Juan 17 - Eibangeilhos en Mirandês

Ouracion de l Senhor al deixar l mundo Acabei la obra que me deste

¹ Apuis de haber falado desta maneira, Jasus alhebantou ls uolhos pa l cielo i dixo: «Pai, chegou la hora: glorfica l tou Filho, para que l Filho te glorfique a ti,

² assi cumo le deste l poder subre toda la giente, para que le deia la bida eiterna a todos ls que le antregueste.

³ I la bida eiterna ye esta: Que te conhéçan a ti solo cumo l Dius berdadeiro i a Jasus Cristo a quien ambieste.

⁴ You amostrei la tue glória neste mundo, cumprindo la obra que me deste a fazer;

⁵ agora, á Pai, dá-me tu la glória que you tenie an pie de ti, inda antes de l mundo eisistir.

⁶ Dei-le a coincer l tou nome als homes, que me deste de l mundo. Éran tous i tu deste-me-los i eilhes guardórun la tue palabra.

⁷ Agora yá sáben que todo l que me deste ben de ti,

⁸ porque le dei las palabras que tu me deste, eilhes recebírun-las, sáben de berdade que sali de ti i acraditórun que tu me ambieste.»

You pido por aqueilhes que me deste

⁹ You pido por eilhes; nun pido pul mundo, mas por aqueilhes que me deste, porque son tous,

¹⁰ i todas las mies cousas son tues i las tues son mies; i la mie glória bai-se a amostrar neilhes.

¹¹ You yá nun stou ne l mundo, mas eilhes stan ne l mundo i you bou-me para an pie de ti. Pai santo, guarda, an tou nome, ls que me deste, para que séian un solo tal i qual cumo nós.

¹² Anquanto stube cun eilhes, you guardaba, an tou nome, aqueilhes que me deste i guardei-los de modo que ningun deilhes se perdiu a nun ser l filho de la perdiçon, para que se cumprira la scritura.

¹³ Mas agora bou-me para an pie de ti i falo estas cousas ne l mundo, para que téngan l miu cuntentamiento andrento deilhes mesmos.

¹⁴ You dei-le la tue palabra i l mundo tubo-le rábia, porque nun son de l mundo, tal i qual cumo you nun sou de l mundo.

¹⁵ Nun te pido que ls tires de l mundo, mas que ls lhibres de l Mal.

¹⁶ Eilhes nun son de l mundo, tal i qual cumo you nun sou de l mundo.

¹⁷ Santefica-los na berdade; la tue palabra ye la berdade.

¹⁸ Assi cumo tu me mandeste al mundo, tamien you ls mandei pul mundo;

¹⁹ i por eilhes me santefico a mi mesmo, para que tamien eilhes séian santeficados na berdade.»

Pido por todos ls que han de acraditar

²⁰ «Nun pido solo por estes, mas tamien por aqueilhes que, por bias de la sue palabra, han de acraditar an mi;

²¹ para que todos séian un, assi cumo tu, á Pai, l sós an mi i you an ti; para que tamien eilhes séian un, an nós, para que l mundo acradite que tu me ambieste.

²² You dei-le la glória que tu me deste a mi, para que séian un, tal i qual cumo nós somos un.

²³ You neilhes i tu an mi, para que séian purfeitos na ounidade, para que l mundo saba que tu me ambieste a mi i que ls ameste cumo me ameste a mi.

²⁴ Pai! Quiero que aqueilhes que me deste stéian cumigo adonde you stubir, para que béian la glória que me deste, porque me ameste zde muito antes de l mundo ser criado.

²⁵ Pai justo, l mundo nun te coinciu; mas you coinci-te i estes soubírun que tu me ambieste a mi.

²⁶ You dei-le a coincer l tou nome i cuntinarei a fazé-lo para que l amor cun que me ameste steia neilhes i you steia neilhes.»