Marcos 13 - Eibangeilhos en Mirandês

Sermon de la fin. Anúncio de la çtruiçon de l templo

¹ Quando salien de l templo, dixo-le un de ls sous deciplos: «Mestre, mira que piedras i que eidefícios.»

² I Jasus dixo-le a eilhes: «Bedes estes eidefícios tan grandes? Eiqui nun quedará piedra porriba de piedra, que nun seia sbarrulhada.»

De l grande sufrimiento que ende ben

³ Quando staba sentado ne l Cabeço de las Oulibeiras acontra l Templo, preguntaba-le, d’aparte, Pedro i tamien Tiago i Juan i Andrés:

⁴ «Di-mos, quando se ban a dar essas cousas i que seinha haberá quando todo s’ampeçar a acabar?.»

⁵ Jasus, anton, ampeçou-le a dezir: «Mirai, que naide bos anganhe!

⁶ Muita giente benirá a dezir, an miu nome: “Sou you”, i anganharan a muito.

⁷ Quando oubirdes falar de guerras i nobidades de guerras, nun téngades miedo; essas cousas ténen que se dar, mas inda nun ye la fin.

⁸ Ponerá-se pobo contra pobo i reino contra reino, haberá terramotos an muito sítio, haberá fames. Ende ye l ampeço de ls delores.

⁹ Bede bós mesmos l que se passa. Ban-bos a antregar als cunceilhos, ides a lhebar porrada nas sinagogas, ides a star delantre de gobernadores i de reis por bias de mi pa le dar teçtemunho a eilhes.

¹⁰ Mas, an purmeiro, ye neçairo pregar l Eibangeilho a todas las naciones.

¹¹ Quando bos lhebáren para bos antregar, nun penseis l que ides a dezir, mas dezi l que bos benir a la cabeça nessa altura, puis nun sodes bós que falais, mas l Sprito Santo.

¹² L armano bai a antregar l armano a la muorte i l pai l filho; ls filhos poneran-se contra ls pais i ban a antregá-los a la muorte.

¹³ Todos bos ban a querer mal por bias de l miu nome. Mas quien s’aguantar até la fin, esse será salbo.»

La grande zgrácia de la Judeia

¹⁴ «Anton, quando birdes la zgrácia mais grande de l mundo star adonde nun debe, quien lei que antenda, anton, ls que stan na Judeia scápen-se pa ls montes,

¹⁵ quien stubir anriba l terraço, que nun abaixe nien entre an sue casa a agarrar algo,

¹⁶ i quien stubir pul termo, que nun buolba a agarrar sue roupa.

¹⁷ Cuitadica de quien stubir prenhada ou andubir a dar la teta por essa altura.

¹⁸ Rezai para que nun se passe ne l eimbierno;

¹⁹ puis nesses dies haberá un delor tan grande, que nunca outro aparecido se biu çque Dius criou l mundo até agora, nien se tornará a ber.

²⁰ Se Dius nun acurtiasse esses dies, naide se salbarie. Mas por bias de ls que fúrun scolhidos, el acurtiou esses dies.

²¹ Nessa altura, se ũa pessona bos dezir: “Mirai, stá eiqui l Cristo; mirai, stá eilhi”, nun acradítedes:

²² puis ban a aparecer falsos cristos i falsos porfetas i ban a fazer milagres i sinales milagrosos para anganhar, se esso fur possible, até als scolhidos.

²³ Mas bós stais alerta, puis yá bos dixe estas cousas antes de se dáren.»

La benida de l Filho de l Home

²⁴ «Mas nesses dies, apuis de todos aqueilhes termientos, l sol bai a quedar scuro i la lhuna nun bai a dar la sue claridade,

²⁵ bai a haber streilhas a caier de l cielo i ls eisércitos que hai ne l cielo ban a quedar fracos.

²⁶ Apuis bereis l Filho de l Home a benir anriba las nubres cun muito poder i glória.

²⁷ Anton, mandará ls anjos i ajuntará ls scolhidos por el, de ls quatro aires, de la punta de la tierra a la punta de l cielo.»

Stai cun atento porque nun sabeis la hora

²⁸ «Daprendei la parábola de la figueira: Quando ls galhos deilha yá stubíren tienros i nacíren las fuolhas, sabeis que l berano stá acerca.

²⁹ Assi tamien bós, quando birdes que se dan estas cousas, sabei que stá acerca, yá a la puorta.

³⁰ Quedai bien ciertos de l bos digo: Nun passará desta giraçon até que estas cousas se déian.

³¹ L cielo i la tierra passaran, mas las mies palabras nun passaran.

³² A respeito desse die ou de la hora, naide ls sabe, nien ls anjos de l cielo nien l Filho, solo l Pai.

³³ Stai alerta, belai, porque nun sabeis quando chegará l tiempo.

³⁴ Ye tal cumo un home que se fui para loinge, deixou la sue casa i dou-le l poder als sous criados, a cada un deilhes l sou trabalho i tamien al porteiro le mandou que mirasse pula casa.

³⁵ Antoce, belai, porque nun sabeis quando benirá l duonho de la casa, se a la nuitica, se a meia nuite, se al cantar de l galho, se a la purmanhana cedo,

³⁶ nun se deia l causo de que benga nun sfergante i bos ache a drumir.

³⁷ L que bos digo a bós, digo-se-lo a todos: Belai!»