Mateus 1 - Eibangeilhos en Mirandês

L’OURIGE I LA NINEÇ DE JASUS Genealogie de Jasus

¹ Lhibro de l’ourige de Jasus Cristo, filho de Dabide, filho de Abraan.

² Abraan fui l pai d’Eisaac, Eisaac fui l pai de Jacó, i Jacó fui l pai de Judá i de sous armanos.

³ Judá, de Tamar, tubo a Farés i a Zara, Farés fui l pai de Esron, Esron fui l pai de Aran.

⁴ Aran fui l pai de Aminabade, Aminabade fui l pai de Naaçon, Naaçon fui l pai de Salmon.

⁵ Salmon, de Raabe, tubo a Booç, Booç, de Rute, tubo a Oubede, Oubede fui l pai de Jessé, Jessé fui l pai de l rei Dabide.

⁶ L rei Dabide, de la mulhier de Ourias, fui l pai de Salomon.

⁷ Salomon fui l pai de Roboan, Roboan fui l pai de Abias, Abias fui l pai de Asa.

⁸ Asa fui l pai de Josafate, Josafate fui l pai de Joran, Joran fui l pai de Ouzias.

⁹ Ouzias fui l pai Joatan, Joatan fui l pai de Acaç, Acaç fui l pai de Eizequias.

¹⁰ Eizequias fui l pai de Manassés, Manassés fui l pai de Amon, Amon fui l pai de Josias.

¹¹ Josias fui l pai de Jeconias i de sous armanos, al tiempo de l çterro para Babilónia.

¹² Apuis de l çterro para Babilónia, Jeconias fui l pai de Salatiel i Salatiel fui l pai de Zorobabel.

¹³ Zorobabel fui l pai de Abiude, Abiude fui l pai de Eiliaquin, Eiliaquin fui l pai de Azor.

¹⁴ Azor fui l pai de Sadoc, Sadoc fui l pai de Aquin, Aquin fui l pai de Eiliude.

¹⁵ Eiliude fui l pai de Eileazar, Eileazar fui l pai de Matan, Matan fui l pai de Jacó.

¹⁶ Jacó fui l pai de Jesé, home de Marie que tubo a Jasus, que le cháman Cristo.

¹⁷ Assi, son catorze giraçones zde Abraan até Dabide, catorze giraçones zde Dabide até al çterro para Babilónia i zde l çterro para Babilónia até Cristo outras catorze.

Nacimiento de Jasus

¹⁸ Anton, l nacimiento de Cristo fui assi: Marie, la mai del, era moça de Jesé i antes que stubíran a morar juntos eilha sentiu que staba preinha de l Sprito Santo.

¹⁹ Jesé, l home deilha, cumo era justo i nun la querie çfamar, resolbiu deixá-la sien que naide se dira de cuonta.

²⁰ Andaba el cun esta matacion i apareciu-le un anjo de l Senhor an suonhos, dezindo-le: «Jesé, filho de Dabide, nun tengas miedo de recebir a Marie, tue mulhier, puis l que neilha se girou ye cousa de l Sprito Santo.

²¹ Eilha bai a parir un filho i bás-le a poner l nome de Jasus, puis el salbará l sou pobo de ls pecados.»

²² Todo se passou assi pa que se cumprira l que dezira l Senhor pul porfeta:

²³ Quedai sabendo que ũa birge quedará preinha i parirá un filho i poneran-le l nome de Eimanuel, que quier dezir Dius stá cun nós.

²⁴ Quando Jesé spertou, fizo tal i qual cumo le habie mandado l anjo de l Senhor i aceitou la sue mulhier.

²⁵ I, sien que antes tubira drumido cun eilha, tubo un filho i puso-le l nome de Jasus.