Mateus 11 - Eibangeilhos en Mirandês

¹ Quando acabou de le dar estes recados als sous doze deciplos, Jasus saliu deilhi para ir a ansinar i a pregar nas cidades daqueilha region.

Las oupeniones subre Jasus ampéçan-se a debedir. Ambaixada de Juan a Jasus

² Mas Juan, quando oubiu na cadena ls feitos de Cristo, mandou-le ls sous deciplos a preguntá-le:

³ «Tu sós aquel que ha de benir ou tenemos que asperar outro?»

⁴ I Jasus, respundendo, dixo-le: «Ide-le a cuntar a Juan l que oubis i l que bedes:

⁵ ls ciegos béien, ls tolhidos ándan, ls gafos quédan lhímpios, ls xordos óuben, ls muortos rucecítan i als probes ye le anunciado l Eibangeilho.

⁶ Feliç daquel que nun quedar scandelizado por bias de mi.»

Oupenion de Jasus subre Juan

⁷ Quando eilhes se fúrun ambora, Jasus ampeçou-le a falar de Juan al pobo: «L que fustes a ber al zerto? Ũa canha abanada pul aire?

⁸ Mas, anton, l que fustes a ber? Un home bien bestido? Mirai que ls bien bestidos stan nas casas de ls reis.

⁹ Mas l quei, anton, fustes a ber? Un porfeta? Si, digo-bos-lo you que ye bien mais do que porfeta.

¹⁰ Este ye aquel de quien stá screbido: Mira que mando l miu mensageiro delantre de ti para purparar l tou camino antes de chegares.

¹¹ Quedai bien ciertos de l que bos digo: Antre ls nacidos de mulhier, nun apareciu naide que seia mais grande do que Juan Batista; assi i todo, l que fur l mais pequerrixo ne l reino de ls cielos, ye mais grande do que el.

¹² Porque zde ls dies de Juan Batista até agora l reino de ls cielos ten sido atacado i ls que se bálen de la fuorça quieren-lo cunquistar.

¹³ Todos ls porfetas i la lei até Juan porfetizórun.

¹⁴ Se quereis antender, el mesmo ye Eilias, l que staba para benir.

¹⁵ Quien ten oubidos, que ouba.

¹⁶ A quien hei-de acumparar esta giraçon? Ye acumparada a rapazicos sentados al meio la praça, que le bózian als cumpanheiros,

¹⁷ dezindo: “Toquemos fraita para bós i nun beilestes; cantemos cousas tristes i nun chorestes.”

¹⁸ Ende, bieno Juan, que nun quemie nien buie, i dízen: “Ten l diabro ne cuorpo.”

¹⁹ Bieno l Filho de l Home, que come i bebe, i dízen: “Mirai, ye un home que come bien i bebe melhor, amigo de ls quebradores de la décima i de ls pecadores.” Mas la sabedorie amostrou-se puls feitos del.»

Zgraciadas las cidades de la Galileia

²⁰ Apuis ampeçou-le a botar an cara a las cidades adonde fúrun feitos muitos de ls milagres del, que nun habien feito peniténcia:

²¹ «Ai de ti, Corazin! Ai de ti, Betsaida! Porque se an Tiro i an Sidónia fúran feitos ls milagres que fúrun feitos an bós, yá dies ha que haberien feito peniténcia cun saco i cinza.

²² Por essa rezon bos digo: Ne die de l Juízo, Tiro i Sidónia seran menos maltratadas do que bós.

²³ I tu, Cafarnaún, acauso quedarás tan alta cumo l cielo? Serás rebaixada até las perfundas de ls einfiernos! Porque se nas pessonas de Sodoma houbíran sido feitos ls milagres que fúrun feitos an ti, haberien durado até hoije.

²⁴ Por essa rezon bos digo: Ne die de l Juízo, Sodoma será menos maltratada do que tu.»

Jasus lhouba l Pai

²⁵ Naquel tiempo, Jasus, respundendo, dixo: «You te lhoubo, á Pai, Senhor de l cielo i de la tierra, que scundiste estas cousas als sabidos i als antendidos i las amostreste als pequerricos.

²⁶ Si, á Pai, porque assi te dou la gana.

²⁷ Todas las cousas me fúrun antregues por miu Pai i naide conhece l Filho a nun ser l Pai nien quien conheça l Pai a nun ser l Filho i a quien l Filho se lo quejir amostrar.»

L peso lhebe de Jasus

²⁸ «Beni a mi todos bós ls que trabalhais i sodes oupremidos i you bos darei alíbio.

²⁹ Ponei la mie carga anriba de bós i daprendei de mi que sou manso i houmilde de coraçon i achareis çcanso pa las buossas almas,

³⁰ porque la mie carga ye suable i l miu peso ye lhebe.»