Lucas 3 - Eibangeilhos en Mirandês

PURPARAÇON DE L MENISTÉRIO Juan Batista

¹ Quinze anhos apuis de Tibério César ser amperador, sendo Póncio Pilatos gobernador de la Judeia, Harodes gobernador de la Galileia, sou armano Felipe gobernador de la Eitureia i de la Traconídite, i Lizánias, gobernador de Abilena,

² sendo Anás i Caifás ls Sumos Saçardotes, la palabra de Dius fui ambiada a Juan, filho de Zacarias, ne l zerto.

³ Juan andaba por toda la region de l Jordan, apregonando un batismo pa la cumberson i l perdon de ls pecados,

⁴ cumo stá screbido ne l lhibro de l porfeta Eisaías: Hai ũa boç que bózia ne l zerto: Purparai l camino de l Senhor, andreitai ls sous carreirones.

⁵ Todas las baixas seran acobelhadas, todos ls altos i cabeços seran alisados; ls caminos tuortos quedaran dreitos i ls derramados quedaran cumpuostos.

⁶ I toda la criatura berá la salbaçon de Dius.

⁷ Anton, el dezie-le als juntouros de pessonas que benien para séren batizadas por el: «Raça de bíboras, quien bos ansinou a scapar de la rábia que bai a benir?

⁸ Dai fruitos que amóstren que stais arrependidos i nun ampécedes a pensar, “Tenemos a Abraan cumo nuosso pai”, puis digo-bos que Dius puode fazer nacer filhos d’Abraan destas piedras.

⁹ La machada yá stá apuntada a la raiç de la arble i toda l’arble que nun dir fruito será cortada i botada pa l lhume.»

¹⁰ I toda aqueilha giente preguntaba-le a Juan: «L quei tenemos de fazer?»

¹¹ El respundie-le: «Quien tubir dues capas, debe de dar ũa a quien nun ten ningũa i quien tubir quemido faga la mesma cousa.»

¹² Alguns publicanos tamien fúrun alhá pa que ls batizara i preguntórun-le: «Mestre, l quei debemos de fazer?»

¹³ El respundiu-le: «Nun quebreis mais do que l que stubir stabelecido.»

¹⁴ Ls suldados tamien le preguntórun: «I nós, l quei debemos de fazer?» El respundiu-le: «Nun le fágades mal a naide, nun fágades falsas acusaçones i cuntentai-bos cula paga que bos dan.»

¹⁵ Cumo l pobo staba a la spera, preguntaba-se, ne l sou coraçon, se Juan nun serie l Messias.

¹⁶ Juan dixo-le a todos: «You batizo-bos cun auga, mas bai a benir quien ye mais fuorte do que you, alguien a que nien sequiera sou dino de le zatar las correias de ls çapatos. El bai-bos a batizar ne l Sprito Santo i ne l fuogo.

¹⁷ El bai a agarrar na mano ũa pala de lhimpar, para lhimpar las sues eiras i arrecadar l trigo na sue tulha, mas la palha bai-la a queimar nun fuogo que nunca se apaga.»

¹⁸ I, assi, de muita maneira, anunciaba la buona nobidade al pobo.

¹⁹ Mas cinçuraba al gobernador Harodes por bias de Harodíade, mulhier de l armano del, i por muita cousa mala que habie feito,

²⁰ mas el inda fizo ũa mais mala acion, mandou meter a Juan na cadena.

Batizado de Jasus

²¹ Un die, apuis de haber batizado to la giente, de Jasus tamien se haber batizado i quando staba a rezar, abriu-se l cielo

²² i l Sprito Santo abaixou porriba del, an figura de palomba, i de l cielo bieno ũa boç: «Tu sós l miu amado Filho, an ti pongo l miu ancanto.»

Genealogie de Jasus

²³ Quando ampeçou la sue atebidade, Jasus tenie alredror de trinta anhos i, cumo cuidaba todo mundo, era filho de Jesé, filho de Eli,

²⁴ filho de Matat, filho de Lebi, filho de Melqui, filho de Janai, filho de Jesé,

²⁵ filho de Matatias, filho de Amós, filho de Naun, filho de Esli, filho de Nagaí,

²⁶ filho de Maat, filho de Matatias, filho de Semei, filho de Josec, filho de Judá,

²⁷ filho de Joanan, filho de Reça, filho de Zorobabel, filho de Salatiel, filho de Neri,

²⁸ filho de Melqui, filho de Adi, filho de Cozan, filho de Elmadan, filho de Her,

²⁹ filho de Jasus, filho de Eiliézer, filho de Jorin, filho de Matat, filho de Lebi,

³⁰ filho de Simeon, filho de Judá, filho de Jesé, filho de Jonan, filho de Eiliaquin,

³¹ filho de Meleia, filho de Mená, filho de Matatá, filho de Natan, filho de Dabide,

³² Filho de Jessé, filho de Oubed, filho de Booç, filho de Salá, filho de Naaçon,

³³ filho de Aminadabe, filho de Admin, filho de Arni, filho de Esron, filho de Farés, filho de Judá,

³⁴ filho de Jacó, filho de Eisaac, filho de Abraan, filho de Tera, filho de Nacor,

³⁵ filho de Seruc, filho de Ragau, filho de Paleg, filho de Éber, filho de Salá,

³⁶ filho de Quenan, filho de Arfaxad, filho de Sen, filho de Noé, filho de Lamec,

³⁷ filho de Matusalen, filho de Heinoc, filho de Jared, filho de Malaleel, filho de Quenan,

³⁸ filho de Einós, filho de Set, filho de Adan, filho de Dius.