ꤗꤢ꤬ꤊꤢꤨ 3 - Eastern Kayah Shadaw Dialect

ꤛꤢꤩ꤬ꤏꤛꤢꤨ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤊꤣꤧ꤬ꤛꤢꤧ꤭ꤖꤢꤩ꤭ ꤊꤢꤨꤋꤢꤨ꤬ꤞꤣꤧ꤭ ꤒꤣ꤬ꤋꤥ ꤙꤣꤧ ꤛꤢꤨꤘꤢ꤬ꤖꤢꤨ ꤢ꤬ ꤗ꤫ꤢꤪ꤬ꤔꤣꤧ꤭ꤘꤥ꤬

¹ ꤛꤢꤩ꤬ꤏꤛꤢꤨ ꤊꤢ꤬ꤔꤥ꤭ ꤋꤛꤢ꤭ꤞꤢꤧ ꤘꤣ ꤒꤢꤩ꤬ꤡꤢꤪꤙꤢꤩ꤭ꤟꤥ꤭ꤊꤢꤨ꤭ ꤚꤣꤧ꤬ ꤙꤣꤧꤔꤣꤧ꤬ ꤒꤣ꤬ꤖꤥ꤬ꤔꤣꤧ꤬, ꤊꤣꤧ꤬ꤛꤢꤧ꤭ꤖꤢꤩ꤭ ꤊꤢꤨꤋꤢꤨ꤬ꤞꤣꤧ꤭ ꤒꤣ꤬ꤋꤥ ꤥ꤬ ꤒꤣ꤬ꤖꤚꤢꤩ꤬꤯

² ꤢ꤬ ꤜꤢ꤭ ꤒꤥ꤭ ꤔꤢꤧ ꤛꤢꤨꤘꤢ꤬ꤖꤢꤨ ꤢ꤬ ꤗ꤫ꤢꤪ꤬ꤔꤣꤧ꤭ꤘꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬ ꤢ꤬ ꤞꤤꤛ꤫ꤢꤦ꤬ ꤗꤢꤧꤕꤢꤨ꤭ ꤕ꤫ꤢꤦ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ꤒꤢꤩ꤬ꤞꤢꤦ ꤚꤣꤧ꤬ ꤢ꤬ ꤥ꤬ꤕ꤫ꤢꤪ꤬ ꤗꤢꤧ ꤜꤢꤨ꤭ ꤔꤢꤧ ꤛꤢꤨꤘꤢ꤬ꤖꤢꤨ ꤢ꤬ ꤗ꤫ꤢꤪ꤬ꤔꤣꤧ꤭ꤘꤥ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤊꤣꤧ꤬ꤛꤢꤧ꤭ꤖꤢꤩ꤭ ꤊꤢꤨꤋꤢꤨ꤬ꤞꤣꤧ꤭ ꤒꤣ꤬ꤋꤥ ꤣꤧ꤭ꤒꤣ꤬ꤖꤚꤢꤩ꤬ ꤕꤢ꤭ ꤟꤢꤧ꤭? ꤗꤢ꤬ ꤒꤥ꤬ ꤟꤢꤧ꤭? ꤟꤢꤨꤔꤣꤧ꤬꤯

³ ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤊꤣꤧ꤬ꤛꤢꤧ꤭ꤖꤢꤩ꤭ ꤊꤢꤨꤋꤢꤨ꤬ꤞꤣꤧ꤭ ꤒꤣ꤬ꤋꤥ ꤣꤧ꤭ꤒꤣ꤬ꤖꤚꤢꤩ꤬ ꤔꤢꤧ, “ꤟꤢꤧ꤭ ꤘꤣ ꤑꤢꤩ꤭ꤣꤧ꤭꤯”

⁴ ꤓꤥ꤭ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤕꤢꤩ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤟꤢꤩ ꤕꤢꤩ꤬ ꤔꤢꤧ ꤙꤣꤧ ꤛꤢꤨꤘꤢ꤬ꤖꤢꤨ ꤢ꤬ꤗ꤫ꤢꤪ꤬ꤔꤣꤧ꤭ꤘꤥ꤬ ꤢ꤬ꤋꤢꤩ꤭ꤔꤣꤧ꤬ꤗꤢ꤬, ꤕꤢꤩ꤬ ꤒꤥ꤭ꤙꤢꤩ꤬ ꤗꤢꤩ꤬ꤡꤝ꤫ꤢ꤬ ꤢꤨ꤭ ꤟꤢꤧ꤭? ꤗ꤫ꤢ꤬ꤒꤥ꤬ꤗꤢ꤬ ꤕꤢꤩ꤬ ꤒꤥ꤭ꤙꤢꤩ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤢꤨ꤭ ꤟꤢꤧ꤭? ꤕꤢꤩ꤬ ꤒꤥ꤭ꤙꤢꤩ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤢ꤬ꤞꤤꤕꤜꤢꤪ꤬ ꤞꤣꤧ꤭ꤖꤚꤢꤩ꤬ ꤟꤢꤧ꤭? ꤗ꤫ꤢ꤬ꤒꤥ꤬ꤚꤣꤧ꤬ ꤕꤢꤩ꤬ ꤒꤥ꤭ꤙꤢꤩ꤬ ꤗꤢꤩ꤬ꤞꤣꤧ꤭ ꤢꤨ꤭ ꤟꤢꤧ꤭?” ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤞꤤ꤭ ꤘꤢꤧꤒꤣꤧ꤬ꤊꤜꤝꤢ꤬ ꤜꤢꤪ꤭ꤕꤜꤤ꤭ ꤖꤢꤧ꤯

⁵ ꤢ꤬ ꤙꤢꤩ꤬ꤏꤢꤩ꤭ ꤛꤢꤩ꤬ꤏꤛꤢꤨ ꤢ꤬ꤞꤤꤕꤜꤢꤪ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤛꤢꤩ꤬ꤞꤤ꤭ ꤊꤢꤨꤜꤢꤩ꤬ꤊꤥ꤬ꤘꤥ꤭ ꤜꤢꤪ꤭ꤕꤜꤤ꤭ ꤡꤣꤧ ꤕꤝꤢ꤭꤮ ꤒꤣ꤬ꤖꤚꤢꤩ꤬, ꤒꤢꤩ꤬ꤞꤤꤛꤢꤪ꤬ꤚꤣꤧ ꤢꤨ꤭ꤔꤣꤧ꤬ ꤢ꤬ ꤥ꤬ ꤡꤣꤧ ꤒꤣꤧ꤬ꤊꤤ꤬꤮ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤏꤛꤢꤨ ꤗꤢꤧ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤞꤤꤕꤜꤢꤪ꤬ꤘꤢꤨ꤬ ꤒꤣꤧ꤬ꤜꤝꤢꤏꤢꤦꤜꤢꤦ꤭ ꤚꤣꤧ꤬ ꤢ꤬ ꤟꤢꤩ ꤊꤣꤧ꤬ꤛꤢꤧ꤭ꤖꤢꤩ꤭ ꤊꤢꤨꤋꤢꤨ꤬ꤞꤣꤧ꤭ ꤒꤣ꤬ꤋꤥ ꤣꤧ꤭ꤒꤣ꤬ꤖꤚꤢꤩ꤬ ꤔꤢꤧ, “ꤙꤢꤪꤓꤢꤩ꤬ ꤔꤢꤧ꤬ ꤊꤢꤨꤋꤢꤨ꤬ꤔꤣꤧ꤬,” ꤚꤣꤧ꤬ ꤢ꤬ ꤙꤢꤪꤓꤢꤩ꤬ ꤢ꤬ꤊꤢꤨꤋꤢꤨ꤬, ꤚꤣꤧ꤬ ꤢ꤬ꤊꤢꤨꤋꤢꤨ꤬ ꤚꤢꤧꤊꤢ꤬ꤋꤛꤢ꤭ ꤕꤜꤢꤦꤜꤢꤪ꤭ ꤋꤛꤢ꤭ꤞꤢꤧ꤯

⁶ ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤚꤣꤧ꤬ ꤒꤣ꤬ꤖꤥꤒꤥ꤬ ꤛꤢꤩ꤬ꤞꤤ꤭ ꤡꤝꤢꤥ꤬ꤕꤜꤢꤪ ꤒ꤫ꤣ꤬ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤋꤚꤝꤢ꤭ꤊꤣꤧ꤭ ꤋꤝꤤꤟꤢꤩ꤬ꤚꤥ꤬ ꤢ꤬ꤋꤛꤢ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤚꤣꤧ꤬ ꤛꤢꤩ꤬ꤞꤤ꤭ ꤡꤝꤢ ꤥ꤬ꤊꤢꤨ ꤟꤢꤩꤙꤢꤩ꤬ ꤚꤣꤧꤘꤢꤦ꤬ꤜꤢꤨ꤭ ꤔꤢꤧ ꤒꤥ꤭ꤙꤢꤩ꤬ ꤗꤢꤩ꤬ꤞꤣꤧ꤭ ꤛꤢꤩ꤬ꤏꤛꤢꤨ ꤟꤢꤨꤒꤢꤩ꤭ ꤢ꤬ꤚꤤ꤬ꤢ꤬ꤊꤢꤧ꤭꤯

ꤊꤣꤧ꤬ꤛꤢꤧ꤭ ꤋꤚꤝꤢ꤭ꤚ꤫ꤥ꤬ꤋꤚꤝꤢ꤭ꤢꤩ ꤛꤢꤩ꤬ꤏꤛꤢꤨ ꤢ꤬ꤋꤛꤢ꤭

⁷ ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤘꤣ ꤊꤢꤧꤜꤢ꤬ꤜꤤ꤬ ꤓꤣꤧ꤭ꤢꤪ꤬ꤘꤢꤨ꤬ꤒꤣꤧ꤬ꤠꤢꤪ꤬ ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤊꤢꤧꤜꤢ꤬ꤜꤤ꤬ ꤊ꤫ꤢꤩ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤋꤚꤝꤢ꤭ꤚ꤫ꤥ꤬ꤋꤚꤝꤢ꤭ꤢꤩ ꤊꤣꤧ꤭ ꤔꤢꤧ꤬ꤡꤣꤧ ꤛꤢꤩ꤬ꤞꤤ꤭ꤋꤛꤢ꤭ꤡꤣꤧ꤯ ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬ꤗꤢ꤬ ꤘꤣ ꤛꤢꤨꤘꤢ꤬ꤊ꤫ꤢꤩ꤬ꤊꤢꤨ꤭,

⁸ ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬ꤗꤢ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬, ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬ꤗꤢ꤬ ꤘꤣ ꤤꤘꤢꤨꤗꤢꤧꤊ꤫ꤢꤩ꤬ ꤔꤢꤧ ꤘꤣ ꤡꤛꤢꤪ꤬ꤘꤢ꤬ ꤓꤣꤧ꤭ꤊꤜꤥ꤭ ꤞꤤꤓꤢꤩ꤬ ꤒꤣ꤬ꤊꤛꤢ꤭, ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤥ꤬ ꤒꤣꤧ꤬ꤠꤤ꤭ꤒꤣꤧ꤬ꤠꤢ꤬ ꤜꤢ꤭ꤋꤢꤧ꤭ ꤙꤣꤧ ꤠꤤ꤭ꤓꤢꤛꤣ꤬ ꤔꤢꤧ ꤠꤤ꤭ꤎꤤꤘꤥ꤬ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤜꤢꤪ꤭꤮ ꤕꤜꤤ꤭ ꤋꤚꤝꤢ꤭ꤊꤣꤧ꤭ ꤜꤢꤪ꤭ ꤛꤢꤩ꤬ꤞꤤ꤭ ꤢ꤬ꤋꤛꤢ꤭꤯ ꤜꤢꤪ꤭ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤟꤥ꤭ ꤜꤢꤪ꤭ꤕꤜꤤ꤭ ꤛꤢꤩ꤬ꤏꤛꤢꤨ ꤗꤢꤩ꤬ ꤒꤢꤩ꤬ꤋꤥꤒꤣꤧ꤬ꤊꤜꤤ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤋꤚꤝꤢ꤭ꤡꤝꤢꤊꤣꤧ꤭ ꤛꤢꤩ꤬ꤞꤤ꤭ꤋꤛꤢ꤭ ꤖꤢꤧ꤯

⁹ ꤛꤢꤩ꤬ꤏꤛꤢꤨ ꤟꤢꤩ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ ꤞꤢꤧꤟꤢꤨ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤟꤢꤧ꤭ꤘꤝꤤꤟꤢꤧ꤭ꤏꤢꤧ꤬ ꤒ꤫ꤢꤧ꤬ ꤜꤢꤨ꤭ ꤒ꤫ꤢꤧ꤬ꤗꤢꤩ꤬ ꤢ꤬ꤑꤢꤩ꤭ꤔꤣꤧ꤬, ꤢ꤬ ꤔꤢꤪ꤭ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤛꤢꤩ꤬ꤞꤤ꤭ ꤞꤢꤪ꤬ꤊꤜꤣꤧ꤭ ꤒꤣ꤬ꤙꤢꤩ꤬꤯

¹⁰ ꤛꤢꤩ꤬ꤏꤛꤢꤨ ꤡꤝꤢ ꤟꤢꤩꤒ꤫ꤥ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤟꤢꤨꤣꤧ꤭ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢ꤬ ꤜꤢ꤭ ꤗꤢꤩ꤬ꤥ꤬ꤗ꤫ꤢꤩ꤬ ꤢꤩꤔꤢꤧ꤬ꤡꤣꤧ ꤟꤣꤧ ꤊꤣꤧ꤬ꤛꤢꤧ꤭ꤏꤝꤤꤊꤣꤧ꤬ꤛꤢꤧ꤭ꤏꤢꤩ꤭ ꤒꤣꤧ꤬ꤟꤢꤩ꤬ ꤟꤣꤧ, ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ꤏꤝꤤꤢ꤬ꤏꤢꤩ꤭ ꤕꤢ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤜꤢ꤭ ꤘꤝꤤꤟꤢꤧ꤭ꤒꤥ꤭ ꤜꤢꤨ꤭ ꤚꤣꤧ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ ꤒꤥ꤬ꤙꤢꤩ꤬ ꤜꤢꤪ꤭ ꤜꤢꤨ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤢ꤬ ꤔꤢꤪ꤭ꤗꤢꤩ꤬ ꤢ꤬ꤋꤥ꤭ꤖꤢꤨꤡ꤫ꤢꤩ꤬ ꤟꤢꤨꤔꤣꤧ꤬ ꤖꤢꤧ꤯

¹¹ ꤜꤥ꤭ꤔꤢꤩ ꤗꤢꤩ꤬ꤙꤢꤩ꤬ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤗꤢꤧꤓ꤫ꤣꤧ꤬ ꤛꤢꤩ꤬ꤏꤛꤢꤨ ꤙꤢꤪꤋꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬, ꤢ꤬ ꤜꤣꤧ꤬ꤋꤢꤦꤒꤢ꤭ ꤘꤣ ꤛꤢꤩ꤬ꤏꤛꤢꤨ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤚꤣꤧ꤬ ꤢ꤬ ꤢꤩꤓꤥ꤭ ꤜꤢ꤭ꤋꤢꤧ꤭ ꤔꤢꤧ, “ꤔꤢꤧ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬,” ꤢ꤬ ꤟꤢꤩ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯

¹² ꤚꤣꤧ꤬ ꤢ꤬ ꤞꤤꤖꤚꤝꤢ꤭ ꤜꤥ꤭ꤔꤢꤩ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ, “ꤠꤢꤧ꤭ ꤗꤢ꤬ ꤢꤨ꤭ꤕꤢꤩ꤭ꤔꤣꤧ꤬ ꤟꤢꤩꤏꤥ꤬ꤜꤥ꤭ ꤒ꤫ꤢꤧ꤬ ꤕ꤫ꤢꤩ꤬ ꤢꤨ꤭ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬ ꤔꤤ꤮꤯”

ꤛꤢꤩ꤬ꤏꤛꤢꤨ ꤔꤝꤢꤓꤢꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤏꤣꤧꤞꤤꤔꤣꤧ꤭

¹³ ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤓꤢꤧ꤬ ꤘꤣ ꤏꤥ꤬ꤜꤥ꤬ ꤚꤣꤧ꤬ ꤢ꤬ ꤢꤩꤟꤢꤧ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ꤒꤥ꤭ ꤜꤢꤨ꤭ꤞꤤꤕꤜꤢꤪ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤘꤣ ꤢ꤬ ꤥ꤬ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤧ꤭ ꤜꤢ꤭ꤋꤢꤧ꤭ ꤘꤣ ꤜꤢꤨ꤭ꤥ꤬꤯

¹⁴ ꤛꤢꤩ꤬ꤏꤛꤢꤨ ꤔꤝꤢꤓꤢꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤏꤣꤧꤞꤤꤔꤣꤧ꤭ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤔꤝꤢꤓꤢꤧ꤬ ꤞꤤ꤭ ꤔꤢꤧ ꤞꤤ꤭ ꤒꤥ꤭ꤙꤢꤩ꤬ ꤥ꤬ꤒ꤫ꤣ꤬ꤊꤣꤧ꤭ ꤔꤢꤧ ꤠꤢꤧ꤭ ꤓꤥ꤭ꤒꤥ꤬ ꤠꤢꤧ꤭ ꤊ꤫ꤢꤦ꤬ ꤔꤢꤪ꤭ꤓꤢꤩ꤬ꤡꤝꤢ ꤞꤤ꤭ ꤕꤢ꤭ ꤚꤣꤧ꤬ ꤞꤤ꤭ ꤊ꤫ꤢꤦ꤬ ꤡꤝꤢꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤜꤢ꤭ꤢ꤬ꤍ꤫ꤥ꤬ ꤕꤢ꤭꤯ ꤚꤣꤧ꤬ ꤢ꤬ ꤢꤩ ꤚꤣꤧꤘꤢꤦ꤬ ꤛꤢꤩ꤬ꤞꤤ꤭ ꤣꤧ꤭ ꤏꤣꤧꤞꤤꤔꤣꤧ꤭ ꤢ꤬ꤗꤝꤤ꤭ ꤔꤢꤧ ꤖꤚꤢꤩ꤬ꤘꤥ꤬ꤔꤢꤧ꤭ꤖꤢꤨ꤯

¹⁵ ꤓꤥ꤭ꤒꤥ꤬ ꤠꤢꤧ꤭ ꤊ꤫ꤢꤦ꤬ ꤘꤣꤧ ꤞꤤ꤭ ꤒꤢꤩ꤬ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤘꤣ ꤞꤤ꤭ ꤊ꤫ꤢꤦ꤬ ꤠ꤫ꤢꤩ꤬ꤓꤢꤩ꤬ꤊꤢꤧ꤭ꤙꤢꤩ ꤜꤥ꤭ꤔꤢꤩ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯”

¹⁶ ꤛꤢꤩ꤬ꤏꤛꤢꤨ ꤔꤝꤢꤓꤢꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤏꤣꤧꤞꤤꤔꤣꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤋꤚꤢꤧ꤮ ꤢꤨ꤭ꤕꤢꤩ꤭ ꤟꤢꤩ ꤚꤣꤧ꤬, ꤋꤢꤨ꤭ꤏꤛꤤꤗꤥ꤬ (ꤘꤣ ꤛꤢꤩ꤬ꤏꤛꤢꤨ ꤢꤩꤒꤣꤧ꤬ꤕꤜꤢꤩ꤬ꤞꤢꤩ꤭ ꤜꤢꤨ꤭ꤗꤝꤤ꤭ ꤔꤢꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ)

¹⁷ ꤖꤢꤩ꤭ꤞꤢꤩꤙꤢꤩ꤬ꤘꤢꤧ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤡꤛꤢꤩ꤭ꤗꤢ꤬ꤎꤣ꤬ ꤔꤢꤧ ꤢ꤬ꤕ꤫ꤥ꤬ꤋꤢꤨ꤭ꤛꤥ꤭ꤟꤢ꤬, ꤚꤣꤧ꤬ ꤛꤢꤩ꤬ꤏꤛꤢꤨ ꤢꤩꤒꤣꤧ꤬ꤕꤜꤢꤩ꤬ꤞꤢꤩ꤭ ꤛꤢꤩ꤬ꤞꤤ꤭ꤗꤝꤤ꤭ ꤔꤢꤧ ꤋꤢꤨ꤭ꤙꤢꤢ꤬ꤔꤢꤩ꤬ꤊꤢꤩ꤯ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬ ꤏꤢ꤬ꤜꤢꤧ꤬ ꤢ꤬ ꤖꤢꤨꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬꤯

¹⁸ ꤋꤢꤨ꤭ꤢꤧ꤬ꤘꤚꤢꤨ, ꤋꤢꤨ꤭ꤖꤤꤜꤤ꤬ꤕꤢꤨ꤬, ꤋꤢꤨ꤭ꤙꤢ꤬ꤞꤢꤪ꤬ꤜꤢꤪꤗꤢꤧ, ꤋꤢꤨ꤭ꤗꤢꤞꤢꤧ, ꤋꤢꤨ꤭ꤞꤥꤗꤢ, ꤖꤢꤩ꤭ꤢ꤬ꤜꤢ꤬ꤖꤢꤧ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤡꤛꤢꤩ꤭ꤗꤢ꤬ꤎꤣ꤬, ꤋꤢꤨ꤭ꤞꤢꤘꤢꤧ, ꤋꤢꤨ꤭ꤏꤛꤤꤗꤥ꤬ ꤘꤣ ꤢ꤬ ꤗꤥ꤬ ꤚꤣꤧꤘꤢꤦ꤬ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬,

¹⁹ ꤔꤢꤧ ꤋꤢꤨ꤭ꤛꤢꤨꤘꤢ꤬ ꤤ꤬ꤎꤢ꤬ꤊꤢꤚꤤꤛꤥ꤬ ꤘꤣ ꤢ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤛꤢꤩ꤬ꤏꤛꤢꤨ ꤔꤣꤧ꤬ꤒꤣ꤬ꤖꤚꤢꤩ꤬꤯

ꤛꤢꤩ꤬ꤏꤛꤢꤨ ꤔꤢꤧ ꤜꤥ꤭ꤔꤢꤩꤜꤥ꤭ꤔꤢ꤬ ꤙꤢꤩ꤬ꤜꤢꤞꤢꤩ꤬ꤙꤢꤨꤜꤢ

²⁰ ꤣꤧ꤭ꤒꤣ꤬ꤖꤥꤚꤣꤧ꤬ ꤛꤢꤩ꤬ꤏꤛꤢꤨ ꤊꤢ꤬ ꤘꤣ ꤟꤤ꤬꤯ ꤚꤣꤧ꤬ ꤊꤣꤧ꤬ꤛꤢꤧ꤭ ꤟꤢꤧ꤭ ꤥ꤬ꤕꤜꤢꤨ꤬ꤥ꤬ꤖꤢꤩ꤬ ꤊꤣꤧ꤭ꤜꤢꤪ꤭ ꤋꤛꤢ꤭ꤞꤢꤧꤜꤢꤨ꤭ ꤒ꤫ꤥ꤬ ꤡꤣꤧ ꤘꤣ ꤛꤢꤩ꤬ꤞꤤ꤭ ꤢꤩ꤬ꤜꤢꤩꤥ꤭ꤜꤢꤩ ꤕꤢ꤬ ꤡꤣꤧ ꤏꤢꤩ꤬ ꤒꤥ꤬꤯

²¹ ꤙꤣꤧ ꤢ꤬ ꤕ꤫ꤥ꤬ꤠ꤫ꤢꤧ꤬ꤗ꤫ꤥ꤬ꤖꤢꤩ꤭ ꤔ꤫ꤤ꤬ꤟꤥ꤭ ꤟꤣꤧ ꤒꤢꤩ꤬ꤗꤢꤩ꤬ꤢ꤬ꤔ꤫ꤢꤩ꤬ ꤟꤢꤨꤣꤧ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤓꤢꤩ꤬ꤡꤝꤢ ꤚꤣꤧ꤬ ꤢ꤬ ꤊ꤫ꤢꤦ꤬ ꤡꤝꤢ ꤡꤝꤤ꤬ꤊꤢ꤬ ꤜꤢꤨ꤭ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤜꤢꤨ꤭ꤛ꤫ꤢꤧ꤬ꤛꤥ꤬ ꤔꤢꤧ, “ꤢ꤬ ꤡ꤫ꤣ꤬ ꤔꤢꤧ ꤢ꤬ ꤒꤣꤧ꤬ꤗꤝꤤ꤭,” ꤛꤢꤩ꤬ꤞꤤ꤭ ꤟꤢꤩ ꤜꤢꤨ꤭ ꤟꤢꤨꤔꤣꤧ꤬꤯

²² ꤓꤥ꤭ꤚꤣꤧ꤬ ꤊꤣꤧ꤬ꤛꤢꤧ꤭ ꤞꤤꤑꤢꤩ꤭ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤥ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤒꤣꤧ꤬ꤟꤢꤩ꤬ ꤟꤢꤧ꤭ꤜꤢꤧ꤬ ꤚꤣꤧ꤬ ꤢ꤬ ꤟꤢꤩ ꤜꤢ꤭ꤋꤢꤧ꤭ ꤔꤢꤧ, “ꤜꤥ꤭ꤔꤢꤩꤜꤥ꤭ꤔꤢ꤬ ꤙꤢꤩ꤬ꤜꤢꤞꤢꤩ꤬ꤙꤢꤨꤜꤢ ꤥ꤬ ꤘꤣ ꤛꤢꤩ꤬ꤏꤛꤢꤨ ꤢ꤬ꤊꤢꤨ꤭, ꤚꤣꤧ꤬ ꤢ꤬ ꤜꤢ꤭ ꤔ꤫ꤤ꤬ꤙꤢꤩ꤬ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪꤘꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤒꤣꤧ꤬ꤚꤣꤧ꤭ꤖꤚꤥ꤬ꤖꤚꤢꤧ꤬ ꤒꤢꤦꤚꤣꤧ꤬ ꤢ꤬ ꤠ꤫ꤢꤩ꤬ꤓꤢꤩ꤬ꤊꤢꤧ꤭ ꤙꤢꤩ ꤖꤢꤧ ꤜꤥ꤭ꤔꤢꤩꤜꤥ꤭ꤔꤢ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯”

²³ ꤚꤣꤧ꤬ ꤛꤢꤩ꤬ꤏꤛꤢꤨ ꤢꤩꤟꤢꤧ꤭ ꤛꤢꤩ꤬ꤞꤤ꤭ ꤘꤣ ꤢ꤬ ꤥ꤬ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ ꤍ꤫ꤥ꤬ꤋꤢꤋꤥ꤬ ꤟꤢꤨꤣꤧ꤭, “ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤡꤝꤢ ꤠ꤫ꤢꤩ꤬ꤓꤢꤩ꤬ꤙꤢꤩ ꤡ꤫ꤢꤧ꤬ ꤋꤛꤢ꤭ꤞꤢꤧ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤟꤢꤨꤒꤢꤩ꤭?

²⁴ ꤓꤣꤧ꤭ꤊ꤫ꤢꤩ꤬ꤖꤢꤨ ꤔꤢꤧ ꤓꤣꤧ꤭ꤊ꤫ꤢꤩ꤬ꤖꤢꤨ ꤊꤢꤩ꤬ ꤏꤢ ꤋꤛꤢ꤭ ꤚꤣꤧꤘꤢꤦ꤬ ꤜꤢꤨ꤭ ꤟꤢꤩꤚꤣꤧ꤬ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ ꤥ꤬ꤊꤜꤢꤪ꤬ꤗꤢ꤬ ꤟꤢꤧ꤭ꤑꤢꤩ꤭ ꤡ꤫ꤢꤩ꤬ꤡꤢꤦ꤭ ꤒ꤫ꤣ꤬ꤡ꤫ꤢꤧ꤬ ꤕꤢ꤬ ꤜꤢꤨ꤭ ꤒꤥ꤬꤯

²⁵ ꤟꤤ꤬ꤖꤢꤨꤖꤢꤧ꤭ꤖꤢꤨ ꤒꤣ꤬ꤟꤤ꤬ ꤊꤢꤩ꤬ꤊꤛꤢꤊꤢꤩ꤬ꤒꤣꤧ꤬ꤍꤢ꤭ ꤋꤛꤢ꤭ ꤚꤣꤧꤘꤢꤦ꤬ ꤜꤢꤨ꤭ ꤟꤢꤩꤚꤣꤧ꤬ ꤟꤤ꤬ꤖꤢꤨꤖꤢꤧ꤭ꤖꤢꤨ ꤣꤧ꤭ ꤥ꤬ ꤟꤢꤧ꤭ꤑꤢꤩ꤭ ꤒ꤫ꤣ꤬ꤡ꤫ꤢꤧ꤬ ꤕꤢ꤬ ꤜꤢꤨ꤭ ꤒꤥ꤬꤯

²⁶ ꤟꤢꤨꤔꤣꤧ꤬ꤚꤣꤧ꤬ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤊꤢꤩ꤬ ꤏꤢ ꤚꤣꤧꤘꤢꤦ꤬ ꤋꤛꤢ꤭ꤞꤢꤧ ꤢ꤬ꤔ꤫ꤢꤩ꤬ ꤟꤢꤩꤚꤣꤧ꤬ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤥ꤬ꤊꤜꤢꤪ꤬ꤗꤢ꤬ ꤡ꤫ꤢꤧ꤬ꤒꤥ꤬꤯ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕꤢ꤭꤯

²⁷ ꤗꤢ꤬ꤔꤢꤧꤚꤣꤧ꤬ ꤙꤣꤧ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ ꤡꤝꤢꤔꤥ꤭ ꤘꤣ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤘꤣ ꤢ꤬ꤞꤢꤧꤔꤢꤧ ꤊꤣꤧ꤬ꤛꤢꤧ꤭ꤏꤝꤢ꤬ꤊꤣꤧ꤬ꤛꤢꤧ꤭ꤏꤢꤪ꤭ ꤒꤣ꤬ꤖꤚꤢꤩ꤬ ꤢ꤬ꤟꤤ꤬ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤊꤢꤩ꤬ ꤔꤥ꤭ ꤡꤢꤪ꤭ꤊꤜꤢꤪ꤬ꤗꤢ꤬ ꤚ꤫ꤣꤧ꤬ ꤜꤢꤨ꤭ ꤒꤥ꤬ ꤊꤢꤩ꤬ꤟꤢꤩꤔꤣꤧ꤬, ꤢ꤬ ꤔꤥ꤭ ꤖꤛꤢꤖꤢꤩ꤬ꤔ꤫ꤤ꤬ ꤡ꤫ꤢꤧ꤬ ꤜꤢꤨ꤭ꤒꤢ꤭ꤒꤢꤩ꤬ ꤒꤣꤧ꤬ꤋꤢꤧ꤮ ꤒꤥ꤬꤯ ꤢ꤬ ꤡꤢꤪ꤭ꤊꤜꤢꤪ꤬ꤗꤢ꤬ ꤓꤥ꤭ ꤜꤢꤨ꤭ ꤒꤢꤦꤗꤢ꤬ ꤢ꤬ ꤖꤛꤢꤖꤢꤩ꤬ ꤔ꤫ꤤ꤬ ꤡ꤫ꤢꤧ꤬ ꤜꤢꤨ꤭ ꤒꤢ꤭ꤒꤢꤩ꤬ ꤖꤢꤧ꤯

²⁸ ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭, ꤜꤢꤪ꤭ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ ꤒꤢꤩ꤬ꤞꤢꤦ ꤒꤣꤧ꤬ꤟꤢꤩ꤬ ꤔꤢꤧ ꤜꤢꤪ꤭ ꤢ꤬ ꤟꤢꤩꤙꤢꤩ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤕꤜꤝꤢ꤭ꤊꤢꤧ꤭ ꤜꤢꤪ꤭ ꤛꤢꤩ꤬ꤞꤤ꤭ ꤒꤢꤩ꤬ꤞꤢꤦ ꤖꤢꤧ꤯

²⁹ ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤔꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤕꤜꤝꤢ꤭ꤊꤢꤧ꤭ꤙꤢꤩ ꤕꤢ꤬ ꤡꤣꤧ ꤜꤢꤨ꤭ꤒꤢꤩ꤬ꤞꤢꤦ ꤒꤣꤧ꤬ꤊꤤ꤬꤮ ꤒꤥ꤬꤯ ꤢ꤬ꤒꤢꤩ꤬ꤞꤢꤦ ꤣꤧ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤥ꤬ꤗꤢ꤬ꤡ꤫ꤢꤧ꤬ ꤜꤥ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤒꤣꤧ꤬ꤜꤢꤧ꤬ꤋꤚꤢꤩ ꤟꤣꤧ꤯”

³⁰ ꤛꤢꤩ꤬ꤏꤛꤢꤨ ꤡꤝꤢꤟꤢꤩꤒ꤫ꤥ꤬ ꤟꤢꤨꤣꤧ꤭ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, “ꤜꤥ꤭ꤔꤢꤩꤜꤥ꤭ꤔꤢ꤬ ꤥ꤬ ꤘꤣ ꤜꤢꤨ꤭ꤊꤢꤨ꤭,” ꤛꤢꤩ꤬ꤞꤤ꤭ ꤜꤢ꤭ ꤟꤢꤩ ꤟꤢꤨꤔꤣꤧ꤬꤯

ꤛꤢꤩ꤬ꤏꤛꤢꤨ ꤢ꤬ꤗ꤫ꤥ꤬ ꤔꤢꤧ ꤢ꤬ꤕ꤫ꤥ꤬ꤗ꤫ꤢꤧ꤬ ꤒꤣꤧ꤬ꤟꤢꤩ꤬

³¹ ꤛꤢꤩ꤬ꤏꤛꤢꤨ ꤢ꤬ꤗ꤫ꤥ꤬ ꤔꤢꤧ ꤢ꤬ ꤕ꤫ꤥ꤬ꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ ꤟꤢꤧ꤭ꤥ꤬ ꤊꤣꤧ꤬ꤓꤢꤪ꤬ ꤘꤣ ꤟꤤ꤬ꤒ꤫ꤣꤧ꤬ꤊꤜꤢꤪ꤭ ꤚꤣꤧ꤬ ꤢ꤬ ꤔꤢꤪ꤭ꤡꤝꤢꤢꤩ ꤢꤨ꤭ ꤔꤢꤧ ꤛꤢꤩ꤬ꤏꤛꤢꤨ꤯

³² ꤚꤣꤧ꤬ ꤊꤣꤧ꤬ꤛꤢꤧ꤭ ꤢꤩꤖꤚꤢꤩ꤬ ꤥ꤬ꤔꤢꤧ꤭ ꤒꤣꤧ꤬ꤠꤢ꤬ ꤕꤜꤢꤨ꤬ꤖꤢꤩ꤬ ꤜꤢꤪ꤭ ꤔꤢꤧ ꤛꤢꤩ꤬ꤏꤛꤢꤨ꤯ ꤢꤨ꤭ ꤟꤢꤩ ꤛꤢꤩ꤬ꤏꤛꤢꤨ ꤔꤢꤧ, “ꤗꤢꤧꤗꤣꤧ꤭ ꤘꤣ ꤔꤣꤧ꤬, ꤔꤢꤧ꤬ꤗ꤫ꤥ꤬ ꤔꤢꤧ ꤔꤢꤧ꤬ ꤕ꤫ꤥ꤬ꤖꤚꤢꤩ꤬ꤋꤢꤨ꤭ ꤔꤢꤧ꤬ ꤕ꤫ꤥ꤬ꤖꤚꤢꤩ꤬ꤗꤢꤪ꤬ ꤒꤣꤧ꤬ꤟꤢꤩ꤬ ꤥ꤬ꤜꤢꤪ꤭ ꤘꤣ ꤟꤤ꤬ꤒ꤫ꤣꤧ꤬ꤊꤜꤢꤪ꤭ꤔꤣꤧ꤬ ꤚꤣꤧ꤬ ꤢ꤬ ꤘꤣꤧꤟꤣꤧ꤭ꤞꤢꤦ ꤜꤢ꤭ꤋꤢꤧ꤭ ꤔꤢꤧ꤬꤯”

³³ ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ꤗ꤫ꤥ꤬ ꤔꤢꤧ ꤠꤢꤧ꤭ ꤕ꤫ꤥ꤬ꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ꤗꤢ꤬ ꤢꤨ꤭ꤕꤢꤩ꤭?”

³⁴ ꤢ꤬ ꤗꤢꤧ ꤒꤣꤧ꤬ꤠꤤ꤭ꤒꤣꤧ꤬ꤠꤢ꤬ꤚꤣꤧ ꤊꤣꤧ꤬ꤛꤢꤧ꤭ ꤥ꤬ꤔꤢꤧ꤭ꤕꤜꤢꤨ꤬ ꤒꤣꤧ꤬ꤠꤢ꤬ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤣꤧ꤭ꤜꤢꤩ, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤙꤣꤧꤣꤧ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤗ꤫ꤢ꤬ꤟꤣꤧ ꤠꤢꤧ꤭ꤗ꤫ꤥ꤬ ꤔꤢꤧ ꤠꤢꤧ꤭ ꤕ꤫ꤥ꤬ꤖꤚꤢꤩ꤬ꤋꤢꤨ꤭ ꤒꤣꤧ꤬ꤟꤢꤩ꤬ꤟꤣꤧ꤯

³⁵ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤒꤥ꤭ ꤟꤢꤨ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤔꤣꤧ꤬ꤒꤣꤧ꤬ꤟꤢꤩ꤬ꤗꤢ꤬ ꤗ꤫ꤢ꤬ꤟꤣꤧ ꤠꤢꤧ꤭ꤕ꤫ꤥ꤬ꤠꤢꤧ꤭ꤗ꤫ꤢꤧ꤬ ꤒꤣꤧ꤬ꤟꤢꤩ꤬ ꤔꤢꤧ ꤠꤢꤧ꤭ꤗ꤫ꤥ꤬ ꤟꤣꤧ,” ꤢ꤬ ꤟꤢꤩ ꤟꤢꤨꤔꤣꤧ꤬꤯