Mateus 10 - Eibangeilhos en Mirandês

Nomes de ls apóstelos

¹ Apuis de chamar ls sous doze deciplos, Jasus dou-le l poder de botáren pa la rue ls spritos malos i de sanáren qualquiera fraqueza i qualquiera malina.

² Estes son ls nomes de ls doze apóstelos: l purmeiro ye Simon, que le cháman Pedro, i Andrés, armano del;

³ Tiago, filho de Zebedeu, i Juan, armano del; Felipe i Burtelameu; Tomé i Mateus, quebrador de la décima; Tiago, filho de Alfeu, i Tadeu;

⁴ Simon, l Cananeu, i Judas Scariotes, aquel que l atraiçonou.

Mission de ls apóstelos

⁵ Jasus mandou estes doze deciplos i dou-le ourientaçones, dezindo-le: «Nun báiades pul camino de ls gentius i nun éntredes nas cidades de ls samaritanos.

⁶ An purmeiro, ide a las canhonas que se perdírun de la casa d’Eisrael.

⁷ Pul camino apergonai, dezindo: “L reino de ls cielos stá acerca.”

⁸ Sanai ls que stan malos, rucecitai ls muortos, lhimpai ls lheprosos, botai ls demonhos para fuora. Recebistes de grácia, dai tamien de grácia.

⁹ Nun quérgades tener nien ouro, nien prata, nien riquezas ne ls buossos bolsos,

¹⁰ nien cerron pa l camino, nien dues capas, nien çapatos, nien choupa, porque l oubreiro merece l sou quemido.

¹¹ An qualquiera cidade ou lhugarico adonde antrardes, preguntai quien nesse sítio ye pessona de cunfiança i quedai ende até que bos báiades ambora.

¹² I, al antrar na casa, saludai-la.

¹³ Se essa fur, de berdade, ũa casa de giente séria, la buossa paç benirá par’eilha; mas se nun fur séria, la buossa paç tornará para bós.

¹⁴ I quienquiera que nun bos reciba nien ouba las buossas palabras, al salir de casa del ou dessa cidade, sacudi l puolo de ls buossos pies.

¹⁵ Afianço-bos que ne l die de l Juízo ls de la tierra de Sodoma i Gomorra nun seran tan maltratados cumo ls daqueilha cidade.»

L teçtemunho delantre de ls homes

¹⁶ «Mirai que bos mando cumo canhonas pa l meio de lhobos. Anton, séiades cuidadosos cumo las serpientes i hounestos cumo las palombas.

¹⁷ Mas tenei cuidado culas pessonas, porque bos antregaran als cunceilhos i bos eiran a çurrar nas sinagogas deilhes;

¹⁸ i, por bias de mi, ban-bos a lhebar delantre ls gobernadores i ls reis para dardes teçtemunho delantre deilhes i de ls gentius.

¹⁹ Mas, quando bos antregáren, nun quédedes a pensar an cumo ou l quei heis de dezir, porque nessa hora será-bos ansinado l quei dezir.

²⁰ Porque nun sodes bós que falais, mas l Sprito de buosso Pai que fala an bós.

²¹ Nessa altura, un armano ha de antregar outro armano a la muorte, i l pai al filho, i ls filhos ban-se a alhebantar contra ls pais i fazeran cun que los máten.

²² I todos bos teneran rábia por bias de l miu nome; mas l que s’aguantar até la fin, esse será salbo.

²³ Quando bos perseguíren nũa cidade, scapai-bos para outra; tan cierto cumo bos l digo que nun acabareis las cidades d’Eisrael até que benga l Filho de l Home.

²⁴ L deciplo nun stá arriba de l mestre, nien l criado arriba de l amo.

²⁵ Bonda-le al deciplo que seia cumo l mestre del i al criado que seia cumo l amo del. Se até al Pai de família le chamórun Satanás, aquantas mais als de la sue casa!

²⁶ Anton, nun téngades miedo deilhes, puis nun hai nada que steia a las scuras que nun quede a las claras i nun hai nada scundido que nun se benga a saber.

²⁷ L que bos digo a las scuras dezi-lo a la lhuç de l die i l que scuitais an segredo apregonai-lo d’anriba ls telhados.

²⁸ Nun téngades miedo de ls que mátan l cuorpo, mas nun puoden matar l’alma. Tenei subretodo miedo daquel que puode botar a perder l’alma i l cuorpo ne l einfierno.

²⁹ Acauso nun se bénden dous paixaricos por ũa pequeinha moneda? Mas nien un deilhes se cairá por tierra se l buosso Pai nun quejir.

³⁰ Ne l que bos toca a bós, até todos ls pelos de la buossa cabeça stan cuntados.

³¹ Anton, nun téngades miedo puis bós baleis mais que muitos paixaricos.

³² Aquel que dir teçtemunho de mi delantre las pessonas, tamien you darei teçtemunho del delantre miu Pai que stá ne l cielo.

³³ Aquel que me negar delantre las pessonas, tamien you l negarei delantre miu Pai que stá ne l cielo.

³⁴ Nun cúidedes que you bin a traier la paç al mundo. You nun bin a traier la paç, mas la spada.

³⁵ Porque you bin a apartar l filho de l pai, la filha de la mai, la nuora de la suogra,

³⁶ de modo que ls einemigos dũa pessona seran ls de la sue família.

³⁷ Quien gusta de l pai ou de la mai mais do que de mi, nun ye dino de mi; quien gusta de l filho ou de la filha mais do que de mi, nun ye dino de mi.

³⁸ I quien nun lhebar la sue cruç i benir atrás de mi, nun ye dino de mi.

³⁹ L que cunserba la sue bida, perderá-la i l que perdir la sue bida por bias de mi, achará-la.»

L acolhimiento i la recumpensa de ls deciplos

⁴⁰ «Quien bos recibe ye a mi que me recibe i quien me recibe a mi recibe aquel que me mandou.

⁴¹ Quien recibe un porfeta por bias de ser porfeta, recebirá l galardon de porfeta, i quien recibe un justo por bias de ser justo, recebirá l galardon de justo.

⁴² I quien dir, nien que seia solo un copo d’auga fresca, a buer a un destes mais pequeinhos, por bias de ser miu deciplo, quedai ciertos de l que bos digo, nun perderá l sou galardon.»