Lucas 19 - Eibangeilhos en Mirandês

Jasus an casa de l publicano Zaqueu

¹ Habendo antrado an Jericó, iba-la atrabessando.

² Moraba alhá un home que le chamában Zaqueu, que era mui rico i era xefe de ls publicanos.

³ Andaba a ber quien era Jasus, mas nun era capaç por bias de la muita giente, porque era mui baixico de altura.

⁴ Botou-se a correr pa la delantreira i chubiu-se a ũa figueira braba, para l ber, puis habie de passar puli.

⁵ Quando chegou a esse sítio, Jasus alhebantou ls uolhos i dixo-le: «Zaqueu, abaixa dende debrebe, que hoije tengo de quedar an tue casa.»

⁶ El abaixou-se lhougo i recebiu-lo todo cuntento.

⁷ Al béren essas cousas, todos falában antre eilhes dezindo: «Bai a quedar an casa de un pecador!»

⁸ Anton, Zaqueu puso-se de pies i dixo-le al Senhor: «Senhor, bou-le a dar metade de ls mius bienes als probes i, se perjudiquei alguien an algũa cousa, darei-le quatro bezes mais.»

⁹ Jasus dixo-le: «Hoije bieno la salbacion a esta casa, puis este tamien ye filho de Abraan;

¹⁰ porque l Filho de l Home bieno a salbar i a saber de l que staba perdido.»

Parábola de l denheiro antregue

¹¹ Quando stában a oubir estas cousas, Jasus dixo-le inda ũa parábola, porque staba acerca de Jarusalen i por eilhes pensáren que l reino de Dius iba lhougo a benir.

¹² Dixo-le anton: «Un cierto home nobre fui-se a ũa tierra mui loinge para tomar puosse dun reino i apuis tornar.

¹³ Habendo chamado dieç de ls sous criados, dou-le a cada un dieç minas i dixo-le: “Fazei negócio, até que you benga.”

¹⁴ Mas l pobo nun gustaba nada del i mandou ũa quemisson atrás del a dezi-le: “Nun queremos que este seia l nuosso rei!”

¹⁵ Quando tornou, apuis de haber tomado puosse de l reino, mandou chamar ls criados a quien le antregara l denheiro, para saber quanto habie ganho cada un deilhes.

¹⁶ Apersentou-se l purmeiro i dixo: “Senhor, la tue mina rendiu dieç minas.”

¹⁷ El dixo-le: “Baliente, criado buono; yá que fuste fiél an cousa tan pequeinha, bás a tener poder subre dieç cidades.”

¹⁸ Chegou l segundo i dixo-le: “Senhor, la tue mina rendiu cinco minas.”

¹⁹ I a este dixo-le: “Tu quedas cun l poder subre cinco cidades.”

²⁰ Bieno outro i dixo-le: “Senhor, eiqui stá la tue mina, que la guardei nun lhenço;

²¹ tube grima de ti, que sós un home rigoroso, apanhas l que nun poniste i segas l que nun sembreste.”

²² El dixo-le: “Pula tue boca te bou a julgar, criado malo! Sabies que sou un home rigoroso, que apanho l que nun pus i sego l que nun sembrei?

²³ Anton porque nun metiste l denheiro ne l banco? Quando bolbisse, tenerie-lo sacado cun juros.”

²⁴ I dixo-le als que stában eilhi: “Tirai-le la mina i dai-se-la al que ten dieç.”

²⁵ Eilhes dezírun-le: “Senhor, mas el yá ten dieç minas!”

²⁶ Digo-bos you: “Al que ten ha de se le dar, mas al que nun ten até l que ten le tiraran.

²⁷ Quanto a esses mius einemigos, que nun quejírun que you reinara subre eilhes, traiei-los acá i matai-los eiqui delantre de mi.”»

REDADEIRO MENISTÉRIO AN JARUSALEN Çcuçones an Jarusalen Jasus entra an Jarusalen

²⁸ Quando acabou de dezir estas cousas, cuntinou al palantre chubindo para Jarusalen.

²⁹ Al chegar acerca de Betfagé i de Betánia, an pie dun cabeço que le cháman de las Oulibeiras, mandou dous deciplos,

³⁰ dezindo-le: «Ide a l’aldé que queda an frente i, mal apenas éntredes neilha, ides a achar un burrico preso, que inda naide se chubiu anriba del; soltai-lo i traei-me-lo.

³¹ I se bos preguntáren: “Porque lo stais a soltar?”, respundereis-le assi: “L Senhor ten percison del.”»

³² Alhá se fúrun ls que habie mandado i achórun todo cumo el le dezira.

³³ Quanto stában a soltar l burrico, ls duonhos dezírun-le: «Porque stais a soltar l burranco?»

³⁴ Eilhes respundírun-le: «L Senhor ten percison del.»

³⁵ Apuis, lhebórun-se-lo a Jasus i, botando las capas deilhes porriba l burrico, chubírun a Jasus anriba.

³⁶ Anquanto iba andando, stendien las capas ne l camino.

³⁷ Quando yá staba acerca de la costielha de l Cabeço de las Oulibeiras, todos ls deciplos, mui cuntentos, ampeçórun a dar lhoubores a Dius, boziando muito, por todos ls milagres que habien bido,

³⁸ dezindo: «Bendito l Rei que ben an nome de l Senhor! Paç ne l cielo i glória nas alturas!»

³⁹ Alguns fariseus dezírun-le, de l meio daqueilha giente toda: «Mestre, reinhe culs tous deciplos!»

⁴⁰ Jasus respundiu-le: «Digo-bos l you: Se eilhes se calháren, boziaran las piedras.»

Anúncio de la çtruiçon de Jarusalen

⁴¹ Quando se achegou a la borda, al ber la cidade, chorou subre eilha

⁴² dezindo: «Se tamien tu, al menos neste die, coinciras aquel que te puode traier la paç! Mas agora estas cousas stan scundidas de ls tous uolhos.

⁴³ Porque bénen ende dies an que ls tous einemigos te ban a arrodiar cun galatones, a deixá-te sien salida i a apertá-te por todos ls lhados;

⁴⁴ ban-te a sbarrulhar a ti i als tous filhos, que stan andrento de ti, i nun ban a deixar piedra anriba de piedra, porque nun coinciste l tiempo an que fuste bejitada.»

Jasus bota ls bendedores para fuora de l templo

⁴⁵ Adepuis, antrou ne l templo i ampeçou a mandar ambora ls bendedores

⁴⁶ dezindo-le: «Stá screbido: La mie casa será ũa casa de ouraçon. Mas bós fazistes deilha un buraco de lhadrones.»

⁴⁷ Staba todos ls dies a ansinar ne l templo. Ls príncepes de ls saçardotes i ls scribas i ls percipales de l pobo, buscában modo de dar cunta del

⁴⁸ mas nun sabien cumo habien de fazer, puis todo l pobo quedaba ambelado a oubi-lo.