Lucas 7 - Eibangeilhos en Mirandês

Sinales i leis de Jasus Jasus sana l criado de l centurion

¹ Apuis de haber acabado todas estas palhestras delantre de l pobo, antrou an Cafarnaún.

² Habie alhá un centurion an que un criado, de quien gustaba muito, staba mui malo, a las puortas de la muorte.

³ Mal apenas oubiu falar de Jasus, mandou-le uns ancianos de ls judius, a pedi-le que benira a sanar l sou criado.

⁴ Eilhes, assi que chegórun an pie de Jasus, pedírun-le muito, dezindo-le: «El ye merecedor de que le atendas l pedido del,

⁵ porque gusta de la nuossa tierra i fui el que mos fizo la sinagoga.»

⁶ Anton, Jasus fui cun eilhes. Quando yá iba acerca de la casa, l centurion mandou-le uns amigos a dezi-le: «Senhor, nun t’anquemodes, puis you nun sou merecedor de que entres ambaixo l miu telhado,

⁷ pula mesma rezon nien sequiera cuidei que fura merecedor de benir a tener cuntigo, mas diç ũa palabra i l miu criado quedará sano.

⁸ Porque tamien you sou un home sujeito a l’outeridade, tengo suldados a las mies ordes, i digo-le a este “Bai”, i el bai; i a outro “Ben”, i el ben; i al miu criado “Faç esto”, i el faç.»

⁹ Al oubir estas cousas, Jasus quedou mui admirado cun el i bolbendo-se pa l juntouro de giente que iba a trás del, dixo-le: «Digo-bos, que nien an Eisrael achei ũa fé tan grande.»

¹⁰ Al chegar a casa, ls que habien ido a tener cun el, achórun l criado yá sano.

L filho de la biúda de Nain

¹¹ Un ratico apuis fui-se a ũa cidade que le chamában Nain i íban cun el ls sous deciplos i un grande juntouro de pessonas.

¹² Quando stában a chegar acerca la puorta de la cidade, lhebában un a anterrar que era l filho morgado de sue mai, que era biúda, i muita giente de la cidade iba cun eilha.

¹³ Mal apenas la biu l Senhor, quedou cheno de pena deilha i dixo-le: «Nun chores.»

¹⁴ Achegou-se, topou ne l squife i ls que lo lhebában parórun. El dixo: «Moço, digo-te-lo you: Alhebanta-te.»

¹⁵ L muorto sentou-se i ampeçou a falar. Apuis antregou-se-lo a la mai.

¹⁶ Anton, todos quedórun cun muito miedo i lhoubában a Dius, dezindo: «Apareciu un grande porfeta antre nós» i tamien: «Dius bejitou l sou pobo.»

¹⁷ I la fama del corriu-se por toda la Judeia i por aqueilhas tierras eilhi alredror.

L’ambaixada de Juan a Jasus

¹⁸ Ls deciplos de Juan cuntórun-le estas cousas todas.

¹⁹ Anton, Juan chamou dous de ls sous deciplos i mandou-los a tener cul Senhor, dezindo-le: «Sós tu l que ha de benir ou asperamos por outro?»

²⁰ Quando ls homes chegórun an pie del, dezírun-le: «Juan Batista mandou-mos a tener cuntigo para te dezir: “Sós tu l que ha de benir ou asperamos por outro?”»

²¹ Na mesma oucasion curou a muita giente de males, pragas i spritos malos i a muito ciego dou-le la bista.

²² Respundendo, dixo-le Jasus: «Ide i cuntai-le a Juan l que bistes i oubistes: Ls ciegos béien, ls tolhidos ándan, ls lheprosos quédan lhímpios, ls xordos óuben, ls muortos rucecítan i als probes ye anunciado l Eibangeilho.

²³ Feliç daquel que an mi nun achou rezon para se scandelizar.»

L pensar de Jasus subre Juan

²⁴ Quando ls mensageiros de Juan se fúrun ambora, ampeçou-le a falar de Juan a aqueilha giente toda: «L que ye que fustes a ber al zerto? Ũa canha a abanar cul aire?

²⁵ Mas l que fustes a ber? Un home bien trajado cun roupas delicadas? Mirai que ls que ándan bien bestidos i a la buona bida stan ne ls palácios de ls reis.

²⁶ Anton, l que fustes a ber? Un porfeta? Si, digo-bos-lo you, bien mais do que un porfeta.

²⁷ Este ye aquel de quien stá screbido: Mira que mando alantre l miu mensageiro, que purparará l camino delantre de ti.

²⁸ Digo-bos-lo you: Naide ye mais grande do que Juan antre ls nacidos de las mulhieres; mas l mais pequeinho ne l reino de Dius ye mais grande do que el.»

²⁹ Todo l pobo que l oubiu i ls publicanos dórun grácias a Dius, habendo sido batizados cul batismo de Juan.

³⁰ Mas ls fariseus i ls doutores de la lei nun quejírun aceitar l cunseilho de Dius contra eilhes, nun habendo sido batizado por el.

³¹ «A quien acumpararei ls homes desta giraçon? A quien son acumparados?

³² Son acumparados a rapazicos que stan sentados na praça i bózian uns pa ls outros, dezindo: “Toquemos fraita para bós i nun beilestes; cantemos-bos modas tristes i nun chorestes.”

³³ Porque bieno Juan Batista, que nun quemie pan nien buie bino, bós dezis: “Ten l demonho cun el”;

³⁴ bieno l Filho de l Home, que come i bebe, i dezis: “Ende stá un home quemilon i bubedor de bino, amigo de ls quebradores de la décima i de ls pecadores.”

³⁵ Mas la sabedorie de Dius solo se bei an todos ls que son sous filhos.»

Jasus ye ountado por ũa mulhier pecadora

³⁶ Un de ls fariseus pediu-le que fusse a quemer cun el. Antrou an casa de l fariseu i sentou-se a la mesa.

³⁷ Ende, ũa mulhier de la cidade que era pecadora, quando soubo quien staba sentado a la mesa an casa de l fariseu, lhebou un baso de alhabastro cun unguiento

³⁸ i, ponendo-se por trás del a chorar als pies del, ampeçou-le a regar ls pies cun lhágrimas i a anxugaba-se-los cul pelo de la sue cabeça, beisaba-le ls pies i ountaba-se-los cul unguiento.

³⁹ Quando biu estas cousas l fariseu que lo habie cumbidado, dezie alhá cun el: «Se este fura un porfeta, saberie bien quien i l que ye la mulhier que le topou, pus ye ũa pecadora.»

⁴⁰ Jasus respundiu-le, dezindo: «Simon, tengo ũa cousa para te dezir.» I el dixo-le: «Dezi alhá, mestre.»

⁴¹ «Habie dues pessonas que le debien a outra: ũa debie-le quenhientos denheiros i outra cinquenta.

⁴² Nun tenendo cun quei le pagar, el perdonou-le a dambas a dues: qual de las dues le quedará mais an fabor?»

⁴³ Simon respundiu-le, dezindo: «Cuido que será aqueilha a quien mais le perdonou.» Anton, el dixo-le: «Penseste bien.»

⁴⁴ Bolbendo-se pa la mulhier, dixo-le a Simon: «Bés esta mulhier? Antrei an tue casa, nun me deste auga pa ls pies, mas eilha regou ls mius pies cun lhágrimas i anxugou-los cul sou pelo.

⁴⁵ Nun me deste un beiso, mas esta, çque antrei, nun parou de me beisar ls pies.

⁴⁶ Nun ounteste la mie cabeça cun azeite, mas esta ountou ls mius pies cun un ounguiento.

⁴⁷ Por bias destas cousas, digo-te-lo you: Son-le perdonados ls muitos pecados deilha, porque amou muito; mas aquel a quien pouco ye perdonado, pouco ama.»

⁴⁸ Dixo-le apuis a eilha: «Quédan-te perdonados ls tous pecados.»

⁴⁹ Ls que stában sentados a la mesa ampeçórun a dezir uns pa ls outros: «Quien ye este que até perdona ls pecados?»

⁵⁰ I dixo-le a la mulhier: «La tue fé salbou-te. Bai-te an paç.»