Lucas 21 - Eibangeilhos en Mirandês

La smola de biúda probe

¹ Alhebantando ls uolhos, biu ls ricos a botar la sue smola na caixa de las smolas de l templo.

² Biu tamien ũa probe biúda a botar alhá dues pequeinhas monedas

³ i dixo: «Quedai bien ciertos de l que bos digo: Esta biúda probe dou mais smola do que ls outros todos.

⁴ Porque aqueilhes todos dórun de smola l que le sobraba, mas esta, de la sue pobreza, dou de smola todo l sou sustento.»

Sermon de ls redadeiros dies Anúncio de la çtruiçon de l templo

⁵ Cumo alguns falában de l templo, de cumo era feito de buona piedra i mui guapo cun tanta oufierta, el dixo:

⁶ «De todas estas cousas que bedes, bai a benir un die an que nun ha de quedar piedra anriba de piedra. Todo será sbarrulhado.»

Ls termientos que ende bénen

⁷ Preguntórun-le, anton: «Mestre, quando se ban a passar essas cousas i qual bai a ser la seinha de que essas cousas se ban a ampeçar a dar?»

⁸ El respundiu-le: «Mirai, nun bos déixedes anganhar. Puis apareceran muitos a dezir an miu nome: “Sou you”, i tamien: “L tiempo stá a chegar.” Nun quérgades ir atrás deilhes.

⁹ Quando oubirdes falar de guerras i reboluçones, nun bos assústedes. Porque ye perciso que estas cousas se déian purmeiro, mas nun será lhougo l fin.»

¹⁰ Apuis dixo-le: «Alhebantará-se pobo contra pobo, reino contra reino;

¹¹ bai a haber grandes terramotos i, puls lhugares, ban a benir fames i malinas; bai a haber cousas de meter muito miedo i grandes sinales de l cielo.

¹² Mas antes de todas estas cousas, ban-bos a botar la mano i a perseguir-bos, antregando-bos a las sinagogas i metendo-bos na cadena, i ban-bos a lhebar delantre de ls reis i de ls gobernadores por bias de l miu nome;

¹³ mas estas cousas passaran-se para dardes teçtemunho.

¹⁴ Ponei ne l buossos coraçones l’eideia de que nun debeis de star preacupados cun l que heis de respunder;

¹⁵ you darei-bos boca i sabedorie, de modo que nun poderan rejistir nien cuntradezir-bos ls que stubíren contra bós.

¹⁶ Até sereis antregues puls buossos pais, armanos, parientes i amigos, i alguns de bós seran muortos,

¹⁷ i sereis malqueridos por todo mundo, por bias de l miu nome.

¹⁸ Mas nien un pelo de la buossa cabeça se perderá.

¹⁹ Cula buossa pacéncia salbareis las buossas almas.»

La zgrácia de la Judeia i l termiento final

²⁰ «Mas quando birdes Jarusalen circada pul eisército, anton quedai a saber que stá acerca la sue fin.

²¹ Nessa altura, ls que stubíren na Judeia, scápen-se pa ls montes; ls que stubíren ne l meio de la cidade, sálan para fuora; i ls que andubíren pul termo, nun éntren neilha.

²² Porque estes son dies de bingança, para que se cúmpran todas las cousas que stan scritas.

²³ Ai daqueilhas que stubíren preinhas i de las que stubíren a criar naqueilhes dies! Puis haberá ũa grande agonia na tierra i rábia contra este pobo,

²⁴ cairan cul filo de la spada, seran lhebados prijoneiros para todas las naçones i Jarusalen será apatulhada puls gentius, até que eilhes acáben l sou tiempo.»

La benida de l filho de l home

²⁵ «Haberá sinales ne l sol, na lhuna i nas streilhas i na tierra ũa grande agonie de las naçones amedrancadas cul bruído de l mar i de las óndias,

²⁶ morrendo-se las pessonas cun grima i a spera de l que le bai a passar al mundo, puis las fuorças de l cielo lhebaran un abanon baliente.

²⁷ Nessa altura han-de ber l Filho de l Home a benir anriba dũa nubre, cun poder i grande glória.

²⁸ Quando estas cousas se ampeçáren a dar, mirai parriba i alhebantai las buossas cabeças, porque la buossa salbaçon stá acerca.»

Stai cun atento, puis nun sabeis la hora

²⁹ Anton cuntou-le ũa parábola: «Mirai la figueira i todas las outras arbles:

³⁰ apuis de habéren arrebentado, bós mesmos sabeis que l berano yá ben acerca.

³¹ Assi, tamien bós, quando birdes que se pássan estas cousas, sabereis que stá acerca l reino de Dius.

³² Quedai bien ciertos de l que bos digo: Nun se passará esta giraçon, sien que todas estas cousas se déian.

³³ L cielo i la tierra passaran, mas las mies palabras nun han de passar.

³⁴ Fazei por bós, para que ls buossos coraçones nun quéden carregados de comezainas, borracheiras i de ls cuidados desta bida i que aquel die benga i bos agarre çprebenidos,

³⁵ porque ha de benir cumo un lhaço porriba de todos ls que móran na tierra.

³⁶ Quedai a belar i a rezar sien parar, para que puodades scapar a todas estas cousas que se ban a dar, de star bien firmes delantre de l Filho de l Home.»

³⁷ Pul die staba ne l templo a ansinar, mas de nuite salie para un cabeço que le chamában de las Oulibeiras.

³⁸ Todo l pobo madrugaba i iba a tener cun el al templo, pa l oubir.