Lucas 23 - Eibangeilhos en Mirandês

Jasus ye antregue a Pilatos

¹ Toda la giente se alhebantou i lhebórun-lo a Pilatos.

² Ampeçórun, anton, a acusá-lo dezindo: «Achemos este a albrotar l nuosso pobo, a nun deixar que se pagasse la décima a César i dezindo que ye Cristo, l rei.»

³ Pilatos anterrogou-lo, preguntando-le: «Tu sós l rei de ls Judius?» El respundiu-le: «Sós tu que l dizes.»

⁴ Anton, Pilatos dixo-le als príncepes de ls saçardotes i al juntouro de pessonas: «Nun acho culpa neste home.»

⁵ Mas eilhes zirrában, dezindo: «El albrota l pobo ansinando por toda la Judeia, a ampeçar na Galileia até eiqui.»

Harodes faç caçuada de Jasus

⁶ Quando oubiu estas cousas, Pilatos preguntou se l home era Galileu

⁷ i, al ber que pertencie al poder de Harodes, mandou-se-lo a Harodes, que nesses dies tamien staba an Jarusalen.

⁸ Quando biu a Jasus, Harodes quedou mui cuntento, puis yá quantá que l querie ber, por bias de l que oubira dezir del i speraba que fazira algun milagre delantre del.

⁹ Anterrogaba-lo cun muita pregunta, mas el nun le respundie nada.

¹⁰ Ls príncepes de ls saçardotes i ls scribas que stában alhá acusában-lo sien parar.

¹¹ Harodes, culs sous suldados, tratou-lo cun çprézio i, por caçuada, mandou-le bestir ũa capa branca i mandou-se-lo a Pilatos.

¹² Nesse mesmo die, Harodes i Pilatos quedórun amigos, puis antes éran einemigos un de l outro.

Ne l tribunal de Pilatos

¹³ Pilatos mandou chamar ls príncepes de ls saçardotes, ls xefes i l pobo

¹⁴ i dixo-le: «Traístes-me este home cumo andando a albrotar l pobo, anterroguei-lo delantre de bós, mas nun achei nel ningun de ls crimes de que lo acusais,

¹⁵ l mesmo se passando cun Harodes, puis mos lo mandou outra beç. Anton, nun beio nel nada que mereça la muorte.

¹⁶ Bou-le a dar un castigo i apuis bou-lo a mandar ambora.»

¹⁷ Pula fiesta de la Páscoa, Pilatos tenie siempre de le sultar un preso.

¹⁸ Mas toda la giente se puso a boziar: «Agarra este i solta-mos a Barrabás!»

¹⁹ Este staba preso por bias dun albrote que armórun na cidade, adonde matórun un home.

²⁰ Mas Pilatos tornou outra beç a falar cun eilhes, querendo lhibartar a Jasus,

²¹ mas eilhes boziában, dezindo: «Curcefica-lo, curcefica-lo!»

²² Aquel, pula treceira beç, dixo-le: «Mas que mal fizo el? Nun achei nel nada que mereça la muorte; por essa rezon, bou-lo a castigar i apuis mando-lo ambora.»

²³ Mas eilhes boziában pedindo que fura curceficado i ls sous bózios crecien cada beç mais.

²⁴ Anton, Pilatos achou que debie de fazer l que eilhes le pedien:

²⁵ Lhibartou l que fura preso por albrote i por muorte, tal i qual cumo eilhes pedien, i antregou-le a Jasus a la buntade deilhes.

Curceficion

²⁶ Quando lo lhebában, agarrórun un cierto Simon de Cirene que benie de l campo i ponírun-le la cruç a las cuostas pa que la lhebara atrás de Jasus.

²⁷ Iba atrás del un grande juntouro de pobo i ũas mulhieres que batien ne l peito i chorában por el.

²⁸ Jasus bolbiu-se para eilhas i dixo-le: «Filhas de Jarusalen, nun chóredes por mi, chorai mas ye por bós i puls buossos filhos,

²⁹ porque bénen ende dies an que deziran: “Felizes las que nun puoden tener filhos, ls bientres que nun girórun i ls peitos que nun dórun lheite!”

³⁰ Nessa altura ampeçaran-le a dezir als montes: “Caí-bos anriba de nós!”, i als cabeços: “Acubri-mos!”,

³¹ porque se trátan assi la madeira berde, l que le passará a la seca?»

³² Lhebában tamien outros dous, para séren muortos cun el.

³³ Quando chegórun a un sítio, que le cháman Calbairo, curceficórun-lo ende i als lhadrones, un a la mano dreita i outro a la mano squierda.

³⁴ Jasus dezie: «Á Pai, perdona-le porque nun sáben l que fázen.» Apuis botórun suortes para debedir ls bestidos del.

³⁵ L pobo staba eilhi a mirar. Ls xefes fazien caçuada del i dezien: «Salbou ls outros; que se salbe a el mesmo, se ye l Cristo de Dius, l scolhido.»

³⁶ Tamien ls suldados fazien caçuada del, achegando-se a la borda pa le dar binagre

³⁷ i dezindo: «Se sós l rei de ls Judius, salba-te a ti mesmo.»

³⁸ Porriba del habie uns dezires: «Este ye l rei de ls Judius.»

³⁹ Un de ls lhadrones que habien sido curceficados cun el trataba-lo mal, dezindo: «Nun sós tu l Cristo? Salba-te a ti i a nós tamien!»

⁴⁰ Mas l outro renhiu cun el, dezindo-le: «Nien sequiera tu temes a Dius, tu que tubiste la mesma cundanaçon?

⁴¹ Al menos cun nós fizo-se justícia, puis recebimos la paga que mereciemos! Mas este nun fizo nada de mal.»

⁴² I pedie: «Jasus, lhembra-te de mi quando antrares ne l tou reino.»

⁴³ El respundiu-le: «Queda bien cierto de l que te digo: Hoije starás cumigo ne l paraíso.»

Muorte de Jasus

⁴⁴ Yá mui acerca de meidie, toda la tierra quedou a las scuras até las trés de la tarde,

⁴⁵ porque l sol habie quedado scuro i l béu de l templo rachou-se al meio.

⁴⁶ Apuis, Jasus dou un grande bózio, dezindo: «Pai, nas tues manos antrego l miu sprito.» Mal apenas acabou de dezir estas palabras, morriu-se.

⁴⁷ Al ber l que se habie passado, l centurion daba grácias a Dius, dezindo: «Rialmente, este home era un justo!»

⁴⁸ Todo l juntouro de pessonas que habie assestido a aquel spetaclo, al ber l que se passara, iba-se ambora batendo ne l peito.

⁴⁹ Todos ls coincidos del i las mulhieres, que habien ido atrás del zde la Galileia, stában al loinge a ber estas cousas.

Sepultura

⁵⁰ Habie un home, que le chamában Jesé i era justo i buono i pertencie al cunceilho,

⁵¹ mas nun habie cuncordado cul cunceilho nien culs feitos deilhes. Era de Arimateia, cidade de ls Judius, i asperaba l reino de Dius.

⁵² Fui-se a tener cun Pilatos i pediu-le l cuorpo de Jasus.

⁵³ Apuis de lo abaixar, ambrulhou-lo nun lhençol i puso-lo nũa sepultura scabada nũa peinha i adonde naide inda habie sido puosto.

⁵⁴ Era l die de la Purparaçon i staba a rumper l die de sábado.

⁵⁵ Las mulhieres, que habien benido cun el zde la Galileia, fúrun tamien i bírun la sepultura i cumo fui puosto l cuorpo del.

⁵⁶ Quando bolbírun, purparórun oulores i unguientos, mas ne l sábado çcansórun cunsante manda la lei.