Juan 7 - Eibangeilhos en Mirandês

Ne l die de la Fiesta de la Tiendas ye testado an público L miu tiempo inda nun chegou

¹ Apuis, Jasus andaba pula Galileia i nun querie andar pula Judeia puis ls judius buscában un modo de l matar.

² Staba acerca la fiesta de ls judius, Fiesta de las Tiendas.

³ Anton, ls armanos del dezírun-le: «Sal deiqui i bai-te pa la Judeia, pa que ls tous deciplos tamien béian las obras que fazes.

⁴ Porque naide, se quejir ser coincido, faç las cousas an segredo. Se fazes estas cousas, amostra-te al mundo.»

⁵ La berdade ye que nien mesmo ls armanos acraditában nel.

⁶ Jasus respundiu-le: «L miu tiempo inda nun chegou, mas para bós qualquiera tiempo ye buono.

⁷ L mundo nun bos puode tener rábia, mas a mi ténen-me rábia porque you amostro-le que las obras deilhes son malas.

⁸ Ide bós a la fiesta. You nun bou a essa fiesta porque l miu tiempo inda nun stá cumprido.»

⁹ I apuis de le dezir estas cousas, quedou na Galileia.

¹⁰ Adepuis de ls armanos del habéren ido a la fiesta, tamien el se fui até alhá, mas a las scundidas sien que naide dira por el.

¹¹ Ls judius andában a saber del pula fiesta i dezien: «Por adonde andará el?»

¹² Habie un grande falatório del antre to la giente. Uns dezien: «Ye buona pessona!» Mas outros dezien: «Nó, porque solo anda a anduzir las pessonas!»

¹³ Mas naide falaba del a las claras, cun miedo de ls judius.

Jasus entra ne l templo

¹⁴ Quando la fiesta yá iba a meio, Jasus antrou ne l templo i ampeçou a ansinar.

¹⁵ Ls judius stában mui admirados, dezindo: «Cumo ye que sabe tanto se nun andubo a studar?»

¹⁶ Jasus respundiu-le: «La mie doutrina nun ye mie, mas daquel que me ambiou.

¹⁷ Se houbir quien querga fazer la buntade del, saberá se la doutrina ben de Dius, ou se falo solo por mi.

¹⁸ Quien fala solo por el mesmo, busca la sue própia glória, mas l que busca la glória de quien lo ambiou, esse diç la berdade i nel nun hai anjustícia.

¹⁹ Moisés nun bos dou la lei? Mas bós nun cumpris la lei. Porque me quereis matar?»

²⁰ L pobo respundiu-le: «Tu tenes l demonho! Quien ye que te quier matar?»

²¹ Jasus respundiu-le: «Solo fiç un milagre i todos quedais admirados.

²² Porque Moisés bos dou la circuncison – nó que fura del, mas de ls pais –, al sábado circuncidais ls homes.

²³ Se un home puode ser circuncidado al sábado, para que se cumpra la lei de Moisés, porque ye que quedais andinados cumigo por haber sano un home al sábado?

²⁴ Nun quérgades julgar pulas aparecéncias, mas pul que ye justo.»

Ls judius çcúten a respeito de Jasus

²⁵ Anton, habie pessonas de Jarusalen que le preguntában: «Nun ye este l que quieren matar?

²⁶ Cumo ye que stá parqui a falar, a las claras, i naide le diç nada? Será que ls príncepes yá se cumbencírun de que el ye l Cristo?

²⁷ Este sabemos bien d’adonde ye, mas quando benir l Cristo, naide saberá d’adonde ye.»

²⁸ Al ansinar ne l templo, boziaba: «Anton, bós sabeis quien sou i d’adonde bengo? You nun bin por mi mesmo, mas ye berdade que bin por aquel que me ambiou i que bós nun coinceis.

²⁹ You conheço-lo porque bengo del i el ambiou-me.»

³⁰ Anton, eilhes buscában modo de l prender, mas naide le botou la mano, porque inda nun habie chegado la hora del.

³¹ Muita daqueilha giente acraditou nel i dezien: «Quando l Cristo benir será que bai a fazer mais milagres do que este ten feito?»

³² Ls fariseus oubírun l pobo a dezir estas cousas del i mandórun ls xefes de ls saçardotes i de ls fariseus para l prendéren.

³³ Jasus, anton, dixo-le: «Inda bou a quedar cun bós mais un tempico i apuis bou-me para aquel que me ambiou.

³⁴ Nessa altura andareis a saber de mi, mas nun me heis de achar i para adonde you bou bós nun podeis ir.»

³⁵ Ls judius preguntában uns als outros: «Para adonde eirá, yá que nun l poderemos achar? Será que se bai culs que eimígran pa ls griegos, para ls ansinar?

³⁶ Que quier el dezir cun estas palabras: “Buscareis-me i nun me achareis?” i tamien “Para adonde you bou bós nun podeis benir?”»

Çcuçones feitas antre la giente i ne l tribunal

³⁷ Ne l redadeiro die, que era l mais fuorte de la fiesta, Jasus staba de pies a boziar, dezindo: «Quien tubir sede, benga a tener cumigo i beba.

³⁸ Quien acradita an mi, cumo diç la Scritura, de la sue barriga han de nacer rius de auga biba.»

³⁹ El dezie estas cousas de l Sprito que habien de recebir ls que nel acraditássen. Nesta altura l Sprito inda nun habie sido dado, porque Jasus inda nun fura glorficado.

⁴⁰ Muita giente, quando oubiu estas palabras, dixo: «Este de certeza que ye un porfeta!»;

⁴¹ outros dezien: «Este ye l Cristo!»; mas outros dezien: «Cumo ye que l Cristo puode benir de la Galileia?»

⁴² Nun ye la Scritura que diç: «L Cristo ben de la família de Dabide i de l lhugar de Belen, la tierra de Dabide?»

⁴³ Anton, armou-se un grande çcutimiento antre las pessonas por bias del.

⁴⁴ Alguns deilhes querien prendé-lo, mas naide le botou la mano.

⁴⁵ Ls guardas fúrun-se a tener culs xefes de ls saçardotes i culs fariseus. Estes preguntórun-le: «Porque nun l prendistes?»

⁴⁶ Ls guardas respundírun-le: «Nunca se oubiu un home a falar daqueilha maneira.»

⁴⁷ Ls fariseus dezírun-le: «Tamien bós bos deixestes anduzir?

⁴⁸ Acauso algun de ls xefes ou de ls fariseus acraditou nel?

⁴⁹ Solo essa giente que nun conhece la lei i ye giente maldita!»

⁵⁰ Anton Nicodemos, que era un de ls deilhes i que antes fura a tener cun Jasus, dixo-le:

⁵¹ «Acauso la nuossa lei julga un home antes de l oubir purmeiro i de saber l que el fizo?»

⁵² Eilhes respundírun-le: «Tamien tu sós de la Galileia? Studa bien i berás que de la Galileia nun bieno un solo porfeta!»

⁵³ Apuis, fui-se cada un para sue casa.