Juan 11 - Eibangeilhos en Mirandês

Mira, aquel que amas stá malo

¹ Staba malo un tal Lházaro de Betánia, aldé de Marie i de l’armana Marta.

² Marie fui la que ountou l senhor cun un perfume i le anxugou ls pies cul pelo. Lházaro, armano deilha, staba malo.

³ Anton, las armanas mandórun-le esta rezon: «Senhor, mira, aquel de quien gustas muito stá malo.»

⁴ Al oubir l recado, Jasus dixo: «Esse mal nun ye pa la muorte mas pa la glória de Dius, para que por bias deilha l Filho de Dius seia glorficado.»

⁵ Jasus gustaba muito de Marta, de l’armana deilha i de Lházaro.

⁶ Mas, quando oubiu dezir que staba malo, inda tardou mais dous dies naquel sítio.

⁷ Apuis, dixo-le assi als sous deciplos: «Bamos-mos outra beç pa la Judeia.»

⁸ I ls deciplos abísan-lo: «Rabi, inda agora ls judius andában a saber de ti para te apedrear i quieres tornar outra beç para alhá?»

⁹ Jasus respundiu-le: «Nun son doze las horas de l die? Se ũa pessona andubir cun de die nun tropeça porque bei la lhuç deste mundo,

¹⁰ mas s’andubir cun de nuite tropeça puis nun trai lhuç cun el.»

¹¹ Dixo estas palabras i apuis acrecentou: «L nuosso amigo Lházaro stá a drumir, mas bou-lo a spertar de l suonho.»

¹² Dezírun-le, anton, ls deciplos: «Senhor, se el stá a drumir bai-se a salbar.»

¹³ Mas quando Jasus falara de la muorte del, eilhes cuidórun que falara de l suonho de drumir.

¹⁴ Anton Jasus dixo-le: «Bei-se bien que Lházaro stá muorto

¹⁵ I quedo cuntento por bós que you nun tenga stado alhá para que acradítedes. Mas bamos-mos a tener cun el.»

¹⁶ Tomé, que le chamában Mielgo, dixo-le als sous cumpanheiros: «Bamos tamien nós, para mos morrermos cun el.»

Rucerreiçon de Lházaro

¹⁷ Quando Jasus chegou, fui-se a tener cun el, que yá quatro dies que staba na sepultura.

¹⁸ Betánia quedaba acerquita de Jarusalen, ende arrimado a ũa lhégua.

¹⁹ Muitos judius benírun a casa de Marta i de Marie pa le dáren ls sentimientos pula muorte de l armano.

²⁰ Marta mal apenas oubiu dezir que Jasus chegara, fui-se a tener cun el, mas Marie quedou sentada an casa.

²¹ Dixo-le, anton, Marta a Jasus: «Senhor, se tubiras stado eiqui miu armano nun se haberie morrido.

²² Mas, assi i todo, sei que qualquiera cousa que le pidas a Dius, el dará-te-la.»

²³ Jasus dixo-le: «Tou armano bai a rucecitar.»

²⁴ Dixo-le Marta: «You sei que bai a rucecitar na rucerreiçon de l redadeiro die.»

²⁵ Jasus dixo-le: «You sou la rucerreiçon i la bida. Quien acradita an mi, anque steia muorto, biberá

²⁶ i todo l que bibe i acradita an mi nunca se morrerá. Acradistas Marta?»

²⁷ «Si, senhor, you acradito que tu sós l Cristo, Filho de Dius, que beniste al mundo.»

²⁸ Assi que dixo estas palabras, fui-se i, a las scundidas, chamou l’armana Marie i dixo-le: «L Mestre stá acá i stá-te a chamar.»

²⁹ Assi que oubiu que la chamaba, alhebantou-se mui debrebe i fui-se a tener cun el.

³⁰ Jasus inda nun habie chegado al lhugar, puis inda staba ne l sítio adonde Marta habie ido a tener cun el.

³¹ Quando ls judius, que stában cun eilha an casa i fazien por l’animar, bírun que Marie s’alhebantou mui delgeira i saliu, fúrun atrás deilha, pensando alhá cun eilhes: «Bai-se a chorar par’an pie la sepultura.»

³² Mas Marie, quando chegou adonde staba Jasus, assi que l biu, caiu-se als pies del i dixo-le: «Senhor, se tubiras stado eiqui miu armano nun se haberie morrido.»

³³ Quando la biu a chorar i biu tamien a chorar ls judius que habien benido cun eilha, Jasus quedou mui peneroso i quemobido,

³⁴ dezindo-le: «Adonde l ponistes?» Eilhes respundírun-le: «Senhor, ben i bei.»

³⁵ Ende, Jasus chorou.

³⁶ Dezírun, anton ls judius: «Mirai cumo el l querie muito.»

³⁷ Mas alguns dezírun antre eilhes: «El que le abriu ls uolhos al ciego nun podie haber feito cun que nun se morrira?»

³⁸ Quedando outra beç todo peneroso andrento de l mesmo, Jasus chegou a la sepultura. Era a modo un lhapo i tenie ũa piedra a tapar l’antrada.

³⁹ Jasus dixo: «Tirai la piedra.» Marta, armana de l muorto, dixo-le: «Senhor, yá cheira mal, puis yá bai an quatro dies.»

⁴⁰ Jasus dixo-le: «You nun te dixe que se acraditares berás la glória de Dius?»

⁴¹ Tirórun la piedra. Jasus, adepuis, alhebantando ls uolhos al parriba dixo: «Pai, dou-te grácias porque me oubiste.

⁴² You bien sei que tu me oubes siempre. Mas falo por bias de l pobo que stá alredror de mi, para que acradite que tu m’ambieste.»

⁴³ Mal dixo estas palabras, boziou cũa boç mi fuorte: «Lházaro, sal acá para fuora.»

⁴⁴ I l muorto lhougo saliu, tenendo las manos i ls pies atados cun bendas de panho i l rostro del staba ambuolto nun sudairo. Jasus dixo-le: «Zatai-lo i deixai-lo ir ambora.»

L cunceilho de l tribunal i la profecie de l sumo saçardote

⁴⁵ Ende, muitos judius que benírun cun Marie i bírun l que el fizo acraditórun nel.

⁴⁶ Mas alguns deilhes fúrun-se als fariseus i cuntórun-le l que Jasus habie feito.

⁴⁷ Anton, ls sumos saçardotes i ls fariseus ajuntórun l cunceilho i dezien: «Que bamos a fazer? Este home faç mais sinales milagrosos que you sei alhá.

⁴⁸ Se l deixamos andar, todos ban a acraditar nel. Ende ban a benir ls romanos i daran-mos cuonta de l nuosso sítio i de to la nacion.»

⁴⁹ Mas Caifás, un deilhes que esse anho era sumo saçardote, dixo-le: «Bós nun antendeis nada destas cousas.

⁵⁰ Nun bedes que mos cumben que un solo home seia muorto por todo l pobo i assi nun se muorra la nacion.»

⁵¹ I el nun dixo estas cousas por el mesmo, mas, cumo era l sumo saçardote aquel anho, porfetizou que Jasus se habie de morrer pul pobo.

⁵² Nun solo por aquel pobo, mas tamien para que an un solo ajuntasse als filhos de Dius, que andában scamalhados.

⁵³ Assi, zde esse die an delantre, treminában a matá-lo.

Jasus bai-se ambora outra beç

⁵⁴ Por essa rezon, Jasus yá nun aparecie pula rue an pie ls judius, mas fui-se deilhi para ũa tierra acerca l zerto, ũa cidade que le chamában Efrain i puli andaba culs deciplos del.

⁵⁵ Staba acerca la Páscoa de ls judius i muita giente daqueilha tierra fui-se até Jarusalen antes la Páscoa, para se purficáren.

⁵⁶ Anton, andában a saber de Jasus i dezien-le uns als outros quando stában ne l templo: «Que bos parece? Cuidais que nun benirá a la fiesta?»

⁵⁷ I ls sumos saçardotes i ls fariseus habien dado orde que se alguien soubira adonde el staba, que l dezisse, para que l podíran prender.