Juan 5 - Eibangeilhos en Mirandês

Jasus amostra-se a el mesmo al mundo Jasus sana un home malo an Jarusalen, al sábado

¹ Adepuis, era die de fiesta de ls judius i Jasus chubiu até Jarusalen.

² Hai an Jarusalen, acerca la puorta de las Canhonas, un tanque que an heibraico le cháman Betesda, que ten cinco cabanhales.

³ Ende staba deitado un juntouro de pessonas cun muitos males, ciegos, mancos, pessonas secas, que asperában que las augas se mexíran,

⁴ porque un anjo abaixaba al tanque, de tiempos a tiempos, i anxalagaba l’auga; l purmeiro que alhá abaixaba, apuis de l’auga ser mexida, sanaba de qualquiera mal que tubira.

⁵ Habie alhá un home que yá trinta i uito anhos que tenie l sou mal.

⁶ Jasus, al bé-lo eilhi deitado i sabendo que yá muitá staba naqueilha ampostura, dixo-le: «Quieres-te sanar?»

⁷ L malo respundiu-le: «Senhor, nun tengo nanhun home que me meta ne l tanque quando l’auga ye mexida; anquanto you bou, outro abaixa antes de mi.»

⁸ Jasus dixo-le: «Lhebanta-te, agarra tou catre i anda.»

⁹ I lhougo aquel home quedou sano, agarrou l catre i andaba. Era sábado naquel die.

¹⁰ Anton, dezien-le ls judius al que habie quedado sano: «Ye sábado, nun puodes lhebar l catre.»

¹¹ Mas el respundiu-le: «L que me sanou, dixo-me: “Agarra l tou catre i anda.”»

¹² Eilhes preguntórun-le: «I quien ye esse home que te dixo: “Agarra l catre i anda?”»

¹³ Mas l que habie quedado sano nun sabie quien el era, puis Jasus fura-se deilhi, por haber muita giente naquel sítio.

¹⁴ Mais tarde, Jasus ancarou cun el ne l Templo i dixo-le: «Mira, stás sano; nun tornes a pecar para que nun te passe algo pior.»

¹⁵ Anton, l home fui-le a dezir als judius que habie sido Jasus que lo habie sanado.

¹⁶ Por bias desses feitos, ls judius andában atrás de Jasus, porque fazie essas cousas al sábado.

¹⁷ Jasus dixo-le: «Miu Pai obra siempre i you tamien obro.»

¹⁸ Anton, ls judius inda mais buscában un modo de lo matar, puis nun respeitaba l sábado, mas tamien porque dezie que Dius era Pai del, fazendo-se armano a Dius.

L poder que l Pai le dou al Filho

¹⁹ Mas Jasus respundiu-le assi: «Quedai bien ciertos de l que bos digo: L Filho, por el mesmo, nun puode fazer nada se nun bir l Pai a fazé-lo, puis todo l que este faç, tamien l Filho l faç de la mesma maneira.

²⁰ Porque l Pai ama l Filho i amostra-le todo l que el faç i amostrará-le feitos inda mais grandes do que estes, para que bós quédedes admirados.

²¹ Porque, assi cumo l Pai rucecita ls muortos i le dá bida, assi tamien l Filho le dá bida als que el quier.

²² L Pai nun julga a naide, mas dou-le al Filho todo l poder de julgar,

²³ para que todos hónren l Filho, tal i qual cumo hónran l Pai. Quien nun honra l Filho, nun honra l Pai que l ambiou.

²⁴ Quedai bien ciertos de l que bos digo: Quien oube la mie palabra i acradita naquel que me ambiou, ten la bida aterna i nun ye cundanado, mas passou de la muorte pa la bida.

²⁵ Quedai bien ciertos de l que bos digo: Ben la hora, i ye agora, an que ls muortos han de oubir la boç de l Filho de Dius; i ls que la oubíren, biberan.

²⁶ Tal i qual cumo l Pai ten la bida nel mesmo, tamien le dou al Filho l tener la bida nel mesmo;

²⁷ i dou-le l poder de julgar, porque ye Filho de l Home.

²⁸ Nun bos admíredes cun estas cousas, porque ben ende la hora an que ls que stan nas sepulturas oubiran la sue boç:

²⁹ Ls que oubrórun l bien saliran pa la rucerreiçon de la bida i ls que oubrórun l mal saliran pa la rucerreiçon de la cundanaçon.

³⁰ You nun puodo fazer nada por mi mesmo; julgo cunsante oubo i l miu juízo ye justo, porque nun busco l que me dá la gana, mas la buntade daquel que me ambiou.

³¹ Se you dou teçtemunho de mi, l miu teçtemunho nun ye berdadoso;

³² ye outro l que dá teçtemunho de mi i you sei que l teçtemunho que el dá de mi ye berdadoso.

³³ Bós mandestes a Juan i el dou teçtemunho de la berdade;

³⁴ mas you nun recibo teçtemunho dun home, mas digo-bos estas cousas para que bos sálbedes.

³⁵ El era ũa candela que ardie i alhumbraba i bós, por un cachico, quejistes cuntentar-bos cula sue lhuç.

³⁶ Mas you tengo un teçtemunho mais grande do que l de Juan, puis las obras que l Pai me dou para fazer, essas obras que you fago, amóstran que l Pai me ambiou;

³⁷ i l Pai, que me ambiou, dou el mesmo teçtemunho de mi. Nunca oubistes la boç del, nien bistes l rostro del,

³⁸ i la palabra del nun mora an bós, porque nun acraditais naquel que el ambiou.

³⁹ Mirai bien las squinicas todas de las Scrituras, puis cuidais que neilhas stá la bida aterna; i son eilhas que dan teçtemunho de mi.

⁴⁰ I nun quereis benir a mi, para tenerdes la bida.

⁴¹ You nun recibo glória de ls homes,

⁴² mas bien bos conheço, que nun teneis an bós l amor de Dius.

⁴³ You bin an nome de miu Pai i nun me aceitais, mas se benir outro an nome del própio yá l aceitareis.

⁴⁴ Cumo podeis acraditar, se recebis la honra uns de ls outros i nun buscais la honra que ben solo de Dius?

⁴⁵ Nun cúidedes que you bos bou a acusar a miu Pai; hai un que bos acusa: ye Moisés, an quien teneis sprança.

⁴⁶ Se acraditárades an Moisés, acraditariedes tamien an mi, puis el screbiu a miu respeito.

⁴⁷ Mas se nun acraditais ne ls sous screbidos, cumo heis de acraditar nas mies palabras?»