ฟีเลโมน 1 - Eastern Kayah Shadaw Dialect1-2 ꤠꤢꤧ꤭ ꤗꤢ꤬ ꤋꤢꤨ꤭ꤕꤢꤪꤜꤢꤨ꤯ ꤠꤢꤧ꤭ ꤔꤢꤧ ꤕꤢꤩ꤬ ꤕ꤫ꤥ꤬ꤠ꤫ꤢꤧ꤬ ꤘꤣ ꤋꤚꤤ ꤢ꤬ꤊꤢꤨ꤭ ꤋꤢꤨ꤭ꤒꤤ꤬ꤗꤢ꤬ꤞꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤚꤢ꤭ꤡꤝꤢꤕ꤫ꤢꤩ꤬ ꤋꤢꤨ꤭ꤖꤤꤜꤢ꤬ꤗꤥ꤬ ꤜꤤ꤬ꤣꤧ꤭ꤒꤣ꤬ꤙꤢ꤬꤯ ꤘꤣ ꤠꤢꤧ꤭ ꤗꤢꤩ꤬ ꤕ꤫ꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤢ꤬ꤒꤢꤩ꤬ꤗꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢꤨ꤭ ꤘꤢꤪꤒꤢ꤭ ꤠꤢꤧ꤭ ꤘꤣ ꤢ꤬ꤕꤥ꤬ꤊꤢꤨ꤭꤯ ꤕꤢꤩ꤬ ꤚꤢ꤭ꤡꤝꤢꤕ꤫ꤢꤩ꤬ ꤜꤤ꤬ꤣꤧ꤭ ꤘꤣ ꤕꤢꤩ꤬ ꤋꤥ꤭ꤙꤢꤧꤞꤝꤢ ꤋꤢꤨ꤭ꤖꤤꤜꤢ꤬ꤗꤥ꤬ ꤘꤣ ꤢ꤬ ꤗꤢꤩ꤬ ꤒ꤫ꤣ꤬ꤊꤣꤧ꤭ꤒꤢꤩ꤬ ꤔꤢꤧ ꤕꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤥ꤬, ꤔꤢꤧ ꤕꤢꤩ꤬ ꤕ꤫ꤥ꤬ꤠ꤫ꤢꤧ꤬ ꤋꤚꤤꤖꤢꤨ ꤖꤚꤢꤩ꤬ꤗꤢꤪ꤬ ꤗꤢꤪ꤬ꤢ꤬ꤖꤤ, ꤔꤢꤧ ꤕꤢꤩ꤬ ꤕ꤫ꤥ꤬ꤠ꤫ꤢꤧ꤬ ꤋꤚꤤꤖꤢꤨ ꤋꤢꤨ꤭ꤢ꤬ꤊꤤ꤬ꤕꤢꤨ ꤘꤣ ꤢ꤬ꤞꤢꤧꤔꤢꤧ ꤊꤜꤣꤧ꤭ꤟꤢꤨ ꤒꤣ꤬ꤖꤚꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ ꤥ꤬, ꤔꤢꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ ꤕꤜꤢꤪꤗꤢꤨ꤬ꤖꤢꤨ ꤥ꤬ ꤘꤣ ꤋꤢꤨ꤭ꤖꤤꤜꤢ꤬ꤗꤥ꤬ ꤢ꤬ꤟꤤ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤥ꤬꤯ 3 ꤕꤢꤩ꤬ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬ ꤔꤢꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤊ꤫ꤢꤦ꤬ ꤘꤣꤧꤜꤢꤧ꤬ꤘꤢꤦ꤬ ꤞꤤ꤭ ꤒꤢꤩ꤬ꤙꤝꤤꤒꤢꤩ꤬ꤒꤣꤧ꤬ꤚꤣꤧ꤭ ꤔꤢꤧ ꤒꤢꤩ꤬ꤒꤣꤧ꤬ꤡꤣꤧꤒꤣꤧ꤬ꤡ꤫ꤢꤨ꤬ ꤔꤤ꤮꤯ ꤋꤢꤨ꤭ꤖꤤꤜꤢ꤬ꤗꤥ꤬ ꤢ꤬ꤒꤢꤩ꤬ꤗꤥ꤬ ꤔꤢꤧ ꤢ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ 4 ꤋꤢꤨ꤭ꤖꤤꤜꤢ꤬ꤗꤥ꤬꤮, ꤙꤣꤧ ꤠꤢꤧ꤭ ꤊꤝꤤ꤭ꤡꤢꤪꤙꤢꤩ꤭ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤒꤣꤧ꤬ꤔꤢꤩ꤬ꤓꤢꤧ꤬ꤙꤢꤩ꤬ ꤒ꤫ꤥ꤬ ꤔꤢꤧ꤬ ꤕꤝꤢ꤭꤮ ꤒꤣ꤬ꤖꤥ ꤚꤣꤧ꤬ ꤠꤢꤧ꤭ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤠꤢꤧ꤭ ꤡꤢꤪꤗꤣꤧ꤬ꤚꤢꤧ꤬꤯ 5 ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤠꤢꤧ꤭ ꤔ꤫ꤤ꤬ꤟꤥ꤭ ꤔꤢꤧ ꤔꤢꤧ꤬ ꤛ꤫ꤢꤦ꤬ꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤟꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤓꤥ꤭ꤚꤣꤧ꤬ ꤔꤢꤧ꤬ ꤗꤥ꤬ꤚꤣꤧ ꤜꤢꤪ꤭ꤕꤜꤤ꤭ ꤊꤣꤧ꤬ꤛꤢꤧ꤭ ꤛ꤫ꤢꤦ꤬ꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤠꤢꤧ꤭ ꤡꤢꤪꤗꤣꤧ꤬ꤚꤢꤧ꤬꤯ 6 ꤞꤢꤧꤟꤢꤨ ꤔꤢꤧ꤬ ꤒꤢꤩ꤬ꤙꤢꤧꤞꤝꤢꤙꤢꤧꤜꤢ꤬ ꤔꤢꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤚꤥ꤬ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤗꤢꤩ꤬ꤡꤝ꤫ꤢ꤬ ꤘꤤ꤭ꤒ꤫ꤢꤦ꤬ ꤔꤢꤧ꤬ ꤘꤣ ꤔꤢꤧ꤬ ꤊ꤫ꤢꤦ꤬ ꤞꤤꤑꤢꤩ꤭ ꤜꤣꤙꤢ꤭ꤜꤢꤪ꤭ ꤒꤢꤩ꤬ꤚꤢꤧ ꤕꤝꤢ꤭꤮ ꤒꤣ꤬ꤡꤣ꤬ ꤘꤣ ꤕꤢꤩ꤬ ꤔ꤫ꤤ꤬ꤙꤢꤩ꤬ ꤘꤣ ꤋꤚꤤ ꤢ꤬ꤊꤢꤨ꤭ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ꤔꤣꤧ꤬ ꤠꤢꤧ꤭ ꤊꤝꤤ꤭ꤡꤢꤪꤙꤢꤩ꤭ ꤕꤢꤩ꤬ ꤘꤣ ꤔꤢꤧ꤬ꤑꤢꤩ꤭꤯ 7 ꤋꤥ꤭ꤙꤢꤧꤞꤝꤢ ꤗꤥ꤬, ꤔꤢꤧ꤬ ꤒꤢꤩ꤬ꤗꤥ꤬ ꤔꤣꤧ꤬, ꤢ꤬ ꤗꤢꤩ꤬ ꤞꤤꤋꤚꤢꤦ꤭ꤞꤤꤜꤢꤪ꤭ ꤔꤢꤧ꤬ꤡꤣꤧ ꤠꤢꤧ꤭ ꤚꤣꤧ꤬ ꤢ꤬ ꤘꤣꤧ ꤏꤢꤪ꤭ꤓꤢꤧ꤬ ꤔꤢꤧ꤬ꤡꤣꤧ ꤠꤢꤧ꤭ꤟꤢꤧ꤭ꤠꤢꤧ꤭ꤚꤢꤩ꤬꤯ ꤘꤣ ꤗꤢ꤬ꤒꤢꤩ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ ꤟꤢꤩꤚꤣꤧ꤬ ꤔꤢꤧ꤬ ꤗꤢꤩ꤬ꤗꤥ꤬ ꤓꤥ꤭ꤟꤣꤧ ꤜꤢꤪ꤭ ꤊꤣꤧ꤬ꤛꤢꤧ꤭ ꤛ꤫ꤢꤦ꤬ꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤞꤤꤕꤜꤢꤪ꤬ ꤟꤣꤧ꤯ ꤒꤢꤩ꤬ꤊꤝꤤ꤭ꤞꤤꤛꤢꤪ꤬ ꤘꤣ ꤋꤢꤨ꤭ꤢꤪꤔꤢꤩ꤬ꤎꤢꤩꤗꤢꤨ ꤢ꤬ꤑꤢꤩ꤭ 8 ꤘꤣ ꤒꤢꤩ꤬ꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤞꤤꤛ꤫ꤢꤦ꤬ ꤊꤝꤤ꤭ ꤔꤢꤧ꤬ ꤒꤢꤩ꤬ꤗꤢꤩ꤬ꤡꤝ꤫ꤢ꤬ ꤒꤣ꤬ꤡꤣ꤬꤯ ꤋꤚꤤ ꤘꤣꤧ ꤡꤣꤧ ꤠꤢꤧ꤭ ꤒꤢꤩ꤬ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤘꤣ ꤠꤢꤧ꤭ ꤊ꤫ꤢꤦ꤬ ꤙꤢꤩ꤬ ꤟꤢꤩꤒꤢ꤭ ꤋꤢꤦ꤭ꤟꤢ꤭ ꤡꤣꤧ ꤠꤢꤧ꤭ꤍ꤫ꤥ꤬ ꤔꤢꤧ ꤠꤢꤧ꤭ ꤙꤢꤩ꤬ ꤔꤢꤪ꤭ꤗꤢꤩ꤬ ꤔꤢꤧ꤬ ꤒꤢꤩ꤬ ꤘꤣ ꤢ꤬ꤚꤢꤧ ꤟꤢꤨ ꤔꤢꤧ꤬ ꤒꤥ꤭ꤙꤢꤩ꤬ ꤗꤢꤩ꤬ꤔꤣꤧ꤬ ꤡꤣꤧ ꤒꤣꤧ꤬ꤘꤢꤦꤚꤣꤧ꤬, 9 ꤕꤢꤩ꤬ ꤜꤢ꤭ ꤗꤥ꤬ ꤚꤣꤧꤘꤢꤦ꤬ ꤋꤛꤢ꤭ꤟꤣꤧꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤊꤝꤤ꤭ꤞꤤꤛꤢꤪ꤬ꤖꤢꤧ ꤔꤢꤧ꤬ ꤖꤢꤧ꤯ ꤊꤢꤨꤔ꤫ꤢꤧ꤬ꤚꤣꤧ꤬ ꤠꤢꤧ꤭ ꤗ꤫ꤢ꤬ꤟꤣꤧ ꤋꤢꤨ꤭ꤕꤢꤪꤜꤢꤨ ꤣꤧ꤭, ꤠꤢꤧ꤭ ꤗ꤫ꤥ꤬ꤖꤚ꤫ꤢꤩ꤬ꤟꤣꤧ, ꤓꤥ꤭ꤒꤥ꤬ ꤘꤣ ꤛꤢꤩ꤬ꤏꤛꤢꤨꤋꤚꤤ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤢꤨ꤭ ꤜꤢ꤭꤮ ꤘꤢꤪꤒꤢ꤭ꤕꤢ꤬ ꤠꤢꤧ꤭ ꤘꤣ ꤢ꤬ꤕꤥ꤬ꤊꤢꤨ꤭ ꤚꤣꤧ꤬ ꤠꤢꤧ꤭ ꤊꤝꤤ꤭ꤞꤤꤛꤢꤪ꤬ ꤔꤢꤧ꤬ ꤖꤢꤧ꤯ 10 ꤠꤢꤧ꤭ ꤊꤝꤤ꤭ꤞꤤꤛꤢꤪ꤬ ꤔꤢꤧ꤬ ꤘꤣ ꤋꤢꤨ꤭ꤢꤪꤔꤢꤩ꤬ꤎꤢꤩꤗꤢꤨ ꤢ꤬ꤜ꤫ꤢꤩ꤬ꤊꤜꤥ꤭ ꤖꤢꤧ꤯ ꤢ꤬ ꤗꤢ꤬ ꤢ꤬ ꤞꤢꤧꤡꤣꤧꤔꤢꤧ ꤠꤢꤧ꤭ ꤖꤢꤨꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬ ꤡꤣꤧ꤯ ꤙꤣꤧ ꤠꤢꤧ꤭ ꤒꤢ꤭ ꤘꤣ ꤢ꤬ꤕꤥ꤬ꤊꤢꤨ꤭ ꤢ꤬ꤋꤢꤩ꤭, ꤢ꤬ ꤓꤝꤢ꤭ꤓꤢꤧ꤬ꤟꤣꤧ ꤠꤢꤧ꤭ꤖꤢꤨꤖꤚꤢꤩ꤬ꤋꤢꤨ꤭ ꤘꤣ ꤋꤚꤤ ꤢ꤬ꤊꤢꤨ꤭ ꤒꤣ꤬ꤖꤚꤢꤩ꤬ꤟꤣꤧ꤯ 11 ꤘꤣ ꤢ꤬ꤚ꤫ꤣꤧ꤬ꤋꤢꤩ꤭ ꤔꤣꤧ꤬ꤗꤢ꤬ ꤢ꤬ ꤓꤝꤢ꤭ꤙꤝꤤꤓꤝꤢ꤭ꤒꤣꤧ꤬ꤚꤣꤧ꤭ ꤘꤣ ꤔꤢꤧ꤬ꤑꤢꤩ꤭ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤊꤢꤨꤔ꤫ꤢꤧ꤬ꤣꤧ꤭ ꤢ꤬ ꤊ꤫ꤢꤦ꤬ ꤓꤝꤢ꤭ꤙꤝꤤꤓꤝꤢ꤭ꤒꤣꤧ꤬ꤚꤣꤧ꤭ ꤘꤣ ꤔꤢꤧ꤬ꤑꤢꤩ꤭ ꤔꤢꤧ ꤠꤢꤧ꤭ꤑꤢꤩ꤭ ꤟꤣꤧ꤯ 12 ꤢ꤬ ꤗꤢ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ ꤘꤣ ꤠꤢꤧ꤭ ꤗꤥ꤬ ꤚꤣꤧꤘꤢꤦ꤬ ꤔꤢꤧ꤬ꤡꤣꤧ ꤜꤢꤨ꤭ ꤚꤣꤧ꤬ ꤠꤢꤧ꤭ ꤞꤢꤨ꤭ꤊꤢ꤬ꤋꤛꤢ꤭ ꤒꤥ꤭ꤋꤛꤢ꤭ꤞꤢꤧ ꤢ꤬ ꤘꤣ ꤔꤢꤧ꤬ꤥ꤬꤯ 13 ꤘꤣ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤢꤨ꤭ ꤘꤢꤪꤥ꤬ꤕꤢ꤬ ꤠꤢꤧ꤭ ꤘꤣ ꤢ꤬ꤕꤥ꤬ꤊꤢꤨ꤭ ꤣꤧ꤭ꤢ꤬ꤋꤢꤩ꤭ꤔꤣꤧ꤬, ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤗꤢꤩ꤬ꤡꤝ꤫ꤢ꤬ ꤠꤢꤧ꤭ ꤘꤣ ꤔꤢꤧ꤬ ꤜ꤫ꤢꤩ꤬ꤊꤜꤥ꤭ ꤢ꤬ꤑꤢꤩ꤭ꤔꤣꤧ꤬ꤚꤣꤧ꤬, ꤠꤢꤧ꤭ ꤞꤤꤛ꤫ꤢꤦ꤬ ꤢꤩ ꤥ꤬ ꤒꤣꤧ꤬ꤘꤢꤦ꤬ꤕꤢ꤬ ꤢ꤬ ꤘꤣ ꤠꤢꤧ꤭ ꤊꤢꤧ꤭ꤏꤢ꤯ 14 ꤗꤢ꤬ꤔꤢꤧꤚꤣꤧ꤬ ꤔꤢꤧ꤬ ꤜꤢ꤭ ꤞꤤꤑꤢꤩ꤭ ꤜꤢ꤭ꤟꤤ ꤜꤢꤨ꤭ꤚꤤ꤬ꤊꤢꤧ꤭ ꤒꤥ꤬, ꤓꤥ꤭ꤚꤣꤧ꤬ ꤔꤢꤧ꤬ ꤜꤢ꤭ ꤢꤪꤜꤢꤧ꤬ ꤜꤢ꤭ꤟꤤ ꤠꤢꤧ꤭ ꤒꤣ꤬ꤡꤣ꤬꤮ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤞꤤꤛ꤫ꤢꤦ꤬ ꤗꤢꤩ꤬ꤜꤢ꤭ꤟꤤꤒꤥ꤬꤯ ꤠꤢꤧ꤭ ꤞꤤꤛ꤫ꤢꤦ꤬ ꤔꤢꤪ꤭ꤏꤝꤢ꤬ ꤔꤢꤧ ꤔꤢꤧ꤬ ꤒꤥ꤬ꤒꤥ꤬꤯ ꤡꤢꤨ꤮ ꤘꤢꤦ꤬ ꤔꤢꤧ꤬ ꤞꤤꤕꤜꤢꤪ꤬ ꤞꤤꤛ꤫ꤢꤦ꤬ ꤗꤢꤩ꤬ꤡꤝ꤫ꤢ꤬ ꤠꤢꤧ꤭ ꤖꤢꤧ꤯ 15 ꤒꤣꤧ꤬ꤚꤢꤧꤗꤢ꤬ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤘꤣ ꤢ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤔꤢꤧ ꤔꤢꤧ꤬ ꤒꤣꤧ꤬ꤕꤜꤣ꤬ꤒꤣꤧ꤬ꤕꤜꤢꤧꤟꤢꤨ ꤣꤧ꤭ꤔꤣꤧ꤬ꤗꤢ꤬ ꤞꤢꤧꤟꤢꤨ ꤔꤢꤧ꤬ ꤊ꤫ꤢꤦ꤬ ꤗꤢꤩ꤬ꤔ꤫ꤤ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤢ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤢ꤬ꤑꤢꤩ꤭ ꤔꤣꤧ꤬ꤖꤢꤧ ꤊꤣꤧ꤭ꤔꤢꤧꤊ꤫ꤢꤩ꤬꤯ 16 ꤚꤣꤧ꤬ ꤔꤢꤧ꤬ ꤔ꤫ꤤ꤬ꤙꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤋꤢꤨ꤭ꤢꤪꤔꤢꤩ꤬ꤎꤢꤩꤗꤢꤨ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤗ꤫ꤢ꤬ꤕꤢ꤬ ꤟꤢꤨ ꤡ꤫ꤢꤦ꤬ ꤒꤣ꤬ꤖꤚꤢꤩ꤬ ꤒꤥ꤬, ꤢ꤬ꤚꤢꤧ ꤜꤣ ꤡꤣꤧ ꤔꤢꤧ ꤡ꤫ꤢꤦ꤬, ꤢ꤬ ꤓꤝꤢ꤭ ꤡꤣꤧ ꤟꤣꤧ ꤟꤢꤨ꤮ ꤕ꤫ꤥ꤬ꤠ꤫ꤢꤧ꤬ ꤘꤣ ꤋꤚꤤ ꤢ꤬ꤊꤢꤨ꤭ ꤒꤣ꤬ꤖꤚꤢꤩ꤬ ꤔꤣꤧ꤬ꤟꤣꤧ꤯ ꤢ꤬ ꤗꤢ꤬ ꤢ꤬ꤞꤢꤧꤔꤢꤧ ꤕ꤫ꤥ꤬ꤠ꤫ꤢꤧ꤬ ꤘꤣ ꤠꤢꤧ꤭ ꤗꤥ꤬ꤚꤣꤧ ꤜꤢꤨ꤭ ꤒꤣꤧ꤬ꤘꤢꤦꤚꤣꤧ꤬ ꤔꤢꤧ꤬ ꤊ꤫ꤢꤦ꤬ ꤗꤥ꤬ꤜꤣ ꤡꤣꤧ ꤜꤢꤨ꤭ ꤔꤢꤧ ꤠꤢꤧ꤭ ꤕꤢ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤔꤢꤧ꤬ ꤔ꤫ꤤ꤬ꤙꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤢ꤬ ꤟꤢꤨ ꤡ꤫ꤢꤦ꤬ ꤒꤣ꤬ꤖꤚꤢꤩ꤬ ꤔꤢꤧ ꤕ꤫ꤥ꤬ꤠ꤫ꤢꤧ꤬ ꤘꤣ ꤙꤢꤧ꤬ꤡꤢꤩ꤬ ꤢ꤬ꤊꤢꤨ꤭ ꤔꤣꤧ꤭ꤡꤣ꤬ ꤜꤢꤪ꤭ꤟꤣꤧ꤯ 17 ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤔꤢꤧ꤬ ꤊꤢꤩ꤬ ꤘꤢꤧ꤬ ꤠꤢꤧ꤭ ꤟꤢꤨ ꤖꤚꤢꤩ꤬ꤗꤢꤩ꤬ꤚ꤫ꤥ꤬ꤜꤢꤨ꤭ꤒꤢꤩ꤬ ꤒꤣ꤬ꤖꤚꤢꤩ꤬ ꤊꤢꤩ꤬ꤟꤢꤩꤚꤣꤧ꤬ ꤢꤩꤗꤥ꤬ꤏꤢꤦ꤬ ꤋꤛꤢ꤭ꤞꤢꤧ ꤢ꤬ ꤟꤢꤨ ꤔꤢꤧ꤬ ꤢꤩꤗꤥ꤬ꤏꤢꤦ꤬ ꤠꤢꤧ꤭ ꤕꤢ꤭ ꤔꤣꤧ꤬ ꤔꤤ꤮꤯ 18 ꤟꤢꤩꤊꤥꤚꤣꤧ, ꤢ꤬ ꤊꤢꤩ꤬ ꤗꤢꤩ꤬ꤞꤢꤦ ꤓꤥ꤭ꤟꤣꤧ ꤔꤢꤧ꤬ ꤊꤢꤩ꤬ꤥ꤬ ꤒꤣꤧ꤬ꤟꤢꤩ꤬, ꤒꤥ꤬ꤗꤢ꤬ꤔꤢꤧ ꤢ꤬ꤔ꤫ꤥ꤬ꤢ꤬ꤏꤢꤨ꤬ ꤊꤢꤩ꤬ꤥ꤬ ꤔꤢꤧ꤬ ꤒꤣꤧ꤬ꤟꤢꤩ꤬ ꤊꤢꤩ꤬ꤟꤢꤩꤚꤣꤧ꤬ ꤘꤢꤧ꤬ ꤢ꤬ ꤟꤢꤨ ꤠꤢꤧ꤭ꤔ꤫ꤥ꤬ꤠꤢꤧ꤭ꤏꤢꤨ꤬ ꤔꤣꤧ꤬ ꤔꤤ꤮꤯ 19 ꤊꤢꤨꤔ꤫ꤢꤧ꤬ꤚꤣꤧ꤬ ꤠꤢꤧ꤭ ꤗ꤫ꤢ꤬ꤟꤣꤧ ꤋꤢꤨ꤭ꤕꤢꤪꤜꤢꤨ ꤡꤢꤓꤢꤧ꤬ ꤚꤢ꤭ꤚꤣꤧ ꤜꤤ꤬ꤣꤧ꤭ ꤔꤢꤧ ꤠꤢꤧ꤭ ꤊꤢꤨꤋꤢꤨ꤬ ꤚꤣꤧꤘꤢꤦ꤬ꤡꤣꤧ꤯ ꤊꤢꤩ꤬ ꤢ꤬ ꤗꤢꤩ꤬ꤞꤢꤦ ꤓꤥ꤭ꤟꤣꤧ ꤔꤢꤧ꤬ ꤊꤢꤩ꤬ꤥ꤬ ꤒꤣꤧ꤬ꤟꤢꤩ꤬, ꤊꤢꤩ꤬ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ ꤜ꤫ꤥ꤬ꤕꤜꤢ ꤔꤢꤧ꤬ ꤊꤢꤩ꤬ꤥ꤬ ꤒꤣꤧ꤬ꤟꤢꤩ꤬ ꤟꤢꤩꤚꤣꤧ꤬ ꤘꤢꤧ꤬ ꤢ꤬ ꤟꤢꤨ ꤠꤢꤧ꤭ꤔ꤫ꤥ꤬ꤠꤢꤧ꤭ꤏꤢꤨ꤬ ꤔꤣꤧ꤬, ꤚꤣꤧ꤬ ꤠꤢꤧ꤭ ꤊ꤫ꤢꤦ꤬ ꤕꤜꤢꤜꤤ꤭ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤘꤢꤦ꤬ ꤔꤢꤧ꤬ ꤕꤢ꤭꤯ ꤗꤢ꤬ꤔꤢꤧꤚꤣꤧ꤬ ꤘꤣ ꤠꤢꤧ꤭ꤋꤝꤢ꤬ꤠꤢꤧ꤭ꤋꤛꤢ꤭ ꤚꤣꤧ꤬, ꤔꤢꤧ꤬ ꤔ꤫ꤤ꤬ꤙꤢꤩ꤬ ꤒꤢꤩ꤬ꤞꤣꤧ꤭ꤖꤚꤢꤩ꤬ ꤢ꤬ꤞꤢꤩ꤭ ꤘꤣ ꤋꤚꤤ ꤢ꤬ꤊꤢꤨ꤭ ꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭, ꤔꤢꤧ꤬ ꤔ꤫ꤢꤩ꤬ꤙꤢꤧ꤬ꤡꤢꤩ꤬ ꤚꤣꤧꤘꤢꤦ꤬ ꤔꤢꤧ꤬ ꤜ꤫ꤥ꤬ꤘꤣꤧ ꤠꤢꤧ꤭ ꤔꤣꤧ꤬, ꤠꤢꤧ꤭ ꤜ꤫ꤥ꤬ꤘꤣꤧ ꤞꤤꤔ꤫ꤢꤩ꤬ꤓꤢꤧ꤬ꤕꤢ꤬ ꤔꤢꤧ ꤔꤢꤧ꤬ ꤒ꤫ꤥ꤬ꤟꤣꤧ꤯ 20 ꤟꤢꤨꤔꤣꤧ꤬ꤚꤣꤧ꤬, ꤠꤢꤧ꤭ ꤕ꤫ꤥ꤬ꤠ꤫ꤢꤧ꤬ ꤋꤢꤨ꤭ꤖꤤꤜꤢ꤬ꤗꤥ꤬꤮ ꤕꤢꤩ꤬ ꤜꤢ꤭ ꤛ꤫ꤢꤦ꤬ꤢꤩ꤬ꤚꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ꤋꤝꤢ꤬ꤢ꤬ꤋꤛꤢ꤭, ꤋꤢꤧꤞꤤꤘꤥ꤭ ꤗꤢꤩ꤬ꤙꤝꤤꤗꤢꤩ꤬ꤒꤣꤧ꤬ꤚꤣꤧ꤭ ꤕ꤫ꤢꤩ꤬ꤚꤣꤧ ꤠꤢꤧ꤭ ꤣꤧ꤭ꤒꤣ꤬ꤡꤣ꤬ ꤔꤤ꤮꤯ ꤋꤢꤧꤞꤤꤘꤥ꤭ ꤗꤢꤩ꤬ꤗꤥ꤬ꤓꤢꤧ꤬ ꤊꤣꤧ꤭ꤚꤣꤧ ꤠꤢꤧ꤭ ꤞꤤꤕꤜꤢꤪ꤬ ꤘꤣ ꤋꤚꤤ ꤢ꤬ꤊꤢꤨ꤭ ꤔꤤ꤮꤯ 21 ꤠꤢꤧ꤭ ꤚꤢ꤭ ꤜꤤ꤬ ꤘꤣ ꤔꤢꤧ꤬ꤥ꤬ ꤣꤧ꤭ꤔꤣꤧ꤬, ꤠꤢꤧ꤭ ꤛ꤫ꤢꤦ꤬ꤢꤩ꤬ ꤘꤣ ꤔꤢꤧ꤬ ꤊ꤫ꤢꤦ꤬ ꤡꤢꤨ꤭ꤢꤩ꤬ ꤠꤢꤧ꤭ꤜꤢ꤭ꤠꤢꤧ꤭ꤍ꤫ꤥ꤬ ꤚꤣꤧ꤬ ꤠꤢꤧ꤭ ꤞꤤꤑꤢꤩ꤭ ꤘꤣ ꤔꤢꤧ꤬ ꤊ꤫ꤢꤦ꤬ ꤗꤢꤩ꤬ꤢꤩꤜꤣ ꤡꤣꤧ ꤔꤢꤧ ꤠꤢꤧ꤭ ꤊꤝꤤ꤭ ꤔꤢꤧ꤬ ꤣꤧ꤭ꤔꤣꤧ꤬ ꤕꤢ꤭꤯ 22 ꤚꤣꤧ꤬ ꤢ꤬ ꤥ꤬ꤕꤢ꤬ ꤒꤣ꤬ꤡꤣ꤬: ꤋꤢꤧꤞꤤꤘꤥ꤭ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤕ꤫ꤢꤩ꤬ꤚꤣꤧ ꤠꤢꤧ꤭ꤑꤢꤩ꤭ ꤟꤤ꤬ꤘꤢꤪꤊꤢꤨ꤭ ꤒꤣ꤬ꤒ꤫ꤥ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤠꤢꤧ꤭ ꤗꤢꤧꤏꤢꤦ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤔ꤫ꤤ꤬ꤘꤢ꤭ ꤞꤤ꤭ ꤒꤢꤩ꤬ꤊꤝꤤ꤭ꤡꤢꤪꤙꤢꤩ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤞꤢꤨ꤭ꤊꤢ꤬ꤋꤛꤢ꤭ ꤠꤢꤧ꤭ ꤘꤣ ꤞꤤ꤭ ꤥ꤬ ꤕꤢ꤭꤯ ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤘꤣ ꤋꤛꤢ꤭ꤜꤣ 23 ꤘꤣ ꤛꤢꤩ꤬ꤏꤛꤢꤨꤋꤚꤤ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬, ꤋꤢꤨ꤭ꤢꤩꤕꤢ꤬ꤖꤚꤢ ꤒꤢ꤭ꤒ꤫ꤣ꤬ꤊꤣꤧ꤭ ꤢ꤬ꤕꤥ꤬ꤊꤢꤨ꤭ ꤔꤢꤧ ꤠꤢꤧ꤭, ꤚꤣꤧ꤬ ꤢ꤬ ꤞꤢꤨ꤭ꤟꤢꤧ꤭ ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤘꤣ ꤞꤤ꤭ꤥ꤬꤯ 24 ꤟꤢꤨꤔꤣꤧ꤬ꤟꤣꤧ ꤖꤚꤢꤩ꤬ꤗꤢꤩ꤬ꤒ꤫ꤣ꤬ꤒꤢꤩ꤬ ꤔꤢꤧ ꤠꤢꤧ꤭ ꤋꤢꤨ꤭ꤗꤢ꤬ꤊꤢꤨ, ꤋꤢꤨ꤭ꤢ꤬ꤚꤤꤎꤢ꤬ꤒꤢ꤬ꤊꤢꤨ, ꤋꤢꤨ꤭ꤘꤢꤩ꤬ꤗꤢ ꤔꤢꤧ ꤋꤢꤨ꤭ꤜꤢꤨꤊꤢ꤬ ꤞꤤ꤭ꤒꤣꤧ꤬ꤟꤢꤩ꤬ ꤞꤢꤨ꤭ꤟꤢꤧ꤭ ꤊꤣꤧ꤭ꤏꤢꤜ꤫ꤢꤩ꤬ ꤢ꤬ ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤒꤣꤧ꤬ꤟꤢꤩ꤬ ꤘꤣ ꤞꤤ꤭ꤥ꤬꤯ 25 ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤢ꤬ꤙꤝꤤꤢ꤬ꤒꤣꤧ꤬ꤚꤣꤧ꤭ ꤊ꤫ꤢꤦ꤬ ꤥ꤬ꤊꤣꤧ꤭ꤘꤢꤦ꤬ ꤔꤢꤧ ꤞꤤ꤭ ꤜꤢꤪ꤭꤮ ꤕꤜꤤ꤭ ꤔꤤ꤮꤯ |
Wycliffe USA
The Seed Company