Juan 13 - Eibangeilhos en Mirandês

REDADEIRAS PALABRAS ALS DECIPLOS Última cena Jasus lhaba-le ls pies als deciplos

¹ L die atrás la fiesta de la Páscoa, sabendo Jasus que habie chegado la sue hora de passar deste mundo pa l Pai, cumo habie amado ls sous, que stában ne l mundo, amou-los até al fin.

² A la cena, cumo l diabro yá habie puosto ne l coraçon de Judas Scariotes, filho de Simon, que l atraiçonasse,

³ sabendo Jasus que l Pai habie puosto na sue mano todas las cousas, que habie salido de Dius i tornaba para Dius,

⁴ lhebantou-se de la cena, tirou las bestimientas i agarrou ũa toalha que puso a la cintura.

⁵ Apuis, botou auga nũa bacie i ampeçou-le a lhabar ls pies als sous deciplos i a anxugá-se-los cula toalha que tenie a la cintura.

⁶ Achegou-se a Simon Pedro, que le dixo: «Senhor, tu lhabas-me a mi ls pies?»

⁷ Jasus respundiu-le, dezindo: «L que you fago, tu nun l antendes agora, mas antenderás-lo apuis.»

⁸ Pedro dixo-le: «Tu a mi nunca me has de lhabar ls pies!» Jasus respundiu-le: «Se you nun te lhabar, nun tenerás parte cumigo.»

⁹ Dixo-le, anton, Simon Pedro: «Senhor, anton nun me lhabes solo ls pies, mas tamien las manos i la cabeça!»

¹⁰ Jasus dixo-le: «Quien stá lhabado, solo ten percison de lhabar ls pies, puis stá todo lhimpo; i bós stais lhimpos, mas nien todos.»

¹¹ Porque el bien sabie quien lo habie de atraiçonar, ye que dixo: «Nien todos stais lhimpos.»

¹² Apuis de le haber lhabado ls pies i haber agarrado la sue roupa, tornou-se a sentar a la mesa i dixo-le: «Antendeis l que bos stube a fazer?

¹³ Bós chamais-me “Mestre” i “Senhor” i falais bien, puis you lo sou.

¹⁴ Ora se you, Senhor i Mestre, bos lhabei ls pies, tamien bós debeis de bos lhabar ls pies uns als outros.

¹⁵ Porque you dei-bos l eisemplo, para que bós fágades cumo you bos fiç.

¹⁶ Quedai bien ciertos de l que bos digo: L criado nun ye mais do que l sou amo, nien l ambiado ye mais do que aquel que lo ambiou.

¹⁷ Se sabeis estas cousas, sodes bienabinturados se las fazirdes.

¹⁸ Nun falo de todos bós, puis bien sei ls que tengo scolhido, mas para que se cumpra la Scritura: L que come l pan cumigo, alhebantou contra mi l sou carcanhal.

¹⁹ Yá bos l digo agora, antes que se passe, para que, quando se benir a passar, acradítedes que you sou.

²⁰ Quedai bien ciertos de l que bos digo: Quien recebir l que you ambiar, recibe-me a mi; i quien me recibe a mi, recibe aquel que me ambiou.»

Anúncio de la traiçon de Judas

²¹ Mal apenas dixo estas cousas, Jasus quedou agoniado ne l sprito i dixo bien çclarado: «Quedai bien ciertos de l que bos digo: Un de bós bai-me a atraiçonar.»

²² Ls deciplos mirában uns pa ls outros, sien saber de quien staba a falar.

²³ Un de ls sous deciplos, de quien Jasus gustaba muito, staba sentado al lhado del.

²⁴ Simon Pedro fizo-le ũa seinha, para que le preguntara de quien staba a falar.

²⁵ El drobou-se pa l peito de Jasus i dixo-le: «Senhor, quien ye?»

²⁶ Jasus respundiu-le: «Ye aquel a quien you le dir l cacho de pan molhado.» I habendo molhado l cacho de pan, dá-se-lo a Judas Scariotes.

²⁷ I apuis de l cacho de pan, Satanás antrou nel. Dixo-le, anton, Jasus: «Faç debrebe l que tenes a fazer.»

²⁸ I naide, de ls que stában a la mesa, antendiu porque Jasus le falara assi.

²⁹ Porque, cumo Judas tenie la bolsa, cuidában que Jasus le habie dezido: «Compra l que mos fai falta pa la fiesta» ou que le dira qualquiera cousa als probes.

³⁰ Mal apenas acabou de angulhir l cacho de pan, Judas fui-se ambora. Yá era de nuite.

Dá un mandamento nuobo

³¹ Apuis de el haber salido, Jasus dixo: «Agora ye glorficado l Filho de l Home i Dius ye glorficado nel.

³² Se Dius ye glorficado nel, tamien Dius l glorficará nel mesmo i siempre l ha de glorficar.

³³ Mius felhicos, inda stou cun bós mais un ratico. Heis-de andar a saber de mi i, cumo le habie dezido als judius, “para adonde you bou, bós nun podeis ir”, tamien bos l digo agora a bós.

³⁴ Dou-bos un mandamento nuobo: Que bos ámedes uns als outros; assi cumo you bos amei a bós, amai-bos tamien uns als outros.

³⁵ Por ende todos saberan que sodes mius deciplos, se bos amardes uns als outros.»

Anúncio de la negaçon de Pedro

³⁶ Dixo-le Simon Pedro: «Senhor, para adonde bás?» Jasus respundiu-le: «Para adonde bou, agora nun puodes benir atrás de mi, mas apuis has de benir.»

³⁷ Dixo-le Pedro: «Porque nun puodo ir agora atrás de ti? Darei la mie bida por ti.»

³⁸ Jasus respundiu-le: «Darás la tue bida por mi? Lhembra-te bien de l que te digo: Nun cantará l galho anquanto nun me tubires negado trés bezes.»