Lucas 5 - Eibangeilhos en Mirandês

Chamamento de ls purmeiros deciplos

¹ Dou-se l causo que ũa beç, staba el ne l lhago de Genezaré, un grande juntouro de pessonas apertaba-lo alredror para oubir la palabra de Dius

² i biu dous barcos que stában na borda de l lhago anquanto ls pescadores, apuis de se habéren abaixado deilhes, stában a lhabar las redes.

³ Anton, chubiu-se anriba dun barco, que era de Simon, i pediu-le que lo zbiasse un cachico de la borda; i sentando-se, ansinaba d’anriba l barco a todo aquel juntouro de pessonas.

⁴ Quando acabou de falar, dixo-le a Simon: «Bai pa l meio i botai las buossas redes para caçar.»

⁵ Simon respundiu-le, dezindo: «Mestre, andubimos to la nuite a trabalhar i nun agarremos nada, mas yá que tu mandas bou a botar las redes.»

⁶ Mal apenas fazírun l que le mandou, agarrórun tanto, tanto peixe que las redes quaijeque se rumpien.

⁷ Anton, fazírun-le sinales als sous cumpanheiros que stában noutro barco para que los beníran a ajudar. Eilhes benírun i anchírun tanto ls dous barcos que quaijeque se stában a afundar.

⁸ Al ber todas essas cousas, Simon Pedro botou-se als pies de Jasus, dezindo-le: «Sal d’an pie de mi, á Senhor, que you sou un home pecador.»

⁹ Tanto el cumo ls outros que stában cun el quedórun mui pasmados de habéren caçado tanto peixe.

¹⁰ L mesmo se passou cun Tiago i Juan, filhos de Zebedeu, que éran cumpanheiros de Simon. Jasus dixo-le a Simon: «Nun tengas miedo: deiqui palantre serás pescador de homes.»

¹¹ Apuis de habéren lhebado ls barcos para tierra, eilhes deixórun todo i fúrun-se cun el.

Sana un lheproso

¹² Ũa beç, quando staba nũa cierta cidade, habie alhá un home cheno de lhepra que, al ber a Jasus i drobando-se cula cara até la tierra, le pediu dezindo: «Senhor, se tu quejires, puodes lhimpar-me.»

¹³ El stendiu la mano i topou-le, dezindo: «Quiero, queda lhimpo.» I nistante la lhepra zapareciu del.

¹⁴ Apuis dou-le orde pa que nun se lo cuntara a naide, dezindo-le: «Bai, amostra-te al saçardote i, por haberes quedado sano, ouferece l que Moisés mandou, para que sirba de teçtemunho para eilhes.»

¹⁵ Mas inda mais se spalhaba la fama del i ajuntában-se grandes juntouros de pessonas pa lo oubíren i para séren sanadas de ls sous males.

¹⁶ Mas el apartaba-se pa ls zertos i rezaba.

Sana un tolhido

¹⁷ Outra beç, nun desses dies, andaba el a ansinar i stában eilhi sentados fariseus i doutores de la lei, que habien benido de todos ls lhugaricos de la Galileia, de la Judeia i de Jarusalen. I l poder de Dius staba cun el, para sanar.

¹⁸ Ende, uns homes traírun nun catre un home que staba tolhido i andában a ber se éran capazes de antrar i poné-lo delantre del.

¹⁹ I cumo nun achórun modo de lo lhebar por bias de l juntouro de pessonas, chubírun-se a un telhado i, pul meio de las teilhas, abaixórun-lo cul catre até al meio delantre de Jasus.

²⁰ Al ber la fé deilhes, dixo-le: «Home, ls tous pecados quédan perdonados.»

²¹ Ls scribas i ls fariseus lhougo ampeçórun a falar uns culs outros dezindo: «Quien ye este, que diç blasfémias? Quien puode perdonar ls pecados a nun ser Dius?»

²² Jasus, mal se dou de cuonta de ls pensamientos deilhes, respundiu-le dezindo: «Que stais par’ende a pensar ne ls buossos coraçones?

²³ L que ye mais fácele: dezir “Quédan-te perdonados ls tous pecados” ou dezir “Alhebanta-te i camina”?

²⁴ Anton, para que sábades que l Filho de l Home ten, na tierra, l poder de perdonar ls pecados» – dixo-le al que staba tolhido –: «A ti te digo: Alhebanta-te, agarra l tou catre i bai-te pa tue casa.»

²⁵ El lhougo s’alhebantou i, delantre deilhes, agarrou l catre adonde staba deitado i fui-se pa sue casa dando grácias a Dius.

²⁶ Todos quedórun pasmados, dában grácias a Dius i, chenos de miedo, dezien: «Hoije bimos cousas marabilhosas.»

Jasus chama a Lebi i come cun ls publicanos

²⁷ Apuis destas cousas todas, saliu i biu un recebidor de la décima, que le chamában Lebi i staba sentado na sue banca, i dixo-le: «Ben cumigo.»

²⁸ I el, deixando todo, alhebantou-se i fui-se cun el.

²⁹ Anton, Lebi fizo-le ũa grande cenarada an sue casa i habie alhá un grande juntouro de arrecolhedores de la décima i outros que stában cun eilhes a la mesa.

³⁰ Ls fariseus i ls scribas deilhes craticában ls deciplos del dezindo-le: «Porque stais a quemer i a buer culs recebidores de la décima i culs pecadores?»

³¹ Jasus respundiu-le, dezindo: «Ls que stan sanos nun percísan de doutor, mas ls que ténen algun mal.

³² You nun bin para chamar ls justos, mas ls pecadores, para que s’arrepéndan.»

Ls cumbidados de la boda nun ayúnan

³³ Anton eilhes dezírun-le: «Ls deciplos de Juan ayúnan amenudadas bezes i fázen ouraçones, tal i qual cumo ls de ls fariseus, mas ls tous cómen i bében.»

³⁴ Jasus dixo-le a eilhes: «Sodes capazes de fazer ayunar ls cumbidados de las bodas, anquanto l moço stá cun eilhes?

³⁵ Mas ha de benir un die an que le tiraran l moço d’an pie deilhes i ye nesses dies que ayunaran.»

³⁶ Dezie-le apuis, cumo ũa acumparança: «Naide saca un cacho dũa roupa nuoba para botar un remendo nũa roupa bielha, puis queda cul nuobo roto i al bielho nun eiguala bien l remendo de l nuobo.

³⁷ Tamien naide bota bino nuobo an botos bielhos, senó l bino nuobo rompe ls botos i arrama-se i quédan açagados ls botos;

³⁸ assi, l bino nuobo hai que lo botar an botos nuobos.

³⁹ Tamien naide quier bino nuobo apuis d’haber buído de l bielho, pus diç: “L bielho ye melhor.”»