เตเด๊อะโลแถ่ 10 - Eastern Kayah Shadaw Dialect

ꤒꤣꤧ꤬ꤔꤢꤩꤖꤢꤨ ꤔꤢꤧ ꤜꤤ꤬ꤒꤣꤧ꤬ꤜꤢꤨ꤭ꤟꤢꤨ ꤒꤣ꤬ꤊꤜꤢꤨ꤭

¹ ꤟꤢꤨꤔꤣꤧ꤬ꤓꤥ꤭ꤚꤣꤧ꤬ ꤠꤢꤧ꤭ ꤗꤢꤧꤓ꤫ꤣꤧ꤬ ꤒꤣꤧ꤬ꤔꤢꤩꤖꤢꤨ ꤢ꤬ ꤟꤢꤧ꤭ꤏꤝꤢ꤬ꤚꤢꤩ꤬ꤏꤢꤪ꤭ ꤘꤣ ꤢ꤬ꤚꤥ꤬ ꤒꤣ꤬ꤖꤚꤢꤩ꤬ ꤥ꤬ꤘꤣ ꤗꤢꤪꤋꤢꤨ꤬ ꤟꤢꤧ꤭ꤜꤢꤧ꤬꤯ ꤢ꤬ ꤊꤢꤦ꤭ꤞꤢꤧ ꤓꤢꤧ꤬ꤔ꤫ꤤ꤬ ꤢꤪꤜ꤫ꤥ꤬ ꤚꤣꤧ꤬ ꤓꤣꤧ꤭ꤜ꤫ꤢꤪ꤬ꤕꤣꤧ꤬ꤥ ꤥ꤬ ꤘꤣ ꤜꤢꤨ꤭ ꤊꤢꤨ꤬ꤊꤜꤢꤪꤋꤢꤨ꤬꤯ ꤢ꤬ ꤕꤣꤧꤞꤢꤩ꤬ꤔꤣꤧ꤬ ꤢ꤬ꤞꤢꤧꤔꤢꤧ ꤒꤣꤧꤗ꤫ꤢꤪ꤬ ꤚꤣꤧ꤬ ꤢ꤬ ꤋꤢꤧꤘꤥ꤬ꤔꤣꤧ꤬ ꤢ꤬ꤞꤢꤧꤔꤢꤧ ꤗꤤ꤬ꤢꤦ꤭ ꤜꤤ꤬ꤊꤣꤧ꤬ꤞꤝꤤ ꤟꤤ꤬ꤓꤢꤦ꤬ ꤔꤣꤧ꤬꤯

² ꤘꤣ ꤢ꤬ ꤊꤢꤨꤛꤢ꤭ꤊꤢꤨ꤭ ꤔꤣꤧ꤬, ꤢ꤬ ꤕ꤫ꤢꤦ꤬ꤗꤢ꤬ꤥ꤬ꤚꤣꤧ ꤜꤤ꤬ꤒꤣꤧ꤬ꤜꤢꤨ꤭ꤟꤢꤨ ꤘꤣ ꤢꤨ꤭ ꤙꤢꤗꤥ꤭ ꤥ꤬ꤔꤢꤩ꤬ ꤟꤣꤧ ꤜꤢꤨ꤭ ꤒꤣ꤬ꤊꤜꤢꤨ꤭꤯ ꤢ꤬ꤋꤢꤧꤘꤥ꤬ ꤡꤢꤓꤝꤢ ꤒꤣ꤬ꤋꤥꤔꤣꤧ꤬ ꤢ꤬ ꤋꤢꤩ꤭ꤒꤢ꤭ ꤘꤣ ꤓꤣꤧ꤭ꤘꤢꤨ꤬ꤒꤣꤧ꤬ꤠꤢ꤬ ꤢ꤬ꤋꤢꤨ꤬, ꤚꤣꤧ꤬ ꤘꤣ ꤡꤢꤡꤤ꤬ ꤒꤣ꤬ꤋꤥꤔꤣꤧ꤬ ꤢ꤬ ꤋꤢꤩ꤭ꤒꤢ꤭ ꤘꤣ ꤊꤣꤧ꤬ꤜꤥ꤭ꤋꤢꤨ꤬꤯

³ ꤚꤣꤧ꤬ ꤢ꤬ ꤢꤩꤓꤥ꤭ ꤖꤚꤢ꤬ꤓꤢꤧ꤬ꤏꤝꤢ꤬ ꤞꤢꤧꤡꤣꤧꤔꤢꤧ ꤢꤞ꤫ꤤ꤬ ꤒꤣꤧ꤬ꤟꤢꤩ꤬ ꤊ꤫ꤢꤪ꤬ꤒꤣꤧ꤬ꤍꤢꤩ꤬ ꤔꤣꤧ꤬꤯ ꤙꤣꤧ ꤢ꤬ ꤢꤩꤓꤥ꤭ꤓꤢꤧ꤬ ꤓꤥ꤭ꤔꤣꤧ꤬, ꤏꤢ꤬ꤜꤢꤧ꤬ ꤏꤢꤦ꤬ꤕ꤫ꤢꤩ꤬ ꤜꤢꤨ꤭ ꤞꤥ꤭ꤞꤝꤢꤒꤣ꤬ꤟꤢꤦ꤬꤯

⁴ ꤙꤣꤧ ꤏꤢ꤬ꤜꤢꤧ꤬ ꤓꤥ꤭ ꤞꤥ꤭ꤞꤝꤢꤒꤣ꤬ꤟꤢꤦ꤬ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤊ꤫ꤢꤦ꤬ꤚꤢꤩ꤭ ꤚꤢ꤭ꤗꤢꤊꤢꤧ꤭ ꤒꤣꤧ꤬ꤘꤢꤦꤚꤣꤧ꤬ ꤠꤢꤧ꤭ ꤔ꤫ꤤ꤬ꤟꤥ꤭ ꤍ꤫ꤥ꤬ꤖꤚꤢ꤬ꤓꤢꤧ꤬ ꤘꤣ ꤗꤢꤪꤋꤢꤨ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤘꤢꤧ꤬ꤥꤘꤢꤧ꤬ꤙꤤꤊꤢꤧ꤭ ꤏꤢ꤬ꤜꤢꤧ꤬ ꤟꤢꤩꤏꤥ꤬ꤜꤥ꤭ ꤊꤢ꤬ꤋꤛꤢ꤭ꤏꤢꤦ꤬ ꤔꤢꤧ꤬ ꤞꤥ꤭ꤞꤝꤢ ꤒꤣ꤬ꤟꤢꤦ꤬ ꤣꤧ꤭ꤔꤣꤧ꤬꤯ ꤚꤢ꤭ꤗꤢ ꤒ꤫ꤢꤧ꤬ ꤢ꤬ ꤒ꤫ꤢꤧ꤬ꤗꤢꤩ꤬”

⁵ ꤙꤣꤧꤔꤣꤧ꤬ꤢ꤬ꤋꤢꤩ꤭ ꤠꤢꤧ꤭ ꤗꤢꤧꤓ꤫ꤣꤧ꤬ ꤒꤣꤧ꤬ꤔꤢꤩꤖꤢꤨ ꤘꤣ ꤢ꤬ ꤊꤣꤧ꤬ꤓꤢꤪ꤬ꤥ꤬ ꤘꤣ ꤓꤣꤧ꤭ꤘꤢꤨ꤬ꤒꤣꤧ꤬ꤠꤢ꤬ ꤢ꤬ꤋꤢꤨ꤬ ꤔꤢꤧ ꤊꤣꤧ꤬ꤜꤥ꤭ꤋꤢꤨ꤬ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤙꤢꤪꤓꤢꤧ꤬ ꤢ꤬ꤊꤢꤨꤋꤢꤨ꤬ ꤡꤢꤓꤝꤢ ꤘꤣ ꤗꤢꤪꤋꤢꤨ꤬꤯

⁶ ꤚꤣꤧ꤬ ꤢ꤬ ꤙꤢꤧ꤭ꤜꤢꤧ꤬ꤚꤣꤧ ꤢ꤬ꤔ꤫ꤢꤩ꤬ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤢ꤬ ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤒꤣꤧ꤬ꤜꤢꤧ꤬ꤋꤚꤢꤩ ꤚꤣꤧ꤬ ꤢ꤬ ꤙꤢꤧꤜꤢꤧ꤬ ꤗꤢꤪꤋꤢꤨ꤬, ꤟꤢꤩ꤬ꤋꤢꤨ꤬, ꤓꤣꤧ꤭ꤘꤢꤨ꤬ꤒꤣꤧ꤬ꤠꤢ꤬ ꤔꤢꤧ ꤒꤢꤩ꤬ꤜꤢꤪ꤭꤮ ꤕꤜꤤ꤬ ꤥ꤬ ꤘꤣ ꤢ꤬ꤊꤢꤨ꤭ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤢ꤬ꤗꤝꤤ꤭꤯ ꤓꤥ꤭ꤚꤣꤧ꤬ ꤒꤣꤧ꤬ꤔꤢꤩꤖꤢꤨ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤟꤢꤩ ꤔꤢꤧ, “ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤕꤢ꤭ ꤔꤣꤧ꤬ ꤢ꤬ꤑꤢ꤭ꤕꤢ꤬ ꤔꤢꤧꤒꤥ꤬ꤟꤣꤧ꤯

⁷ ꤏꤢ꤮ ꤒꤣꤧ꤬ꤔꤢꤩꤖꤢꤨ ꤢ꤬ꤖꤚꤢꤩ꤬ ꤞꤥ꤭ꤞꤝꤢꤒꤣ꤬ꤖꤚꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤥꤓꤢꤧ꤬ ꤢ꤬ꤊꤝꤢ꤬ ꤢ꤬ꤋꤢꤩ꤭ꤕꤢ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤙꤢ꤭ꤓꤢꤧ꤬ ꤢ꤬ꤒꤢꤩ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤒꤢꤩ꤬ꤢ꤬ꤡ꤫ꤢꤪ꤬ꤢ꤬ꤛꤢꤧ꤭ ꤟꤢꤨ ꤢ꤬ ꤟꤢꤩꤏꤥ꤬ ꤓꤥ꤭ꤟꤣꤧ ꤢ꤬ꤜꤢꤨ꤬ꤜꤢꤩ ꤖꤚꤢꤩ꤬ꤖꤚꤥ꤬ ꤒꤣꤧ꤬ꤟꤢꤩ꤬ ꤔꤣꤧ꤬ ꤕꤢ꤭꤯”

⁸ ꤍ꤫ꤥ꤬ꤖꤚꤢ꤬ꤓꤢꤧ꤬ ꤘꤣ ꤠꤢꤧ꤭ ꤔ꤫ꤤ꤬ꤟꤥ꤭ ꤓꤥ꤭ꤟꤣꤧ ꤘꤣ ꤗꤢꤪꤋꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤟꤢꤩꤙꤢꤩ꤬ꤒꤢ꤭ ꤋꤛꤢ꤭ꤞꤢꤧ ꤠꤢꤧ꤭ ꤚꤣꤧ꤬ ꤢ꤬ ꤟꤢꤩ ꤠꤢꤧ꤭ ꤟꤢꤨꤣꤧ꤭, “ꤡꤝꤢꤖꤛꤢ ꤜꤤ꤬ꤒꤣꤧ꤬ꤜꤢꤨ꤭ ꤘꤣ ꤢꤨ꤭ ꤙꤢꤗꤥ꤭ ꤥ꤬ꤔꤢꤩ꤬ ꤓꤥ꤭ꤟꤣꤧ ꤘꤣ ꤒꤣꤧ꤬ꤔꤢꤩꤖꤢꤨ ꤘꤣ ꤢ꤬ ꤊꤣꤧ꤬ꤓꤢꤪ꤬ꤥ꤬ ꤘꤣ ꤓꤣꤧ꤭ꤘꤢꤨ꤬ꤒꤣꤧ꤬ꤠꤢ꤬ ꤢ꤬ꤋꤢꤨ꤬ ꤔꤢꤧ ꤊꤣꤧ꤬ꤜꤥ꤭ꤋꤢꤨ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ ꤊꤢꤨꤛꤢ꤭ꤊꤢꤨ꤭ ꤔꤣꤧ꤬꤯”

⁹ ꤚꤣꤧ꤬ ꤠꤢꤧ꤭ ꤡꤝꤢ ꤘꤣ ꤒꤣꤧ꤬ꤔꤢꤩꤖꤢꤨ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ꤥ꤬ ꤚꤣꤧ꤬ ꤠꤢꤧ꤭ ꤊꤝꤤ꤭ ꤢ꤬ ꤜꤤ꤬ꤒꤣꤧ꤬ꤜꤢꤨ꤭ꤟꤢꤨ ꤔꤣꤧ꤬ꤒꤣ꤬ꤊꤜꤢꤨ꤭꤯ ꤚꤣꤧ꤬ ꤢ꤬ ꤟꤢꤩ ꤠꤢꤧ꤭ ꤔꤢꤧ, “ꤖꤛꤢ ꤚꤣꤧ꤬ ꤢꤩ꤬ ꤢ꤬ ꤔꤤ꤮꤯ ꤘꤣ ꤔꤢꤧ꤬ ꤟꤢꤪꤊꤢꤨ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤋꤢꤩ꤬ ꤕꤢ꤭ ꤒꤣꤧ꤬ꤘꤢꤦꤚꤣꤧ꤬ ꤘꤣ ꤔꤢꤧ꤬ ꤊꤢꤧ꤭ꤊꤢꤨ꤭ ꤔꤣꤧ꤬ ꤢ꤬ ꤊ꤫ꤢꤦ꤬ ꤏꤢꤦ꤭ ꤞꤢꤧꤔꤢꤧ ꤠꤢꤧꤓꤣꤧ꤭ ꤔꤣꤧ꤬ ꤕꤢ꤭꤯”

¹⁰ ꤠꤢꤧ꤭ ꤔ꤫ꤤ꤬ꤙꤢꤩ꤬ ꤜꤤ꤬ꤒꤣꤧ꤬ꤜꤢꤨ꤭ꤟꤢꤨ ꤘꤣ ꤢ꤬ ꤊꤢꤨꤛꤢ꤭ꤊꤢꤨ꤭ ꤣꤧ꤭ ꤚꤣꤧ꤬ ꤠꤢꤧ꤭ ꤢꤩ꤬꤯ ꤠꤢꤧ꤭ ꤢꤩ꤬ ꤚꤣꤧ꤬ ꤘꤣ ꤠꤢꤧ꤭ ꤊꤢꤧ꤭ꤊꤢꤨ꤭ ꤔꤣꤧ꤬, ꤢ꤬ꤏꤢꤦ꤭ ꤞꤢꤧꤔꤢꤧ ꤠꤢꤧꤓꤣꤧ꤭ ꤒꤣꤧ꤬ꤘꤢꤦꤚꤣꤧ꤬ ꤙꤣꤧ ꤠꤢꤧ꤭ ꤔ꤫ꤤ꤬ꤊꤜꤢꤨ꤭ꤔꤥ꤭ ꤓꤥ꤭ꤟꤣꤧ ꤢ꤬ ꤢ꤬ꤋꤢꤩ꤭ ꤔꤣꤧ꤬, ꤢ꤬ꤋꤢꤩ꤬ ꤟꤢꤧ꤭ ꤘꤣ ꤠꤢꤧ꤭ꤟꤢꤪꤊꤢꤨ꤭꤯

¹¹ ꤟꤢꤨꤔꤣꤧ꤬ꤓꤥ꤭ꤚꤣꤧ꤬ ꤢꤨ꤭ ꤟꤢꤩ ꤠꤢꤧ꤭ ꤔꤢꤧ, “ꤔꤢꤧ꤬ ꤙꤢꤩ꤬ ꤟꤢꤩꤖꤚꤥ꤬ ꤥ꤬ꤔꤢꤩ꤬ ꤋꤛꤢ꤭ꤞꤢꤧ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤢꤩꤖꤚꤢꤩ꤬, ꤗꤤ꤭ꤡꤣ꤬ ꤢꤩꤡꤣ꤬, ꤖꤚꤢꤩ꤬ꤟꤢꤩꤙꤢꤩ꤬ ꤋꤥꤜꤢꤨ꤭ ꤍ꤫ꤥ꤬ ꤢꤩꤡꤣ꤬ ꤔꤢꤧ ꤋꤝꤤꤡꤢꤪꤖꤢꤧ꤬ ꤢꤩꤖꤚꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤔꤤ꤮꤯”