Lucas 15 - Eibangeilhos en Mirandês

Parábola de la canhona perdida i de la moneda achada

¹ Achegában-se a el todos ls arrecolhedores de la décima i ls pecadores pa lo oubíren.

² Ls fariseus i ls scribas falában mal antre eilhes, dezindo: «Este recibe ls pecadores i bibe cun eilhes.»

³ El aperpuso-le esta parábola, dezindo-le:

⁴ «Qual ye l home, de todos bós, que tenendo cien canhonas i habendo pedido ũa deilhas, nun deixa ne l campo las nobenta i nuobe i se bai a saber de la perdida até que adregue a achá-la?

⁵ Mal apenas la ache, pon-la als ombros, mui cuntento.

⁶ Al chegar a casa, chama ls amigos i bezinos, dezindo-le: “Cuntentai-bos cumigo, puis yá achei la canhona que se m’habie perdido.”

⁷ Digo-bos you que tamien assi haberá alegrie ne l cielo por un pecador que s’arrepende, mais do que por nobenta i nuobe justos que nun percísan de s’arrepender.

⁸ Ou, anton, qual ye la mulhier que, tenendo dieç monedas, se perdir ũa deilhas, nun acende la candela i barre la casa cun todo l cuidado até que la ache?

⁹ Mal apenas la ache, chama las amigas i las bezinas, dezindo-le: “Cuntentai-bos cumigo, porque yá achei la moneda que habie perdido.”

¹⁰ Digo-bos you que tamien assi hai alegrie delantre de ls anjos de Dius por un pecador que s’arrepende.»

Parábola de l filho pródigo

¹¹ Dixo-le tamien: «Habie un home que tenie dous filhos.

¹² L mais moço de ls dous, dixo-le al pai: “Pai, dá-me la parte de ls bienes que me toca.” El, anton, repartiu por eilhes ls bienes.

¹³ Poucos dies apuis, l filho mais nuobo ajuntou todo i fui-se pul mundo, por ende dando cuonta de ls sous bienes nũa bida sien tino.

¹⁴ Apuis de el haber gastado todo, houbo na tierra adonde staba ũa fame mi grande i el ampeçou a passar mal.

¹⁵ Un die fui a serbir para ũa persona desse lhugar que l mandou pa las tierras cun ũa bezeira de cochinos.

¹⁶ El bien querie anchir la barriga culas belhotras que ls cochinos quemien, mas naide le daba nada.

¹⁷ Un die, botou-se de cuontas i dixo: “Quanto oubreiro de miu pai ten pan a la farta i you eiqui a morrer a la fame!

¹⁸ Bou-me mas ye a tener cun miu pai i digo-le: Pai, pequei contra l cielo i contra ti;

¹⁹ Yá nun mereço que me chames tou filho, trata-me cumo un de ls tous oubreiros.”

²⁰ Apuis, alhebantou-se i fui-se a tener cul pai. Quando inda benie loinge, l pai biu-lo, quedou cheno de pena del i botou-se a fugir, atirando-se-le al cachaço i beisando-lo.

²¹ L filho dixo-le: “Pai, pequei contra l cielo i contra ti, yá nun mereço que me chames tou filho.”

²² Mas l pai dixo-le als sous criados: “Traiei debrebe la melhor roupa i besti-se-la, ponei-le un anielho na mano i alparagatas ne ls pies;

²³ i traiei l bitelo mais cebado i matai-lo; bamos a quemer i a quedar mui cuntentos;

²⁴ puis este miu filho staba muorto i tornou a bibir, habie-se perdido i tornou-se a achar.” I ampeçórun a quedar mui cuntentos.

²⁵ L filho mais bielho andaba pul campo i, quando chegou a casa, oubiu la música i l baile.

²⁶ Anton, chamou un de ls criados i preguntou-le l que se passaba.

²⁷ El cuntou-le: “Bieno tou armano i tou pai matou l bitelo cebado, porque chegou salbo i cun salude.”

²⁸ El quedou mui anrabiado i nun querie antrar. Anton, l pai saliu a la rue a ber se l cumbencie.

²⁹ Mas el respundiu-le al pai, dezindo: “Yá stou a trabalhar para ti bai para tanto anho, sien nunca deixar de fazer l que me mandeste i nunca me deste sequiera un chibo para fazer ũa fiesta culs mius amigos.

³⁰ Mas a este tou filho, que dou cuonta de la tue fazienda cun putas, mal apenas chegou, mateste-le l bitelo cebado.”

³¹ I el dixo-le: “Filho, tu stás siempre cumigo i todo l que ye miu, ye tou;

³² Mas era perciso que quedáramos cuntentos i fazíramos ũa fiesta, porque tou armano staba muorto i tornou a bibir, habie-se perdido i achou-se.”»