Juan 16 - Eibangeilhos en Mirandês

¹ «Tengo-bos dezido estas cousas para que nun bos scandalízedes.

² Botaran-bos para fuora de las sinagogas; mas ben ende la hora an que quien bos matar, cuidará que le stá a fazer un serbício a Dius.

³ I fazeran-bos estas cousas porque nun coincírun al Pai nien a mi.

⁴ Tengo-bos dezido estas cousas para que, quando chegar essa hora, bos lhémbredes que yá bos lo habie dezido; i you nun bos dixe estas cousas zde l ampeço, porque staba cun bós.

⁵ Agora bou-me para an pie daquel que me ambiou i ningun de bós me pregunta: Para adonde bás?

⁶ Cumo bos tengo dezido estas cousas, l buosso coraçon ten-se anchido de tristeza.

⁷ Mas, digo-bos la berdade, cumben-bos que you me baia ambora, porque se you nun me fur ambora, l Sprito nun benirá a tener cun bós; mas se you me fur, mandarei-bos-lo.

⁸ I quando el benir, bai a cumbencir l mundo de l pecado, de la justícia i de l juízo.

⁹ De l pecado, porque nun acradítan an mi;

¹⁰ de la justícia, porque you me bou para miu Pai i nun me tornareis a ber;

¹¹ i de l juízo, porque l príncepe deste mundo yá stá julgado.

¹² Inda tengo muita cousa para bos dezir, mas agora nun íbades a ser capazes de las antender.

¹³ Mas, quando benir l Sprito de berdade, el bos guiará an toda la berdade; porque nun falará del mesmo, mas falará todo l que tubir oubido i anunciará-bos l que ha de benir.

¹⁴ El amostrará-bos la mie glória, porque bai a recebir de l que ye miu i bai-bos-lo a anunciar.

¹⁵ Todo l que l Pai ten ye miu; por essa rezon bos dixe que bai a recebir de l que ye miu i bai-bos-lo a anunciar.»

La buossa tristeza bolberá-se an alegrie

¹⁶ «Mais un pouquito i nun me bereis; i inda mais outro pouquito i tornareis-me a ber, porque me bou pa l Pai.»

¹⁷ Ende, alguns de ls sous deciplos dezírun uns pa ls outros: «Que quieren dezir estas palabras? “Un pouquito i nun me bereis”; i “inda mais outro pouquito i tornareis-me a ber”; i tamien “porque me bou pa l Pai?”»

¹⁸ Dezien assi: «L que quier dezir “un pouquito”? Nun sabemos l que stá a dezir.»

¹⁹ Jasus dou-se de cuonta que le querien preguntar algo i dixo-le: «Preguntais-bos uns als outros subre l que you dixe: Un pouquito i nun me bereis i inda mais outro pouquito i tornareis-me a ber?

²⁰ Lhembrai-bos bien de l que bos digo: Habeis de chorar i quedareis penerosos i l mundo adbertirá-se i bós stareis tristes; mas la buossa tristeza ha de se bolber an alegrie.

²¹ La mulhier, quando stá para tener un filho, sinte-se triste, porque chegou la sue hora; mas apuis de haber tenido l filho, yá nun se lhembra de ls delores, pul gusto de haber benido ũa pessona al mundo.

²² Assi, tamien bós agora teneis muita tristeza; mas tornarei-bos a ber i l buosso coraçon quedará cuntento i la buossa alegrie naide bos la poderá tirar.

²³ Nesse die, nada me preguntareis. Quedai bien ciertos de l que bos digo, que todo l que le pedirdes a miu Pai, an miu nome, el bos l ha de dar.

²⁴ Até agora nun pedistes nada an miu nome; pedi i recebireis para que la buossa alegrie se cumpra.

²⁵ Falei-bos destas cousas por acumparaçones; mas ben ende la hora an que nun bos falarei mais por acumparaçones, mas falarei-bos çclaradamente subre miu Pai.

²⁶ Nesse die, pedireis an miu nome i nun bos digo que you pedirei por bós al Pai;

²⁷ puis l própio Pai bos ama, porque bós me amestes i acraditestes que bin de Dius.

²⁸ You sali de l Pai i bin al mundo; agora deixo l mundo i bou-me pa l Pai.»

²⁹ Dezírun-le ls sous deciplos: «Agora falas çclaradamente i nun usas acumparaçones.

³⁰ Agora sabemos que sabes todo i nun percisas que un te faga preguntas. Por isso, acraditamos que saliste de Dius.»

³¹ Jasus respundiu-le: «Acraditais agora?

³² Ben ende la hora, i yá stá a quedar acerca, an que bós sereis scamalhados, cada un para sue parte i me deixareis a mi solo; mas you nun stou solo, porque l Pai stá cumigo.

³³ Tengo-bos dezido estas cousas, para que téngades paç an mi; ne l mundo tenereis agonias, mas, tenei ánimo, you benci l mundo.»