Mateus 15 - Eibangeilhos en Mirandês

L que ye ampuro i l que torna un home ampuro

¹ Anton benírun, zde Jarusalen, a tener cun Jasus fariseus i scribas i dezírun-le:

² «Porquei ls tous deciplos nun guárdan las questumes de ls antigos? Eilhes nun lhában las manos quando cómen pan.»

³ Anton el respundiu-le, dezindo: «I bós, porquei nun guardais l mandamento de Dius por bias de la buossa questume?

⁴ Porque Dius dixo: Respeita a tou pai i a tue mai i Quien amaldiçonar l pai ou la mai, debe de ser castigado cula muorte.

⁵ Mas bós dezis: “Quien le dezir al pai ou a la mai: Qualquiera cousa cun que you bos podira ajudar, ye ũa oufierta sagrada,

⁶ nun stará oubrigado a respeitar l pai”; i tirestes-le l balor a la palabra de Dius por bias de la buossa questume.

⁷ Falsos! Bien porfetizou subre bós Eisaías, dezindo:

⁸ Este pobo honra-me cun palabras, mas l coraçon deilhes stá loinge de mi;

⁹ Ye ambalde que me adóran, ansinando doutrinas que son leis de ls homes.»

¹⁰ I chamando l pobo para acerca del, dixo-le: «Oubi i antendei:

¹¹ Nun ye l que entra pula boca que fai un home ampuro, mas l que sal de la boca, esso si torna un home ampuro!»

¹² Apuis, ls deciplos achegórun-se a el i dezírun-le: «Queda sabendo que ls fariseus, quando oubírun las tues palabras, quedórun scandelizados.»

¹³ Mas el respundiu-le dezindo: «Qualquiera arble que miu Pai celhestre nun puso, será arrincada.

¹⁴ Deixai-los: son ciegos guias de ciegos. I se un ciego guia outro ciego, dambos a dous s’ambolcaran para ũa fóia.»

¹⁵ Anton, Pedro respundiu-le, dezindo: «Splica-mos essa parábola.»

¹⁶ Mas el dixo-le: «Tamien bós stais sien antendimiento?

¹⁷ Nun antendeis que las cousas que éntran pula boca, ban pa la barriga i sálen a campo nun sítio scundido?

¹⁸ Mas las cousas que sálen de la boca, bénen de l coraçon i eilhas fáien un home ampuro.

¹⁹ Porque ye de l coraçon que sálen ls malos pensamientos, las muortes, ls adultérios, ls anganhos, ls roubos, ls falsos teçtemunhos, las malas palabras.

²⁰ Estas son las cousas que fáien un home ampuro, mas quemer culas manos por lhabar nun fai un home ampuro.»

Pedido de la mulhier cananeia

²¹ Jasus, salindo deilhi, fui-se pa ls lhados de Tiro i de Sidónia.

²² Anton, ũa mulhier cananeia, benida daquel termo, ampeçou a boziar dezindo: «Tenei piadade de mi, Senhor, Filho de Dabide: la mie filha stá mui mal, atermentada por un demonho.»

²³ Mas el nun le respundiu nien ui nien ai. Ls deciplos, achegando-se a el, pedien-le, dezindo: «Çpacha-la, que ben a boziar atrás de nós.»

²⁴ El, anton, respundiu-le, dezindo: «You nun fui ambiado a nun ser pa las canhonas que se perdírun de la casa d’Eisrael.»

²⁵ Mas eilha bieno i botou-se por tierra delantre del, dezindo: «Senhor, balei-me!»

²⁶ El respundiu-le: «Nun ye cousa buona tirá-le l pan als filhos i botá-se-lo als perros.»

²⁷ Mas eilha dixo-le: «Mas, Senhor, tamien ls perricos cómen las forfalhas que se cáien de la mesa de ls sous duonhos.»

²⁸ Anton, respundendo-le, Jasus dixo-le: «Á mulhier, grande ye la tue fé! Faga-se tal i qual cumo tu quieres.» I zde aqueilha mesma hora, la filha deilha quedou sana.

Muitos malos son curados

²⁹ Jasus saliu daqueilha tierra i fui-se para acerca l mar de la Galileia. Chubiu-se a un cabeço i sentou-se alhá.

³⁰ I benírun a tener cun el grandes juntouros de pessonas que traien cun eilhas tolhidos, ciegos, mancos, tatos i mais que you sei alhá i atirórun cun eilhes als pies del i sanou-los.

³¹ De modo que todos quedában admirados al ber ls tatos a falar, ls mancos sanos, ls tolhidos a andar i ls ciegos a ber. I dában grácias al Dius d’Eisrael.

Son fartadas quatro mil pessonas

³² Jasus, apuis, chamou ls sous deciplos i dixo-le: «Tengo pena desta giente, porque yá trés dies que ándan atrás de mi i nien raça ténen de quemer; i nun ls quiero ampuntar an ayunas, nun le baia a dar ũa fraqueza pul camino.»

³³ Dízen-le, anton, ls deciplos: «Adonde bamos a saber de pan, ne l zerto, que chegue pa le matar la fame a tanta giente?»

³⁴ Dixo-le Jasus: «Quantas fogaças teneis?» Eilhes respundírun-le: «Siete i alguns peixicos.»

³⁵ I dou-le orde a la giente pa que se sentara na tierra.

³⁶ Apuis, agarrou las sietes fogaças i ls peixes, agradeciu, partiu-los i dou-se-los als deciplos i ls deciplos al pobo.

³⁷ Quemírun todos até quedáren fartos i culs cachos que sobrórun anchírun siete cestas.

³⁸ Ls que quemírun éran quatro mil homes, sien cuntar cun mulhieres i garotos.

³⁹ Apuis de mandar ambora aquel juntouro de giente, chubiu-se nun barquito i fui-se pa l termo de Magadan.