Mateus 18 - Eibangeilhos en Mirandês

Quien antre ls deciplos ye l mais grande

¹ Naqueilha mesma hora, ls deciplos achegórun-se al pie de Jasus i dezírun-le: «Quien cuidas que ye l mais grande ne l reino de ls cielos?»

² El chamou un rapazico, puso-lo ne l meio deilhes

³ i dixo: «Quedai bien ciertos de l que bos digo: Se nun demudardes i bos tornardes cumo rapazicos, nun antrareis ne l reino de ls cielos.

⁴ Quien se fazir pequerrixo cumo este garotico, esse ye l mais grande ne l reino de ls cielos.

⁵ I quien recebir un rapazico cumo este an miu nome, ye a mi que me recibe.»

Ls pequerricos nun puoden ser scandelizados nien çpreziados

⁶ «Mas quien scandelizar un destes pequerricos que acradítan an mi, mais le balira que le çpindurássen ũa piedra de molino al cachaço i l botássen al fondo de l mar.

⁷ Ai de l mundo por bias de ls scándalos! Nun hai modo de acabar culs scándalos, mas ai de l home por quien benga l scándalo!

⁸ Se la tue mano ou l tou pie dan scándalo, corta-lo i atira cun el para bien loinge de ti: ye melhor para ti que entres na bida coto ou manco do que seias botado al fuogo eiterno tenendo las dues manos i ls dous pies.

⁹ I se l tou uolho dá scándalo, arrinca-lo i atira cun el para bien loinge de ti: ye melhor que entres na bida cun un uolho solo, do que seias botado al fuogo de ls anfiernos tenendo ls dous uolhos.

¹⁰ Mirai bien, nun zpréziedes un solo destes pequerricos; digo-bos que ls anjos deilhes stan siempre ne l cielo a ber la cara de miu Pai que stá ne ls cielos.

¹¹ Porque l Filho de l Home bieno a salbar l que staba perdido.»

Parábola de la canhona perdida

¹² «Que bos parece? Se ũa pessona tubir cien canhonas i ũa deilhas se perdir, nun deixará las nobenta i nuobe pul campo i se bai a saber de la que se perdiu?

¹³ I se tubir suorte de l’achar, digo-bos you que quedará mais cuntento cun eilha do que culas nobenta i nuobe que nun se perdírun.

¹⁴ Assi, tamien, la buntade de buosso Pai que stá ne ls cielos ye que nun se perda niun destes pequerricos.»

Resolber ls porblemas cun ls armanos

¹⁵ «Se tou armano fazir algo de mal contra ti, agarra-lo daparte, ls dous solicos, i fala cun el. Se el te oubir, tenerás ganho a tou armano.

¹⁶ Mas se nun te oubir, chama inda cuntigo ũa ou dues pessonas para que toda la question quede resolbida delantre de dues ou trés teçtemunhas.

¹⁷ Anton, se el nun las quejir oubir, diç-le al cunceilho; mas se nien al cunceilho quejir dar oubidos, que seia para ti cumo l gentiu i l quebrador de la décima.

¹⁸ Quedai bien ciertos de l que bos digo: Todo l que lhigardes na tierra será lhigado ne l cielo i todo l que çprendirdes na tierra será çprendido ne l cielo.

¹⁹ Digo-bos outra beç: Se dous de bós s’antendíren na tierra subre algo, todo l que pedíren será-le dado por miu Pai que stá ne ls cielos.

²⁰ Porque, adonde stan dous ou trés juntos an miu nome, you stou ende ne l meio deilhes.»

Quantas bezes se dében de perdonar ls pecados

²¹ Anton, achegando-se Pedro dixo-le: «Senhor, quantas bezes miu armano puode pecar contra mi i you tengo que le perdonar? Até siete bezes?»

²² Jasus dixo-le: «Nun te digo até siete bezes, mas até setenta bezes siete.»

Parábola de l credor sien piadade

²³ «Assi, l reino de ls cielos ye acumparado a un home que ye rei i quijo fazer cuontas culs sous criados.

²⁴ I mal ampeçou a fazer cuontas, apersentou-se-le un que le debie dieç mil talentos.

²⁵ Mas cumo nun tubira cun quei pagar, l amo mandou-lo bender a el, a la mulhier i als filhos i a todo quanto tenie, i quedaba pago.

²⁶ Anton l criado, botando-se por tierra, pedie-le, dezindo: “Senhor, ten pacéncia cumigo i todo te pagarei.”

²⁷ Ende, l amo tubo pena de l sou criado i mandou-lo ambora, perdonando-le la díbeda.

²⁸ Quando este criado iba a salir ancuntrou un de ls sous cumpanheiros, que le debie cien denheiros, i agarrando-lo pul cachaço afogaba-lo, dezindo: “Paga l que me debes.”

²⁹ L cumpanheiro del, botando-se por tierra, pedie-le dezindo: “Ten pacéncia cumigo i you te pagarei.”

³⁰ Mas l outro nun quijo, fui-se ambora i metiu-lo na cadena até que pagara la díbeda.

³¹ Al béren tal, ls cumpanheiros del que stában eilhi quedórun mui tristes i fúrun-se a tener cul amo i cuntórun-le todo l que se habie passado.

³² Anton, l amo chamou aquel sou criado i dixo-le: “Criado purberso, perdonei-te toda aqueilha díbeda, porque me pediste;

³³ nun era buono que tamien tu tubiras pena de l tou cumpanheiro, assi cumo you tube pena de ti?”

³⁴ I l amo, mui anrabiado, antregou-se-lo als algozes, até que pagara la díbeda toda.

³⁵ Assi tamien miu Pai de l cielo bos fazerá a bós, se nun perdonardes, cada un a sou armano, culs buossos coraçones.»