Lucas 17 - Eibangeilhos en Mirandês

Ls pequerricos nun dében de ser scandelizados

¹ Dixo-le als sous deciplos: «Ye ampossible que nun haba scándalos, mas zgraciado de l que trair l scándalo.

² Mais balie que le atáran ũa piedra de molino al cachaço i l botáran al mar, do que fazer tropeçar un destes mais pequerrixos.

³ Mirai por bós mesmos.» «Se tou armano fazir algo de mal contra ti, reinhe-le i, se el s’arrependir, perdona-le.

L perdon de ls pecados al armano

⁴ Se el fazir algo de mal contra ti siete bezes al die i se siete bezes al die benir a tener cuntigo, dezindo, “arrependo-me”, perdona-le.»

La bertude de la fé

⁵ Anton, ls apóstelos dezírun-le al Senhor: «Acrecenta-mos la nuossa fé.»

⁶ I l Senhor dixo-le: «Se tubirdes fé cumo un grano de mostarda, dezireis a esta moreira “arrinca-te deiqui i pon-te ne l mar” i eilha oubedecerá-bos.

Parábola de l criado einútele

⁷ Quien ye que, tenendo un criado a arar ou cul ganado pul campo, le diç quando el bolbir de l campo, “achega-te i senta-te a la mesa?”,

⁸ i nun le dezirá, an beç dessas palabras, “purpara-me la cena, lhaba-te i sirbe-me i, apuis de you haber quemido i buído, quemerás i buberás tu?”

⁹ Achais que debe de quedar agradecido a esse criado porque fizo l que le mandou? Cuido que nó.

¹⁰ Tamien bós, quando fazirdes todo l que bos mandórun, dezi: “Somos criados que nun serbimos para nada, porque nun fazimos mais nada que l que debiemos de fazer.”»

Un samaritano sanado dá grácias

¹¹ Quando iba a camino de Jarusalen, passou pul meio de la Samarie i de la Galileia.

¹² Antrou nun lhugar i salírun-le al camino dieç homes, chenos de lhepra, que parórun quando inda stában loinge.

¹³ Anton, boziórun-le, dezindo: «Jasus, Mestre, ten mezericórdia de nós.»

¹⁴ El, bendo-los, dixo-le: «Ide-bos ambora i amostrai-bos als saçardotes.» Quando eilhes s’íban ambora quedórun lhimpos.

¹⁵ Un deilhes, al ber que staba sano, tornou al para trás, als bózios, dando grácias a Dius.

¹⁶ Atirou-se als pies del, cula cara acontra la tierra, agradecendo-le. El era samaritano.

¹⁷ Jasus preguntou-le: «Nun éran dieç ls que quedórun sanos? Anton, adonde stan ls outros nuobe?

¹⁸ Nun houbo naide que tornasse a dar grácias a Dius a nun ser este strangeiro?»

¹⁹ I dixo-le: «Alhebanta-te i bai-te ambora. Fui la tue fé que te salbou.»

La benida de l Reino de Dius

²⁰ Sendo-le preguntado puls fariseus quando iba a benir l reino de Dius, respundiu-le dezindo: «L reino de Dius nun ben de modo que se beia.

²¹ Nien deziran: “Stá eiqui” ou “stá eilhi”, porque l reino de Dius stá ne l meio de bós.»

La benida de l filho de l home

²² I dixo-le als deciplos: «Ha de benir un tiempo an que heis de querer ber un de ls dies de l Filho de l Home i nun lo heis de ber.

²³ I deziran-bos: “Stá eiqui” ou “Stá eilhi.” Nun báiades alhá, nien báiades atrás del.

²⁴ Porque, assi cumo l relhampo alhumbra dũa punta de l cielo até la outra, assi tamien será l Filho de l Home ne l sou die.

²⁵ Mas, purmeiro, cumben que padeça muito i seia cundanado por esta giraçon.

²⁶ Tal i qual cumo se passou ne ls dies de Noé, tamien assi se passará ne ls dies de l Filho de l Home.

²⁷ Quemien, buien, casában-se uns culs outros, até al die an que Noé antrou na arca i bieno l delúbio i ls afogou a todos.

²⁸ Fui la mesma cousa que se passou ne ls dies de Lot: quemien, buien, cumprában, bendien, ponien i custruien.

²⁹ Mas ne l die an que Lot saliu de Sodoma, chobiu de l cielo fuogo i alxofre que los queimou a todos.

³⁰ Será la mesma cousa ne l die an que l Filho de l Home aparecir.

³¹ Nesse die, quien stubir ne l telhado, tenendo las sues ferramientas an casa, nun abaixe a saber deilhas i quien stubir ne l campo, nun torne atrás.

³² Lhembrai-bos de la mulhier de Lot.

³³ Quien andubir a saber dun modo de salbar la sue bida, perderá-la i quien la perdir, salbará-la.

³⁴ Digo-bos you que, nessa nuite, staran dous nũa cama i un será agarrado i l outro será deixado.

³⁵ Dues mulhieres staran juntas a moler, ũa será agarrada i la outra será deixada.

³⁶ Staran dous ne l campo, un será agarrado i l outro será deixado.»

³⁷ Anton, eilhes dezírun-le: «Adonde, Senhor?» I el dixo-le: «Adonde stubir l cuorpo, ende s’ajuntaran ls alcaforros.»