Marcos 6 - Eibangeilhos en Mirandês

Jasus ye çfamado na sue tierra

¹ Apuis, saliu deilhi i fui-se pa la sue tierra i ls deciplos fúrun cun el.

² Quando chegou l sábado, ampeçou a ansinar na sinagoga. Muitos que stában a oubir quedában mui admirados, dezindo: «De adonde le benírun estas cousas todas i que sabedorie ye esta que le dórun? Cumo tan grandes marabilhas son feitas pulas manos del?

³ Anton, este nun ye l carpinteiro, l filho de la Marie i armano de Tiago, de Jesé, de Judas i de Simon? I las armanas del nun móran eiqui cun nós?» I quedában sacandelizados cun el.

⁴ Jasus, anton, dezie-le: «Nun hai porfeita que seia çfamado a nun ser na tierra del, na parentena del i na casa del.»

⁵ I nun quijo fazer eilhi mais milagres. Solo curou uns pouquitos de malos, apuis de le poner las manos porriba.

⁶ Quedaba mui admirado cula falta de fé deilhes. Andaba, anton, a ansinar pulas terricas alredror.

Mission i ansino de ls apóstelos

⁷ Adepuis, chamou ls doze i ampeçou a mandá-los als dous de cada beç i dou-le poder contra ls spritos malos.

⁸ Dixo-le que nun lhebáran pul camino mais do que ũa choupa: Nien pan, nien alforjas, nien denheiro ne l cinto;

⁹ que calçaran las albarcas, mas que nun lhebássen dues capas.

¹⁰ I dixo-le, tamien: «Quando antrardes nũa casa, quedai alhá até que bos báiades desse sítio.

¹¹ I se ũa tierra nun bos recebir nien las pessonas bos oubíren, al salir dalhá sacudi l puolo de ls buossos pies an teçtemunho contra eilhes.»

¹² Eilhes fúrun-se a pregar para que fazíran penitença,

¹³ botában muito demonho pa la rue i ountában cun azeite a quien stubisse malo i lhougo sanaba.

L que Harodes i outros oubírun subre Jasus

¹⁴ Cumo l nome del habie ganho muita nomeada, l rei Harodes oubiu falar del. Uns dezien: «Juan Batista rucecitou de ls muortos i ye por bias desso que nel óbran aqueilhes milagres todos.»

¹⁵ Mas outros dezien: «Ye Eilias.» I outros: «Ye un porfeta, acumparado a un de ls porfetas.»

¹⁶ Oubindo estas cousas, Harodes dezie: «Aquel Juan a quien le cortei l cachaço, el rucecitou.»

Córtan-le la cabeça a Juan Batista

¹⁷ Ye berdade que esse Harodes mandara prender a Juan i habie-lo botado nũa cadena por bias de Harodíade, la mulhier de Felipe, armano del, porque se habie casado cun eilha.

¹⁸ Dezie-le, anton, Juan a Harodes: «Nun tenes l dreito de bibir cula mulhier de tou armano.»

¹⁹ Harodíade puso-se contra el i querie-lo matar, mas nun podie

²⁰ porque Harodes tenie-le miedo a Juan, puis sabie que era un home justo i santo, i defendie-lo; apuis de lo oubir quedaba cheno de miedo, mas assi i todo gustaba muito de l oubir.

²¹ Mas chegou un die al modo, an que Harodes fizo anhos i dou ũa boda pa ls sous prencipales, pa ls oufeciales i pa ls maiorales de la Galileia.

²² Ende apersentou-se a beilar la filha daqueilha Harodíade i agradou a Harodes i als sous cumbidados. L rei dixo-le a la rapaza: «Pide-me l que quejires i you darei-te-lo.»

²³ I jurou-le muita beç: «Dou-te qualquiera cousa que me pidas, nien que seia la metade de l miu reino.»

²⁴ Eilha saliu i preguntou-le a la mai: «L que le bou a pedir?» I eilha respundiu-le: «La cabeça de Juan Batista.»

²⁵ Lhougo eilha tornou a antrar para adonde staba l rei i fizo-le l pedido dezindo: «Quiero que agora mesmo me deias, nun prato, la cabeça de Juan Batista.»

²⁶ Mui triste, l rei, cumo habie feito la jura i por bias de ls cumbidados, nun le quijo faltar cula palabra

²⁷ i lhougo mandou un guarda cun orde para traier la cabeça de Juan. L guarda fui-se a la cadena i eilhi le cortou l cachaço

²⁸ i trouxo la cabeça del nun prato i dou-se-la a la rapazica i la rapazica dou-se-la a la mai deilha.

²⁹ Quando soubírun de l que se passara, ls deciplos de Juan fúrun-se a buscar l cuorpo del i ponírun-lo nũa sepultura.

Ls apóstelos buolben i cinco mil pessonas son fartadas por Jasus

³⁰ Nesse antretiempo, bolbírun ls apóstelos i cuntórun-le a Jasus todas las cousas que habien feito i ansinado.

³¹ El dixo-le: «Beni bós solicos para un sítio sien naide i çcansai un cachico.» Porque era muita la giente que andaba para alhá i para acá, que eilhes nien tiempo para quemer tenien.

³² Scapórun-se, anton, eilhes solicos nun barco para un sítio sien naide.

³³ Quando ls bírun salir, muitos dórun-se de cuonta para adonde íban. Antoce, fui-se par’alhá a pie la giente de muita cidade i inda chegórun purmeiro do que eilhes.

³⁴ Al abaixá-se de l barco, biu un grande juntouro de giente i tubo pena deilha, porque éran cumo canhonas que nun tenien pastor, i ampeçou-le a ansinar muita cousa.

³⁵ Quando la hora yá staba a quedar mui adelantrada, fúrun-se a tener cun el ls deciplos i dezírun-le: «Este sítio ye un ermo i la hora yá bai mui adelantrada;

³⁶ manda-los ambora, para que se báian pulas tierras i quintas alredror a cumprar algo que quemer.»

³⁷ Mas el respundiu-le, dezindo: «Dai-le bos a quemer.» I eilhes dezírun-le: «Bamos, anton, alhá a cumprar duzientos denheiros de pan i damos-se-lo a quemer.»

³⁸ El preguntou-le: «Quantas fogaças teneis ende? Ide alhá a ber.» Quando eilhes soubírun, dezírun-le: «Cinco fogaças i dous peixes.»

³⁹ Dou-le, anton, orde pa que fazíran sentar a todo mundo, an grupos, anriba ls fenascos inda berdes.

⁴⁰ Eilhes sentórun-se, apartados an grupos de cien i de cinquenta.

⁴¹ Agarrou apuis nas cinco fogaças i ne ls dous peixes, mirou pa l cielo, beneziu i partiu las fogaças i iba-se-las dando als sous deciplos para que se las díran a las pessonas; partiu tamien ls dous peixes.

⁴² I quemírun todos até fartar.

⁴³ Inda arrecolhírun doze cestas chenas de carolos i puostas de peixe.

⁴⁴ Ls que quemírun l pan éran cinco mil homes.

Jasus anda porriba l mar

⁴⁵ Lhougo a seguir, oubrigou ls sous deciplos a chubir pa l barco para passáren pa l outro lhado, para Betsaida, anquanto el mandaba l pobo ambora.

⁴⁶ Apuis de ls haber mandado ambora, fui-se para un cabeço a rezar.

⁴⁷ Yá cun de nuite, l barco andaba ne l meio de l mar i el staba el solo an tierra.

⁴⁸ Al bé-los mui afergolhados a remar, puis tenien l aire contra eilhes, ende pula quarta dúnia de la nuite fui-se a tener cun eilhes, andando porriba l mar i querie-los arrepassar.

⁴⁹ Mas eilhes, quando l bírun a caminar porriba l mar, cuidórun que era ũa pantasma i gritórun,

⁵⁰ porque todos l habien bido i quedórun assustados. Mas lhougo falou cun eilhes i dixo-le: «Tenei cunfiança, sou you, nun téngades miedo.»

⁵¹ Apuis chubiu-se ne l barco para an pie deilhes i l aire aplaquiou. Eilhes inda quedában muito mais admirados,

⁵² puis nada habien antendido de l que se habie passado cul pan, porque l coraçon deilhes staba tapado.

Sana bárias pessonas cun males an Genesaré

⁵³ Quando chegórun a tierra, benírun para Genesaré i ancostórun a la borda.

⁵⁴ Mal apenas habien salido de l barco, lhougo ls coincírun

⁵⁵ i correndo toda aqueilha region, ampeçórun a traier an padiuolas todos ls que tenien algun mal para adonde oubien dezir que el andaba.

⁵⁶ Adondequiera que antrasse, fura cidade, aldé ou lhugarico, ponien ls que stában malos nas praças i pedien-le que al menos le deixasse topar na franja de la sue bestimienta; i todos ls que le topában, quedában sanos.