Juan 9 - Eibangeilhos en Mirandês

L ciego sanado i la çcuçon cun ls judius Sana un home ciego de nacéncia

¹ Quando iba a passar, Jasus biu un home que era ciego de nacéncia.

² Ls deciplos del preguntórun-le: «Rabi, quien pecou, el ou ls pais del, para que nacira ciego?»

³ Jasus respundiu-le: «Nien fui el que pecou nien ls pais del, mas quedou assi para que nel s’amostráran las obras de Dius.

⁴ Ye perciso que you faga las obras daquel que me mandou, inda cun de die, puis ben ende la nuite an que naide puode trabalhar.

⁵ Anquanto stou ne l mundo sou la lhuç de l mundo.»

⁶ Tenendo dezido estas palabras, cuçpiu na tierra, fizo lhodo cula cuçpinha, ountou cun lhodo ls uolhos de l ciego

⁷ i dixo-le: «Bai-te a lhabar ne l tanque de Siloé» (que quier dezir Ambiado). El fui, lhabou-se i tornou dalhá a ber.

⁸ Anton, ls bezinos i las pessonas que yá antes sabien que el era ciego dezien: «Este nun ye aquel que quedaba sentado a pedir smola?»

⁹ «Ye el mesmo», dezien uns. Mas outros dezien: «Nó, ye outra pessona aparecida cun el.» Mas l ciego zirraba: «Sou you.»

¹⁰ Preguntában-le, anton: «Cumo fui que se t’abrírun ls uolhos?»

¹¹ El respundiu-le: «Aquel home, que le cháman Jasus, fizo lhodo i ountou-me ls uolhos i dixo-me: “Bai al tanque de Siloé i lhaba-te.” Anton, you fui alhá, lhabei-me i bi.»

¹² I eilhes preguntórun-le: «Adonde ye que el stá?» El respundiu-le: «Nun sei.»

Bótan l ciego para fuora la sinagoga

¹³ Anton, eilhes lhebórun-le als fariseus l que fura ciego.

¹⁴ Era sábado quando Jasus fizo l lhodo i le abriu ls uolhos.

¹⁵ Ls fariseus preguntórun-le outra beç cumo habie passado a ber. El dixo-le: «Puso-me lhodo anriba ls uolhos, apuis lhabei-me i agora beio.»

¹⁶ Anton ls fariseus dezien: «Cumo puode esse home ser de Dius se nun guarda l sábado?» Outros dezien: «Cumo puode un home pecador fazer sinales cumo esses?» I habie un grande çcutimiento antre eilhes.

¹⁷ Assi, tornórun-le a preguntar outra beç al ciego: «Tu l que dizes daquel que te abriu ls uolhos?» El, anton, dixo-le: «Ye un porfeta.»

¹⁸ Mas ls judius nun acraditórun que el houbira sido ciego i agora bisse. Anton, chamórun ls pais del

¹⁹ i anterrogórun-los, dezindo-le: «Este ye l buosso filho que dezis que naciu ciego? Anton, cumo ye que agora bei?»

²⁰ Ls pais de l ciego respundírun-le, dezindo: «Sabemos que este ye l nuosso filho i sabemos que el naciu ciego,

²¹ mas nun sabemos cumo ye que agora bei i tamien nun sabemos quien le tenerá abierto ls uolhos. Perguntai-se-lo a el porque yá ten eidade para falar del mesmo.»

²² Ls pais dezírun estas cousas porque tenien miedo de ls judius, porque estes yá habien treminado que se alguien cunfessasse que Jasus era l Messias iba a ser ampuntado de la sinagoga.

²³ Fui por essa rezon que ls pais del dezírun: «Yá ten eidade, preguntai-le a el.»

²⁴ Chamórun, anton, outra beç l home que habie sido ciego i dezírun-le: «Dá grácias a Dius! Nós sabemos que esse home ye un pecador.»

²⁵ El dixo-le: «Nun sei se ye pecador ou nó. Solo sei que you era ciego i agora beio.»

²⁶ Eilhes preguntórun-le: «L quei te fizo el? Cumo fui que te abriu ls uolhos?»

²⁷ El respundiu-le: «Yá bos l dixe i oubistes bien. Porque quereis oubir outra beç? Talbeç tamien bos quérgades fazer deciplos del.»

²⁸ Ende, chamórun-le denomes i dezírun-le: «Tu ye que sós deciplo del. Nós somos deciplos de Moisés

²⁹ i sabemos que Dius le falou a Moisés, mas este nun sabemos de adonde ye.»

³⁰ L home respundiu-le, dezindo-le: «Puis ye ende que stá la marabilha, que bós nun sábades de adonde ye i me tenga abierto ls uolhos.

³¹ Sabemos que Dius nun oube als pecadores, mas oube a quien le ten respeito i fai la buntade del.

³² Yá zde l ampeço de l mundo nunca s’oubiu dezir que alguien tenga abierto ls uolhos a un ciego de nacéncia.

³³ Se el nun fura de Dius, nun poderie fazer nada.»

³⁴ Respundírun-le eilhes, dezindo-le: «Naciste todico an pecado i benes-mos a ansinar a nós?» Adepuis, botórun-lo para fuora.

Jasus manifesta-se al ciego

³⁵ Jasus oubiu dezir que lo habien botado para fuora i quando ancarou cun el, dixo-le: «Tu acraditas ne l Filho de Dius?»

³⁶ El respundiu-le: «Quien ye el, Senhor, para que you acradite nel?»

³⁷ I Jasus dixo-le: «Tu yá l biste. Ye el mesmo que stá a falar cuntigo.»

³⁸ Anton el dixo-le: «Acradito, Senhor.» I, botando-se por tierra, adorou-lo.

³⁹ Dixo-le apuis Jasus: «You bin a este mundo para un julgamiento, para que aqueilhes que nun béien pássen a ber i para que ls que béien quéden ciegos.»

⁴⁰ Alguns fariseus que stában cun el oubírun i dezírun-le: «Acauso tamien nós somos ciegos?»

⁴¹ Jasus dixo-le: «Se fúrades ciegos nun haberiedes pecado. Mas cumo agora dezis “nós bemos”, l buosso pecado cuntina.»