เตเด๊อะโลแถ่ 9 - Eastern Kayah Shadaw Dialect

¹ ꤟꤢꤨꤔꤣꤧ꤬ꤓꤥ꤭ꤚꤣꤧ꤬ ꤙꤣꤧ ꤒꤣꤧ꤬ꤔꤢꤩꤖꤢꤨ ꤍꤢꤧ꤭ꤖꤚꤢꤩ꤬ ꤒꤣ꤬ꤖꤚꤢꤩ꤬ ꤥꤓꤢꤧ꤬ ꤢ꤬ꤊꤝꤢ꤬ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤗꤢꤧꤓ꤫ꤣꤧ꤬ ꤏꤢꤩ꤬ ꤒꤣ꤬ꤗꤢꤩ꤭ ꤜꤣꤧ꤬ꤒꤢ꤭ ꤥ꤬ ꤓꤥ꤭ꤟꤣꤧ ꤘꤣ ꤟꤢꤩ꤬ꤋꤢꤨ꤬ ꤣꤧ꤭ ꤚꤣꤧ꤬ ꤢꤨ꤭ ꤘꤣꤧ ꤏꤢꤩ꤬ ꤣꤧ꤭ꤒꤣ꤬ꤗꤢꤩ꤭ ꤔꤢꤧ ꤋꤚꤢꤪ꤭ꤊꤢꤨ꤭ꤘꤢꤨ꤬ ꤋꤚꤢꤪ꤭ꤊꤢꤨ꤭ꤛꤢꤧ꤭ ꤒꤣ꤬ꤊꤢꤨ꤭ ꤢ꤬ꤞꤢꤪ꤭ꤓꤤ꤬꤯

² ꤏꤢꤩ꤬ꤣꤧ꤭ ꤒꤣ꤬ꤗꤢꤩ꤭ ꤙꤢꤗꤥ꤭ ꤋꤚꤢꤪ꤭ꤊꤢꤨ꤭ꤘꤢꤨ꤬ ꤋꤚꤢꤪ꤭ꤊꤢꤨ꤭ꤛꤢꤧ꤭ ꤣꤧ꤭ꤒꤣ꤬ꤊꤢꤨ꤭ ꤚꤣꤧ꤬ ꤗꤤ꤬ꤋꤥ꤬ꤓꤢꤧ꤬ ꤘꤣ ꤢ꤬ꤊꤢꤨ꤭ ꤚꤣꤧ꤬ ꤢ꤬ ꤞꤢꤧꤡꤣꤧꤔꤢꤧ ꤗꤤ꤬ꤋꤥ꤬ꤓꤢꤧ꤬ ꤘꤣ ꤗꤤ꤬ꤕꤥ꤬ꤘꤢꤨ꤬ꤊꤢꤨ꤭ ꤔꤣꤧ꤬ ꤡꤣꤧ꤯ ꤗꤤ꤬ ꤜꤢ꤭ ꤋꤥ꤬ꤓꤢꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤒꤣꤧꤗ꤫ꤢꤪ꤬ ꤗꤢ꤬ ꤢ꤬ꤋꤤꤋꤤ, ꤗꤢꤪꤜꤢꤩ꤭ ꤗꤢ꤬ ꤢ꤬ ꤋꤤꤊꤢꤧ꤭ ꤜꤢꤪ꤭ꤕꤜꤤ꤭ꤡꤣꤧ꤯

³ ꤒꤣꤧ꤬ꤊꤤ꤭ ꤒꤣꤧ꤬ꤟꤢꤩ꤬ ꤥ꤬ ꤘꤣ ꤗꤤ꤬ꤋꤥ꤬ꤊꤜꤢꤩ꤭ ꤛꤥ꤬ꤓꤢꤩ꤬ ꤚꤣꤧ꤬ ꤢ꤬ ꤛꤥ꤬ꤓꤢꤩ꤬ ꤒꤢ꤭ꤜꤢꤪ꤭ ꤘꤣ ꤟꤢꤩ꤬ꤋꤢꤨ꤬ ꤚꤣꤧ꤬ ꤢꤨ꤭ ꤘꤣꤧ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤖꤚꤥ꤬ꤖꤚꤢꤧ꤬ ꤏꤝꤢ꤬ꤏꤢꤪ꤭ ꤘꤣ ꤢ꤬ ꤊ꤫ꤢꤦ꤬ ꤢ꤫ꤢ꤬ꤚꤢꤧ꤭ ꤢꤨ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤚꤢꤧ꤭ ꤞꤢꤧꤡꤣꤧꤔꤢꤧ ꤘꤢꤧ꤭ꤗꤢꤩ꤬ ꤘꤣ ꤟꤢꤩ꤬ꤋꤢꤨ꤬ꤣꤧ꤭ ꤒꤣꤧ꤬ꤟꤢꤩ꤬ ꤢ꤬ ꤢ꤫ꤢ꤬ꤚꤢꤧ꤭ ꤢꤨ꤭ ꤔꤣꤧ꤬ ꤡꤣꤧ ꤕꤢ꤭꤯

⁴ ꤢꤨ꤭ ꤟꤢꤩꤥ꤬ꤔꤢꤩ꤬ ꤛꤢꤩ꤬ꤞꤤ꤭ ꤔꤢꤧ ꤢ꤬ ꤙꤢꤩ꤬ ꤗꤢꤩ꤬ꤕꤛꤢꤔ꤫ꤤ꤬ ꤗꤤ꤬ꤞꤢꤩ꤬ꤗ꤫ꤢꤪ꤬ ꤒꤣꤧ꤬ꤟꤢꤩ꤬ ꤒꤥ꤬, ꤞꤢꤪ꤬ꤒꤢꤪ꤭ꤗ꤫ꤢꤪ꤬ ꤞꤤꤞꤥ꤭ ꤒꤣꤧ꤬ꤟꤢꤩ꤬ ꤒꤥ꤬, ꤞꤢꤪ꤬ꤗ꤫ꤢꤪ꤬ꤠꤢꤩ꤬ꤙꤥ꤭ ꤞꤤ꤭ꤒꤣꤧ꤬ꤟꤢꤩ꤬ ꤒꤣꤧ꤬ꤊꤤ꤬꤮ ꤒꤥ꤬꤯ ꤛꤢꤩ꤬ꤞꤤ꤭ ꤙꤢꤩ꤬ ꤢ꤫ꤢ꤬ ꤖꤢꤧꤒꤢꤦ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤚꤣꤧꤘꤢꤦ꤬ ꤊꤣꤧ꤭ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤒꤢꤩ꤬ꤗꤢꤩ꤬ꤗꤢꤗꤢꤩ꤬ꤒꤢꤩ꤭ ꤘꤣ ꤢ꤬ ꤗꤢ꤭ꤓꤢꤩꤜꤥ꤬ ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯

⁵ ꤒꤣꤧ꤬ꤊꤤ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤟꤢꤩ ꤥ꤬ ꤛꤢꤩ꤬ꤞꤤ꤭ ꤘꤣ ꤢ꤬ ꤙꤢꤩ꤬ ꤗꤢꤩ꤬ꤞꤣꤧ꤭ꤔ꤫ꤤ꤬ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤒꤥ꤬ ꤗꤢ꤬ꤔꤢꤧꤚꤣꤧ꤬ ꤍꤢꤧ꤭ꤜꤢꤩ꤭ ꤢ꤬ꤊꤢꤨ꤭ꤔꤣꤧ꤬, ꤢꤨ꤭ ꤔꤢꤪ꤭ꤗꤢꤩ꤬ꤏꤝꤤꤡꤢ꤭ ꤗꤢꤩ꤬ꤏꤝꤤꤡꤢꤦ꤭ ꤛꤢꤩ꤬ꤞꤤ꤭ ꤔꤢꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬꤯ ꤒꤢꤩ꤬ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤢꤨ꤭ ꤣꤧ꤭ꤔꤣꤧ꤬, ꤢ꤫ꤢ꤬ꤚꤢꤧ꤭ꤏꤢꤩ꤭ ꤞꤢꤧꤡꤣꤧꤔꤢꤧ ꤘꤢꤧ꤭ꤗꤢꤩ꤬ ꤢ꤫ꤢ꤬ ꤔꤣꤧ꤬꤯

⁶ ꤣꤧ꤭ꤍꤢꤧ꤭ꤜꤢꤩ꤭ ꤢ꤬ꤊꤢꤨ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤗꤢꤧꤕꤢꤨ꤭ ꤒꤢꤩ꤬ꤞꤣꤧ꤭ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤒꤥ꤬꤯ ꤛꤢꤩ꤬ꤞꤤ꤭ ꤞꤤꤛ꤫ꤢꤦ꤬ ꤞꤣꤧ꤭ ꤒꤣꤧ꤬ꤘꤢꤦꤚꤣꤧ꤬ ꤒꤢꤩ꤬ꤞꤣꤧ꤭ ꤢ꤬ꤗ꤫ꤥ꤬ꤖꤢꤩ꤭ ꤊ꤫ꤢꤦ꤬ ꤊꤜꤢꤧ꤬ ꤒꤣꤧ꤬ꤖꤢ꤭ꤊꤢꤧ꤭ ꤛꤢꤩ꤬ꤞꤤ꤭ ꤜ꤫ꤢꤩ꤬ ꤕꤢ꤭꤯

⁷ ꤒꤣꤧ꤬ꤊꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ꤞꤢꤧꤔꤢꤧ ꤒꤣꤧ꤬ꤞꤤ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤥ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤢ꤬ꤔ꤫ꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤏꤢꤒꤢꤩ꤬ ꤢ꤬ꤑꤢꤩ꤭ ꤔꤣꤧ꤬꤯ ꤘꤣ ꤛꤢꤩ꤬ꤞꤤ꤭ ꤊꤢꤨ꤬ꤊꤜꤢꤪꤜꤥ꤬ ꤔꤣꤧ꤬ ꤢ꤬ ꤡ꤫ꤣ꤬ ꤔꤢꤧ ꤢ꤬ ꤊ꤫ꤥ꤬ꤔ꤫ꤤ꤬ ꤊꤢꤨꤊ꤫ꤥ꤬ꤓꤢꤩ꤭ ꤔꤣꤧ꤬, ꤓꤥ꤭ꤚꤣꤧ꤬ ꤛꤢꤩ꤬ꤞꤤ꤭ ꤕꤣꤧꤞꤢꤩ꤬ ꤔꤣꤧ꤬, ꤢ꤬ ꤡ꤫ꤣ꤬ ꤔꤢꤧ ꤊꤣꤧ꤬ꤛꤢꤧ꤭ ꤕꤣꤧꤞꤢꤩ꤬꤯

⁸ ꤛꤢꤩ꤬ꤞꤤ꤭ ꤊꤢꤨꤜꤥ꤬ ꤔꤣꤧ꤬, ꤢ꤬ꤞꤢꤧꤔꤢꤧ ꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤢ꤬ꤊꤢꤨꤜꤥ꤬ ꤚꤣꤧ꤬ ꤢ꤬ꤊꤢꤨ꤬ꤋꤣꤧ꤭ ꤔꤣꤧ꤬ ꤢ꤬ꤞꤢꤧꤔꤢꤧ ꤢꤞ꤫ꤤ꤬ ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤬ꤋꤣꤧ꤭꤯

⁹ ꤘꤣ ꤛꤢꤩ꤬ꤞꤤ꤭ ꤒꤣꤧ꤬ꤥ꤭ꤜꤥ꤬ ꤔꤣꤧ꤬ ꤢ꤬ ꤡ꤫ꤣ꤬ ꤔꤢꤧ ꤢ꤬ ꤞꤢꤧꤔ꤫ꤤ꤬ ꤡꤢ꤬ꤒ꤫ꤢꤪ꤬ꤓꤢꤩ ꤚꤣꤧ꤬ ꤢ꤬ ꤕꤜ꤫ꤢꤧ꤬ ꤢ꤬ꤘꤢꤔꤣꤧ꤬ ꤢ꤬ꤖꤚꤢ꤬ ꤊꤣꤧ꤬ꤢꤪ꤭ꤊꤣꤧ꤬ꤢꤧ ꤞꤢꤧꤡꤣꤧꤔꤢꤧ ꤢꤨ꤭ ꤓꤢꤧ꤬ꤏꤢ ꤒꤢꤩ꤬ꤏꤢ ꤚꤣꤧ꤬ ꤢꤨ꤭ ꤠ꤫ꤢꤩ꤬ꤤꤏꤢ꤬ ꤖꤚꤢ꤬ꤚ꤫ꤢꤨ꤬ꤖꤚꤢ꤬ꤒꤢꤩꤓꤢꤧ꤬ ꤢꤩꤚꤣꤧ ꤒꤣꤧ꤬ꤞꤤꤜ꤫ꤥ꤬ ꤒꤣꤧ꤬ꤟꤢꤩ꤬ ꤔꤣꤧ꤬ ꤡꤣꤧ꤯

¹⁰ ꤢ꤬ꤊꤢꤨꤗꤤ꤬ ꤔꤣꤧ꤬, ꤢ꤬ ꤞꤢꤧꤡꤣꤧꤔꤢꤧ ꤘꤢꤧ꤭ꤗꤢꤩ꤬ꤔꤣꤧ꤬ ꤚꤣꤧ꤬ ꤢ꤬ ꤢ꤫ꤢ꤬ꤚꤢꤧ꤭ ꤞꤢꤧꤡꤣꤧꤔꤢꤧ ꤘꤢꤧ꤭ꤗꤢꤩ꤬ꤔꤣꤧ꤬ ꤡꤣꤧꤡꤣꤧ꤯ ꤢ꤬ꤊꤢꤨꤗꤤ꤬ ꤣꤧ꤭ꤔꤣꤧ꤬, ꤢ꤬ꤥ꤬ ꤔꤢꤧ ꤢ꤬ꤒꤢꤩ꤬ꤚꤢꤧ꤭ ꤏꤝꤢ꤬ꤏꤢꤪ꤭ ꤘꤣ ꤢ꤬ ꤊ꤫ꤢꤦ꤬ ꤢ꤫ꤢ꤬ꤡꤢ꤭ ꤢ꤫ꤢ꤬ꤡꤢꤦ꤬ ꤢꤨ꤭ ꤍꤢꤧ꤭ꤜꤢꤩ꤭ ꤢ꤬ꤊꤢꤨ꤭ ꤕꤢ꤭꤯

¹¹ ꤡꤢꤪꤖꤢꤧ꤬ ꤘꤣ ꤢ꤬ ꤕꤣ ꤛꤢꤩ꤬ꤞꤤ꤭ꤔꤣꤧ꤬ ꤢ꤬ ꤥ꤬ꤒꤣ꤬ꤖꤚꤢꤩ꤬꤯ ꤢ꤬ ꤗꤢ꤬ ꤒꤣꤧ꤬ꤔꤢꤩꤖꤢꤨ ꤒꤣ꤬ꤖꤚꤢꤩ꤬ ꤘꤣ ꤢ꤬ ꤕꤣ ꤋꤚꤢꤪ꤭ꤊꤢꤨ꤭ꤘꤢꤨ꤬ ꤋꤚꤢꤪ꤭ꤊꤢꤨ꤭ꤛꤢꤧ꤭ ꤣꤧ꤭ꤒꤣ꤬ꤊꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ꤯ ꤟꤤꤙꤚꤢꤨ ꤢ꤬ꤍ꤫ꤥ꤬ ꤔꤣꤧ꤬ꤗꤢ꤬ ꤢ꤬ꤗꤝꤤ꤭ ꤔꤢꤧ ꤢ꤬ꤙꤢ꤬ꤘꤥ꤬ ꤚꤣꤧ꤬ ꤊꤚꤤ ꤢ꤬ꤍ꤫ꤥ꤬ ꤔꤣꤧ꤬ꤗꤢ꤬, ꤢ꤬ ꤟꤢꤩ ꤔꤢꤧ ꤢ꤬ꤕꤢꤪꤜꤤ꤬ꤛꤢ꤬꤯

¹² ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤚ꤫ꤣꤧ꤬ꤜꤣ ꤒꤣ꤬ꤡꤣ꤬ ꤔꤣꤧ꤬ꤗꤢ꤬, ꤢ꤬ ꤒꤣꤧ꤬ꤜꤝꤢꤊꤢꤧ꤭ ꤓꤥ꤭ꤟꤣꤧ꤯ ꤣꤧ꤭ꤒꤣ꤬ꤡꤣ꤬ ꤓꤥ꤭ꤕꤢ꤭ ꤗꤢ꤬ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤊ꤫ꤢꤦ꤬ ꤟꤢꤧ꤭ ꤕ꤫ꤥ꤬ ꤔꤣꤧ꤭ꤡꤣ꤬ ꤕꤢ꤭꤯

¹³ ꤙꤣꤧ ꤒꤣꤧ꤬ꤔꤢꤩꤖꤢꤨ ꤢ꤬ꤖꤚꤢꤩ꤬ ꤞꤥ꤭ꤞꤝꤢ ꤔꤣꤧ꤬ꤒꤣ꤬ꤖꤚꤢꤩ꤬ ꤥꤓꤢꤧ꤬ ꤢ꤬ꤊꤝꤢ꤬ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤔ꤫ꤤ꤬ꤟꤥ꤭ ꤍ꤫ꤥ꤬ꤖꤚꤢ꤬ꤓꤢꤧ꤬ ꤘꤣ ꤒꤢꤩ꤬ꤜꤢꤨ꤭ꤚ꤫ꤢꤩ꤬ꤓꤢꤩ꤭ ꤢ꤬ꤔꤢꤪ꤬ ꤜꤝꤤ꤭ꤙꤥ꤭ ꤢ꤬ꤊꤢꤨ꤭ ꤘꤣ ꤢ꤬ ꤥ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤕꤣꤧꤞꤢꤩ꤬ꤑꤢꤩ꤭ ꤔꤣꤧ꤬ꤒꤣ꤬ꤋꤢꤨ꤬꤯

¹⁴ ꤍ꤫ꤥ꤬ ꤟꤢꤩꤒꤢ꤭ꤜꤢꤧ꤬ ꤒꤣꤧ꤬ꤔꤢꤩꤖꤢꤨ ꤢ꤬ꤖꤚꤢꤩ꤬ ꤞꤥ꤭ꤞꤝꤢ ꤘꤣ ꤢ꤬ ꤕ꤫ꤢꤦ꤬ꤗꤢ꤬ꤥ꤬ꤚꤣꤧ ꤊꤝꤢ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤔꤢꤧ, “ꤕꤜꤝꤢ꤭ꤓꤢꤩ꤬ꤡꤝꤢ ꤒꤣꤧ꤬ꤔꤢꤩꤖꤢꤨ ꤔꤣꤧ꤬ꤞꤤꤜꤝꤤ꤭ ꤘꤣ ꤢꤨ꤭ ꤡꤢꤪ꤭ꤊꤜꤢꤪ꤬ꤗꤢ꤬ ꤛꤢꤩ꤬ꤞꤤ꤭ ꤘꤣ ꤜꤢꤧ꤭ꤗ꤫ꤥ꤬ꤘꤢꤨ꤬ ꤛꤢꤨ꤬ꤠꤢ꤬ꤚꤢꤩꤒꤤ ꤢ꤬ꤊꤢꤨ꤭ꤔꤣꤧ꤬꤯”

¹⁵ ꤒꤣꤧ꤬ꤔꤢꤩꤖꤢꤨ ꤢ꤬ꤖꤚꤢꤩ꤬ ꤞꤥ꤭ꤞꤝꤢ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤡꤝꤢ ꤕꤜꤝꤢ꤭ꤓꤢꤩ꤬ꤊꤢꤧ꤭ ꤒꤣꤧ꤬ꤔꤢꤩꤖꤢꤨ ꤣꤧ꤭ꤞꤤꤜꤝꤤ꤭ ꤚꤣꤧ꤬ ꤛꤢꤩ꤬ꤞꤤ꤭ ꤣꤧ꤭ꤔꤣꤧ꤬, ꤢꤨ꤭ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤋꤥꤘꤢꤦ꤬ ꤛꤢꤩ꤬ꤞꤤ꤭ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ ꤒꤥ꤭ꤒꤢꤦꤊꤢꤧ꤭ ꤖꤚꤢꤩ꤬ꤜꤢꤨ꤬ ꤟꤢꤩ꤬ꤋꤢꤨ꤬ꤖꤢꤨ ꤞꤥ꤭ꤕꤝꤤꤒꤣ꤬ꤕꤝꤤ ꤙꤣꤧ ꤒꤣ꤬ꤗꤢꤦ꤭ ꤢ꤬ꤊꤢꤨ꤭, ꤒꤣ꤬ꤔꤣꤧ꤭ ꤢ꤬ꤊꤢꤨ꤭, ꤒꤣ꤬ꤜꤢꤩ꤭ ꤢ꤬ꤊꤢꤨ꤭ ꤔꤢꤧ ꤒꤣ꤬ꤔꤢ꤬ ꤢ꤬ꤊꤢꤨ꤭ ꤣꤧ꤭ꤔꤣꤧ꤬ ꤕꤢ꤭꤯

¹⁶ ꤊꤜꤣꤧ꤭ ꤘꤣ ꤢ꤬ ꤘꤢꤧ ꤒꤣꤧ꤬ꤞꤤ ꤒꤣꤧ꤬ꤟꤢꤩ꤬ ꤢ꤬ ꤥ꤬ꤢꤩ ꤡꤣꤧ ꤙꤢ꤮ ꤒꤢꤩ꤭ꤔꤣꤧ꤬, ꤠꤢꤧ꤭ ꤔ꤫ꤤ꤬ꤟꤥ꤭ ꤢꤨ꤭ ꤟꤢꤩꤏꤥ꤬ꤕ꤫ꤢꤩ꤬ ꤠꤢꤧ꤭ ꤔꤢꤧ ꤢ꤬ ꤥ꤬ ꤡꤣꤧ ꤢ꤬ꤞꤤ꤭ ꤔꤣꤧ꤭ꤚꤤ ꤡꤣꤧ꤯

¹⁷ ꤘꤣ ꤠꤢꤧ꤭ ꤒꤢꤩ꤬ꤗꤢꤧꤓ꤫ꤣꤧ꤬ꤜꤝꤢ ꤥ꤬ꤔꤢꤩ꤬ ꤢ꤬ꤊꤢꤨ꤭ꤣꤧ꤭ꤔꤣꤧ꤬ ꤠꤢꤧ꤭ ꤗꤢꤧꤓ꤫ꤣꤧ꤬ ꤒꤣꤧ꤬ꤞꤤ ꤒꤣꤧ꤬ꤟꤢꤩ꤬ ꤔꤢꤧ ꤖꤚꤢꤩ꤬ꤘꤢꤧ ꤜꤢꤨ꤭ ꤒꤣꤧ꤬ꤟꤢꤩ꤬꤯ ꤛꤢꤩ꤬ꤞꤤ꤭ ꤞꤢꤧ ꤜꤢ꤭ꤋꤢꤧ꤭ ꤡꤢ꤬ꤒ꤫ꤢꤪ꤬ꤓꤢꤩ ꤒꤣꤧ꤬ꤟꤢꤩ꤬ ꤘꤣ ꤢ꤬ꤜꤤ꤬ ꤞꤢꤧꤡꤣꤧꤔꤢꤧ ꤗꤤ꤬, ꤚꤣꤧ꤬ ꤢ꤬ ꤒꤣꤧ꤬ꤖꤢꤩ꤬ꤜꤢꤪ꤬, ꤓꤥ꤭ꤚꤣꤧ꤬ ꤢ꤬ ꤙꤢꤧ꤭ ꤞꤢꤧꤡꤣꤧꤔꤢꤧ ꤛꤢ꤬ꤞꤢꤨꤙꤢꤧ꤭ ꤘꤣ ꤢꤨ꤭ ꤢꤩ ꤔꤢꤧ ꤏꤢ꤬ꤜꤢ꤬ꤖꤢ꤬ ꤔꤣꤧ꤬ ꤡꤣꤧ꤯ ꤒꤣꤧ꤬ꤞꤤ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤬ꤊꤜꤢꤪ ꤔꤣꤧ꤬, ꤢ꤬ꤞꤢꤧꤔꤢꤧ ꤢꤞ꤫ꤤ꤬ ꤊꤢꤨ꤬ꤊꤜꤢꤪ ꤚꤣꤧ꤬ ꤘꤣ ꤒꤣꤧ꤬ꤞꤤ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤊꤢꤧ꤭ꤊꤢꤨ꤭ ꤔꤣꤧ꤬, ꤗꤤ꤬ ꤔꤢꤧ ꤗꤤ꤬ꤋꤥ꤬ ꤒꤣꤧ꤬ꤟꤢꤩ꤬ ꤔꤢꤧ ꤛꤢ꤬ꤞꤢꤨꤙꤢꤧ꤭ ꤏꤢ꤬ꤜꤢ꤬ꤖꤢ꤬ ꤓꤢꤩ꤬ ꤜꤢꤪ꤭ꤕꤜꤤ꤭꤯

¹⁸ ꤗꤤ꤬ꤊꤢꤧ꤭ꤓꤢꤩ꤬, ꤗꤤ꤬ꤋꤥ꤬ꤓꤢꤩ꤬, ꤛꤢ꤬ꤞꤢꤨꤙꤢꤧ꤭ ꤓꤢꤩ꤬ ꤘꤣ ꤒꤣꤧ꤬ꤞꤤ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤊꤢꤧ꤭ꤊꤢꤨ꤭꤯ ꤘꤣ ꤒꤢꤩ꤬ꤣꤧ꤭ꤞꤥ꤭ꤡꤣ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤢꤨ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤊꤣꤧ꤬ꤛꤢꤧ꤭ ꤞꤣꤧ꤭ ꤞꤥ꤭ꤕꤝꤤꤒꤣ꤬ꤕꤝꤤ꤯

¹⁹ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤒꤣꤧ꤬ꤞꤤ ꤒꤣꤧ꤬ꤟꤢꤩ꤬ ꤢ꤬ ꤒꤢꤩ꤬ꤖꤚꤥ꤬ꤖꤚꤢꤧ꤬ꤏꤝꤢ꤬ꤏꤢꤪ꤭ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤏꤢꤩ꤭ꤢꤨ꤭ ꤔꤣꤧ꤬, ꤢ꤬ ꤥ꤬ ꤘꤣ ꤛꤢꤩ꤬ꤞꤤ꤭ ꤊꤢꤧ꤭ꤊꤢꤨ꤭ ꤔꤢꤧ ꤢ꤬ꤊꤢꤨꤗꤤ꤬ ꤢ꤬ꤜꤥ꤬ꤔꤣꤧ꤬꤯ ꤢ꤬ꤊꤢꤨꤗꤤ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤊꤢꤨ꤬ꤊꤜꤢꤪꤥ꤬ ꤚꤣꤧ꤬ ꤢ꤬ꤊꤢꤨꤗꤤ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ꤞꤢꤧꤔꤢꤧ ꤚ꤫ꤢꤨ꤬ ꤊꤢꤨ꤬ꤊꤜꤢꤪ, ꤚꤣꤧ꤬ ꤢ꤬ ꤗꤢꤩ꤬ꤏꤝꤤꤗꤢꤩ꤬ꤏꤢꤩ꤭ ꤜꤢꤪ꤭ꤕꤜꤤ꤭ ꤢꤨ꤭ ꤔꤢꤧ ꤢ꤬ꤊꤢꤨꤗꤤ꤬ ꤣꤧ꤭ꤒꤣꤧ꤬ꤟꤢꤩ꤬꤯

²⁰ ꤊꤣꤧ꤬ꤛꤢꤧ꤭ ꤘꤣ ꤢ꤬ꤥ꤬ ꤜꤣꤧ꤬ꤕꤜꤢꤩꤊꤢꤧ꤭ ꤔꤢꤧ ꤒꤢꤩ꤬ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤢ꤬ꤒꤢꤩ꤬ ꤞꤣꤧ꤭ꤚ꤫ꤢ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤗꤢꤩ꤬ ꤟꤢꤧ꤭ꤑꤢꤩ꤭ ꤒꤣꤧ꤬ꤘꤢꤦ꤬ ꤚꤣꤧꤘꤢꤦ꤬ꤕꤢ꤬ ꤢ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬꤯ ꤢ꤬ ꤛꤢꤧ꤬ ꤚꤣꤧ ꤕ꤫ꤢꤩ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤒꤥ꤬꤯ ꤛꤢꤩ꤬ꤞꤤ꤭ ꤡꤢꤪꤙꤢꤩ꤭ ꤒꤣꤧ꤬ꤘꤢꤦ꤬ꤕꤢ꤬ ꤜꤢ꤭ꤋꤢꤧ꤭ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬, ꤖꤚꤢꤩ꤬ꤛꤥ꤬ ꤘꤣ ꤢꤨ꤭ ꤗꤢꤩ꤬ꤔꤢꤧ ꤓꤢꤩ꤭, ꤢꤨ꤭ ꤗꤢꤩ꤬ꤔꤢꤧ ꤚꤢꤦ꤭, ꤢꤨ꤭ ꤗꤢꤩ꤬ꤔꤢꤧ ꤒꤣꤧ꤬ꤜꤤ꤭ ꤔꤢꤧ ꤜ꤫ꤢꤪ꤬ ꤔꤢꤧ ꤞꤢꤪ꤬ ꤘꤣ ꤢ꤬ ꤗꤢꤧꤓ꤫ꤣꤧ꤬ꤡ꤫ꤢꤧ꤬ꤒꤥ꤬, ꤓꤥ꤭ꤚꤣꤧ꤬ ꤢ꤬ ꤔ꤫ꤤ꤬ꤟꤥ꤭ ꤡ꤫ꤢꤧ꤬ꤒꤥ꤬, ꤢ꤬ ꤡꤝꤢꤡ꤫ꤢꤧ꤬ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬꤯

²¹ ꤓꤥ꤭ꤒꤥ꤬ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤗꤢꤩ꤬ꤞꤣꤧ꤭ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭, ꤢ꤬ꤒꤢꤩ꤬ꤗꤢꤩ꤬ ꤜꤥ꤭ꤔꤢꤩ ꤞꤢꤚꤢ ꤢꤩ꤬ ꤢꤨ꤭ꤛ꤫ꤢꤧ꤬ꤛꤥ꤬ ꤒꤣꤧ꤬ꤟꤢꤩ꤬, ꤢ꤬ ꤒꤢꤩ꤬ꤡꤝꤢꤞꤢꤦ ꤖꤚꤢꤩ꤬ꤗꤢꤪ꤬ꤖꤚꤢꤩ꤬ꤋꤢꤨ꤭ ꤔꤢꤧ ꤢ꤬ ꤒꤢꤩ꤬ꤢꤩ꤬ꤟꤥ꤬ꤢꤩ꤬ꤟꤤ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤛꤢꤧ꤬ ꤚꤣꤧ ꤕ꤫ꤢꤩ꤬ ꤚꤣꤧꤘꤢꤦ꤬ ꤊꤣꤧ꤭ ꤕꤢ꤬ ꤢ꤬ꤔꤢꤩ꤬ ꤒꤣ꤬ꤖꤥ꤮ ꤒꤥ꤬꤯