Lucas 6 - Eibangeilhos en Mirandês

Spigas agarradas al sábado

¹ Ũa beç, nun sábado an que stában a passar por uns panes, ls sous deciplos arrepiçában las spigas, sfregában-las culas manos i quemien-las.

² Anton, alguns fariseus dezírun-le: «Porque stais a fazer l que nun se puode fazer al sábado?»

³ Jasus respundiu-le, dezindo-le: «Anton nun listes l que fizo Dabide ũa beç an que el i ls que stában cun el quedórun chenos de fame?

⁴ Cumo antrou na casa de Dius i agarrou las fogaças que éran d’oufierta i quemiu-las i dou-se-las als que stában cun el, sabendo que solo ls saçardotes las podien quemer?»

⁵ I dezie-le: «L Filho de l Home até ye senhor de l sábado.»

Ũa mano seca sanada al sábado

⁶ Outra beç, noutro sábado, antrou na sinagoga i puso-se a ansinar. Staba alhá un home que tenie la mano dreita smirradica.

⁷ Anton, ls scribas i ls fariseus mirában a ber se el respeitaba l sábado, para acháren modo de l’acusar.

⁸ Mas el coincie bien ls pensamientos deilhes i dixo-le al home que tenie la mano smirradica: «Alhebanta-te i pon-te de pies eiqui ne l meio.» El alhebantou-se i quedou de pies.

⁹ Anton, Jasus dixo-le a eilhes: «Pregunto-bos se al sábado ye premitido fazer bien ou fazer mal, salbar la bida ou perdé-la?»

¹⁰ I mirando para todos ls que stában alredror, dixo-le al home: «Stica la tue mano.» El assi fizo i quedou-le sana la mano.

¹¹ Anton, eilhes quedórun mui anrabiados i falában uns culs outros subre l que le habien de fazer a Jasus.

Ls nomes de ls apóstelos

¹² Ũa beç, naqueilhes dies, chubiu-se a un cabeço a rezar i passou to la nuite a rezar a Dius.

¹³ Mal apenas rumpiu l die, chamou ls sous deciplos, scolhiu doze deilhes i dou-le l nome d’apóstelos:

¹⁴ Simon, a quien tamien le dou l nome de Pedro, i Andrés armano del; Tiago i Juan; Felipe i Burtelameu;

¹⁵ Mateus i Tomé; Tiago, filho de Alfeu, i Simon, que le chamában l zelote;

¹⁶ Judas, filho de Tiago, i Judas Scariotes, que fui quien lo atraiçonou.

Juntouros de pessonas ban atrás de Jasus

¹⁷ Abaixando cun eilhes, parou nũa prainada cun muitos de ls sous deciplos i un grande juntouro de giente de l pobo, que habie benido de toda la Judeia, de Jarusalen, de Tiro i de Sidónia que quedában a la borda de l mar,

¹⁸ que benírun pa lo oubir i para séren curados de ls sous males i tamien ls que stában atermentados puls spritos malos fúrun sanos.

¹⁹ Toda la giente buscaba un modo de le topar, porque salie del ũa bertude que los sanaba a todos.

Sermon an sítio de l campo Quatro bienabinturanças i quatro ai de bós

²⁰ El, alhebantando ls uolhos pa ls sous deciplos, dezie: «Felizes sodes bós, ls probes, porque l reino de Dius ye buosso.

²¹ Felizes sodes bós ls que agora teneis fame, porque sereis fartados. Felizes ls que agora chorais, porque habeis de rir.

²² Felizes sereis, quando ls homes bos tubíren rábia i quando bos poníren d’aparte, quando bos tratáren mal i atiráren cul buosso nome pa la rue cumo cousa mala, por bias de l Filho de l Home.

²³ Cuntentai-bos nesse die i fazei ũa fiesta, porque ye grande l buosso galardon ne l cielo, puis tamien assi le fazírun ls pais deilhes als porfetas.

²⁴ Mas ai de bós, á ricos, porque yá teneis la buossa paga!

²⁵ Ai de bós, ls que agora stais fartos, porque habeis de tener fame! Ai de bós, ls que agora rides, porque habeis de bos aflegir i de chorar!

²⁶ Ai de bós, quando to la giente dezir bien de bós! Puis tamien esso le fazien ls pais deilhes als falsos porfetas.»

La paga i l amor als einemigos

²⁷ «A bós que stais a oubir, digo-bos: Amai ls buossos einemigos i fazei-le bien als que bos ténen rábia.

²⁸ Dezi bien de ls que dízen mal de bós, rezai puls que bos bótan calúnias.

²⁹ Al que te dir nũa cara, apersenta-le tamien la outra; i al que te tirar la capa, deixa-le lhebar la outra roupa.

³⁰ A todo l que te pedir, dá; i al que agarrar l que ye tou, nun se lo tornes a pedir.

³¹ I cumo quereis que las pessonas bos fágan a bós, fazei-le bós l mesmo a eilhas.

³² Se amardes als que bos áman a bós, nun fazeis nada de mais. Tamien ls pecadores áman als que ls áman a eilhes.

³³ I se fazirdes bien als que bos fázen bien, nun fazeis nada de mais. Tamien ls pecadores fázen la mesma cousa.

³⁴ I se amprestardes a aqueilhes de quien asperais tornar a recebir, nun fazeis nada de mais. Tamien ls pecadores ampréstan als pecadores, para tornáren a recebir outra cousa armana.

³⁵ Anton, amai ls buossos einemigos, fazei bien i amprestai sien asperar nada; será mui grande l buosso galardon i sereis filhos de l Altíssemo, porque el tamien ye buono pa ls angratos i pa ls malos.

³⁶ Séiades mezericordiosos, cumo tamien l buosso Pai ye mezericordioso.»

Nun quérgades julgar

³⁷ «Nun quérgades julgar i nun sereis julgados; nun quérgades cundanar i nun sereis cundanados; sultai i tamien bos sultaran;

³⁸ dai i tamien bos será dado: ũa buona medida, ancalcada, sacudida i a arramar para fuora bos botáran ne l regaço; porque cula mesma medida cun que medirdes tamien bos mediran a bós.»

³⁹ Anton, dixo-le cumo acumparança: «Será que un ciego puode guiar outro ciego? Nun cairan dambos a dous nũa fóia?

⁴⁰ L deciplo nun subirte porriba l mestre, mas todo l que fur purfeito será cumo l sou mestre.

⁴¹ Anton, porque ye que bés la palhica que stá ne l uolho de tou armano i nun miras pa l cantiado que stá ne l tou uolho?

⁴² Cumo ye que le puodes dezir a tou armano: “Armano, deixa-me tirar la palhica que stá ne l tou uolho” i nun bés l cantiado que stá ne l tou uolho? Falso, tira purmeiro l cantiado de l tou uolho i apuis yá bés bien para tirar la palhica que stá ne l uolho de tou armano.»

L tesouro de l coraçon buono i malo

⁴³ «Porque nun hai ũa arble buona que deia fruito malo, nien ũa arble mala que deia fruito buono.

⁴⁴ Cada arble conhece-se pul sou fruito; nien de spineiros se puoden colher figos, nien de ls abrolhos se puoden bendimiar ubas.

⁴⁵ L home buono tira l bien de l bun tesouro de l coraçon, mas l home malo, de l mal tira cousas malas: porque la sue boca fala de l que l coraçon stá carregado.»

La casa feita anriba de piedra

⁴⁶ «Porque me chamais “Senhor, Senhor” i nun fazeis l que bos digo?

⁴⁷ Quien benir a mi i oubir las mies palabras i las pon an prática, bou-bos a amostrar a quien ye acumparado:

⁴⁸ ye acumparado a un home que fizo ũa casa, scabou bien fondo i puso ls aliçaces anriba de piedra; bieno ũa mundiada i la corriente batiu cun fuorça naqueilha casa, mas nien fui capaç de l’abanar porque staba bien feita.

⁴⁹ Mas l que oube i nun pon an prática, ye acumparado al home que fizo la sue casa anriba la tierra i sien aliçaces, atirou-se la corriente contra eilha i lhougo se sbarrulhou i aqueilha casa quedou feita nun munton de piedras.»