴ Agarra l que ye tou i bai-te ambora. You tamien le quiero dar a este último tanto cumo a ti.

¹⁵ Ou será que nun tengo l dreito de fazer l que me dá la gana culas mies cousas? Acauso l tou uolho ye malo porque you sou buono?”

¹⁶ Assi, ls redadeiros seran purmeiros i ls purmeiros seran redadeiros, porque muitos son ls chamados, mas poucos ls scolhidos.»

Treceiro anúncio de la Paixon i de la Rucerreiçon

¹⁷ Quando iba a chubir para Jarusalen, Jasus agarrou ls doze deciplos daparte i dixo-le pul camino:

¹⁸ «Mirai que bamos a chubir para Jarusalen i l Filho de l Home bai a ser antregue puls xefes de ls saçardotes i ls scribas, ban-lo a cundanar a la muorte

¹⁹ i ban-lo a antregar als gentius para que fágan caçuada del, lo ínchan de baradas i lo curcefíquen, mas al treceiro die rucecitará.»

Ser amo i ser criado

²⁰ Anton, bieno a tener cun el la mai de ls filhos de Zebedeu, cun ls filhos deilha, i botou-se por tierra pa le pedir algo.

²¹ Al que el le dixo: «L que quieres?» Eilha dixo-le: «Arranja modo de, ne l tou reino, estes mius dous filhos se sentáren un a la tue mano dreita i outro a la tue mano squierda.»

²² Jasus respundiu-le, dezindo-le: «Nun sabeis l que stais a pedir; podeis buer l cálece que you tengo de buer?» Eilhes respónden-le: «Podemos.»

²³ El dixo-le a eilhes: «L miu cálece si bubereis, mas nun stá na mie mano que bos séntedes a la mie mano dreita i a la mie mano squierda, puis esse campo ye para quien stá purparado por miu Pai.»

²⁴ Ls outros dieç, quando oubírun, quedórun anrabiados culs dous armanos.

²⁵ Anton, Jasus chamou-los para an pie del i dixo-le: «Sabeis que ls xefes de las naciones mándan neilhas i ls que ténen muito poder fáien sentir esse poder subre eilhas.

²⁶ Nun ha de ser assi antre bós, mas aquel de bós que quejir fazé-se grande, ha de ser buosso criado,

²⁷ i aquel que quejir ser l purmeiro antre bós, será buosso scrabo.

²⁸ De l mesmo modo, l Filho de l Home nun bieno para ser serbido, mas para serbir i dar la sue bida pa la salbaçon de muitos.»

Sana dous ciegos acerca de Jericó

²⁹ I quando se fúrun para Jericó, iba atrás del un grande juntouro de pessonas.

³⁰ Anton, dous ciegos que stában sentados a la borda de l camino oubírun que Jasus staba a passar i boziórun dezindo: «Senhor, ten pena de nós, filho de Dabide.»

³¹ La giente renhie cun eilhes para que se calháran, mas eilhes inda boziában mais, dezindo: «Senhor, ten pena de nós, filho de Dabide!»

³² Jasus parou, chamou-los i dixo-le: «Quei quereis que bos faga?»

³³ Eilhes respónden-le: «Senhor, que s’ábran ls nuossos uolhos.»

³⁴ Cheno de pena deilhes, Jasus topou ne ls uolhos deilhes i lhougo quedórun a ber i fúrun-se atrás del.