Marcos 4 - Eibangeilhos en Mirandês

Parábolas de l Reino de Dius Parábola de l sembrador

¹ Jasus ampeçou outra beç a ansinar a la borda de l mar. Ajuntou-se alredror del un grande juntouro de pessonas, de modo que tubo de se chubir para ũa barca i ende se sentou, ne l mar, anquanto todo mundo quedaba an tierra, na borda de l mar.

² Ansinaba-los ousando muita parábola i dezie-le na sue prática:

³ «Oubi. Ũa beç, saliu un sembrador a sembrar.

⁴ I dou-se que, anquanto sembraba, ũa parte de la semiente aparou a la borda de l camino i benírun ls páixaros i comírun-la.

⁵ Outra aparou an sítio cheno de piedras, adonde nun habie muita tierra, i lhougo naciu porque la tierra era pouco fonda;

⁶ mas, mal apenas l sol naciu, lhougo s’abranou i, cumo nun tenie raiç, secou-se.

⁷ Outra fui a aparar pa l meio de gatunhas, las gatunhas crecírun i abafórun-la i nun dou fruito.

⁸ Houbo inda outra que aparou an tierra buona i creciu, berdegou i dou fruito, ũa a trinta granos cada ũa, outra a sessenta i outra a un ciento.»

⁹ I dezie: «Quien tubir oubidos para oubir, ouba.»

Porquei fala Jasus an parábolas

¹⁰ Quando quedou el solico, ls que stában eilhi alredror del i ls Doze preguntórun-le l que querien dezir las parábolas.

¹¹ El respundiu-le: «A bós fui-bos dado l coincer l mistério de l Reino de Dius, mas als que son de fuora todo ten que le ser puosto an parábolas,

¹² para que, al mirar, míren mas nun béian, i al oubir, óuban, mas nun anténdan, a nun ser que se cumbírtan i séian perdonados.»

Splicaçon de la parábola de l sembrador

¹³ Apuis dixo-le: «Nun antendeis esta parábola. Anton, cumo podereis antender las outras parábolas?

¹⁴ L que sembra, sembra la palabra.

¹⁵ Ls que stan a la borda de l camino son aqueilhes adonde ye sembrada la palabra, mas, mal apenas la óuben, ben Satanás i saca-le la palabra neilhes sembrada.

¹⁶ Aqueilhes an que sembra porriba de piedras, son ls que óuben la palabra i lhougo l’acéitan mui cuntentos,

¹⁷ mas nun ténen raiç andrento, que stá a la flor de la tierra: antoce, mal le benga algun cuntratiempo ou perseguiçon por bias de la palabra, lhougo pérden la fé.

¹⁸ Ls outros an que se sembra ne l meio de gatunhas son ls que oubírun la palabra,

¹⁹ mas ls cobradeiros de cabeça de la bida i l matinar nas riquezas i noutras paixones que le éntran n’alma, abáfan la palabra i eilha nun puode granar.

²⁰ I aqueilhes an que se sembra an tierra buona son ls que óuben la palabra i la recíben, dando uns a trinta semientes cada un, outros a sessenta i outros a un ciento.»

Cumo se debe de oubir

²¹ Tamien le dezie: «Acauso ũa pessona trai ũa candela pa la poner ambaixo l alqueire ou ambaixo la cama? Nun ye pa la colgar ne l belador?

²² Porque nun hai nada que steia scundido que nun benga a ser amostrado, nien nada que seia feito a las scuras que nun seia puosto a las claras.

²³ Quien tubir oubidos para oubir, ouba.»

²⁴ Dezie-le, inda: «Quedai cun bien atento al que oubis. Cula medida cun que medirdes, assi bos mediran i bos daran la paga.

²⁵ Puis, al que ten dará-se-le i al que nun ten até l que ten se le ha de tirar.»

Parábola de la semiente

²⁶ Dezie tamien: «L reino de Dius ye acumparado a un home que sembrou la semiente na tierra,

²⁷ apuis drume-se i alhebanta-se, de nuite i de die, i la semiente nace i crece, sien el saber cumo.

²⁸ Porque la tierra purmeiro dá la yerba, apuis la spiga i al fin queda granada la spiga.

²⁹ Apuis de star bien criado l grano, lhougo le bota la fouce, porque bieno l tiempo de la segada.»

Parábola de l grano de mostarda

³⁰ I dezie mais: «A quei hemos d’acumparar l Reino de Dius ou an qual parábola lo hemos de poner?

³¹ Tal i qual cumo l grano de mostarda que ye sembrado i anterrado cumo la mais pequeinha de todas las semientes que se sémbran.

³² Mas, apuis de sembrado, crece i faç-se mais grande do que todo quanto se pon na huorta i bota galhos tan grandes que ls páixaros puoden quedar a la selombra deilha.»

L uso de las parábolas

³³ Cun estas i muitas outras parábolas le falaba de la Palabra, cunsante cada un era capaç d’antender,

³⁴ i nunca le falaba sien ser por parábolas. Mas quando staba el solico culs deciplos splicaba-le todo.

Feitos i ditos de Jasus. La termienta atamada

³⁵ Nesse die, yá a la tardica, dixo: «Bamos-mos pa l outro lhado.»

³⁶ I deixando aqueilha giente toda, lhebórun-lo cun eilhes, na barca adonde staba; i outras barcas fúrun cun el.

³⁷ Ende, alhebantou-se ũa airaçada tan grande que las óndias yá antrában na barca i esta ampeçaba a quedar chena d’auga.

³⁸ Nesse antretiempo el staba na parte de la frente de l barco a drumir nũa almofada. Spertórun-lo i dízen-le: «Mestre, nun se t’amporta que mos muorramos todos?»

³⁹ El alhebantou-se, dou-le orde al aire i dixo-le al mar: «Calha-te, assossega.» I l aire parou i quedou todo mui sereno.

⁴⁰ Apuis dixo-le a eilhes: «Porque stais cun tanta grima? Será que nun teneis fé?»

⁴¹ I quedórun todos cun tanto respeito, que dezien uns pa ls outros: «Quien será este, que até l aire i l mar le oubedécen?»