ꤚꤥꤗꤢꤩ꤬ 1 - Eastern Kayah Shadaw Dialectꤋꤢꤨ꤭ꤕꤢꤪꤜꤢꤨ ꤢ꤬ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ 1 ꤠꤢꤧ꤭ ꤗꤢ꤬ ꤋꤢꤨ꤭ꤕꤢꤪꤜꤢꤨ꤯ ꤠꤢꤧ꤭ ꤚꤢ꤭ꤡꤝꤢꤕ꤫ꤢꤩ꤬ ꤞꤤ꤭ ꤜꤤ꤬ ꤣꤧ꤭ꤒꤣ꤬ꤙꤢ꤬꤯ ꤠꤢꤧ꤭ ꤗꤢ꤬ ꤛꤢꤩ꤬ꤏꤛꤢꤨꤋꤚꤤ ꤢ꤬ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤒꤣ꤬ꤖꤚꤢꤩ꤬꤯ ꤢ꤬ ꤢꤩ ꤠꤢꤧ꤭ ꤔꤢꤧ ꤠꤢꤧ꤭ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤖꤚꤢꤩ꤬ꤘꤥ꤬ꤔꤢꤧ꤭ꤖꤢꤨ ꤒꤣ꤬ꤖꤚꤢꤩ꤬, ꤓꤥ꤭ꤚꤣꤧ꤬ ꤢ꤬ ꤔꤝꤢꤓꤢꤧ꤬ ꤠꤢꤧ꤭ ꤔꤢꤧ ꤠꤢꤧ꤭ ꤊ꤫ꤢꤦ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬꤯ 2 ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤢꤪꤜꤢꤧ꤬ ꤥ꤬ꤔꤢꤩ꤬ ꤑꤢ꤭꤮ ꤜꤥ꤬ꤟꤣꤧ ꤢ꤬ꤍ꤫ꤥ꤬ ꤗꤢꤨ꤮ ꤑꤢꤔꤢꤨ꤬ꤋꤢꤩ꤭ ꤔꤢꤧ ꤢ꤬ꤖꤚꤢꤩ꤬ꤖꤚꤥ꤬ ꤒꤣꤧ꤬ꤟꤢꤩ꤬ ꤟꤢꤨ ꤢ꤬ ꤚꤢ꤭ꤥ꤬ꤔꤢꤩ꤬ ꤓꤥ꤭ꤟꤣꤧ ꤘꤣ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤢ꤬ꤊꤢꤨ꤭ꤔꤣꤧ꤬꤯ 3 ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤗ꤫ꤢ꤬ꤟꤣꤧ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤘꤢꤦ꤬ ꤕꤢꤩ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤣꤧ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤘꤣ ꤢ꤬ ꤟꤢꤧ꤭ꤜꤢꤧ꤬ ꤊꤜꤝꤢ꤬ꤢ꤬ꤔ꤫ꤢꤩ꤬ ꤟꤢꤨ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤟꤣꤧ, ꤚꤣꤧ꤬ ꤢ꤬ ꤟꤢꤧ꤭ ꤥ꤬ꤖꤢꤨꤡ꤫ꤢꤩ꤬ꤜꤢꤧ꤬ ꤘꤣ ꤋꤝꤤ ꤋꤢꤨ꤭ꤘꤢ꤬ꤠꤤ꤬ ꤢ꤬ꤊꤜꤝꤤ꤭ꤢ꤬ꤜꤢꤧ꤭ ꤢ꤬ꤊꤢꤨ꤭ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤟꤣꤧ꤯ 4 ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤙꤣꤧ ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤞꤣꤧ꤭ꤖꤚꤢꤩ꤬ ꤊꤢ꤬ꤋꤛꤢ꤭ ꤕꤢꤩ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤘꤣ ꤒꤢꤩ꤬ꤞꤣꤧ꤭ ꤔꤢꤧ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤘꤣꤧꤜꤥ꤭ ꤟꤣꤧ ꤜꤢꤨ꤭ ꤔꤢꤧ ꤢ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤟꤣꤧ꤯ 5 ꤘꤣ ꤋꤚꤤ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤒꤢ꤭ ꤕꤢꤩ꤬ ꤢ꤬ ꤒꤢꤩ꤬ꤙꤝꤤꤒꤢꤩ꤬ꤒꤣꤧ꤬ꤚꤣꤧ꤭ ꤔꤢꤧ ꤒꤢꤩ꤬ꤏꤣꤧꤋꤢꤩ꤭ ꤒꤥ꤭ꤚꤢꤧ ꤘꤣ ꤕꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤖꤚꤢꤩ꤬ꤘꤥ꤬ꤔꤢꤧ꤭ꤖꤢꤨ ꤘꤣ ꤋꤚꤤ ꤢ꤬ꤑꤢꤩ꤭꤯ ꤞꤢꤧꤟꤢꤨ ꤜꤢꤪ꤭ ꤛꤢꤨꤘꤢ꤬ꤖꤢꤨ ꤗ꤫ꤢ꤬ꤒꤥ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ ꤊꤣꤧ꤭ꤢꤨ꤭ ꤛꤢꤩ꤬ꤏꤛꤢꤨ, ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤘꤢ꤭ꤊꤣꤧ꤭ ꤡꤢꤪꤗꤣꤧ꤬ꤚꤢꤧ꤬ ꤍ꤫ꤥ꤬ ꤢ꤬ꤑꤢꤩ꤭ꤔꤣꤧ꤬ꤚꤣꤧ꤬, ꤢ꤬ ꤔꤢꤪ꤭ꤓꤝꤢ꤭ꤓꤢꤧ꤬ ꤕꤢꤩ꤬ ꤖꤢꤧ꤯ 6 ꤡꤢꤪꤗꤣꤧ꤬ꤚꤢꤧ꤬ ꤢꤩ ꤢꤨ꤭ ꤘꤣ ꤢꤨ꤭ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤛꤢꤩ꤬ꤏꤛꤢꤨꤋꤚꤤ ꤢ꤬ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤢ꤬ꤊꤜꤢꤩ꤭ꤔꤣꤧ꤬, ꤞꤤ꤭ ꤗꤢ꤬ ꤞꤤ꤭ ꤥ꤬ꤔꤥ꤭ꤒ꤫ꤣ꤬ꤊꤣꤧ꤭ ꤙꤣꤧꤔꤣꤧ꤬ꤔꤣꤧ꤬ ꤟꤣꤧ꤯ 7 ꤋꤥ꤭ꤙꤢꤧꤞꤝꤢꤗꤥ꤬ ꤘꤣ ꤢ꤬ ꤥ꤬ ꤘꤣ ꤠꤤ꤭ꤚꤥꤗꤢꤩ꤬ ꤢ꤬ꤊꤢꤨ꤭ ꤞꤤ꤭, ꤡꤢꤪꤗꤣꤧ꤬ꤚꤢꤧ꤬ ꤗꤥ꤬ ꤚꤣꤧꤘꤢꤦ꤬ ꤞꤤ꤭, ꤓꤥ꤭ꤒꤥ꤬ ꤢ꤬ ꤢꤩ ꤟꤣꤧ ꤞꤤ꤭ ꤘꤣ ꤞꤤ꤭ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤢ꤬ꤊꤣꤧ꤬ꤛꤢꤧ꤭ ꤚꤣꤧꤘꤢꤦ꤬ ꤟꤣꤧ꤯ ꤠꤢꤧ꤭ ꤚꤢ꤭ꤡꤝꤢ ꤕ꤫ꤢꤩ꤬ꤜꤢꤪ꤭ ꤞꤤ꤭ ꤜꤤ꤬ꤣꤧ꤭ꤒꤣ꤬ꤙꤢ꤬꤯ ꤕꤢꤩ꤬ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬ ꤔꤢꤧ ꤕꤢꤩ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤊ꤫ꤢꤦ꤬ ꤘꤣꤧꤘꤢꤦ꤬ ꤞꤤ꤭ ꤒꤢꤩ꤬ꤙꤝꤤꤒꤢꤩ꤬ꤒꤣꤧ꤬ꤚꤣꤧ꤭ ꤔꤢꤧ ꤒꤢꤩ꤬ꤒꤣꤧ꤬ꤡꤣꤧꤒꤣꤧ꤬ꤡ꤫ꤢꤨ꤬ ꤔꤤ꤮꤯ ꤋꤢꤨ꤭ꤕꤢꤪꤜꤢꤨ ꤊꤝꤤ꤭ꤡꤢꤪꤙꤢꤩ꤭ ꤚꤣꤧ꤬ ꤢ꤬ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤡꤢꤪꤗꤣꤧ꤬ꤚꤢꤧ꤬ 8 ꤘꤣ ꤛꤢꤩ꤬ꤏꤛꤢꤨꤋꤚꤤ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬, ꤠꤢꤧ꤭ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤚ꤫ꤣꤧ꤬ꤜꤣ ꤟꤣꤧ ꤠꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤞꤤ꤭ ꤜꤢꤪ꤭꤮ ꤕꤜꤤ꤭ ꤢ꤬ꤑꤢꤩ꤭ ꤟꤣꤧ, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤞꤤ꤭ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤣꤧ꤭ꤔꤣꤧ꤬, ꤢꤨ꤭ ꤔ꤫ꤤ꤬ꤟꤥ꤭ ꤜꤢꤪ꤭ꤟꤣꤧ ꤟꤢꤩ꤬ꤋꤢꤨ꤬ ꤒꤣ꤬ꤙꤢ꤬ ꤟꤣꤧ꤯ 9 ꤙꤣꤧ ꤠꤢꤧ꤭ ꤊꤝꤤ꤭ꤡꤢꤪꤙꤢꤩ꤭ꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤞꤤꤔ꤫ꤢꤩ꤬ꤓꤢꤧ꤬ꤙꤢꤩ꤬ ꤞꤤ꤭ ꤕꤝꤢ꤭꤮ ꤒꤣ꤬ꤖꤥ ꤡꤣꤧ꤯ ꤠꤢꤧ꤭ ꤗꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤟꤢꤨꤣꤧ꤭ ꤔꤣꤧ꤬ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤞꤤꤑꤢꤩ꤭ ꤖꤢꤧ꤯ ꤠꤢꤧ꤭ ꤗꤢꤩ꤬ ꤜꤢꤪ꤭ꤞꤢꤨ꤬ꤜꤢꤪ꤭ꤞꤢꤩ ꤕ꤫ꤢꤩ꤬ ꤜꤢꤨ꤭ ꤒꤢꤩ꤬ꤗꤢꤩ꤬ ꤔꤢꤧ ꤠꤢꤧ꤭ ꤒꤢꤩ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤢ꤬ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤣꤧ꤭ ꤢ꤬ꤋꤛꤢ꤭ ꤟꤣꤧ꤯ 10 ꤠꤢꤧ꤭ ꤊꤝꤤ꤭ꤡꤢꤪꤙꤢꤩ꤭ ꤑꤢ꤭꤮ ꤜꤥ꤬ꤟꤣꤧ ꤡꤢꤪꤗꤣꤧ꤬ꤚꤢꤧ꤬ ꤔꤢꤧ, ꤢ꤬ ꤊꤢꤩ꤬ ꤞꤤꤕꤜꤢꤪ꤬ꤥ꤬ ꤔꤢꤧ ꤠꤢꤧ꤭ ꤊ꤫ꤢꤦ꤬ ꤡꤝꤢꤥ꤬ꤜꤢꤩ꤭ ꤊꤣꤧ꤭ ꤞꤤ꤭ ꤊꤢꤩ꤬ꤟꤢꤩꤚꤣꤧ꤬ ꤠꤢꤧ꤭ ꤞꤤꤛ꤫ꤢꤦ꤬ ꤡꤝꤢꤥ꤬ꤜꤢꤩ꤭ ꤊꤣꤧ꤭ꤜꤢ꤭ ꤞꤤ꤭꤯ 11 ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤢꤧꤟꤢꤨ ꤠꤢꤧ꤭ ꤊ꤫ꤢꤦ꤬ ꤟꤢꤧ꤭ ꤘꤣꤧ ꤕ꤫ꤢꤩ꤬ꤊꤣꤧ꤭ ꤞꤤ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤢ꤬ꤏꤢ꤭ꤛ꤫ꤢꤨ꤬ ꤣꤧ꤭ꤔꤣꤧ꤬ꤚꤣꤧ꤬, ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤧ꤭ ꤥ꤬ꤜꤢꤩ꤭ ꤊꤣꤧ꤭ ꤜꤢ꤭ ꤞꤤ꤭꤯ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤢ꤬ꤏꤢ꤭ꤛ꤫ꤢꤨ꤬ ꤊ꤫ꤢꤦ꤬ ꤘꤣꤧꤏꤝꤢ꤬ꤘꤣꤧꤏꤢꤪ꤭ꤓꤢꤧ꤬ ꤘꤢꤦ꤬ ꤞꤤ꤭ ꤞꤤꤕꤜꤢꤪ꤬ ꤔꤤ꤮꤯ 12 ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤩ ꤟꤢꤨꤒꤢꤩ꤭ ꤟꤢꤩꤚꤣꤧ꤬ ꤕꤢꤩ꤬ ꤘꤣꤧꤟꤢꤧ꤭ꤘꤣꤧꤚꤢꤩ꤬ ꤗꤢꤩ꤬ꤡꤝ꤫ꤢ꤬ꤜꤣꤧ꤭ ꤗꤢꤩ꤬ꤡꤝ꤫ꤢ꤬ꤊꤢꤩ꤬ ꤋꤛꤢ꤭ꤞꤢꤧꤜꤢꤨ꤭ ꤞꤤ꤭ ꤒꤢꤩ꤬ꤛ꤫ꤢꤦ꤬ ꤔꤢꤧ ꤠꤢꤧ꤭ ꤒꤢꤩ꤬ꤛ꤫ꤢꤦ꤬ ꤟꤢꤨꤔꤣꤧ꤬ ꤒꤣ꤬ꤡꤣ꤬ꤖꤢꤧ꤯ 13 ꤕ꤫ꤥ꤬ꤠ꤫ꤢꤧ꤬ ꤞꤤ꤭꤮, ꤠꤢꤧ꤭ ꤞꤤꤛ꤫ꤢꤦ꤬ ꤔꤢꤪ꤭ꤞꤤꤑꤢꤩ꤭ ꤊꤣꤧ꤭ ꤞꤤ꤭ ꤔꤢꤧ ꤠꤢꤧ꤭ ꤒꤢꤩ꤬ꤒꤣꤧ꤬ꤔꤢꤩ꤬ꤥ꤬ꤔꤢꤩ꤬ ꤘꤣ ꤠꤢꤧ꤭ ꤊ꤫ꤢꤦ꤬ ꤟꤢꤧ꤭ ꤥ꤬ꤜꤢꤩ꤭ ꤊꤣꤧ꤭ ꤞꤤ꤭ ꤕꤢ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤣꤧ꤭ꤔꤣꤧ꤬ꤗꤢ꤬ ꤢꤩꤖꤥ ꤜꤥ꤬ꤟꤣꤧ꤯ ꤗꤢ꤬ꤔꤢꤧꤚꤣꤧ꤬ ꤒꤢꤩ꤬ꤗꤢꤩ꤬ ꤘꤤꤘꤢꤪ꤭ꤘꤤꤘꤢꤧ꤭ ꤠꤢꤧ꤭ ꤔꤣꤧ꤬ ꤢ꤬ꤥ꤬ ꤒ꤫ꤥ꤬ꤕꤢ꤬ ꤡꤣꤧ ꤊꤢꤨꤔ꤫ꤢꤧ꤬ ꤣꤧ꤭ꤔꤣꤧ꤬ ꤡꤣꤧ꤯ ꤟꤢꤨ ꤠꤢꤧ꤭ ꤗꤢꤩ꤬ꤓꤥ꤭ꤟꤣꤧ ꤘꤣ ꤛꤢꤨꤘꤢ꤬ꤖꤢꤨ ꤗ꤫ꤢ꤬ꤒꤥ꤬ ꤒꤣꤧ꤬ꤟꤢꤩ꤬ ꤢ꤬ꤊꤜꤢꤩ꤭ꤔꤣꤧ꤬, ꤞꤢꤧꤟꤢꤨ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤞꤤ꤭ꤊꤜꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ꤊꤣꤧ꤭ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤢ꤬ꤑꤢꤩ꤭ꤔꤣꤧ꤬ꤚꤣꤧ꤬, ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤧ꤭ ꤥ꤬ꤜꤢꤩ꤭ ꤗꤢꤩ꤬ꤡꤝ꤫ꤢ꤬ ꤕ꤫ꤢꤩ꤬ ꤊꤣꤧ꤭ ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯ 14 ꤊꤚꤤꤗꤤ꤭ꤡꤣ꤬ꤖꤢꤨ ꤒꤣꤧ꤬ꤟꤢꤩ꤬ ꤙꤢꤩ꤬ꤙꤢꤩ꤬, ꤊꤚꤤꤗꤤ꤭ꤡꤣ꤬ꤖꤢꤨ ꤗ꤫ꤢ꤬ꤒꤥ꤬ ꤒꤣꤧ꤬ꤟꤢꤩ꤬ ꤙꤢꤩ꤬ꤙꤢꤩ꤬, ꤊꤣꤧ꤬ꤛꤢꤧ꤭ ꤒꤢꤩ꤬ꤞꤤꤒꤢꤩ꤬ꤖꤢꤩ ꤥ꤬ ꤙꤢꤩ꤬ꤙꤢꤩ꤬, ꤊꤣꤧ꤬ꤛꤢꤧ꤭ ꤒꤢꤩ꤬ꤞꤤꤒꤢꤩ꤬ꤖꤢꤩ ꤥ꤬ꤒꤥ꤬ ꤙꤢꤩ꤬ꤙꤢꤩ꤬, ꤒꤢꤩ꤬ꤗꤢꤩ꤬ ꤜꤢꤧ꤬ꤙꤢꤩ꤬ꤟꤣꤧ ꤠꤢꤧ꤭ ꤘꤣ ꤠꤢꤧ꤭ ꤊ꤫ꤢꤦ꤬ꤙꤢꤩ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤗꤤ꤭ꤡꤣ꤬ ꤕꤝꤢ꤭꤮ ꤒꤣ꤬ꤡꤣ꤬ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ꤟꤣꤧ꤯ 15 ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤞꤤ꤭ ꤘꤣ ꤢ꤬ ꤥ꤬ ꤜꤢ꤭ꤋꤢꤧ꤭ ꤘꤣ ꤠꤤ꤭ꤚꤥꤗꤢꤩ꤬ ꤢ꤬ꤊꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤠꤢꤧ꤭ ꤞꤤꤕꤜꤢꤪ꤬ꤏꤝꤢ꤬ ꤘꤥ꤬ꤔꤢꤧ꤭ ꤕ꤫ꤢꤩ꤬ꤊꤣꤧ꤭ ꤔꤢꤧ꤬ꤡꤣꤧ ꤞꤤ꤭ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤡꤣꤧ꤯ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ 16 ꤘꤣ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤞꤤꤒꤣꤧ꤬ꤚꤢꤩ꤭ꤒꤥ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤜꤢꤪ꤭ ꤛꤢꤩ꤬ꤞꤤ꤭ ꤔꤢꤧ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤟꤣꤧ꤯ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤚ꤫ꤣꤧ꤬ꤜꤣ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬, ꤓꤥ꤭ꤚꤣꤧ꤬ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤊꤣꤧ꤭ꤕ꤫ꤥ꤬ ꤛꤢꤨꤘꤢ꤬ꤖꤢꤨ ꤗ꤫ꤢ꤬ꤒꤥ꤬ ꤒꤣꤧ꤬ꤟꤢꤩ꤬꤯ 17 ꤡꤢꤪꤗꤣꤧ꤬ꤚꤢꤧ꤬ ꤘꤢꤧ꤬ꤡꤢꤪꤘꤢꤧ꤬ꤒꤢꤩ꤬ ꤟꤣꤧ ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤢ꤬ꤔ꤫ꤢꤩ꤬ ꤚꤣꤧꤘꤢꤦ꤬ ꤟꤢꤨꤒꤢꤩ꤭ꤔꤣꤧ꤬ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ ꤘꤣꤧꤜꤥ꤭ꤓꤢꤧ꤬ꤜꤥ꤭ ꤕ꤫ꤢꤩ꤬ ꤟꤣꤧ꤯ ꤒꤢꤩ꤬ꤡꤢꤪꤒꤢꤩ꤬ꤒꤢꤩ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤡꤢꤓꤢꤧ꤬ ꤔꤢꤧ ꤒꤢꤩ꤬ꤛ꤫ꤢꤦ꤬ ꤚꤣꤧ꤬ ꤢ꤬ ꤒꤣꤧ꤬ꤘꤢꤦ꤬ ꤔꤢꤧ ꤒꤢꤩ꤬ꤛ꤫ꤢꤦ꤬꤯ ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ, “ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤘꤢꤧ꤬ꤡꤢꤪꤘꤢꤧ꤬ꤒꤢꤩ꤬ ꤢ꤬ ꤔꤢꤧ ꤢ꤬ꤒꤢꤩ꤬ꤛ꤫ꤢꤦ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤢ꤬ꤞꤢꤩ꤭ ꤗ꤫ꤢ꤬ꤔꤤꤔꤢꤧ꤬ ꤕꤢ꤭꤯” ꤊꤣꤧ꤬ꤛꤢꤧ꤭ ꤗꤢꤩ꤬ꤜꤢꤪ꤭ꤕꤜꤤ꤭ ꤒꤢꤩ꤬ꤞꤢꤦ ꤕꤝꤢ꤭꤮ ꤒꤣ꤬ꤖꤚꤢꤩ꤬ 18 ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤞꤤꤕꤜꤢꤪ꤬ꤘꤢꤨ꤬ ꤥ꤬ꤜꤥ꤭ꤓꤢꤧ꤬ ꤘꤣ ꤗꤢꤪꤋꤢꤨ꤬꤯ ꤚꤣꤧ꤬ ꤢ꤬ ꤥ꤬ꤜꤥ꤭ꤓꤢꤧ꤬ ꤕ꤫ꤢꤩ꤬ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ ꤒꤢꤩ꤬ꤞꤢꤦꤒꤢꤩ꤬ꤕꤜꤢ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬꤯ ꤘꤣ ꤛꤢꤩ꤬ꤞꤤ꤭ ꤗꤢꤩ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤢ꤬ ꤔꤢꤪ꤭ ꤞꤤꤑꤢꤩ꤭ ꤕꤢ꤬ ꤢꤨ꤭ ꤔꤢꤧ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤣꤧ꤭ꤔꤣꤧ꤬ ꤒꤥ꤬ ꤟꤣꤧ꤯ 19 ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤛꤢꤩ꤬ꤞꤤ꤭ ꤜ꤫ꤢꤩ꤬ꤞꤤꤑꤢꤩ꤭ꤡ꤫ꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤔꤣꤧ꤬, ꤢ꤬ ꤥ꤬ꤜꤥ꤭ ꤜꤤ꤭ꤖꤥ ꤡꤣꤧ ꤘꤣ ꤛꤢꤩ꤬ꤞꤤ꤭ꤑꤢꤩ꤭ ꤡꤣꤧ, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤔ꤫ꤢꤩ꤬ꤙꤢꤧ꤬ꤡꤢꤩ꤬ ꤚꤣꤧꤘꤢꤦ꤬ ꤘꤣꤧꤜꤥ꤭ ꤜ꤫ꤢ꤬ꤜꤤ꤭ ꤕ꤫ꤢꤩ꤬ ꤡꤣꤧ ꤟꤣꤧ ꤛꤢꤩ꤬ꤞꤤ꤭ ꤡꤣꤧ ꤟꤣꤧ꤯ 20 ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤡꤢꤓꤢꤧ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤙꤢꤧꤜꤢꤧ꤬ꤜꤢꤨ ꤟꤢꤩ꤬ꤋꤢꤨ꤬ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤞꤤꤑꤢꤩ꤭ꤕꤜꤥ꤭ ꤚꤢꤧꤚꤢꤧ ꤡꤣꤧ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤥ꤬ ꤔꤢꤧ ꤢ꤬ ꤒꤣꤧ꤬ꤚꤣꤧ꤭ꤖꤚꤥ꤬ꤖꤚꤢꤧ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤡꤣꤧ, ꤓꤥ꤭ꤒꤥ꤬ ꤛꤢꤩ꤬ꤞꤤ꤭ ꤞꤤꤑꤢꤩ꤭ ꤕꤜꤥ꤭ꤕꤜꤢꤦ ꤡꤣꤧ ꤔꤢꤧ ꤢ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤗ꤫ꤢ꤬ꤔꤤꤔꤢꤧ꤬ ꤒꤣ꤬ꤖꤚꤢꤩ꤬ꤡꤣꤧ꤯ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤣꤧ꤬ꤚꤣꤧ꤭ꤖꤚꤥ꤬ꤖꤚꤢꤧ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤔꤢꤧ ꤢ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤗ꤫ꤢ꤬ꤔꤤꤔꤢꤧ꤬ ꤒꤣ꤬ꤖꤚꤢꤩ꤬ ꤡꤣꤧ ꤣꤧ꤭ꤔꤣꤧ꤬, ꤛꤢꤩ꤬ꤞꤤ꤭ ꤗꤢꤧꤓ꤫ꤣꤧ꤬ꤡ꤫ꤢꤧ꤬ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤞꤤꤑꤢꤩ꤭ꤡ꤫ꤢꤧ꤬ ꤖꤢꤧ꤯ ꤛꤢꤩ꤬ꤞꤤ꤭ ꤜꤢ꤭ ꤗꤢꤧꤓ꤫ꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤙꤢꤧꤜꤢꤧ꤬ꤒꤢꤩ꤭ꤜꤢꤧ꤬ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤞꤤ꤭ ꤞꤤꤑꤢꤩ꤭ꤡ꤫ꤢꤧ꤬ ꤜꤢ꤭ꤋꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤖꤢꤧ꤯ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤜꤢꤪ꤭ ꤒꤢꤩ꤬ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤓꤥ꤭ꤟꤣꤧ ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤞꤤ꤭ ꤟꤢꤩꤓꤥ꤭ꤟꤢꤩꤜꤢꤧ꤬ ꤡ꤫ꤢꤧ꤬ ꤕꤢ꤬ꤒꤥ꤬꤯ 21 ꤛꤢꤩ꤬ꤞꤤ꤭ ꤞꤤꤑꤢꤩ꤭ꤟꤣꤧ ꤡꤢꤪꤗꤣꤧ꤬ꤚꤢꤧ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤘꤢꤧ꤬ꤛ꤫ꤢꤦ꤬ꤘꤢꤧ꤬ꤔ꤫ꤢꤧ꤬ ꤊꤣꤧ꤭ ꤜꤢꤨ꤭ ꤟꤢꤨ ꤡꤢꤪꤗꤣꤧ꤬ꤚꤢꤧ꤬ ꤒꤣ꤬ꤖꤚꤢꤩ꤬ ꤒꤥ꤬꤯ ꤢ꤬ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤊꤣꤧ꤭ ꤜꤢꤨ꤭ ꤒꤥ꤬ꤒꤥ꤬꤯ ꤟꤢꤨꤔꤣꤧ꤬ꤚꤣꤧ꤬ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤒꤣꤧ꤬ꤔꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤓꤝꤢ꤭ꤓꤢꤧ꤬ ꤜꤢꤪ꤭ ꤒꤢꤩ꤬ꤥ꤬ꤜꤣꤥ꤬ꤊꤜꤢꤪ꤭꤯ ꤓꤥ꤭ꤒꤥ꤬ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤒꤣꤧ꤬ꤔꤢꤩ꤬ ꤥ꤬ꤜꤣꤥ꤬ꤊꤜꤢꤪ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤒꤢꤩ꤬ꤋꤤꤒꤢꤩ꤬ꤜꤢꤪ꤬ ꤗꤢꤩ꤬ꤙꤤꤊꤢꤧ꤭ ꤟꤣꤧ ꤛꤢꤩ꤬ꤞꤤ꤭ ꤟꤣꤧ꤯ 22 ꤛꤢꤩ꤬ꤞꤤ꤭ ꤟꤢꤩꤜꤢꤧ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ ꤢ꤬ ꤒꤢꤩ꤬ꤞꤤꤒꤢꤩ꤬ꤖꤢꤩ ꤥ꤬, ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤓꤝꤢ꤭ ꤜꤢ꤭ꤋꤢꤧ꤭ ꤊꤣꤧ꤬ꤛꤢꤧ꤭ ꤢꤦꤢꤧ ꤖꤢꤧ꤯ 23 ꤛꤢꤩ꤬ꤞꤤ꤭ ꤒꤥ꤭ ꤡꤢꤪꤙꤢꤩ꤭ꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤢ꤬ ꤥ꤬ ꤔꤢꤧ ꤢ꤬ ꤒꤣꤧ꤬ꤚꤣꤧ꤭ꤘꤢꤨ꤬ꤓꤢꤨ꤭ ꤚꤣꤧ꤬ ꤢ꤬ ꤞꤣꤧ꤭ꤡ꤫ꤢꤧ꤬ꤒꤥ꤬ ꤣꤧ꤭ꤒꤣ꤬ꤖꤚꤢꤩ꤬, ꤗꤢ꤬ꤔꤢꤧꤚꤣꤧ꤬ ꤢ꤬ ꤡꤝꤢ ꤡꤢꤪꤙꤢꤩ꤭ ꤒꤣꤧ꤬ꤕꤜꤢꤩ꤬ꤘꤢꤦ꤬ꤑꤢꤩ꤭ ꤖꤚꤢꤩ꤬ꤛꤥ꤬ꤖꤚꤢꤩ꤬ꤊꤤ꤬ ꤘꤣ ꤢꤨ꤭ ꤙꤢꤧ ꤔꤢꤧ ꤊꤢꤨꤋꤢꤨ꤬ ꤒꤣꤧ꤬ꤟꤢꤩ꤬꤯ ꤛꤢꤩ꤬ꤞꤤ꤭ ꤡꤢꤪꤙꤢꤩ꤭ ꤖꤚꤢꤩ꤬ꤛꤥ꤬ꤖꤚꤢꤩ꤬ꤊꤤ꤬ ꤘꤣ ꤢ꤬ꤞꤢꤧꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤣꤧ꤭ꤡ꤫ꤢꤧ꤬ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ꤞꤢꤧꤔꤢꤧ ꤛ꤫ꤥ꤬ꤓꤢꤨ꤬ ꤒꤣꤧ꤬ꤟꤢꤩ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ꤞꤢꤧꤔꤢꤧ ꤒꤢꤩ꤬ꤖꤢꤨꤒꤢꤩ꤬ꤜꤣꤧ꤬ ꤒꤣꤧ꤬ꤟꤢꤩ꤬, ꤒꤥ꤬ꤗꤢ꤬ꤔꤢꤧ ꤢ꤬ꤞꤢꤧꤔꤢꤧ ꤚ꤫ꤢꤨ꤬ꤕꤜꤢꤧ ꤒꤣꤧ꤬ꤓꤢꤩ ꤒꤣꤧ꤬ꤟꤢꤩ꤬꤯ 24 ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤞꤤ꤭ ꤞꤤꤕꤜꤢꤪ꤬ ꤞꤤꤛ꤫ꤢꤦ꤬ ꤒꤢꤩ꤬ꤕꤣꤧ꤬ꤒꤤ꤭ꤕꤣꤧ꤬ꤒꤢ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤟꤢꤨꤒꤢꤩ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤕꤜꤝꤢ꤭ꤗꤢꤩ꤬ꤊꤢꤧ꤭ ꤛꤢꤩ꤬ꤞꤤ꤭ ꤖꤢꤧ꤯ ꤚꤣꤧ꤬ ꤛꤢꤩ꤬ꤞꤤ꤭ ꤗꤢꤩ꤬ ꤞꤤꤒꤣꤧ꤬ꤚꤢꤩ꤭ ꤚꤣꤧꤘꤢꤦ꤬ ꤜꤢꤪ꤭ ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬꤯ 25 ꤢ꤬ ꤒꤥ꤭ ꤛ꤫ꤢꤦ꤬ꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤓꤢꤨ꤬ꤜꤢꤧ꤬ ꤒꤣꤧ꤬ꤕꤜꤢꤩ꤬ꤊꤢꤧ꤭ ꤚꤣꤧ꤬ ꤢ꤬ ꤡꤝꤢ ꤛ꤫ꤢꤦ꤬ꤢꤩ꤬ ꤚꤣꤧꤘꤢꤦ꤬ ꤒꤢꤩ꤬ꤜꤣꤧ꤬ꤟꤥ꤭ꤜꤣꤧ꤬ꤟꤢꤧ꤬꤯ ꤢ꤬ ꤒꤥ꤭ ꤡꤢꤪꤙꤢꤩ꤭ ꤒꤣꤧ꤬ꤒ꤫ꤢꤪ꤬ꤡꤣꤧ ꤡꤢꤪꤗꤣꤧ꤬ꤚꤢꤧ꤬ ꤚꤣꤧ꤬ ꤢ꤬ ꤒꤥ꤭ ꤗꤢꤩ꤬ ꤕ꤫ꤢꤩ꤬ ꤖꤢꤧꤒꤢꤦ ꤖꤚꤢꤩ꤬ ꤘꤣ ꤢ꤬ ꤙꤢꤧꤜꤢꤧ꤬ ꤒꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤒꤢꤩ꤬ꤗꤢꤩ꤬ ꤖꤢꤧ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤡꤝꤢ ꤡꤢꤪꤙꤢꤩ꤭ ꤚꤣꤧ꤬ ꤗꤢꤩ꤬ ꤕ꤫ꤢꤩ꤬ ꤒ꤫ꤥ꤬ ꤒꤢꤩ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤙꤢꤧꤜꤢꤧ꤬ ꤜꤢꤨ꤭ ꤒꤣꤧ꤬ꤟꤢꤩ꤬ ꤢ꤬ꤒꤢꤩ꤬ꤗꤢꤩ꤬꤯ ꤙꤢꤧ꤬ꤡꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬ ꤢꤨ꤭ ꤊ꤫ꤢꤦ꤬ ꤓꤢꤨ꤬ꤞꤢꤩꤓꤢꤧ꤬ ꤘꤢꤦ꤬ ꤜꤢꤨ꤭ ꤢ꤬ꤡꤢꤨ꤬ꤡꤢꤨ꤬ ꤢ꤬ꤓꤢꤦ꤭ꤓꤢꤦ꤭ ꤔꤤ꤮꤯ ꤢ꤬ꤗꤢꤩ꤬꤯ 26 ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤒꤢ꤭ꤊꤢꤧ꤭ ꤛꤢꤩ꤬ꤞꤤ꤭ ꤘꤣ ꤞꤝꤤ꤬ꤓꤣꤧ꤭ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ꤞꤤꤜꤢꤪ꤭ ꤘꤣ ꤢ꤬ ꤗꤢꤩ꤬ꤞꤤꤒꤣꤧ꤬ꤚꤢꤩ꤭ ꤗꤢꤨꤗ꤫ꤢꤧ꤬ ꤛꤢꤩ꤬ꤞꤤ꤭ ꤣꤧ꤭ ꤢ꤬ ꤊꤣꤧ꤬ꤘꤢ꤭ꤊꤢꤨ꤭꤯ ꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤡꤣꤧ ꤙꤢꤩ꤬ꤙꤢꤩ꤬, ꤢ꤬ ꤠꤤ꤭ꤊꤢꤧ꤭ ꤢ꤬ꤜ꤫ꤢꤩ꤬ꤊꤜꤥ꤭ ꤙꤢꤧꤞꤝꤢ ꤥ꤬ꤗꤣꤧ꤭ꤒ꤫ꤣ꤬ ꤔꤢꤧ ꤖꤚꤢꤩ꤬ꤋꤢꤨ꤭ ꤚꤣꤧ꤬ ꤛꤢꤩ꤬ꤞꤤ꤭ ꤔꤢꤧ ꤛꤢꤩ꤬ꤞꤤ꤭ ꤡꤝꤢ ꤙꤢꤧꤞꤝꤢ ꤥ꤬ꤗꤣꤧ꤭ꤒ꤫ꤣ꤬ ꤚꤣꤧꤘꤢꤦ꤬ ꤜꤢꤨ꤭꤯ 27 ꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤙꤢꤩ꤬ꤙꤢꤩ꤬ ꤢ꤬ ꤞꤢꤧꤟꤢꤨꤔꤣꤧ꤬ꤟꤣꤧ꤯ ꤛꤢꤩ꤬ꤞꤤ꤭ ꤠꤤ꤭ꤊꤢꤧ꤭ ꤢ꤬ꤜ꤫ꤢꤩ꤬ꤊꤜꤥ꤭ ꤥ꤬ꤗꤣꤧ꤭ꤒ꤫ꤣ꤬ ꤔꤢꤧ ꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ꤞꤝꤤ꤬ꤓꤣꤧ꤭ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤔꤣꤧ꤬ ꤢ꤬ ꤞꤤꤛ꤫ꤢꤦ꤬ꤡꤝꤢ ꤥ꤬ꤗꤣꤧ꤭ꤒ꤫ꤣ꤬ ꤚꤣꤧꤘꤢꤦ꤬ ꤋꤛꤢ꤭ ꤜꤢꤨ꤭꤯ ꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤗꤢꤩ꤬ ꤞꤤꤒꤣꤧ꤬ꤚꤢꤩ꤭ ꤚꤣꤧꤘꤢꤦ꤬ ꤋꤛꤢ꤭ ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬꤯ ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤒꤢꤩ꤬ꤞꤢꤦꤒꤢꤩ꤬ꤥ꤬ꤚꤢ꤬ ꤟꤢꤨꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤘꤣꤧꤡꤢ꤭ ꤟꤣꤧ ꤛꤢꤩ꤬ꤞꤤ꤭ ꤟꤢꤨ ꤢ꤬ ꤊꤢꤪ꤬ ꤔꤢꤧ ꤛꤢꤩ꤬ꤞꤤ꤭ꤔꤣꤧ꤬ ꤟꤣꤧ꤯ 28 ꤓꤥ꤭ꤒꤥ꤬ ꤛꤢꤩ꤬ꤞꤤ꤭ ꤞꤤꤑꤢꤩ꤭ ꤓꤥ꤭ꤟꤣꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤒꤣꤧ꤬ꤘꤢꤦꤚꤣꤧ꤬, ꤢ꤬ ꤖꤛꤢꤏꤢꤦ꤬ ꤜꤢ꤭ꤋꤢꤧ꤭ ꤒꤥ꤬, ꤢ꤬ ꤘꤢꤧ꤬ ꤒꤢꤩ꤬ꤒꤣ꤬ꤡꤣ꤬꤮ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤡꤢꤪꤗꤣꤧ꤬ꤚꤢꤧ꤬ ꤔꤢꤪ꤭ꤕꤣꤊꤢꤧ꤭ ꤛꤢꤩ꤬ꤞꤤ꤭ ꤔꤢꤧ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤒꤣꤧ꤬ꤔꤢꤩ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤚꤣꤧꤘꤢꤦ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤕꤜꤝꤢ꤭ꤗꤢꤩ꤬ ꤜꤢ꤭ꤋꤢꤧ꤭ ꤛꤢꤩ꤬ꤞꤤ꤭ ꤔꤢꤧ ꤒꤢꤩ꤬ ꤘꤣ ꤢ꤬ ꤊꤢꤪ꤬ ꤗꤢꤩ꤬ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤣꤧ꤯ 29 ꤛꤢꤩ꤬ꤞꤤ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤣꤧ꤭ꤔꤣꤧ꤬ ꤢ꤬ ꤜꤣꤙꤢ꤭ ꤏꤥ꤭ꤏꤢꤦ ꤡꤣꤧ ꤔꤢꤧ ꤒꤢꤩ꤬ꤡꤢꤪꤒꤢꤩ꤬ꤒꤢꤩ꤬ ꤒꤥ꤬, ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬, ꤊꤢꤨꤠ꤫ꤢ꤬ꤊꤢꤨꤠꤢꤩ꤭ ꤢꤩ꤬ꤚꤣꤧꤘꤢꤦ꤬ ꤑꤢꤩ꤭, ꤓꤥ꤭ꤚꤣꤧ꤬ ꤢ꤬ ꤜꤣꤙꤢ꤭ ꤡꤣꤧ ꤔꤢꤧ ꤒꤢꤩ꤬ꤞꤤꤋꤝꤢꤩ ꤢꤨ꤭, ꤗꤢꤩ꤬ꤞꤣꤧ꤭ ꤊꤣꤧ꤬ꤛꤢꤧ꤭, ꤠꤢꤦꤢꤨ꤭, ꤜꤣꤧ꤬ꤟꤥ꤭ꤜꤣꤧ꤬ꤟꤢꤧ꤬ꤢꤩ꤬ ꤢꤨ꤭, ꤞꤤꤋꤢꤞꤤꤓꤢꤩ꤬ ꤢꤨ꤭, ꤘꤢꤧꤗꤣꤧ꤬ꤓ꤫ꤣꤧ꤬ꤛꤥ꤬ ꤢꤨ꤭꤯ 30 ꤓꤥ꤭ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩꤕꤛꤢ ꤢꤨ꤭ꤗꤝꤤ꤭, ꤞꤤꤓꤢꤩ꤬ ꤡꤢꤪꤗꤣꤧ꤬ꤚꤢꤧ꤬, ꤤ꤬ꤏꤢꤪ꤭ꤤ꤬ꤙꤢ꤬ꤏꤝꤢ꤬, ꤖꤛꤢꤘꤢꤨ꤬ ꤖꤛꤢꤓꤢꤧ꤬ꤜꤥ꤭ ꤔ꤫ꤢꤩ꤬, ꤓꤢꤨ꤬ꤞꤢꤩ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬꤯ ꤛꤢꤩ꤬ꤞꤤ꤭ ꤗꤢꤧꤕꤢꤨ꤭ꤒꤣꤧ꤬ꤔꤢꤩ꤬ ꤢꤩꤓꤢꤧ꤬ꤕ꤫ꤥ꤬ ꤊꤜꤢꤧ ꤢ꤬ꤞꤢꤩ꤭ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ ꤢꤩꤓꤢꤧ꤬ ꤟꤢꤧ꤭ꤑꤢꤩ꤭ꤕ꤫ꤥ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬꤯ ꤛꤢꤩ꤬ꤞꤤ꤭ ꤔ꤫ꤤ꤬ꤘꤢ꤭ ꤜꤢ꤭ꤋꤢꤧ꤭ ꤢ꤬ꤗ꤫ꤥ꤬ꤢ꤬ꤖꤢꤩ꤭ ꤍ꤫ꤥ꤬ ꤒꤥ꤬꤯ 31 ꤛꤢꤩ꤬ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤢꤦꤢꤧ ꤊꤣꤧ꤬ꤛꤢꤧ꤭ ꤖꤥ꤭ꤓꤢꤧ꤭, ꤢ꤬ꤡꤢꤪ ꤊꤣꤧ꤭ ꤔꤢꤧ ꤢ꤬ꤍ꤫ꤥ꤬ ꤒꤥ꤬꤯ ꤢ꤬ ꤒꤢꤩ꤬ꤗꤥ꤬ꤚꤣꤧ ꤢꤨ꤭ꤔꤣꤧ꤬, ꤢ꤬ꤥ꤬ꤒꤥ꤬, ꤢ꤬ ꤞꤤꤛꤢꤪ꤬ꤚꤣꤧ ꤢꤨ꤭ꤔꤣꤧ꤬ ꤢ꤬ꤥ꤬ꤒꤥ꤬꤯ 32 ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤟꤢꤩ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤞꤣꤧ꤭ꤖꤚꤢꤩ꤬ ꤟꤢꤨꤔꤣꤧ꤬ ꤒꤣꤧ꤬ꤟꤢꤩ꤬ ꤗꤢ꤬ ꤢ꤬ ꤊꤢꤪ꤬ꤞꤣꤧ꤭ ꤔꤣꤧ꤬ ꤢ꤬ ꤞꤤꤑꤢꤩ꤭ ꤖꤢꤧ꤯ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤗꤢꤩ꤬ ꤟꤢꤧ꤭ꤑꤢꤩ꤭ ꤒꤣꤧ꤬ꤘꤢꤦ꤬ꤘꤢꤦ꤬ꤕ꤫ꤥ꤬ ꤖꤢꤧ꤯ ꤓꤥ꤭ꤒꤥ꤬ ꤢꤨ꤭ ꤊꤢꤩ꤬ ꤗꤢꤩ꤬ꤊꤣꤧ꤭ ꤟꤢꤨꤔꤣꤧ꤬ ꤟꤢꤩꤚꤣꤧ꤬ ꤛꤢꤩ꤬ꤞꤤ꤭ ꤞꤤꤕꤜꤢꤪ꤬ꤗꤥ꤬ ꤜꤢ꤭ꤋꤢꤧ꤭ ꤖꤢꤧ꤯ |
Wycliffe USA
The Seed Company