Mateus 14 - Eibangeilhos en Mirandês

L que Harodes oubiu subre Jasus. Córtan-le la cabeça a Juan Batista

¹ Naquel tiempo, l tetrarca Harodes oubiu falar de la fama de Jasus

² i dixo-le als sous criados: «Este ye Juan Batista; el rucecitou de ls muortos i, assi, ls milagres óbran nel.»

³ Ye berdade que Harodes prendiu a Juan, atou-lo cun fierros i atirou cun el pa la cadena por bias de Harodías mulhier de Felipe, armano del.

⁴ Todo porque Juan le dezie: «Nun stá cierto que la tengas para ti.»

⁵ El bien l querie matar, mas tubo miedo de l pobo que lo tenie na cuonta de porfeta.

⁶ Anton, ne l die an que Harodes fizo anhos, la filha de Harodías beilou ne l meio la fiesta i Harodes gustou.

⁷ Ende, jurou que le darie todo l que le pedisse.

⁸ I eilha, lhucitada pula mai, dixo-le: «Dá-me eiqui, nun prato, la cabeça de Juan Batista.»

⁹ L rei quedou triste, mas por bias de la jura i de ls que stában a cenar cun el, dou orde

¹⁰ i mandou-le cortar l caçacho a Juan na cadena.

¹¹ I traírun la cabeça del nun prato i dórun-se-la a la rapaza que se l’antregou a la mai deilha.

¹² Anton, benírun ls deciplos del, agarrórun l cuorpo i anterrórun-lo. Apuis benírun-le a dar la nobidade a Jasus.

Jasus dá-le de quemer a cinco mil pessonas

¹³ Jasus, quando oubiu l que se passara, saliu deilhi nun barquito para un sítio zerto i apartado. Mas, quando l soubírun, las multidones fúrun-se atrás del a pie zde las cidades.

¹⁴ I habendo zambarcado, biu un grande juntouro de pessonas i tubo muita pena deilhas sanando aqueilhes que stában malos.

¹⁵ Yá pula tardica, ls deciplos achegórun-se an pie del dezindo-le: «L sítio ye zerto i yá se stá a fazer tarde; manda las pessonas ambora para que se báian pulas aldés a mercar de quemer para eilhas.»

¹⁶ Mas Jasus dixo-le: «Nun ténen percison de ir; dai-le bós a quemer.»

¹⁷ Eilhes, anton, dezírun-Le: «Nun tenemos eiqui a nun ser cinco panes i dous peixes.»

¹⁸ Al que el le respundiu: «Traei-me-los acá.»

¹⁹ I apuis de mandar sentar las pessonas na yerba, agarrou ls cinco panes i ls dous peixes, mirou pa l cielo, beneziu ls panes, partiu-los i dou-se-los als deciplos i estes dórun-se-los a las pessonas.

²⁰ Todos quemírun i quedórun fartos i culs cachos de las sobras anchírun doze cestos.

²¹ Ora, ls que quemírun fúrun alredror de cinco mil homes, sien cuntar mulhieres i garoticos.

Jasus anda porriba l mar

²² I lhougo mandou ls deciplos chubir pa l barquito i que fúran delantre del pa la outra borda, anquanto mandaba las pessonas ambora.

²³ I apuis de haber mandado las pessonas ambora, chubiu el solico a un cabeço para rezar. Quando se fizo de nuite staba eilhi el solico.

²⁴ Nesse antretiempo, l barquito yá staba mui loinge de tierra, ampurrado pulas óndias, pus l aire era cuntrairo.

²⁵ Ende pula quarta dúnia de la nuite, bieno a tener cun eilhes caminando porriba l mar.

²⁶ Anton, ls deciplos, al bé-lo a andar porriba l mar, assustórun-se, dezindo: «Ye ũa pantasma» i gritórun de miedo.

²⁷ Mas nistante Jasus falou cun eilhes, dezindo-le: «Tenei cunfiança, sou you; nun téngades miedo.»

²⁸ Pedro respundiu-le, dezindo-le: «Senhor, se sós tu, manda-me a tener cuntigo porriba l’auga.»

²⁹ I el dixo-le: «Ben.» I, abaixando-se de l barquito, Pedro andubo porriba l’auga i fui-se a tener cun Jasus.

³⁰ Mas al ber un aire tan fuorte tubo miedo i, ampeçando-se a ir al fondo, boziou dezindo: «Senhor, salbai-me!»

³¹ Ende, Jasus lhougo le stendiu la mano, agarrou-lo i dixo-le: «Home de pouca fé, porque dubideste?»

³² I mal apenas antrórun pa l barquito l aire serenou.

³³ Anton, ls que stában ne l barquito adorórun-lo dezindo: «Sós de berdade l Filho de Dius!»

Cura de ls amalinados an Genezaré

³⁴ Apuis de habéren atrabessado pa l outro lhado, benírun pa la tierra de Genezaré.

³⁵ Quando las pessonas daqueilha tierra l coincírun, mandórun rezon para todos aqueilhes alredores i traírun-le todos ls que tenien algun mal,

³⁶ i pedien-le que ls deixara topar al menos la franja de l sou manto. I todos ls que alhá topórun, quedórun sanos.