Juan 6 - Eibangeilhos en Mirandês

Dá de quemer a cinco mil an pie l lhago de Tiberíades

¹ Apuis, Jasus fui-se pa l outro lhado de l mar de la Galileia, ou de Tiberíades.

² Iba atrás del un grande juntouro de pessonas, porque bie ls milagres que el fazie nas pessonas que stában malas.

³ Jasus chubiu-se a un cabeço i sentou-se alhá culs sous deciplos.

⁴ Staba acerca la Páscoa, die de fiesta de ls judius.

⁵ Anton, al alhebantar ls uolhos i al ber tanta giente que benie a tener cun el, dixo-le a Felipe: «Adonde hemos de cumprar pan para esta giente quemer?»

⁶ El falaba assi pa l atentar, puis sabie bien l que habie de fazer.

⁷ Felipe respundiu-le: «Duzientos denheiros de pan nun chégan pa le dar un carolico a cada un!»

⁸ Dixo-le un de ls sous deciplos, Andrés armano de Simon Pedro:

⁹ «Stá eiqui un rapazico que ten cinco fogaças de cebada i dous peixes; mas cumo ha de chegar para tanta giente?»

¹⁰ Jasus dixo-le: «Mandai sentar las pessonas.» Habie muito fenasco naquel sítio. Anton, las pessonas sentórun-se, ende arrimado a cinco mil.

¹¹ Jasus agarrou las fogaças i, apuis de dar grácias, partiu-las puls que stában sentados, l mesmo fazendo culs peixes, todo até fartar.

¹² Quando yá stában fartos, dixo-le als sous deciplos: «Ajuntai ls carolos que sobrórun, para que nada se açague.»

¹³ Anton, ajuntórun-los i anchírun doze cestos de carolos de las cinco fogaças de cebada, que habien sobrado de ls que stubírun a quemer.

¹⁴ Quando aqueilhas pessonas bírun l milagre que habie feito, dezírun: «Pula cierta, este ye l porfeta que habie de benir al mundo!»

¹⁵ Jasus, al saber que l íban a agarrar pa l fazéren rei, tornou a salir deilhi, el solico, pa l cabeço.

Jasus anda porriba l mar

¹⁶ A la tardica, ls deciplos del abaixórun até al mar

¹⁷ i, chubindo-se para un barco, atrabessórun l mar, a caras a Cafarnaún. Yá era de nuite scuro i Jasus inda nun habie benido a tener cun eilhes.

¹⁸ Cumo assopraba un aire mui fuorte, l mar ampeçou-se a albrotar.

¹⁹ Quando yá habien remado por ende ũa lhégua, bírun Jasus a andar porriba l mar i a achegá-se de l barco i quedórun grimados.

²⁰ Mas el dixo-le: «Sou you, nun téngades miedo!»

²¹ Quejírun, anton, chubi-lo pa l barco i lhougo l barco chegou al lhugar para adonde íban.

Sermon de l pan de l cielo na sinagoga de Cafarnaún

²² A soutordie, todo l juntouro de giente, que quedara de l outro lhado de l mar, biu que solo habie eilhi un barquito i que Jasus nun antrara culs sous deciplos naquel barquito, puis ls sous deciplos habien salido eilhes solos;

²³ mas outros barquitos habien chegado de Tiberíades acerca l sítio adonde habien quemido l pan, apuis de l Senhor haber dado grácias.

²⁴ Anton, quando aqueilha giente toda biu que nien Jasus nien ls sous deciplos stában eilhi, chubírun-se todos naqueilhes barcos i fúrun-se para Cafarnaún a saber de Jasus.

²⁵ Quando l achórun, de l outro lhado de l mar, dezírun-le: «Rabi, quando chegueste eiqui?»

²⁶ Jasus respundiu-le: «Quedai bien ciertos de l que bos digo: Bós nun andais a saber de mi porque bistes ls milagres, mas porque quemistes de l pan i bos fartestes.

²⁷ Trabalhai nó pul quemido que se acaba, mas pul quemido que dura até la bida eiterna i que l Filho de l Home bos dará; porque a este Dius Pai puso-le l selo!»

²⁸ Dezírun-le, anton: «Que habemos de fazer para oubrar las obras de Dius?»

²⁹ Jasus respundiu-le: «La obra de Dius ye esta: que acradítedes naquel que el ambiou.»

³⁰ Anton, eilhes dezírun-le: «Que milagres fazes tu, para nós bermos i acraditarmos an ti?

³¹ Ls nuossos pais quemírun l maná ne l zerto, cumo stá screbido: Dou-le a quemer pan de l cielo.»

³² Jasus respundiu-le: «Quedai bien ciertos de l que bos digo: Nun fui Moisés que bos dou l pan de l cielo, mas miu Pai dá-bos l berdadeiro pan de l cielo:

³³ l pan de Dius ye l que ben de l cielo i dá la bida al mundo.»

³⁴ Dezírun-le, anton: «Senhor, dá-mos siempre desse pan.»

³⁵ Jasus respundiu-le: «You sou l pan de la bida. Quien ben a mi nun tornará a tener fame i l que acradita an mi nun tenerá mais sede.

³⁶ Mas tamien yá bos dixe que bós bedes-me i nun acraditais an mi.

³⁷ Todo l que l Pai me dá benirá a mi i nun botarei pa la rue l que ben a tener cumigo,

³⁸ porque abaixei de l cielo, nó para fazer l que you quiero, mas la buntade daquel que me ambiou.

³⁹ Esta ye la buntade daquel que me ambiou, que naide, de todos ls que el me dou, se perda, mas que lo rucecite ne l redadeiro die.

⁴⁰ Esta ye la buntade de miu Pai, que todo l que bei al Filho i acradita nel, tenga la bida eiterna i you rucecitarei-lo ne l redadeiro die.»

⁴¹ Anton, ls judius ponírun-se a falar contra el por haber dezido: «You sou l pan que abaixou de l cielo»,

⁴² i dezien: «Este nun ye Jasus, filho de Jesé, de quien nós coincemos l pai i la mai? Cumo ye que agora diç: Abaixei de l cielo?»

⁴³ Jasus respundiu-le: «Nun stéiades cun esse falatório uns culs outros.

⁴⁴ Naide puode benir a tener cumigo se l Pai, que me ambiou, nun lo trair; i you rucecitarei-lo ne l redadeiro die.

⁴⁵ Stá screbido ne ls Porfetas: Todos seran ansinados por Dius. Todo aquel que oubiu i daprendiu de l Pai, ben a mi.

⁴⁶ Nó que alguien haba bisto l Pai, a nun ser aquel que ye de Dius, este ye que biu l Pai.

⁴⁷ Quedai bien ciertos de l que bos digo: Quien acradita, ten la bida eiterna.

⁴⁸ You sou l pan de la bida.

⁴⁹ Buossos pais quemírun l maná ne l zerto i morrírun-se.

⁵⁰ Este ye l pan que abaixou de l cielo i quien del quemir nun se morrerá.

⁵¹ You sou l pan bibo que abaixou de l cielo. Quien quemir deste pan bibirá para siempre i l pan que you bos bou a dar ye la mie carne para le dar bida al mundo.»

⁵² Nesse antretiempo çcutien ls judius uns culs outros, dezindo: «Cumo puode El dar-mos a quemer la sue chicha?»

⁵³ Dixo-le anton Jasus: «Quedai bien ciertos de l que bos digo, se nun quemirdes la carne de l Filho de l Home i se nun buirdes l sou sangre, nun tenereis la bida an bós.

⁵⁴ Quien come la mie chicha i bebe l miu sangre tenerá la bida eiterna i you rucecitarei-lo ne l redadeiro die.

⁵⁵ Puis la mie chicha ye, de berdade, un quemido i l miu sangre ye, de berdade, ũa buida.

⁵⁶ Quien come la mie chicha i bebe l miu sangre queda an mi i you nel.

⁵⁷ Assi cumo l Pai, que bibe, me mandou i you bibo pul Pai, assi l que me come tamien bibirá por mi.

⁵⁸ Este ye l pan que abaixou de l cielo. Nun ye cumo l que quemírun ls buossos pais i morrírun-se. Quien come deste pan bibirá para siempre.»

Muitos deciplos ban-se ambora

⁵⁹ Estas cousas dixo El quando staba a ansinar na sinagoga de Cafarnaún.

⁶⁰ Muitos de ls sous deciplos al oubir estas cousas, dezírun-le: «Duras son estas palabras! Quien las puode scuitar?»

⁶¹ Sabendo Jasus, alhá andrento del mesmo, que ls sous deciplos falában subre estas cousas, dixo-le: «Esto scandaliza-bos?

⁶² I se birdes l Filho de l Home a chubir para adonde staba datrás?

⁶³ L Sprito ye que dá la bida, la carne nun s’aporbeita para nada; las palabras que you bos dixe, son Sprito i son bida.

⁶⁴ Mas hai alguns de bós que nun acraditais.» Jasus sabie, zde l ampeço, quales éran ls que nun acraditában i qual era l que l habie de atraiçonar.

⁶⁵ I dezie: «Por essa rezon ye que bos dixe: Naide puode benir até mi se tal nun le fur dado pul Pai.»

⁶⁶ Zde esta altura muitos de ls sous deciplos fúrun-se ambora i yá nun andában cun el.

⁶⁷ Anton, Jasus dixo-le als Doze: «Tamien bós bos quereis ir ambora?»

⁶⁸ Simon Pedro respundiu-le: «Senhor, para quien habemos nós de ir? Tu tenes palabras de bida eiterna;

⁶⁹ i nós acraditamos i sabemos que tu sós l Santo de Dius.»

⁷⁰ Jasus respundiu-le: «Nun fui you que bos scolhi als Doze? Mas hai un de bós que ye un demonho.»

⁷¹ Amentaba an Judas Scariotes, filho de Simon: Este, anque fura un de ls Doze, habie de lo atraiçonar.