Juan 20 - Eibangeilhos en Mirandês

Cristo rucecitado. La sepultura bazie

¹ Ne l purmeiro die apuis l sábado, Marie Madalena fui-se a la sepultura de Jasus lhougo de madrugada, inda cun de nuite, i biu la laja tirada de la sepultura.

² Anton, botou-se nũa fugida i fui a tener cun Simon Pedro i cul outro deciplo, l que Jasus querie muito, i dixo-le: «Lhebórun l Senhor de la sepultura i nun sabemos adonde l ponírun.»

³ Pedro saliu cul l outro deciplo i fúrun-se a la sepultura.

⁴ Fugien dambos a dous a la par, mas l outro deciplo fugiu mais debrebe do que Pedro i chegou purmeiro a la sepultura.

⁵ Quando s’assomou biu ls panhos de lhino pul solar, mas nun antrou.

⁶ Chegou apuis Pedro, que benie atrás del, antrou na sepultura i biu ls panhos de lhino pul solar

⁷ i l sudairo que stubira anriba la cabeça del, que nun staba pul solar cumo ls panhos de lhino, mas d’aparte anrodilhado noutro sítio.

⁸ Anton, antrou tamien l outro deciplo que chegara purmeiro a la sepultura. El biu i acraditou.

⁹ Porque eilhes inda nun coincien la Scritura: «Ye neçairo que el rucecite de ls muortos.»

¹⁰ Adepuis ls deciplos fúrun-se para casa deilhes.

Jasus aparece-le a Marie Madalena

¹¹ Marie staba a chorar an pie la sepultura, de l lhado de fuora. Anquanto choraba, assomou-se para andrento la sepultura

¹² i biu dous anjos bestidos de branco, sentados, un pa la cabeceira i outro pa ls pies adonde habie sido puosto l cuorpo de Jasus.

¹³ Dezírun-le eilhes: «Á mulhier, porque stás a chorar?» Eilha respundiu-le: «Lhebórun l miu Senhor i nun sei adonde l ponírun.»

¹⁴ Mal apenas acabou de dezir estas palabras, bolbiu-se para trás i biu a Jasus de pies, mas nun sabie que era Jasus.

¹⁵ Dixo-le el: «Á mulhier, porque stás a chorar? De quien andas a saber?» Eilha, cuidando que era l hourtelano, dixo-le: «Senhor, se fuste tu que l lhebeste, di-me adonde l poniste que you bou alhá a buscá-lo.»

¹⁶ Jasus dixo-le: «Marie!» Eilha bolbiu-se i dixo-le: «Rabuni!», que quier dezir Mestre.

¹⁷ Jasus dixo-le: «Nun me detengas, puis inda nun chubi para miu Pai; bai-te a tener culs mius armanos i diç-le: “Bou-me a chubir para miu Pai i buosso Pai, miu Dius i buosso Dius.”»

¹⁸ Marie Madalena fui-le a dar las amboras als deciplos: «Bi l Senhor!», cuntando-le l que el le habie dezido.

Ls deciplos son ambiados recebindo l Sprito Santo

¹⁹ Sendo yá la tarde de l purmeiro die a seguir al sábado i stando cerradas las puortas de l sítio adonde stában ls deciplos, cun miedo de ls judius, bieno Jasus, puso-se de pies al meio deilhes i dixo-le: «La paç steia cun bós.»

²⁰ Mal apenas dixo estas palabras, amostrou-le las manos i l lhado de l peito. Al ber l Senhor, ls deciplos quedórun mui cuntentos.

²¹ Anton, el dixo-le outra beç: «La paç steia cun bós. Assi cumo l Pai me ambiou, tamien you bos ambio a bós.»

²² Apuis de le dezir estas palabras assoprou porriba deilhes i dixo-le: «Recebei l Sprito Santo.

²³ Ls pecados daqueilhes a quien le perdonardes seran perdonados; ls daqueilhes a quien ls mantubirdes seran mantenidos.»

Cunfisson de Tomé

²⁴ Mas Tomé, un de ls doze, que le chamában Mielgo, nun staba an pie deilhes quando Jasus bieno.

²⁵ Ls outros deciplos dezírun-le: «Nós bimos l Senhor.» Mas el dixo-le: «A nun ser que you beia las marcas de ls crabos nas manos del, meta ls mius dedos ne l sítio de ls crabos i meta la mie mano ne l peito del, nun acraditarei.»

²⁶ Uito dies apuis, stában outra beç ls deciplos an casa i Tomé staba cun eilhes. Jasus bieno, stando las puortas cerradas, puso-se de pies al meio deilhes i dixo-le: «La paç steia cun bós.»

²⁷ Apuis dixo-le a Tomé: «Achega eiqui l tou dedo, bei las mies manos, trai acá la tue mano i mete-la ne l miu peito i nun me seias ancrédelo mas criente.»

²⁸ Tomé respundiu-Le, dezindo: «Miu Senhor i miu Dius.»

²⁹ Dixo-le Jasus: «Porque me biste, acraditeste. Felizes ls que nun bírun i acraditórun.»

PURMEIRA CUNCLUSON DE L EIBANGEILHO

³⁰ Jasus fizo, delantre de ls sous deciplos, muitos outros sinales que nun stan screbidos neste lhibro.

³¹ Mas estes fúrun screbidos para que acradítedes que Jasus ye l Cristo, l Filho de Dius, i para que, acraditando, téngades la bida an nome del.