Marcos 12 - Eibangeilhos en Mirandês

Parábola de ls lhabradores malos

¹ Jasus ampeçou-le a falar an parábolas: «Un home puso ũa binha, amuralhou-la, scabou un lhagar i fizo ũa torre. Apuis arrendou-se-la a uns lhabradores i fui-se para loinge.

² Quando chegou l tiempo, mandou un criado a tener culs lhabradores para recebir la parte de ls fruitos de la binha.

³ Eilhes agarrórun-lo, anchírun-lo de porradas i mandórun-lo ambora sien nada.

⁴ Anton, tornou-le a mandar outro criado. Eilhes scalabaçorun-lo todo i anchírun-lo de denomes.

⁵ Mandou inda outro i a este matórun-lo. Apuis, mandou mais i a uns anchírun-los de porradas, mas a outros matórun-los.

⁶ Tenie inda l filho de que el mais gustaba. Por último, mandou-se-lo tamien, dezindo: “Mal será se nun respeitáren l miu filho.”

⁷ Mas aqueilhes lhabradores dezírun uns pa ls outros: “Este ye l ardeiro. Ala, bamos a matá-lo i quedamos nós cula ardança.”

⁸ Anton, agarrórun-lo, matórun-lo i atirórun cun el para fuora la binha.

⁹ Apuis destes feitos, l que fazerá l duonho de la binha? Benirá i acabará cun aqueilhes lhabradores i dará-le la binha a outros.

¹⁰ Nunca listes esta Scritura: La piedra que ls pedreiros nun quejírun, essa bieno a ser la piedra de squineira;

¹¹ Estas cousas fúrun feitas pul Senhor i son ũa marabilha pa ls nuossos uolhos?»

¹² Eilhes buscában modo de lo prender, mas tenien miedo de l pobo, puis antendírun que tenie dezido la parábola para eilhes. Anton, deixórun-lo i fúrun-se ambora.

La décima de César

¹³ Adepuis mándan a tener cun el alguns fariseus i partidários de Harodes, pa lo agarráren puls sous ditos.

¹⁴ Mal apenas chégan al pie del, dízen-le: «Mestre, sabemos que sós berdadoso i que nun te metes cun naide, nien çtingues las pessonas pula cara, mas ansinas cun berdade l camino de Dius. Ye bien pagar la décima a César ou nó? Bamos ou nun bamos a pagar?»

¹⁵ Cumo el coincie bien la manha deilhes, dixo-le: «Porque me atentais? Traiei-me un denheiro, para you ber.»

¹⁶ I eilhes traírun. Dixo-le apuis: «De quien ye esta cara i ls dezires?» Eilhes dezírun-le: «De César.»

¹⁷ Jasus dixo-le, anton: «L que ye de César, dai-se-lo a César i a Dius l que ye de Dius.» I quedórun mui admirados cun el.

La rucerreiçon de ls muortos

¹⁸ Apuis benírun a tener cun el ls saduceus, que dízen que nun hai rucerreiçon, i fazien-le preguntas dezindo:

¹⁹ «Mestre, Moisés deixou-mos screbido, se se morrir un armano i deixar la mulhier mas nun deixar filhos, que l armano se case cun essa mulhier i faga decendientes a sou armano.

²⁰ Habie siete armanos: L purmeiro casou-se cun ũa mulhier i morriu-se sien deixar filhos;

²¹ l segundo casou-se cun eilha, mas tamien se morriu sien deixar decendientes; l treceiro la mesma cousa;

²² i niun de ls siete deixou filhos. Por fin tamien se morriu la mulhier.

²³ Na rucerreiçon, quando rucecitáren, de qual deilhes será la mulhier?»

²⁴ Jasus dixo-le: «Nun bedes que arrais, porque nun antendeis las Scrituras nien l poder de Dius?

²⁵ Quando rucecitáren de ls muortos, nien se cásan nien seran casados, mas son cumo ls anjos ne ls cielos.

²⁶ Subre la rucerreiçon de ls muortos, nun listes ne l lhibro de Moisés, quando Dius le falou de l meio las silbas dezindo-le: You sou l Dius de Abraan i l Dius de Eisaac i l Dius de Jacó?

²⁷ Nun ye Dius de ls muortos, mas de ls bibos. Andais mui anganhados.»

L purmeiro mandamento de todos

²⁸ Achegou-se an pie del un scriba que los oubira a çcutir i cumo le respundira tan bien i preguntou-le: «Qual ye l purmeiro de todos ls mandamentos?»

²⁹ Jasus respundiu-le: «L purmeiro ye: Oube, á Eisrael: L Senhor nuosso Dius ye l único Senhor,

³⁰ i amarás al Senhor tou Dius cun todo l tou coraçon i cun toda la tue alma i cun toda la tue anteligença i cun todas las tues fuorças.

³¹ L segundo ye assi: Amarás al tou próssimo cumo a ti mesmo. Nun hai nanhun mandamento mais grande do que este.»

³² I l scriba dixo-le: «Mestre, faleste cun to la berdade: Ye l único i nun hai outro sien ser el;

³³ i amá-lo cun todo l coraçon i cun toda l’anteligença i cun todas las fuorças i amar l próssimo cumo a el mesmo, ye mais grande do que todas las oufiertas i do que todos ls sacrafícios.»

³⁴ Jasus, al ber cumo habie respundido mui sabidamente, dixo-le: «Nun andas loinge de l reino de Dius.» I yá mais naide tenie coraige de le fazer preguntas.

L Messias, filho i senhor de Dabide

³⁵ Jasus cuntinaba a ansinar ne l templo, preguntando: «Cumo dízen ls scribas que l Cristo ye Filho de Dabide?

³⁶ Fui Dabide que dixo, anspirado pul Sprito Santo: Dixo l Senhor al miu Senhor: Senta-te a la mie mano dreita, até que ponga ls tous einemigos ambaixo ls tous pies.

³⁷ Se Dabide le chama Senhor, d’adonde ben, anton cumo ye filho del?» I todo l juntouro de pessonas lo scuitaba cun muito gusto.

Cuidado cun ls scribas

³⁸ I dezie-le ne l sou ansino: «Tenei cuidado culs scribas, que gústan de passear bien bestidos i de ser saludados na praça,

³⁹ de se sentar ne ls purmeiros scanhos de las sinagogas i ne ls purmeiros lhugares nas cenas;

⁴⁰ que cómen todo l que hai nas casas de las biúdas i fázen de cuonta que rézan grandes ouraciones. Estes ban a tener un juízo mais apertado.»

La smola de la biúda probe

⁴¹ Apuis, sentou-se delantre la caixa de las smolas i miraba l modo cumo las pessonas botában alhá las monedas; i ls mui ricos botában muita.

⁴² Bieno apuis ũa biúda probe i botou alhá dues monedas de las pequeinhas, que fazien uns céntimos.

⁴³ El chamou ls sous deciplos i dixo-le: «Quedai bien ciertos de l que bos digo: Esta biúda probe botou mais do que todos na caixa de las smolas:

⁴⁴ puis todos botórun de l que le sobraba a eilhes, mas esta, de la sue probeza, botou todo l que tenie, todo l sou sustento.»