Marcos 8 - Eibangeilhos en Mirandês

Dá-le de quemer a quatro mil pessonas

¹ Por aqueilhes dies, cumo fura mui grande l juntouro de pessonas i nun tubíran de quemer, chamou ls deciplos i dixo-le:

² «Tengo pena desta giente, puis yá trés dies que m’acumpánhan i nien ténen de quemer;

³ se you ls ampuntar para casa an ayunas, ban a çfalhecer pul camino, porque hai giente que bieno de loinge.»

⁴ Respundírun-le ls deciplos del: «I adonde ye que un puode fartá-los de pan, neste ermo?»

⁵ El, assi i todo, preguntou-le: «Quantas fogaças teneis?» Eilhes respundírun-le: «Siete.»

⁶ Mandou-le a aqueilha giente toda que se sentasse na tierra; adepuis, agarrando las siete fogaças i dando grácias, partie-las, daba-se-las als sous deciplos pa que las çtribuíran i eilhes dórun-se-las a las pessonas.

⁷ Tenien tamien uns pouquitos de peixicos; el beneziu-los i mandou-se-los dar tamien a las pessonas.

⁸ Todos quemírun até fartar i ajuntórun l que sobrou i anchírun siete cestas.

⁹ Al todo éran arrimado a quatro mil. Apuis mandou-los ambora,

¹⁰ chubiu-se mui debrebe nũa barca i fui-se culs sous deciplos pa ls lhados de Dalmanuta.

Nun será dada ũa seinha

¹¹ Aparecírun ls fariseus i ampeçórun a çcutir cun el, pedindo-le ũa seinha de l cielo, solo pa l atentáren.

¹² Arrebolhiçou-se-le la cabeça i dixo-le: «Porquei pide esta giraçon ũa seinha? Quedai bien ciertos de l que bos digo: Nun le será dada niũa seinha a esta giraçon.»

¹³ Apuis deixou-los, chubiu-se outra beç na barca i fui-se pa l outro lhado.

Cuidado cul furmiento de ls fariseus i de Harodes

¹⁴ Eilhes squecírun-se de lhebar l pan i nun tenien cun eilhes ne l barco mais do que ũa fogaça.

¹⁵ El daba-le cunseilho, dezindo-le: «Mirai, acoutelai-bos cul furmiento de ls fariseus i cul furmiento de Harodes.»

¹⁶ I çcutien uns culs outros por nun tenéren pan.

¹⁷ El mal apenas se dou de cuonta, dixo-le: «Que stais par’ende a çcutir por nun tenerdes pan? Será que nun antendeis nien puxais pula cabeça? Teneis l buosso coraçon ciego?

¹⁸ Teneis uolhos i nun bedes i teneis oubidos i nun oubis? Yá nun bos lhembrais

¹⁹ de quando parti las cinco fogaças para cinco mil i quanto cesto cheno de carolos arrecolhistes?» I eilhes respónden-le: «Doze.»

²⁰ «I de quando parti las siete fogaças para cinco mil, quanto cesto cheno de carolos arrecolhistes?» Eilhes respónden-le: «Siete.»

²¹ I dezie-le: «Inda nun antendistes?»

An Betsaida ye sanado un ciego

²² Chégan a Betsaida. Ende tráien-le un ciego i píden-le que tope nel.

²³ El agarrou-le la mano al ciego i lhebou-lo para fuora de l lhugar. Apuis, cuçpiu-le ne ls uolhos, puso-le las manos porriba i preguntou-le: «Bés algo?»

²⁴ El arregalaba ls uolhos i dezie: «Beio homes, beio-los a andar a modo arbles.»

²⁵ A seguir tornou a poner outra beç las manos porriba ls uolhos del i ampeçou a ber quedando curado, de modo que bie todo bien claro.

²⁶ Apuis mandou-lo para casa del, dezindo-le: «Nien t’atentes sequiera a antrar ne l lhugar.»

PUL CAMINO DE JARUSALEN Cunfisson de Pedro

²⁷ Fui-se Jasus culs sous deciplos pa las aldés de Cesareia de Felipe i, anquanto íban pul camino, preguntaba-le als sous deciplos: «Las pessonas quien dízen que sou you?»

²⁸ Eilhes respundírun-le: «Juan Batista, outros Eilias i outros un de ls porfetas.»

²⁹ Adepuis, preguntou-le a eilhes: «I bós quien dezis que sou you?» Respundiu-le Pedro, dezindo: «Tu sós l Cristo.»

³⁰ Anton, dou-le orde para que nun le dezíran nada a naide a respeito del.

Purmeiro anúncio de la Paixon i de la Rucerreiçon

³¹ Ampeçou-le a ansinar: «Ye neçairo que l Filho de l Home benga a padecer muita cousa i que seia cundanado puls mais bielhos i ls puls xefes de ls saçardotes i puls scribas, que seia muorto i que rucecite trés dies apuis.»

³² El falaba-le de modo mui çclarado. Anton Pedro, agarrando-lo d’aparte, ampeçou a renher cun el.

³³ Bolbendo-se i mirando pa ls sous deciplos, renhiu cun Pedro, dezindo-le: «Sal-me delantre, Satanás, puis nun dás aprécio a las cousas que son de Dius, mas solo a las que son de ls homes.»

L deciplo de Jasus debe de lhebar la sue cruç

³⁴ Apuis chamou toda la giente i ls sous deciplos i dixo-le: «Se alguien quejir benir atrás de mi, çprézie-se a el mesmo, agarre la sue cruç i apuis benga atrás de mi.

³⁵ Quien quejir salbar la sue alma, ha de perdé-la; mas quien perdir la sue alma por bias de mi i de l Eibangeilho, salbará-se.

³⁶ Que le adelantra a un home ganhar l mundo anteiro se perdir la sue alma?

³⁷ L que dará un home an troca de la sue alma?

³⁸ Aquel que tubir bergonha de mi i de las mies palabras delantre desta giraçon adúltara i pecadora, tamien l Filho de l Home s’ambergonhará del, quando benir na glória de sou Pai culs anjos santos.»