Marcos 5 - Eibangeilhos en Mirandês

Jasus sana un gadareno cun un sprito malo

¹ Adepuis, alhá chegórun al outro lhado de l mar, a la tierra de ls gadarenos.

² Mal apenas se abaixou de la barca, lhougo bieno a correr para el un home, salido dũa sepultura, que tenie un sprito malo;

³ el moraba nas sepulturas i yá naide, nien cun corrientes, era capaç de l prender,

⁴ porque muita beç fura apeado i preso cun corrientes, mas el scachou las apeias i las corrientes i naide era capaç de lo adominar;

⁵ i andaba siempre, de nuite i de die, pulas sepulturas i puls cabeços a ouliar i a ferir-se a el mesmo cun piedras.

⁶ Al ber Jasus de loinge, dou ũa fugida i adorou-lo,

⁷ i boziando cun ũa boç mui alta, dixo: «Que tenes tu a ber cumigo, á Jasus, filho de l Dius Altíssemo? Por Dius te pido que nun m’atermentes.»

⁸ Porque le habie dezido a el: «Sal desse home, sprito malino.»

⁹ Preguntou-le: «Que nome te dan?.» El respundiu-le: «L miu nome ye Lhegion, porque somos muitos.»

¹⁰ I pedien-le por todo que nun ls botasse para fuora daqueilha region.

¹¹ Dá-se l causo que andaba a pacer ne l monte eilhi acerca ũa bezeira de cochinos;

¹² i pedírun-le, dezindo: «Manda-mos pa ls cochinos, para mos metermos andrento deilhes.»

¹³ El alhá ls deixou ir. Anton, ls spritos malinos, mal apenas salírun, lhougo se metírun ne ls cochinos. Ls cochinos, arrimado a uns dous mil, çfaiórun-se cun to la fuorça por ũa faia pa l mar i afogórun-se ne l mar.

¹⁴ Ls que andában culs cochinos scapórun-se i spalhórun las amboras pula cidade i puls campos; i todos acudírun a ber l que se habie passado.

¹⁵ Anton, benírun a tener cun Jasus i bírun l que tenie andrento l demonho chamado Lhegion, sentado, bestido i an sou juízo i tubírun miedo.

¹⁶ Ls que bírun estas cousas cuntórun l que se habie passado tanto cul que tenie l demonho andrento cumo l causo de ls cochinos.

¹⁷ Apuis ampeçórun-le a pedir que se fura ambora de l sou termo.

¹⁸ Habendo-se chubido para ũa barca, l que habie tubido l demonho andrento, pedie-le que l deixasse ir cun el.

¹⁹ Mas el nun l deixou antrar i dixo-le: «Bai para tue casa i pa la tue giente i cunta-le las cousas que l Senhor fizo cuntigo i de cumo tubo pena de ti.»

²⁰ El fui-se ambora i ampeçou a apregonar na Decápole todas las cousas que Jasus le habie feito i todos quedában mui admirados.

Ye sana ũa mulhier cun un corrimiento de sangre i la filha de Jairo ye rucecitada

²¹ Mal apenas Jasus atrabessou ne l barco pa l’ourielha de l outro lhado, bieno a tener cun el un grande juntouro de pessonas, an pie de l mar.

²² Ende, chegou un de ls xefes de la sinagoga, que le chamában Jairo, i mal apenas l biu botou-se als pies del

²³ i pediu-le sien parar, dezindo: «La mie filhica stá a dar las últimas; ben i pon-le las manos porriba para que se salbe i biba.»

²⁴ El fui-se cun el i todo aquel juntouro de pessonas se fui atrás del, apertando-lo.

²⁵ Anton, ũa mulhier que yá doze anhos que tenie un corrimiento de sangre

²⁶ i yá passara por muito doutor, gastando todo quanto tenie i quedando cada beç mais mala,

²⁷ quando oubiu falar de Jasus, bieno pul meio la giente i achegou-se por trás i topou-le na roupa,

²⁸ puis dezie alhá par’eilha: «Se topar nien que seia na roupa del, quedarei sana.»

²⁹ I lhougo eilhi se le secou l corrimiento de sangre i sentiu ne l cuorpo que staba sana daquel mal.

³⁰ Jasus, al sentir ũa fuorça que salira del, buolto pa l juntouro de pessonas, preguntou: «Quien topou na mie roupa?»

³¹ Dezien-le ls deciplos del: «Bien bés que stá tanta giente a apertá-te i inda preguntas, “quien me topou?”»

³² El cuntinaba a mirar alredror para ber aqueilha que le habie topado.

³³ Antoce la mulhier, chena de miedo i a tembrar, sabendo l que se habie passado cun eilha, bieno i botou-se als pies del i cuntou-le la berdade toda.

³⁴ El, anton, dixo-le: «Filha, la tue fé salbou-te; bai an paç i queda sana de l tou mal.»

³⁵ Inda staba el a falar quando chégan uns de casa de l xefe de la sinagoga a dezi-le: «La tue filha morriu-se; para que bás a anquemodar mais al mestre?»

³⁶ Mas Jasus, cumo oubiu l recado, dixo-le al xefe de la sinagoga: «Nun tengas miedo; bonda que acradites.»

³⁷ I nun deixou a naide ir atrás del, a nun ser a Pedro, a Tiago i a Juan, armano de Tiago.

³⁸ Quando chegórun a la casa de l xefe de la sinagoga, bei un grande rebolhiço i giente a chorar i a gritar muito.

³⁹ Antrou para andrento i dixo-le: «Porque bos apoquentais i chorais? La menina nun se morriu, stá a drumir.»

⁴⁰ Eilhes fazien caçuada del, mas el, apuis de habéren salido todos pa la rue, agarrou cun el l pai i la mai de la rapazica i ls que stában cun el i antrando para adonde staba la rapazica,

⁴¹ agarrou-le la mano i dixo-le: «Talihta qúm», l que quier dezir: «Menina, sou you que te digo, alhebanta-te.»

⁴² Lhougo la rapazica s’alhebantou i andaba, pus yá tenie doze anhos. I todos quedórun mui admirados.

⁴³ Pediu-le muito pa que naide soubira l que se passara i mandou-le dar de quemer a la rapazica.