Marcos 1 - Eibangeilhos en Mirandês

PURPARAÇON DE L MENISTÉRIO Juan Batista

¹ Ampeço de l Eibangeilho de Jasus Cristo, Filho de Dius. Cunsante stá screbido ne l porfeta Eisaías:

² Mira que mando alantre de ti l miu anjo, que bai a purparar l tou camino.

³ Boç que bózia ne l zerto: Purparai l camino de l Senhor, alisai ls sous carreirones.

⁴ Apareciu Juan ne l zerto a batizar i a apregonar un batismo de peniténcia para perdon de ls pecados.

⁵ Benie a tener cun el toda la tierra de la Judeia i toda la giente de Jarusalen i éran batizados por el ne l riu Jordan, cunfessando ls sous pecados.

⁶ Juan andaba bestido cun lhana de camelo, traie ũa correia de cuiro alredror de ls renhones i quemie sartigalhos i miel que agarraba pul campo.

⁷ El pregaba, dezindo: «Apuis de mi ben un mais fuorte do que you i a quien you nien sequiera sou merecedor de le zatar las correias de las albarcas.

⁸ You batizo-bos cun auga, mas el bai-bos a batizar cul Sprito Santo.»

Jasus ye batizado

⁹ Dou-se l causo de que, por essa altura, Jasus bieno de Nazaré de la Galileia i fui batizado por Juan ne l Jordan.

¹⁰ I lhougo al salir de l’auga biu ls cielos abiertos i l Sprito an figura de palomba a abaixar parriba del.

¹¹ Ende, oubiu-se ũa boç a benir de l cielo: «Tu sós l miu Filho, que you quiero muito; nun tengo outro mirar senó an ti.»

Jasus ye atentado por Satanás

¹² Lhougo apuis, l Sprito ampurrou-lo pa l zerto.

¹³ Eilhi, ne l zerto, stubo quarenta dies i era atentado por Satanás; bibie culs bichos de l monte i ls anjos andában a serbir par’el.

PREGAÇON I CURAS NA GALILEIA Jasus ampeça a eibangelizar

¹⁴ Apuis de Juan haber sido atraiçonado, Jasus bieno pa la Galileia a apregonar l Eibangeilho de Dius,

¹⁵ dezindo: «Acabou-se l tiempo i stá quaijeque a benir l Reino de Dius. Fazei peniténcia i acraditai ne l Eibangeilho.»

Jasus chama ls purmeiros deciplos

¹⁶ Un die, iba a passar a la borda de l mar de la Galileia i biu a Simon i a Andrés, armano de Simon, a botar las redes al mar, puis éran pescadores.

¹⁷ I Jasus dixo-le: «Beni cumigo i fazerei de bós pescadores de homes.»

¹⁸ I naqueilha hora, apuis de deixáren las redes, fúrun-se cun el.

¹⁹ Un cachico mais alantre, biu a Tiago, filho de Zebedeu, i a Juan, armano del, que tamien stában na barca a remendar las redes,

²⁰ i lhougo chamou por eilhes. Eilhes deixórun l pai, Zebedeu, na barca culs oubreiros i fúrun-se atrás del.

Na sinagoga de Cafarnaún

²¹ Apuis antrórun an Cafarnaún. Ne l sábado alantre antrou na sinagoga a ansinar.

²² I stában mui admirados cula doutrina del, puis ansinaba-los assi cumo quien ten poder i nó cumo ls scribas.

²³ Alhá na sinagoga deilhes staba un home cun un sprito mui malo, que ampeçou a boziar,

²⁴ dezindo: «Que tenes tu a ber cun nós, Jasus de Nazaré? Beniste acá para mos zgraciar? Sei bien quien tu sós: L santo de Dius.»

²⁵ Jasus dou-le ũa orde, dezindo-le: «Calha-te i sal desse home para fuora!»

²⁶ I lhougo l sprito malo saliu del para fuora, dando bózios mui fuortes.

²⁷ Todos quedórun tan admirados, que preguntában uns als outros, dezindo: «Que bénen a ser estas cousas? Ũa doutrina nuoba cun poder, que le dá ordes als spritos malos i eilhes oubedécen-le!»

²⁸ I la fama del corriu-se por to la parte, an toda la region de la Galileia.

Jasus lhibra la suogra de Pedro dun febre

²⁹ Apuis de salir de la sinagoga, fui-se para casa de Simon i de Andrés, cun Tiago i Juan.

³⁰ Mas la suogra de Simon staba deitada na cama cun un febron mui grande i lhougo le dórun parte deilha.

³¹ El fui alhá, agarrou-le la mano i alhebantou-la. L febron deixou-la i eilha puso-se a serbir par’eilhes.

Jasus sana pessonas cun demonho andrento i cun outros males

³² A la nuitica, yá apuis de l sol se haber çpuosto, traírun-le todos ls que tenien algun mal i ls que tenien demonhos andrento,

³³ i toda la cidade s’ajuntou a la puorta.

³⁴ El sanou muitos que stában atacados por bárias moléstias i botou muito diabro pa la rue, mas nun deixaba ls diabros falar, porque sabien quien el era.

Jasus deixa Cafarnaún

³⁵ Lhougo a la purmanhana cedico, inda cun de nuite, alhebantou-se i fui-se para un sítio sien un germo i eilhi quedou a rezar.

³⁶ Simon i ls que andában cun el fúrun-se a saber del.

³⁷ Quando l achórun, dezírun-le: «Anda todo mundo a saber de ti.»

³⁸ Dixo-le, anton, a eilhes: «Bamos a outro sítio, als pobicos bezinos, para tamien ende pregar, puis fui para esso que you bin.»

³⁹ I andaba por to la Galileia a pregar nas sinagogas deilhes i a botar ls demonhos pa la rue.

Jasus lhimpa un lheproso

⁴⁰ Bieno a tener cun el un lheproso, a pedir-le de zinolhos drobados, dezindo: «Se quejires, puodes-me lhimpar.»

⁴¹ El tubo muita pena, stendiu-le la sue mano, topou-le i dixo-le: «Quiero, queda lhimpo.»

⁴² Lhougo la lhepra zapareciu i el quedou lhimpo.

⁴³ Apuis, Jasus mirou mui sério para el i mandou-lo ambora deilhi,

⁴⁴ dezindo-le: «Mira a ber, nun le digas nada a naide, mas bai-te, amostra-te al saçardote i faç ũa oufierta pula tue cura cumo mandou Moisés, para que sirba de teçtemunho para eilhes.»

⁴⁵ Mas el, mal apenas saliu deilhi, ampeçou a apregonar mui alto i a spalhar la nobidade, de modo que yá nien podie antrar a las claras na cidade. Por bias dessas cousas, quedaba fuora an sítios sien naide i íban a tener cun el de todas las partes.