Lucas 2 - Eibangeilhos en Mirandês

L nacimiento de Jasus

¹ Por aqueilhes dies, saliu ũa lei de l amperador César Agusto a mandar registrar toda la giente de l ampério.

² Este purmeiro registro fui feito quando Quirino era gobernador de la Síria.

³ Todos se íban a registrar, cada un na sue cidade.

⁴ Tamien Jesé bieno de la cidade de Nazaré, na Galileia, até a la cidade de Dabide, que se chamaba Belen i quedaba na Judeia, porque era de la casa i família de Dabide,

⁵ para se registrar cun Marie, sue mulhier, que staba preinha.

⁶ Anquanto stában alhá, bieno l tiempo

⁷ i eilha tubo l sou filho morgado i puso-lo nũa majadoura ambrulhado an panhos, puis yá nun habie campo para eilhes na stalaige.

⁸ Para aqueilhes lhados habie uns pastores que passában la nuite pul termo, a guardar l ganado.

⁹ Anton, apareciu-le l anjo de l Senhor i la glória de Dius relhuziu alredror deilhes i quedórun chenos de miedo.

¹⁰ Mas l anjo dixo-le: «Nun téngades miedo, puis traio-bos ũa grande alegrie que será tamien pa l pobo todo:

¹¹ hoije, na cidade de Dabide, naciu-bos un salbador que ye Cristo Senhor.

¹² Este será para bós la seinha: achareis un nino ambrulhado an panhos i deitado nũa majadoura.»

¹³ Adepuis, ajuntou-se al anjo ũa multidon de l eisército de l cielo, lhoubando a Dius i dezindo:

¹⁴ «Glória a Dius nas alturas i paç na tierra als homes, que el ama.»

¹⁵ Quando ls anjos se fúrun ambora, pa l cielo, ls pastores dezírun uns pa ls outros: «Bamos até Belen a ber l que ye que se passou i mos fui anformado.»

¹⁶ Fúrun todos, mui delgeiros, i achórun a Marie, a Jesé i al nino deitado na majadoura.

¹⁷ Quando l bírun, cuntórun l que l anjo le habie dezido a respeito de l nino.

¹⁸ I todos ls que oubien ls pastores quedában admirados cun l que eilhes cuntában,

¹⁹ mas Marie guardaba todas essas cousas i pensaba subre eilhas ne l sou coraçon.

²⁰ Ls pastores fúrun-se ambora dando grácias i lhoubando a Dius por todo l que habien bido i oubido, cumo le habie sido anunciado pul anjo.

Simeon i Ana dan teçtemunho de Jasus

²¹ Quando passórun ls uito dies pa la circuncison de l nino, ponírun-le l nome de Jasus, cumo habie sido chamado pul anjo antes de star na barriga de la mai.

²² Acabados ls dies de la sue purficaçon, cumo manda la lei de Moisés, lhebórun l nino a Jarusalen, pa l apersentáren al Senhor,

²³ cumo stá screbido na lei de Moisés: Todo l purmeiro filho, que seia home, será cunsagrado al Senhor,

²⁴ i para ouferecéren, cumo stá screbido na lei de l Senhor, un sacrafício dũa pareilha de rolas ou dous palumbicos.

²⁵ Moraba an Jarusalen un home que le chamában Simeon, que era justo i piadoso i asperaba la cunselaçon d’Eisrael i l Sprito Santo staba cun el.

²⁶ L Sprito Santo habie-le rebelado a Simeon que nun s’iba a morrer sien purmeiro ber l Messias pormetido pul Senhor.

²⁷ Ampurrado pul Sprito, Simeon fui al templo. Quando ls sous pais lhebórun l Menino Jasus para cumpríren l que mandaba la lei a respeito deilhes,

²⁸ Simeon agarrou-lo ne ls sous braços, lhoubando a Dius i dezindo:

²⁹ «Agora, Senhor, yá puodes deixar ir l tou serbo an paç, cunsante la tue palabra,

³⁰ porque ls mius uolhos bírun la salbaçon,

³¹ que purpareste para todos ls pobos,

³² lhuç para alhumbrar las naçones i glória de l tou pobo, Eisrael.»

³³ L pai i la mai de l nino stában mui admirados cun l que se dezie del.

³⁴ Simeon abençonou-los i dixo-le a Marie, mai de l nino: «Este Nino bai a ser la rezon de la caída i de l albante de muitos an Eisrael i bai a ser ũa seinha de cuntradiçon;

³⁵ a ti ũa spada bai-te a atrabessar l’alma, para que séian amostrados ls pensamientos de muitos coraçones.»

³⁶ Habie tamien ũa porfetisa que le chamában Ana, yá mui belhica, que era filha de Fanuel, de la tribo de Azer. Habie-se casado mui nuoba i bibira siete anhos cul sou home.

³⁷ Adepuis, quedou biúda i assi bibiu até als uitenta i quatro anhos. Nunca salie de l Templo, serbindo a Dius de nuite i de die, cun ayunos i ouraçones.

³⁸ Eilha chegou nesse antretiempo i puso-se a lhoubar a Dius i a falar de l nino a todos ls que asperában la lhibartaçon de Jarusalen.

³⁹ Quando cumprírun todo l que mandaba la lei de l Senhor, tornórun pa la Galileia, pa la sue cidade de Nazaré.

⁴⁰ L rapazico crecie i iba quedando fuorte, cheno de sabedorie i la grácia de Dius staba cun el.

L Menino Jasus ne l meio de ls doutores

⁴¹ Ls pais del íban to ls anhos a Jarusalen, pa la fiesta de la Páscoa.

⁴² Quando l mocico fizo doze anhos, fúrun a la fiesta, cumo questumado.

⁴³ Passados esses dies, bolbírun para casa, mas l filho quedou an Jarusalen sien que ls pais del se díran de cuonta.

⁴⁴ Cuidando que el benie na carabana, apuis dun die de camino, ampeçórun a saber del antre ls parientes i ls coincidos.

⁴⁵ Mas, cumo nun l achórun, bolbírun a Jarusalen a saber del.

⁴⁶ Trés dies apuis, achórun-lo ne l Templo, sentado ne l meio de ls doutores, a oubi-los i a poné-le preguntas.

⁴⁷ Quien lo oubie quedaba admirado cula sue anteligença i culas sues repuostas.

⁴⁸ Quando l bírun, quedórun mui admirados i la mai dixo-le: «Filho, porque mos faziste estas cousas? You i tou pai andábamos mui agoniados a saber de ti.»

⁴⁹ «Para que andábades a saber de mi? Nun sabiedes que you tengo que star na casa de miu pai?»

⁵⁰ Mas eilhes nun antendírun l que el le dixo.

⁵¹ Apuis, abaixou cun eilhes i tornou para Nazaré, sendo mui oubediente. La mai guardaba estas cousas todas ne l sou coraçon.

⁵² I Jasus crecie, an altura i an grácia, delantre de Dius i de ls homes.