Mateus 13 - Eibangeilhos en Mirandês

Sermon de l Reino de ls Cielos. Parábola de l sembrador

¹ Naquel die, habendo salido de casa, Jasus staba sentado acerca l mar.

² Ajuntou-se alredror del tanta giente que tubo de se chubir para un barquito i sentá-se alhá anquanto todo aquel juntouro de giente quedaba na borda.

³ Anton, falou-le de muita cousa an parábolas, dezindo-le: «L sembrador saliu para sembrar.

⁴ Anquanto sembraba, ũas semientes aparórun acerca l camino, benírun ls páixaros i quemírun-las.

⁵ Outras aparórun an xeixagales adonde nun habie muita tierra i lhougo nacírun porque nun tenien porriba muita altura de tierra.

⁶ Mas mal apenas naciu l sol abranórun-se i, cumo nun tenien raiç, secórun-se.

⁷ Outras aparórun ne l meio de gatunhas i, al crecer, las gatunhas abafórun la semiente.

⁸ Mas outra semiente caiu an tierra buona i dou grano: ũa a cien, outra a sessenta i outra a trinta cada ũa.

⁹ Quien tubir oubidos para oubir, ouba.»

Porquei Jasus falaba por parábolas

¹⁰ Apuis, achegórun-se ls deciplos i dezírun-le: «Porque falas cun eilhes an parábolas?»

¹¹ Dixo-le an repuosta: «Porque a bós fui-bos dado coincer ls mistérios de l reino de ls cielos, mas a eilhes nó.

¹² Porque al que ten será-le dado i tenerá inda mais; mas al que nun ten, até l que ten le será tirado.

¹³ Ye por essa rezon que falo cun eilhes an parábolas, porque míran i nun béien i scúitan mas nun óuben nien anténden.

¹⁴ Cumpre-se neilhes la porfecie de Eisaías quando dixo: Oubir si oubireis, mas nun antendereis; mirar si mirareis, mas nun bereis.

¹⁵ Porque l coraçon desta giente quedou sien sentimientos i duros ls sous oubidos, cerrórun ls sous uolhos para nun tenéren que ber culs uolhos, oubir culs oubidos, antender cul coraçon i se cumbírtan para que you ls sane.

¹⁶ Felizes ls buossos uolhos porque béien i ls buossos oubidos porque óuben.

¹⁷ Tomai tento ne l que bos digo: Muitos porfetas i justos quejírun ber l que bedes i nun bírun, oubir l que oubis i nun oubírun.»

Splicaçon de la parábola de l sembrador

¹⁸ «Mas bós scuitai la parábola de l sembrador:

¹⁹ Quando ũa pessona oube la palabra de l reino i nun antende, ben l diabro i rouba l que fui sembrado ne l sou coraçon. Este ye l que fui sembrado a la borda de l camino.

²⁰ L que fui sembrado nun xeixagal, esse ye l que scuita la palabra i lhougo la aceita cun alegrie,

²¹ mas cumo nun ten raiç andrento del ye de pouca dura: se fur atermentado ou perseguido por bias de la palabra lhougo se bai abaixo.

²² L que fui sembrado ne l meio de gatunhas, esse ye l que oube la palabra, mas ls cuidados deste mundo i la ganáncia de riquezas abáfan la palabra que, assi, nun puode granar.

²³ L que fui sembrado an buona tierra, esse ye l que scuita la palabra, la antende i dá grano, dando ũas bezes a cien, outras a sessenta i outras a trinta.»

Parábola de l jólio

²⁴ Aperpuso-le outra parábola, dezindo: «L reino de ls cielos ye acumparado a un home que sembrou buona semiente na sue tierra.

²⁵ Mas anquanto las pessonas stában a drumir bieno l einemigo del, sembrou jólio pul meio de l trigo i fui-se ambora.

²⁶ Quando las yerbeiras crecírun i botórun spiga tamien apareciu l jólio.

²⁷ Anton, ls criados fúrun-se a saber de l amo i dezírun-le: “Senhor, acauso nun sembreste buona semiente na tue tierra? Anton, d’adonde ben l jólio?”

²⁸ El respundiu-le: “Fui un home einemigo que l sembrou.” Ls criados dezírun-le, anton: “Quereis que báiamos alhá a arrincá-lo?”

²⁹ El respundiu-le: “Nó, nun se deia l causo de al arrincar l jólio arrínquedes l trigo al mesmo tiempo.

³⁰ Deixai-los crecer a dambos a dous até la segada. Quando chegar la segada dezirei-le als segadores: Segai purmeiro l jólio, atai-lo an manolhos pa l queimar; mas l trigo arrecolei-lo ne l miu celeiro.”»

Parábola de l grano de mostarda

³¹ Aperpuso-le outra parábola, dezindo-le: «L reino de ls cielos ye acumparado a un grano de mostarda que un home agarrou i sembrou na sue tierra.

³² Anque esta seia la mais pequeinha de todas las semientes, quando crece queda mais grande que to las cousas de la huorta. I fai-se arble de modo que ls páixaros de l cielo bénen i aniálan ne ls sous galhos.»

Parábola de l furmiento

³³ Cuntou-le inda outra parábola: «L reino de ls cielos ye acumparado al furmiento que ũa mulhier agarra i ambuolbe an trés partes de farina até que queda toda lhiebeda.»

La rezon de las parábolas

³⁴ Todas estas cousas dixo Jasus an parábolas als grandes juntouros de pessonas i nun falaba cun eilhas sien ser por parábolas

³⁵ para que se cumprira l que fura dezido pul porfeta, que dixo: Abrirei la mie boca an parábolas, amostrarei cousas scundidas zde la criaçon de l mundo.

Splicaçon de la parábola de l jólio

³⁶ Anton, apuis de deixar ls grandes juntouros de pessonas, Jasus fui-se para casa. Ls deciplos achegórun-se an pie del i dezírun-le: «Splica-mos la parábola de la tierra de jólio.»

³⁷ Jasus respundiu-le, dezindo: «Quien sembra la buona semiente ye l Filho de l Home.

³⁸ La tierra ye l mundo. La buona semiente son ls filhos de l Reino i l jólio son ls filhos de l mal.

³⁹ L einemigo que sembrou l jólio ye l diabro. La segada ye la fin de l mundo i ls segadores son ls anjos.

⁴⁰ Tal cumo l jólio ye arrecolhido i queimado pul fuogo, assi será na fin de l mundo:

⁴¹ l Filho de l Home ambiará ls sous anjos i arrecolheran de l sou reino todos ls scandalosos i ls que fáien l mal

⁴² i botaran-los na fornalha de fuogo. Ende haberá choro i terrincar de dientes.

⁴³ Anton, ls justos relhuziran cumo l sol ne l reino de l Pai deilhes. Quien ten oubidos, ouba.»

Parábola de l tesouro scundido i la perla achada

⁴⁴ «L reino de ls cielos ye acumparado a un tesouro scundido na tierra que l home que lo achou tornou a scunder. Mui cuntento, bai, bende todo l que ten i compra aqueilha tierra.

⁴⁵ L reino de ls cielos tamien ye acumparado a un negociante que busca buonas perlas.

⁴⁶ Habendo achado ũa perla speciosa, bai, bende todo l que ten i compra-la.»

Parábola de las redes botadas al mar

⁴⁷ «L reino de ls cielos ye tamien acumparado a las redes botadas al mar que agárran peixe de toda la culidade.

⁴⁸ Quando stan chenas púxan-las i séntan-se na praia a scolher ls buonos para ũa canastra i a botar ls malos pa la rue.

⁴⁹ Assi será na fin de l mundo: beniran ls anjos i apartaran ls malos de l meio de ls justos

⁵⁰ i atiraran cun eilhes pa la fornalha de fuogo. Ende haberá choro i terrincar de dientes.»

Cunclusion de l sermon de l Reino de ls Cielos

⁵¹ «Antendistes todas estas cousas?» Eilhes respundírun-Le: «Si, Senhor.»

⁵² Dixo-le, anton: «Assi, todo l scriba sabido ne l reino de ls cielos ye aparecido a un pai de família que tira de la arca cousas nuobas i bielhas.»

Outros feitos i dezires. Ansino de ls deciplos. Jasus nun ye respeitado na sue tierra

⁵³ I mal apenas Jasus acabou estas parábolas, fui-se ambora deilhi

⁵⁴ pa la sue tierra i ende ansinaba-los na sinagoga deilhes, de modo que quedában admirados i dezien: «D’adonde le bieno a este tanta sabedorie i tales bertudes?

⁵⁵ Anton este nun ye l filho de l carpinteiro? Nun le cháman a la mai Marie i als armanos Tiago, Jesé, Simon i Judas?

⁵⁶ I las armanas del nun móran todas an pie de nós? D’adonde le bénen, anton, todas estas cousas?»

⁵⁷ I quedában scandelizados cun el. Jasus, anton, dixo-le: «Nun hai un porfeta sien respeito a nun ser na sue tierra i antre la sue giente.»

⁵⁸ I nun fizo eilhi muito milagre por bias de la falta de fé deilhes.