Lucas 1 - Eibangeilhos en Mirandês

ANTRADA

¹ Assi cumo muitas pessonas yá quejírun screbir la stória de ls feitos que se passórun antre nós,

² tal i qual cumo mos fúrun cuntados puls que, zde l ampeço, ls bírun culs sous uolhos i fúrun menistros de la palabra,

³ tamien you, apuis de haber studado cun atento todo l que se passou zde l ampeço, resolbi screbir-te todo pula orde an que se passou, eilustre Teófilo,

⁴ para que beias la fortaleza de l ansino que recebiste.

L’ANFÁNCIA DE JASUS Anúncio de l nacimiento de Juan Batista

⁵ Al tiempo de Harodes, rei de la Judeia, houbo un saçardote chamado Zacarias, de la classe de Abias. La sue tie chamaba-se Sabel i era decendiente de Aaron.

⁶ Dambos a dous éran justos delantre de Dius, oubedecendo a todos ls mandamentos i ordes de l Senhor.

⁷ Nun tenien filhos, puis Sabel nun podie tener filhos i dambos a dous tenien ũa eidade abançada.

⁸ Un die, an que Zacarias staba nas sues funciones de saçardote delantre de Dius, puis era la beç de la sue classe,

⁹ tocou-le a el, cunsante las suortes de questume antre ls saçardotes, a antrar ne l Santuairo de l Senhor para queimar l ansénsio.

¹⁰ A la hora de l ansénsio, todo l pobo staba fuora a rezar.

¹¹ Ende, apareciu-le un anjo de l Senhor, de pies, a la dreita de l altar de l ansénsio.

¹² Assi que l biu, Zacarias quedou alboriçado i amedrancado.

¹³ Mas l anjo dixo-le: «Nun tengas miedo, Zacarias, porque l tou pedido fui atendido i la tue mulhier, Sabel, parirá un filho i bás-le a poner l nome de Juan.

¹⁴ Quedarás mui cuntento i feliç i muita giente quedará tamien cuntenta cul sou nacimiento,

¹⁵ puis el será grande delantre de l Senhor. Nun buberá nien bino nien qualquiera outra buída alcólica i, zde andrento la barriga de la mai, andará cheno de l Sprito Santo,

¹⁶ traiendo outra beç al Senhor, sou Dius, muitos filhos d’Eisrael.

¹⁷ Caminará delantre deilhes, cul sprito i l poder d’Eilias, para cumbertir ls coraçones de ls pais als filhos i als que nun ténen fé a la sabedorie de ls justos, purparando pa l Senhor un pobo bien çpuosto.»

¹⁸ Zacarias dixo-le al anjo: «Cumo se puoden dar essas cousas, se you yá sou bielho i la mie tie antrada an eidade?»

¹⁹ L anjo respundiu-le: «You sou Grabiel, que stou siempre delantre de Dius i fui mandado para que te falara i dira esta buona notícia.

²⁰ Yá que nun acraditeste nas mies palabras, que se cumpriran a sou tiempo, bás a quedar tato, sien poder falar, até al die an que todas estas cousas se passáren.»

²¹ L pobo asperaba a Zacarias, yá mui admirado por el tardar tanto andentro de l Santuairo.

²² Quando saliu nun le podie falar i eilhes antendírun que el habie tubido ũa bison ne l Santuairo. Fazie-le sinales, mas cuntinaba mudo.

²³ A la fin de ls sous dies de serbício, Zacarias tornou pa sue casa.

²⁴ Passados estes dies, la sue tie Sabel quedou preinha i andubo cinco meses a scundé-se, dezindo:

²⁵ «Mirai l que l Senhor me fizo, ne ls dies an que quijo tirar-me de ser l çprézio de las pessonas.»

Anúncio de l nacimiento de Jasus

²⁶ Al sesto més, l anjo Grabiel fui ambiado por Dius a ũa cidade de la Galileia chamada Nazaré,

²⁷ a ũa birge que le chamában Marie i que era moça dun home chamado Jesé, de la casa de Dabide.

²⁸ Apuis d’antrar an casa deilha, dixo-le l anjo: «Abe, á chena de grácia, l Senhor stá cuntigo, bendita sós antre las mulhieres.»

²⁹ Al oubir estas palabras, eilha quedou pensatible i preguntaba-se a eilha mesma l quei quererie dezir aquel saludo.

³⁰ L anjo dixo-le: «Nun tengas miedo, Marie, puis acheste grácia delantre de Dius.

³¹ Bás a quedar preinha i a parir un filho i bás-le a poner l nome de Jasus.

³² El será grande i bai-se a chamar Filho de l Altíssemo i l Senhor Dius dará-le l trono de sou pai Dabide,

³³ reinará eiternamente na casa de Jacó i l sou reinado nun tenerá fin.»

³⁴ Marie dixo-le al anjo: «Cumo se ban a passar essas cousas se you nun bibo cun ningun home?»

³⁵ L anjo respundiu-le: «L Sprito Santo benirá subre ti i la fuorça de l Altíssemo bai-te a acubrir cula sue selombra. Ye por essa rezon que l santo que bai a nacer de ti será chamado Filho de Dius.

³⁶ Tamien la tue parienta Sabel, anque seia bielha i todos dezíran que nun podie tener filhos, cuncebiu un filho i yá bai ne l sesto més,

³⁷ puis para Dius nada ye ampossible.»

³⁸ Marie dixo-le, anton, al anjo: «Eiqui stá la scraba de l Senhor, faga-se an mi cunsante la tue palabra.» I l anjo fui-se d’an pie deilha.

Marie besita a Sabel

³⁹ Por aqueilhes dies, Marie metiu-se pul camino de ls montes i fui mui delgeira a ũa cidade de Judá.

⁴⁰ Antrou an casa de Zacarias i saludou Sabel.

⁴¹ Assi que Sabel oubiu l saludo de Marie, l nino saltou de cuntento na sue barriga i eilha quedou chena de l Sprito Santo

⁴² dezindo an alta boç: «Bendita sós tu antre las mulhieres i bendito ye l fruito de l tou bientre.

⁴³ D’adonde me ben la honra de ser bejitada pula mai de l miu Senhor?

⁴⁴ Assi que oubi l tou saludo, l nino saltou de cuntento andrento de mi.

⁴⁵ Feliç seia aqueilha que acraditou que se passaran las cousas que le fúrun dezidas pul Senhor.»

⁴⁶ Anton, dixo-le Marie: «La mie alma canta la grandeza de l Senhor

⁴⁷ i l miu sprito inche-se de cuntentamiento an Dius, miu Salbador,

⁴⁸ porque mirou pa l’houmilde cundiçon desta sue criada. Deiqui palantre, to las giraçones me chamaran bienabinturada,

⁴⁹ porque l todo poderoso fizo an mi grandes cousas. L sou nome ye santo

⁵⁰ i la sue mezericórdia chega a todos ls que lo témen, de giraçon an giraçon.

⁵¹ El fizo cousas balientes cul sou braço: dou cabo de ls que tenien l coraçon cheno de sobérbia;

⁵² botou abaixo de l trono als poderosos i dou-le fuorça als houmildes;

⁵³ anchiu de cousas buonas als que tenien fame i mandou ambora als ricos sien nada;

⁵⁴ amparou a Eisrael, sou criado, lhembrando-se de la sue mezericórdia,

⁵⁵ tal cumo le habie dezido als nuossos pais, a Abraan i als sous decendientes, para siempre.»

Nacimiento de Juan Batista

⁵⁶ Marie quedou arrimado a trés meses cun Sabel i apuis tornou para sue casa.

⁵⁷ Acabado l tiempo de Sabel, eilha tubo un filho.

⁵⁸ Ls sous bezinos i parientes, quando soubírun que l Senhor habie amostrado an Sabel la sue mezericórdia, quedórun mui cuntentos cun eilha.

⁵⁹ Als uito dies de l nacimiento, fúrun a circuncidar l nino i querien-le chamar Zacarias, cumo l pai,

⁶⁰ mas la mai lhougo dixo: «Nó, bai-se a chamar Juan.»

⁶¹ Dezírun-le, anton: «Mas nun hai naide na tue família cun esse nome!»

⁶² Apuis, por sinales, preguntórun-le al pai que nome le querie poner.

⁶³ El pediu ũa trabica i screbiu: «L nome del ye Juan.» I todos quedórun mui admirados.

⁶⁴ Ende, abriu-se-le la boca i sultou-se-le la lhéngua, ampeçando a falar i lhoubando l Senhor.

⁶⁵ Al ber essas cousas, ls bezinos deilhes quedórun amedrancados i todas essas cousas se spalhórun por todos ls montes de la Judeia.

⁶⁶ Ls que oubien la notícia preguntában-se a eilhes mesmos: «Quien eirá a ser este rapazico?», puis la mano de l Senhor staba cun el.

⁶⁷ Antoce, Zacarias, l pai del, quedou cheno de l Sprito Santo i porfetizou dezindo:

⁶⁸ «Bendito seia l Senhor, Dius d’Eisrael, porque bejitou i lhibartou l sou pobo,

⁶⁹ alhebantou ũa fuorça de salbaçon na casa de Dabide, sou criado,

⁷⁰ cunsante habie dezido, antigamente, pula boca de ls sous santos porfetas,

⁷¹ el salbou-mos de ls nuossos einemigos i de la mano de ls que mos querien mal,

⁷² para fazer mezericórdia culs nuossos pais i lhembrar-se de la sue santa aliança

⁷³ i de la jura que le fizo a Abraan, nuosso pai,

⁷⁴ para mos premitir que, sien miedo i lhibres de las manos de ls nuossos einemigos, l sírbamos

⁷⁵ an santidade i justícia delantre del, por todos ls nuossos dies.

⁷⁶ I tu, nino, serás chamado porfeta de l Altíssemo, porque eirás alantre de l Senhor a purparar ls sous caminos,

⁷⁷ dando-le a coincer al sou pobo la salbaçon para perdon de ls sous pecados,

⁷⁸ grácias al coraçon mezericordioso de l nuosso Dius, por bias de quien mos bejitará la lhuç de l alto

⁷⁹ para alhumbrar ls que bíben ne l scuro i na selombra de la muorte, para guiar nuossos passos ne l camino de la paç.»

⁸⁰ L nino iba crecendo i quedando fuorte ne l sou sprito i bibiu ne l zerto até al die an que se apresentou a Eisrael.