Lucas 4 - Eibangeilhos en Mirandês

Jasus ye atentado pul diabro

¹ Apuis, Jasus, cheno de l Sprito Santo, saliu d’an pie l Jordan i fui lhebado pul Sprito pa l zerto

² por quarenta dies i ende atentou-lo l demonho. Nesse tiempo todo nun quemiu nada mas, passado esse tiempo, dou-le la fame.

³ Ende, dixo-le l diabro: «Se sós l Filho de Dius, diç-le a esta piedra que se faga an pan.»

⁴ I Jasus respundiu-le: «Stá screbido: «Un home nun bibe solo de pan.»

⁵ Anton, lhebou-lo i, por un sfergante, amostrou-le todos ls reinos que hai pul mundo anteiro.

⁶ I dixo-le l diabro: «Darei-te todo este poder i la sue glória, porque me fui antregue a mi i you dou-se-lo a quien you quejir.

⁷ Se me adorares, será todo tou.»

⁸ Respundendo, dixo-le Jasus: «Stá screbido: Adorarás al Senhor tou Dius i solo a el has de serbir.»

⁹ Lhebou-lo apuis a Jarusalen, puso-lo anriba la cucruta de l templo i dixo-le: «Se sós l Filho de Dius, bota-te deiqui abaixo.

¹⁰ Puis stá screbido: Mandará-te ls sous anjos, para que t’ampáren

¹¹ i tamien: Eilhes agarraran-te culas manos para que nun firas ls tous pies na piedra.»

¹² Respundendo, dixo-le Jasus: «Stá dito: Nun atentarás al Senhor tou Dius.»

¹³ Apuis de acabada toda la tentacion, l diabro fui-se ambora d’an pie del por un cierto tiempo.

FEITOS DE JASUS NA GALILEIA Jasus ampeça a eibangelizar

¹⁴ Jasus tornou pa la Galileia lhebado pula fuorça de l Sprito Santo. I la sue fama spalhou-se por toda aqueilha region.

¹⁵ El ansinaba nas sinagogas deilhes i todos falában bien del.

Jasus ye mal recebido na sue tierra

¹⁶ Adepuis, fui-se para Nazaré, adonde habie sido criado, i al sábado, cumo era la questume deilhes, antrou na sinagoga i alhebantou-se para ler.

¹⁷ Dórun-le l lhibro de l porfeta Eisaías i quando abriu l lhibro achou l sítio adonde staba screbido:

¹⁸ L Sprito de l Senhor stá an mi; por esso me scolhiu para eibangelizar ls probes, mandou-me a apregonar la lhibardade als presos i a dar la bista als ciegos, a mandar an lhibardade ls oupremidos,

¹⁹ a pregar l anho aceite pul Senhor.

²⁰ Apuis cerrou l lhibro, tornou-se-lo a dar al repunsable i sentou-se; i ls uolhos de todo mundo na sinagoga stában a mirar par’el.

²¹ Ende, ampeçou-le a dezir: «Hoije mesmo se cumpriu la Scritura que oubistes.»

²² I todo mundo le falaba bien i s’admiraba culas palabras graciosas que salien de la sue boca i dezien: «Nun ye este l filho de Jesé?.»

²³ I el dixo-le: «Ye cierto que me dezireis este dito: “Doutor, sana-te a ti mesmo”; faç tamien eiqui, na tue tierra, todo l que mos cuntórun que habies feito an Cafarnaún.»

²⁴ Dixo-le, apuis: «Quedai bien ciertos de l que bos digo: Nanhun porfeta ye bien recebido na sue tierra.

²⁵ An pura berdade bos digo: Habie muita biúda an Eisrael ne l tiempo d’Eilias, quando l cielo quedou cerrado por trés anhos i seis meses, de modo que houbo ũa fame mui grande por todo l mundo;

²⁶ i a niũa deilhas le fui mandado Eilias, mas solo a ũa mulhier biúda de Sareta de Sidónia.

²⁷ I habie muita giente cun lhepra an Eisrael ne l tiempo de l porfeta Eilias, mas naide fui sano a nun ser l sírio Naaman.»

²⁸ Al oubir estas cousas, todas las pessonas que stában na sinagoga quedórun mui anrabiadas,

²⁹ alhebantórun-se, botórun-lo para fuora de la cidade i lhebórun-lo pa la punta de riba dun cabeço, adonde staba custruída la cidade deilhes, para l botáren deilhi abaixo.

³⁰ Mas el, passando por meio deilhes, fui-se ambora.

Na sinagoga de Cafarnaún

³¹ Apuis, Jasus fui-se pa la cidade de Cafarnaún na Galileia i ansinaba-los als sábados,

³² i quedában mui admirados cula sue doutrina, porque tenie palabras chenas de poder.

³³ Na sinagoga habie un home que tenie l sprito dun demonho malo, que se puso a boziar:

³⁴ «Tu ende, l que tenemos nós a ber cuntigo, á Jasus de Nazaré? Beniste acá para dar cabo de nós? Sei mi bien quien tu sós, l Santo de Dius.»

³⁵ Jasus renhiu-le, dezindo-le: «Calha-te i sal del para fuora.» L demonho botou-lo por tierra, ne l meio de todos, i saliu d’andrento del sien le fazer mal.

³⁶ Todo mundo quedou cheno de miedo i falában uns culs outros, dezindo: «Que palabra ye esta, que até le dá orde als spritos malos, cun outeridade i cun poder, i eilhes sálen pa la rue?»

³⁷ I spalhaba-se la fama del por to las tierras de la region.

Jasus lhibra la suogra de Pedro dun febre

³⁸ Apuis, salindo de la Sinagoga, antrou an casa de Simon. La suogra de Simon staba cun un febron mi grande i pedírun-le por eilha.

³⁹ El, drobando-se porriba deilha, dou-le orde al febre i este deixou-la. Eilha alhebantou-se lhougo i puso-se a serbi-los.

Sana ls que ténen l demonho i outros males

⁴⁰ Al çponer de l sol, to la giente que tenie malos an casa cun qualquiera malina, trouxo-se-los; el ponie-le las manos anriba de cada un i curaba-los.

⁴¹ D’andrento de muita giente salien demonhos que boziában, dezindo: «Tu sós l Filho de Dius.» Mas el renhie-le i nun los deixaba falar, puis sabien que el era l Cristo.

Jasus bai-se ambora de Cafarnaún

⁴² Mal apenas rumpiu l die, fui-se para un sítio sien naide. Mas grandes juntouros de giente andában a saber del. Quando lo achórun agarrórun-lo para que nun se fura ambora d’an pie deilhes.

⁴³ Mas el dixo-le: «Tamien tengo que ir a las outras cidades a anunciar l reino de Dius, puis para esso fui ambiado.»

⁴⁴ I andaba a pregar pulas sinagogas de la Judeia.