Juan 8 - Eibangeilhos en Mirandês

La mulhier adúltara

¹ Jasus fui-se pa l Cabeço de las Oulibeiras.

² A soutordie, pula manhana cedo, tornou outra beç pa l templo i todo mundo benie a tener cun el. Jasus sentaba-se i ansinaba-los.

³ A ũa cierta altura, ls scribas i ls fariseus lhebórun-le ũa mulhier que fui agarrada an adultério, ponírun-la al meio

⁴ i dezírun-le a Jasus: «Esta mulhier fui agarrada a fazer adultério.

⁵ Moisés, na lei, mandou-mos apedrear estas mulhieres até la muorte. Tu l que mos dizes?»

⁶ Eilhes dezien-le estas cousas pa l lhucitáren, para l podéren acusar. Mas Jasus drobou-se i ampeçou a screbir na tierra cul dedo.

⁷ Cumo eilhes le cuntinában a preguntar, el alhebantou-se i dixo-le: «Aquel de bós que nun tubir pecado, que le atire la purmeira pedrada.»

⁸ Jasus drobou-se outra beç i cuntinou a screbir na tierra.

⁹ Al oubir aqueilhas palabras, fúrun salindo un por un, a ampeçar puls mais bielhos, até que quedou Jasus el solo i la mulhier, que cuntinaba al meio, de pies.

¹⁰ Jasus alhebantou-se i dixo-le a la mulhier: «Mulhier, adonde stan? Naide te cundanou?»

¹¹ Eilha respundiu-le: «Naide, senhor.» Anton, Jasus dixo-le: «You tamien nun te cundano. Bai-te ambora i, deiqui palantre, nun tornes a pecar.»

Çcuçon cun ls judius Jasus dá teçtemunho del mesmo

¹² Jasus falou-le outra beç, dezindo-le: «You sou la lhuç de l mundo; quien benir atrás de mi, nun andará a las scuras, mas tenerá la lhuç de la bida.»

¹³ Anton, dezírun-le ls fariseus: «Tu falas de ti i a tou fabor, assi sendo l tou teçtemunho nun ten balor.»

¹⁴ Jasus respundiu-le: «Anque you fale de mi mesmo, l miu teçtemunho ye berdadeiro, porque sei de adonde bin i para adonde bou, mas bós nien sabeis de adonde bin nien para adonde bou.

¹⁵ Bós julgais al modo de la carne, mas you nun julgo a naide.

¹⁶ Inda que you julgara, l miu juízo era berdadeiro, porque nun sou you solo, mas you i l Pai, que me ambiou.

¹⁷ Na buossa lei stá screbido que l teçtemunho de dous homes ye berdadeiro.

¹⁸ You dou teçtemunho por mi mesmo i l Pai que me ambiou tamien dá teçtemunho por mi.»

¹⁹ Eilhes dezien-le: «Adonde stá tou Pai?» Jasus respundiu-le: «Bós nun me coinceis nien coinceis a miu Pai; se me coincírades a mi, tamien coinceriedes a miu Pai.»

²⁰ Jasus dixo estas palabras quando staba a ansinar ne l templo, an pie la caixa de las smolas. I naide l prendiu, porque inda nun habie chegado la hora del.

Ambiado pul Pai, torna pa l Pai

²¹ Jasus dixo-le outra beç: «You bou-me ambora. Heis de andar a saber de mi, mas morrereis-bos ne l buosso pecado. Para adonde you me bou, bós nun podeis ir.»

²² Anton, dezien ls judius: «Se calha bai-se a matar, porque diç: “Para adonde you me bou, bós nun podeis ir.”»

²³ Jasus cuntinaba a dezi-le: «Bós sodes deiqui de baixo, you sou de alhá riba; bós sodes deste mundo, you nun sou deste mundo.

²⁴ Por essa rezon bos dixe que bos morrereis ne ls buossos pecados, porque se nun acraditardes an quien you sou, morrereis-bos ne ls buossos pecados.»

²⁵ Anton eilhes preguntórun-le: «Quien sós tu?» Jasus dixo-le: «L que bos tengo dezido zde l ampeço.

²⁶ Muita cousa tengo a dezir i a julgar de bós; mas l que me ambiou ye de cunfiança i l que le digo al mundo fui l que le oubi a el.»

²⁷ Eilhes nun antendírun que le falaba de l Pai.

²⁸ Jasus tornou-le a dezir: «Quando alhebantáren al parriba l Filho de l Home, ende heis de saber quien you sou i que nada fago porque you quiero, mas falo solo l que l Pai me ansinou.

²⁹ L que me mandou stá cumigo i nun me deixa a mi solo, porque fago siempre l que le agrada.»

³⁰ Al oubi-lo dezir estas cousas, muitos acraditórun nel.

Ls berdadeiros deciplos de Abraan

³¹ Anton, Jasus dixo-le als judius que habien acraditado nel: «Se bos mantubirdes na mie palabra, sereis mius deciplos berdadeiros,

³² coincereis la berdade i la berdade lhibartará-bos.»

³³ Eilhes respundírun-le: «Somos decendientes de Abraan i nunca fumos scrabos de naide. Cumo mos dizes, anton: “Quedareis lhibres?”»

³⁴ Jasus respundiu-le: «Quedai a saber: Toda la pessona que peca ye scrabo.

³⁵ Un scrabo nun queda na casa para siempre, mas un filho queda alhá para siempre.

³⁶ Se l Filho bos lhibartar, sereis mesmo lhibres.

³⁷ You sei que sodes decendientes de Abraan, mas andais a saber dun modo de me matar, porque la mie palabra nun entra an bós.

³⁸ You falo de l que bi an pie de l Pai i bós tamien fazeis l que le oubistes al buosso pai.»

³⁹ Eilhes respundírun-le: «L nuosso pai ye Abraan.» Jasus dixo-le: «Se fúrades filhos de Abraan, fazeriedes las obras de Abraan.

⁴⁰ Agora andais a saber dun modo de me matar, a mi un home que bos falei la berdade que le oubi a Dius. Abraan nun fizo essas cousas.

⁴¹ Bós fazeis las obras de l buosso pai.» Anton, eilhes dezírun-le assi: «Nós nun somos zorros, puis tenemos un pai que ye Dius.»

⁴² Jasus dixo-le: «Se Dius fura buosso pai, gustariedes de mi; you fui ambiado por Dius, nun bengo de mi mesmo, mas fui el que me mandou.

⁴³ Porque nun antendeis la mie fala, yá que la mie palabra nun la podeis oubir?

⁴⁴ Bós teneis al diabro por pai i quereis fazer l que le agrada al buosso pai. El fui un creminal matador zde siempre i nunca stubo cula berdade, porque nel nun hai berdade. Quando diç mintiras, fala de l que ye del, porque ye mintiroso i ye l pai de la mintira.

⁴⁵ Mas you digo-bos la berdade i por essa rezon nun acraditais an mi.

⁴⁶ Qual de bós puode probar que you tengo pecado? Se bos digo la berdade, porque nun acraditais an mi?

⁴⁷ Quien ye de Dius, scuita las palabras de Dius; bós nun las scuitais porque nun sodes de Dius.»

Antes de Abraan eisistir, you sou

⁴⁸ Ls judius respundírun-le: «Nun tenemos rezon al dezir que sós un samaritano i que tenes l demonho?»

⁴⁹ Jasus respundiu-le: «You nun tengo l demonho, mas honro a miu Pai i bós botais-me al çprézio.

⁵⁰ You nun busco la mie glória; hai quien la busque i julgue cun justícia.

⁵¹ Tomai bien tento ne l que bos digo: Quien oubedecir a la mie palabra, nunca se ha de morrer.»

⁵² Dezírun-le, anton, ls judius: «Agora tenemos la certeza que tenes l demonho. Abraan morriu-se, ls porfetas tamien i tu dizes: “Quien oubedecir a la mie palabra, nunca se ha de morrer?”

⁵³ Acauso tu sós mais do que l nuosso pai Abraan, que se morriu? I ls porfetas tamien se morrírun! Quien cuidas tu que sós?»

⁵⁴ Jasus respundiu-le: «Se you me honro a mi mesmo, la mie honra nun bal nada; mas quien me honra ye miu Pai, aquel de quien bós dezis: “Ye l nuosso Dius”,

⁵⁵ i nun l coinceis, mas you coinci-lo. Se you dezira que nun l conheço, serie mintiroso cumo bós; mas conheço-lo i respeito la sue palabra.

⁵⁶ Abraan, buosso pai, quedou mui cuntento por ber l miu die, biu-lo i quedou cuntento.»

⁵⁷ Dezírun-le ls judius: «Inda nien tenes cinquenta anhos i biste a Abraan?»

⁵⁸ Jasus dixo-le: «Tomai bien tento ne l que bos digo: Antes de Abraan nacer, yá you era l que sou.»

⁵⁹ Anton, agarrórun an piedras pa lo apedreáren, mas Jasus scundiu-se i saliu de l templo.