Juan 19 - Eibangeilhos en Mirandês

¹ Anton, Pilatos agarrou a Jasus i dou-le ũas checotadas.

² Adepuis, ls suldados fazírun ũa corona de spinos, ponírun-se-la na cabeça i bestírun-le un bestido de púrpara.

³ I dezien: «Biba, á Rei de ls judius. I dában-le lhambadas.»

⁴ Anton, Pilatos saliu outra beç para fuora i dixo-le a eilhes: «Mirai que bos l traio para fuora, para que sábades que nun acho nel niun crime.»

⁵ Saliu, anton, Jasus para fuora lhebando la corona de spinos i l bestido de púrpara. Apuis, dixo-le Pilatos: «Ende teneis l home.»

⁶ Mal apenas l bírun, ls xefes de ls saçardotes i ls criados boziórun, dezindo: Curcefica-lo, curcefica-lo. Pilatos dixo-le: «Lhebai-lo bós i curceficai-lo, porque you nun acho nel niun crime.»

⁷ Ls judius respundírun-le: «Nós tenemos ũa lei i, cunsante la nuossa lei, tenemos de l matar, porque se fizo Filho de Dius.»

⁸ Quando Pilatos oubiu esta palabra, inda mais amedrancado quedou.

⁹ Ende, antrou outra beç ne l palácio i dixo-le a Jasus: «De adonde sós tu?» Mas Jasus nun le bolbiu repuosta nien calabaça.

¹⁰ Anton, dixo-le Pilatos: «Nun me falas a mi? Nun sabes que tengo poder para te curceficar i tengo poder para te soltar?»

¹¹ Jasus respundiu-le: «Nun teneries niun poder contra mi se nun te fura dado d’alhá riba; mas l que me antregou a ti inda ten pecado mais grande.»

¹² Zdende, Pilatos andaba a saber dun modo de l soltar; mas ls judius boziában, dezindo: «Se soltas a este nun sós amigo de César, puis quien se fai rei ye contra César.»

¹³ Quando Pilatos oubiu este dito, lhebou a Jasus para fuora i sentou-se ne l tribunal, ne l sítio chamado ampedrado i que an heibraico se diç Gabatá.

¹⁴ Era an biesperas de la Páscoa, mui acerca de meidie. I dixo-le als judius: «Eiqui teneis l buosso rei.»

¹⁵ Mas eilhes boziórun: «Bota-lo pa la rue, bota-lo pa la rue, curcefica-lo.» Pilatos dixo-le: «Anton, hei-de curceficar al buosso rei?» Ls xefes de ls saçardotes respundírun-le: «Nun tenemos outro rei que nun seia César.»

¹⁶ Ende, antregou-se-lo para que fura curceficado. Eilhes agarrórun a Jasus i lhebórun-lo.

La curceficion

¹⁷ Lhebando el a las cuostas la sue cruç, saliu pa l sítio chamado Calabeira, que an heibraico se diç Gólgota.

¹⁸ Ende curceficórun-lo a la par cun outros dous, un de cada lhado i a Jasus al meio.

¹⁹ Pilatos screbiu tamien uns dezires i puso-los porriba la cruç; i ende staba screbido: «Jasus Nazareno, rei de ls judius.»

²⁰ Muito judiu liu esses dezires, porque l sítio adonde Jasus staba curceficado era acerca la cidade i staba screbido an heibraico, griego i lhatin.

²¹ Anton, dezien-le ls xefes de ls saçardotes de ls judius a Pilatos: «Nun scribas, Rei de ls Judius, mas si que el dixo: “Sou l Rei de ls Judius.”»

²² Pilatos respundiu-le: «L que screbi, stá screbido.»

²³ Apuis de habéren curceficado a Jasus, ls suldados agarrórun ls bestidos del i debedírun-los an quatro partes, ũa para cada suldado; i tamien la túnica. Mas la túnica era toda tecida de alto a baixo, sien questura.

²⁴ Anton dezírun uns als outros: Nun la bamos a rasgar, mas bamos a botar suortes para ber a quien le toca. Para que se cumprira la Scritura, que diç: Debedírun antre eilhes ls mius bestidos. I botórun suortes cula mie túnica. Puis ls suldados fazírun estas cousas.

La sepultura de Jasus

²⁵ Arrimada a la cruç de Jasus staba la mai del, l’armana de la mai, Marie de Cleófas i Marie Madalena.

²⁶ Jasus, bendo eilhi la mai del i que l deciplo de quien el gustaba staba alhá, dixo-le a la mai: «Mulhier, ende tenes l tou filho.»

²⁷ Adepuis, dixo-le al deciplo: «Ende tenes a tue mai.» I zde aqueilha hora, l deciplo recebiu-la an sue casa.

²⁸ Apuis, sabendo Jasus que yá stában acabadas todas las cousas, para que se cumprira la Scritura, dixo: «Tengo sede.»

²⁹ Staba eilhi un caçuolo cheno de binagre. Anton, anchírun ũa spoinja, ponírun-la na punta dũa canha i achegórun-se-la a la boca.

³⁰ Quando Jasus porbou l binagre, dixo: «Todo stá cumprido.» I, ancostando la cabeça, antregou la sue alma.

³¹ Para que ls cuorpos nun quedáran na cruç l die de sábado, puis era an bíesperas de la Páscoa, l grande die de sábado, ls judius pedírun-le a Pilatos que le cobráran las piernas i fúran tirados deilhi.

³² Anton, ls suldados fúrun-se alhá i realmente cobrórun las piernas al purmeiro i al outro que cun el fura curceficado;

³³ mas quando chegórun an pie de Jasus, al ber que yá staba muorto, nun le cobrórun las piernas.

³⁴ Mas un suldado atrabessou-le l peito cun ũa lhança i lhougo dalhá saliu sangre i auga.

³⁵ Aquel que biu estas cousas assi las cuntou i l sou teçtemunho ye berdadeiro i sabe que ye berdade l que diç, para que tamien acradítedes.

³⁶ Porque estas cousas acuntecírun para que se cumprira la Scritura: Niun de ls sous uossos le será cobrado.

³⁷ I noutro sítio diç la Scritura: Beran aquel que atrabessórun.

³⁸ Apuis, Jesé de Arimateia, l que era deciplo de Jasus, mas a las scundidas cun miedo de ls judius, pediu-le a Pilatos que le deixasse tirar l cuorpo de Jasus. Pilatos dou-le outerizaçon. Anton, el fui-se alhá i tirou l cuorpo de Jasus.

³⁹ I fui tamien alhá Nicodemos, l que ũa beç fura cun de nuite a tener cun Jasus, lhebando quaije cien arrates dũa mistela de mirra i aloés.

⁴⁰ Agarrórun, anton, l cuorpo de Jasus i ambrulhórun-lo an lhençoles, cun ounguientos, cumo ye questume de ls judius para purparáren las sepulturas.

⁴¹ Ne l sítio adonde fura curceficado habie un huorto i ende habie ũa sepultura nuoba, puis inda naide habie sido alhá puosto.

⁴² Fui ende que ponírun a Jasus, por bias de la Purparaçon de ls judius i porque aqueilha sepultura quedaba acerca.