ꤜꤢꤨꤊꤢ꤬ 22 - Eastern Kayah Shadaw Dialect

ꤛꤢꤨꤘꤢ꤬ꤖꤢꤨ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤒꤣꤧ꤬ꤔꤢꤩ꤬ ꤕ꤫ꤢꤦ꤬ ꤜꤢ꤭ꤋꤢꤧ꤭ ꤛꤢꤩ꤬ꤏꤛꤢꤨ

¹ ꤕꤝꤢꤩ꤬ꤢꤩ꤬ꤋꤢꤪꤗꤢꤨ꤭ ꤏꤥ꤭ꤘꤥ꤭ ꤟꤥ꤭ꤗꤢꤦ꤬ꤒꤣꤧ꤬ꤖꤥ꤬ ꤘꤣ ꤢꤨ꤭ ꤢꤩ ꤔꤢꤧ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤣꤧ꤭ꤔꤣꤧ꤬, ꤢ꤬ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤟꤢꤧ꤭ꤖꤢꤦ꤬ ꤟꤣꤧ꤯

² ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤒꤣꤧ꤬ꤟꤢꤩ꤬ ꤞꤤꤤ꤬ꤏꤢꤩ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤢ꤬ꤜ꤫ꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤗꤢꤧꤕꤢꤨ꤭ ꤊꤜꤢꤧ ꤒꤣ꤬ꤙꤥ꤭ꤙꤥ꤭ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ꤟꤥ꤬ꤊꤢꤧ꤭ ꤛꤢꤩ꤬ꤏꤛꤢꤨ꤯

ꤋꤢꤨ꤭ꤛꤢꤨꤘꤢ꤬ ꤢꤪꤜꤢꤧ꤬ ꤘꤣ ꤢ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤊꤢꤧ꤭ ꤛꤢꤩ꤬ꤏꤛꤢꤨ

³ ꤓꤥ꤭ꤚꤣꤧ꤬ ꤋꤢꤨ꤭ꤛꤢꤨꤘꤢ꤬ ꤘꤣ ꤢꤨ꤭ ꤢꤩꤕ꤫ꤥ꤬ ꤜꤢꤨ꤭ꤗꤝꤤ꤭ ꤔꤢꤧ ꤤ꤬ꤎꤢ꤬ꤊꤢꤚꤤꤛꤥ꤬ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤟꤢꤧ꤭ꤔꤥ꤭ ꤘꤣ ꤜꤢꤨ꤭ ꤞꤤꤕꤜꤢꤪ꤬ꤊꤢꤨ꤭꤯ ꤢ꤬ ꤗꤢ꤬ ꤢ꤬ ꤥ꤬ꤒ꤫ꤣ꤬ꤊꤣꤧ꤭ ꤘꤣ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤏꤣꤧꤞꤤꤔꤣꤧ꤭ ꤢ꤬ꤊꤜꤢꤩ꤭ ꤒꤣ꤬ꤖꤚꤢꤩ꤬ꤟꤣꤧ꤯

⁴ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤋꤢꤨ꤭ꤛꤢꤨꤘꤢ꤬ ꤡꤝꤢꤥ꤬ꤘꤥ꤬ꤔꤢꤧ꤭ ꤔꤢꤧ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤥ꤬ꤕ꤫ꤢꤪ꤬ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤊꤢꤨ꤬ꤊꤜꤢꤪ ꤒꤣꤧ꤬ꤟꤢꤩ꤬꤯ ꤚꤣꤧ꤬ ꤢ꤬ ꤡꤝꤢꤥ꤬ꤊꤢꤨꤘꤥ꤬ꤔꤢꤧ꤭ ꤚꤣꤧ ꤛꤢꤩ꤬ꤞꤤ꤭ ꤔꤢꤧ ꤢ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤛꤢꤩ꤬ꤏꤛꤢꤨ ꤟꤢꤨꤒꤢꤩ꤭ ꤕꤢ꤭ꤔꤣꤧ꤬ ꤢ꤬ꤚꤤ꤬ꤢ꤬ꤊꤢꤧ꤭꤯

⁵ ꤛꤢꤩ꤬ꤞꤤ꤭ ꤞꤤꤋꤚꤢꤦ꤭ꤞꤤꤜꤢꤪ꤭ ꤢꤪꤜꤢꤧ꤬ꤏꤢꤦ꤬ ꤋꤢꤨ꤭ꤛꤢꤨꤘꤢ꤬ ꤔꤢꤧ ꤢ꤬ ꤊ꤫ꤢꤦ꤬ ꤘꤣꤧ ꤜꤢꤨ꤭ ꤚꤢꤦ꤭ ꤕꤢ꤭꤯

⁶ ꤋꤢꤨ꤭ꤛꤢꤨꤘꤢ꤬ ꤡꤢꤨ꤭ꤏꤢꤦ꤬ ꤛꤢꤩ꤬ꤞꤤ꤭ ꤓꤥ꤭ꤚꤣꤧ꤬ ꤞꤢꤧꤟꤢꤨ ꤢꤨ꤭ ꤊ꤫ꤢꤦ꤬ ꤞꤤꤑꤢꤩ꤭ ꤒ꤫ꤢꤧ꤬ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬ ꤔꤣꤧ꤬, ꤢ꤬ ꤡꤢꤓꤢꤧ꤬ ꤗꤢꤧꤕꤢꤨ꤭ ꤏꤣꤧꤋꤢꤩ꤭ꤒꤥ꤭ ꤏꤣꤧꤋꤢꤩ꤭ꤙꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ꤚꤣꤧ ꤛꤢꤩ꤬ꤏꤛꤢꤨ꤯

ꤒꤢꤩ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤜ꤫ꤢꤩ꤬ꤢꤩ꤬ꤜ꤫ꤢꤩ꤬ꤥ꤭

⁷ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤙꤢꤩ꤬ꤟꤣꤧ ꤘꤣ ꤕꤝꤢꤩ꤬ꤢꤩ꤬ꤋꤢꤪꤗꤢꤨ꤭ ꤏꤥ꤭ꤘꤥ꤭ ꤟꤥ꤭ꤗꤢꤦ꤬ꤒꤣꤧ꤬ꤖꤥ꤬ ꤟꤢꤧ꤭ꤒ꤫ꤥ꤬ꤟꤣꤧ ꤚꤣꤧ꤬ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤗꤢꤩ꤬ꤞꤣꤧ꤭ ꤜꤢ꤭ꤋꤢꤧ꤭ ꤞꤤꤗꤤ꤬ꤖꤢꤨ ꤘꤣ ꤊ꤫ꤢꤦ꤬ꤢꤩ꤬ꤊ꤫ꤢꤦ꤬ꤥ꤭ ꤔꤢꤧ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤢ꤬ꤑꤢꤩ꤭꤯

⁸ ꤛꤢꤩ꤬ꤏꤛꤢꤨ ꤔꤢꤪ꤭ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤔꤢꤧ ꤋꤢꤨ꤭ꤛꤥ꤭ꤟꤢ꤬ ꤚꤣꤧ꤬ ꤢ꤬ ꤗ꤫ꤢ꤬ꤡꤝꤢꤚꤣꤧ ꤛꤢꤩ꤬ꤞꤤ꤭ ꤍ꤫ꤥ꤬ ꤔꤢꤧ, “ꤡꤝꤢ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤜꤢ꤭ꤋꤢꤧ꤭ ꤕꤢꤩ꤬ ꤜ꤫ꤢꤩ꤬ꤢꤩ꤬ꤜ꤫ꤢꤩ꤬ꤥ꤭ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤢ꤬ꤏꤢꤩ꤬ꤢꤩ꤬ ꤗ꤫ꤢꤪ꤬ꤟꤢꤩ ꤣꤧ꤭ꤔꤣꤧ꤬ ꤔꤤ꤮꤯”

⁹ ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤔꤢꤧ꤬ ꤞꤤꤛ꤫ꤢꤦ꤬ ꤔꤢꤪ꤭ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤒꤥ꤭ ꤕꤢꤩ꤬ ꤙꤣꤧꤒꤢꤩ꤭ ꤒꤣ꤬ꤖꤥ꤬ꤒꤢꤩ꤭?”

¹⁰ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤔ꤫ꤤ꤬ꤘꤢ꤭ ꤜꤢ꤭ꤋꤢꤧ꤭, ꤙꤣꤧ ꤞꤤ꤭ ꤡꤝꤢꤔꤥ꤭ꤒꤥ꤭ꤟꤣꤧ ꤘꤣ ꤠꤤ꤭ꤊꤢꤨ꤭ ꤢ꤬ꤋꤢꤩ꤭ꤕꤢ꤭ꤔꤣꤧ꤬, ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ꤏꤢꤦ꤬ ꤔꤢꤧ ꤊꤣꤧ꤬ꤛꤢꤧ꤭ꤖꤢꤩ꤭ ꤟꤢꤧ꤭ꤘꤢꤧ ꤡꤢꤪ꤭ꤊꤢ꤬ꤓꤣꤧ꤭ ꤔꤢꤧ ꤞꤥ꤭ꤙꤢꤧ ꤒꤣ꤬ꤖꤚꤢꤩ꤬ ꤕꤢ꤭꤯ ꤚꤣꤧ꤬ ꤋꤚꤝꤢ꤭ꤊꤢ꤬ ꤔꤥ꤭ꤊꤣꤧ꤭ ꤡꤣꤧ ꤜꤢꤨ꤭ ꤘꤣ ꤢ꤬ ꤊꤢ꤬ꤔꤥ꤭ ꤚꤣꤧꤘꤢꤦ꤬ ꤟꤤ꤬ꤒꤣ꤬ꤗꤢꤩ꤭ ꤢ꤬ꤊꤢꤨ꤭ꤔꤣꤧ꤬ ꤔꤤ꤮꤯

¹¹ ꤚꤣꤧ꤬ ꤘꤣꤧꤟꤣꤧ꤭ ꤟꤤ꤬ꤙꤢꤧ꤬ꤡꤢꤩ꤬ꤔꤣꤧ꤬ ꤔꤢꤧ, ‘ꤞꤢꤚꤢ ꤘꤣꤧꤟꤣꤧ꤭ ꤔꤢꤧ꤬ ꤔꤢꤧ, ꤟꤤ꤬ꤘꤢꤪꤊꤢꤨ꤭ ꤘꤣ ꤞꤤꤖꤚ꤫ꤢꤩ꤬ ꤢ꤬ꤑꤢꤩ꤭ ꤘꤣ ꤠꤢꤧ꤭ ꤔꤢꤧ ꤠꤢꤧ꤭ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤢꤩ꤬ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤢ꤬ꤑꤢꤩ꤭ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤥ꤬ ꤒꤥ꤭ꤙꤣꤧꤒꤢꤩ꤭?’ ꤘꤣꤧꤟꤣꤧ꤭ ꤜꤢꤨ꤭ ꤟꤢꤨꤔꤣꤧ꤬ ꤔꤤ꤯

¹² ꤓꤥ꤭ꤕꤢ꤭ꤚꤣꤧ꤬ ꤢ꤬ ꤊ꤫ꤢꤦ꤬ ꤤ꤬ꤛꤢꤨ꤭ꤜꤥ꤭ ꤞꤤ꤭ ꤟꤤ꤬ꤘꤢꤪꤊꤢꤨ꤭ ꤜ꤫ꤢꤩ꤬ꤥ꤬ꤜ꤫ꤢꤧ꤬ ꤘꤣ ꤢ꤬ꤋꤢꤨ꤬ ꤔꤣꤧ꤬ꤒꤣ꤬ꤒ꤫ꤥ꤬ ꤘꤣ ꤢ꤬ ꤥ꤬ꤜꤣꤥ꤬ꤙꤢ꤭ ꤡꤣꤧ ꤔꤢꤧ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤘꤣ ꤕꤢꤩ꤬ ꤜ꤫ꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ ꤕꤢ꤭꤯ ꤚꤣꤧ꤬ ꤥ꤬ꤊꤢꤧ꤭ ꤜꤢ꤭ꤋꤢꤧ꤭ ꤙꤣꤧꤔꤣꤧ꤬ ꤚꤣꤧ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤜꤢ꤭ꤋꤢꤧ꤭ ꤕ꤫ꤢꤩ꤬ ꤕꤢꤩ꤬ ꤏꤢꤩ꤬ꤢꤩ꤬ꤏꤢꤩ꤬ꤥ꤭ ꤙꤣꤧꤔꤣꤧ꤬ ꤔꤤ꤮꤯”

¹³ ꤛꤢꤩ꤬ꤞꤤ꤭ ꤓꤢꤩ꤬ꤡꤝꤢ ꤚꤣꤧ꤬ ꤛꤢꤩ꤬ꤞꤤ꤭ ꤡꤝꤢꤗꤢꤧꤓ꤫ꤣꤧ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤟꤢꤨ ꤛꤢꤩ꤬ꤏꤛꤢꤨ ꤟꤢꤩꤥ꤬ꤔꤢꤩ꤬ ꤛꤢꤩ꤬ꤞꤤ꤭ ꤔꤣꤧ꤬ ꤡꤣꤧ꤯ ꤚꤣꤧ꤬ ꤛꤢꤩ꤬ꤞꤤ꤭ ꤡꤝꤢ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ꤚꤣꤧ ꤜꤢ꤭ꤋꤢꤧ꤭ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤢ꤬ꤏꤢꤩ꤬ꤢꤩ꤬ ꤗ꤫ꤢꤪ꤬ꤟꤢꤩ ꤢ꤬ꤑꤢꤩ꤭ ꤙꤣꤧꤔꤣꤧ꤬꤯

ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ ꤒꤢꤩ꤬ꤢꤩ꤬ꤥ꤭ ꤗ꤫ꤢꤪ꤬ꤟꤢꤩ

¹⁴ ꤙꤣꤧ ꤏꤣꤧꤋꤢꤩ꤭ ꤟꤢꤧ꤭ꤒ꤫ꤥ꤬ꤟꤣꤧ ꤘꤣ ꤒꤥ꤭ꤙꤢꤩ꤬ ꤢꤩ꤬ꤥ꤭ ꤟꤣꤧ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤧ ꤖꤚꤢꤩ꤬ꤘꤥ꤬ꤔꤢꤧ꤭ꤖꤢꤨ ꤒꤣꤧ꤬ꤟꤢꤩ꤬ ꤡꤝꤢ ꤥ꤬ꤔꤢꤧ꤭ꤥ꤬ ꤒꤣꤧ꤬ꤠꤢ꤬ ꤚ꤫ꤥ꤬ꤜꤢꤪ꤭ ꤜꤢꤨ꤭ ꤘꤣ ꤜ꤫ꤢꤩ꤬ꤢꤩ꤬ꤘꤤ꤭ꤚ꤫ꤢꤩ꤬ ꤢ꤬ꤊꤢꤧ꤭ꤏꤢ꤯

¹⁵ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤙꤣꤧ ꤠꤢꤧ꤭ ꤋꤢꤧꤙꤢꤩ꤬ ꤒꤢꤧ꤬ꤜꤢ꤭ꤟꤤ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤜꤢ꤭ꤟꤤꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤞꤤꤛ꤫ꤢꤦ꤬ ꤢꤩ꤬ꤒ꤫ꤣ꤬ꤥ꤭ꤒ꤫ꤣ꤬ꤊꤣꤧ꤭ ꤔꤢꤧ꤬ꤡꤣꤧ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤣꤧ꤭ꤒꤣ꤬ꤖꤥꤔꤣꤧ꤬ ꤔꤢꤧ ꤞꤤ꤭ ꤊꤣꤧ꤬ꤔꤥ꤮ ꤒꤥ꤬꤯

¹⁶ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤠꤢꤧ꤭ ꤟꤢꤩ ꤞꤤ꤭, ꤡꤢꤪꤗꤣꤧ꤬ꤚꤢꤧ꤬ ꤊꤢꤩ꤬ ꤟꤢꤧ꤭ꤤꤓꤢ꤬ꤊꤢ꤬ ꤕꤜꤢꤦꤓꤥ꤭ꤜꤢꤪ꤭ ꤜꤢ꤭ꤟꤤ ꤢ꤬ꤊꤣꤧ꤬ꤛꤢꤧ꤭ ꤒꤥ꤬ ꤚꤣꤧ꤬ ꤢ꤬ ꤟꤢꤧ꤭ ꤓꤝꤢ꤭ꤋꤝꤤ ꤚꤣꤧ꤬ ꤕꤣꤚꤣꤧꤜꤢ꤭ꤟꤤ ꤛꤢꤩ꤬ꤞꤤ꤭ ꤒꤥ꤬ꤔꤣꤧ꤬, ꤠꤢꤧ꤭ ꤢꤩ꤬ꤔꤢꤪꤊꤣꤧ꤭ ꤕꤢ꤭ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤏꤢꤩ꤬ꤢꤩ꤬ꤏꤢꤩ꤬ꤥ꤭ ꤣꤧ꤭ꤔꤣꤧ꤬ ꤔꤢꤧ ꤞꤤ꤭ ꤒꤥ꤬ ꤟꤣꤧ꤯”

¹⁷ ꤛꤢꤩ꤬ꤏꤛꤢꤨ ꤖꤛꤢꤓꤢꤧ꤬ ꤙꤢꤩ꤭ ꤚꤣꤧ꤬ ꤢ꤬ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤓꤥ꤭ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤖꤛꤢꤗꤣꤧ꤭ ꤙꤢꤩ꤭ꤣꤧ꤭ ꤚꤣꤧ꤬ ꤛ꤫ꤢꤨ꤬ꤒꤢ꤭ꤥ꤭ ꤕ꤫ꤢꤩ꤬ ꤜꤢꤨ꤭꤯

¹⁸ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤠꤢꤧ꤭ ꤟꤢꤩ ꤞꤤ꤭, ꤡꤢꤓꤢꤧ꤬ ꤊꤢꤨꤔ꤫ꤢꤧ꤬ꤣꤧ꤭ ꤒꤢ꤭ꤟꤢꤧ꤭ꤑꤢꤩ꤭ ꤒ꤫ꤥ꤬ꤘꤣ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤟꤢꤧ꤭ ꤕꤣꤓꤣꤧ꤭ꤕꤣꤊ꤫ꤢꤩ꤬ ꤕꤢ꤭ ꤒꤣ꤬ꤖꤥꤔꤣꤧ꤬, ꤠꤢꤧ꤭ ꤥ꤭ꤔꤢꤪ ꤊꤣꤧ꤭ꤕꤢ꤬ ꤎꤢ꤬ꤕꤛꤤꤓꤣꤧ꤭ꤣꤧ꤭ ꤒ꤫ꤥ꤬ꤟꤣꤧ꤯”

¹⁹ ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤖꤛꤢ ꤋꤢꤪꤗꤢꤨ꤭ ꤚꤣꤧ꤬ ꤢ꤬ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬꤯ ꤓꤥ꤭ꤚꤣꤧ꤬ ꤢ꤬ ꤙꤤ꤬ꤊꤛꤢ꤭ ꤋꤢꤪꤗꤢꤨ꤭ ꤚꤣꤧ꤬ ꤢ꤬ ꤘꤣꤧꤒꤢ꤭ ꤔꤢꤧ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤣꤧ꤭ꤗꤢ꤬ ꤠꤢꤧ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤘꤣ ꤠꤢꤧ꤭ ꤘꤣꤧꤜꤢꤧ꤬ꤊꤢꤧ꤭ ꤘꤣ ꤞꤤ꤭ꤑꤢꤩ꤭ ꤔꤣꤧ꤬ꤟꤣꤧ꤯ ꤢꤩ꤬ ꤜꤢ꤭ꤋꤢꤧ꤭ ꤣꤧ꤭ ꤘꤣ ꤒꤢꤩ꤬ꤞꤤꤔ꤫ꤢꤩ꤬ꤓꤢꤧ꤬ ꤠꤢꤧ꤭ ꤢ꤬ꤊꤢꤨ꤭ ꤔꤤ꤮꤯”

²⁰ ꤙꤣꤧ ꤢ꤬ ꤢꤩ꤬ꤓꤥ꤭ꤟꤣꤧ ꤗ꤫ꤢꤪ꤬ꤟꤢꤩꤏꤢꤩ꤬ꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤖꤛꤢꤓꤢꤧ꤬ ꤜꤢ꤭ꤒꤢꤩ꤬ ꤙꤢꤩ꤭ꤣꤧ꤭ ꤚꤣꤧ꤬ ꤢ꤬ ꤗꤢꤩ꤬ ꤞꤢꤧꤊꤣꤧ꤭ꤘꤢꤦ꤬ ꤟꤢꤨ ꤢ꤬ ꤗꤢꤩ꤬ ꤋꤢꤪꤗꤢꤨ꤭ꤔꤣꤧ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤣꤧ꤭ꤗꤢ꤬ ꤠꤢꤧ꤭ꤞꤝꤤ꤬ ꤘꤣ ꤢ꤬ ꤗꤢꤩ꤬ꤊꤜꤢꤪ꤬ꤗꤢꤩ꤬ꤗꤢ꤬ ꤒꤢꤩ꤬ꤢꤪꤜꤢꤧ꤬ ꤢ꤬ꤞꤢꤩ꤭ ꤚꤣꤧ꤬ ꤢ꤬ ꤓꤝꤤꤒꤢ꤭ ꤘꤣ ꤞꤤ꤭ꤑꤢꤩ꤭ ꤣꤧ꤭ꤔꤣꤧ꤬ ꤟꤣꤧ꤯

²¹ ꤗꤢ꤬ꤔꤢꤧꤚꤣꤧ꤬ ꤗꤢꤧ ꤜꤢ꤭ꤋꤢꤧ꤭! ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤠꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤥ꤬ꤒ꤫ꤣ꤬ꤊꤣꤧ꤭ ꤔꤢꤧ ꤠꤢꤧ꤭ ꤙꤣꤧ ꤜ꤫ꤢꤩ꤬ꤢꤩ꤬ꤘꤤ꤭ꤚ꤫ꤢꤩ꤬ ꤊꤢꤧ꤭ꤏꤢ ꤣꤧ꤭ꤔꤣꤧ꤬ ꤖꤢꤧ꤯

²² ꤖꤚꤢꤩ꤬ꤜꤢꤨ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤘꤢꤦ꤬ ꤠꤢꤧ꤭ꤣꤧ꤭ ꤢ꤬ ꤊ꤫ꤢꤦ꤬ ꤞꤣꤧ꤭ ꤟꤢꤨ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤒꤣꤧ꤬ꤔꤢꤩ꤬ꤥ꤬ꤔꤢꤩ꤬ ꤔꤣꤧ꤬ꤕꤢ꤭ ꤒꤣꤧ꤬ꤘꤢꤦꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤠꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤋꤢꤧꤙꤢꤩ꤬ ꤔꤢꤧ꤬ꤡꤣꤧ ꤒꤢꤩ꤬ꤡꤢ꤭ꤡꤢꤦ꤬ ꤕꤢ꤭!”

²³ ꤚꤣꤧ꤬ ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤚꤣꤧꤘꤢꤦ꤬ ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤟꤢꤩ ꤜꤢ꤭ꤋꤢꤧ꤭ ꤔꤢꤧ, ꤙꤣꤧꤒꤢꤩ꤭ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤢ꤬ ꤕꤢ꤭ ꤟꤢꤧ꤬꤮?

ꤒꤢꤩ꤬ꤋꤚꤢꤩꤋꤚ꤫ꤢꤧ꤬ ꤜꤢꤨ꤭ ꤔꤢꤧ ꤒꤢꤩ꤬ꤓꤝꤢ꤭ꤘꤢꤨ꤬ꤜꤣ ꤢ꤬ꤚꤤ꤬ꤢ꤬ꤊꤢꤧ꤭

²⁴ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤋꤚꤢꤩꤋꤚ꤫ꤢꤧ꤬ ꤚꤣꤧꤘꤢꤦ꤬ꤜꤢꤨ꤭ ꤔꤢꤧ, ꤘꤣ ꤕꤢꤩ꤬ꤊꤜꤢꤩ꤭ ꤣꤧ꤭ꤔꤣꤧ꤬ꤗꤢ꤬ ꤢꤨ꤭ꤕꤢꤩ꤭ ꤊ꤫ꤢꤦ꤬ ꤓꤝꤢ꤭ꤘꤢꤨ꤬ꤜꤣ ꤢꤨ꤭ ꤕꤢ꤭ ꤟꤢꤧ꤬꤮? ꤟꤢꤨꤔꤣꤧ꤬,

²⁵ ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤛꤢꤨꤘꤢ꤬ꤖꤢꤨ ꤗ꤫ꤢ꤬ꤒꤥ꤬ ꤒꤣꤧ꤬ꤟꤢꤩ꤬ ꤢ꤬ ꤋꤝꤤꤡꤢꤪꤖꤢꤧ꤬ ꤞꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤔꤢꤪ꤭ꤢꤩ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤣꤧ꤭ꤔꤣꤧ꤬ ꤘꤣ ꤓꤣꤧ꤭ꤖꤢꤨꤊ꤫ꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤋꤢꤨ꤬ ꤚꤣꤧ꤬ ꤖꤚꤢꤩ꤬ꤕꤣꤒꤣꤧ꤬ꤚꤤ꤬ꤒꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤤꤛ꤫ꤢꤦ꤬ ꤘꤣ ꤢꤨ꤭ ꤊ꤫ꤢꤦ꤬ ꤢꤩ ꤛꤢꤩ꤬ꤞꤤ꤭ ꤔꤢꤧ, ‘ꤖꤚꤢꤩ꤬ ꤗꤢꤩ꤬ꤙꤝꤤꤗꤢꤩ꤬ꤒꤣꤧ꤬ꤚꤣꤧ꤭ ꤓꤣꤧ꤭ꤖꤢꤨꤊ꤫ꤢꤩ꤬ꤖꤢꤨ’ ꤒꤣꤧ꤬ꤟꤢꤩ꤬ ꤟꤢꤨꤔꤣꤧ꤬꤯

²⁶ ꤗꤢ꤬ꤔꤢꤧꤚꤣꤧ꤬ ꤞꤤ꤭ ꤣꤧ꤭ꤒꤣꤧ꤬ꤟꤢꤩ꤬ꤗꤢ꤬ ꤞꤤ꤭ ꤙꤢꤩ꤬ꤗꤢꤩ꤬ ꤔ꤫ꤤ꤬ ꤊꤣꤧ꤭ꤢꤨ꤭ ꤟꤢꤨꤔꤣꤧ꤬ꤒꤥ꤬꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤓꤝꤢ꤭ꤘꤢꤨ꤬ꤜꤣ ꤢꤨ꤭ ꤘꤣ ꤞꤤ꤭ꤊꤜꤢꤩ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ꤔꤣꤧ꤬, ꤢ꤬ ꤒꤥ꤭ꤙꤢꤩ꤬ ꤓꤝꤢ꤭ ꤟꤢꤨ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤕꤣꤧ꤬ꤒꤤꤜꤣ ꤒꤣ꤬ꤖꤚꤢꤩ꤬ꤔꤣꤧ꤬, ꤓꤥ꤭ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤓꤝꤢ꤭ ꤊꤢꤨ꤬ꤊꤜꤢꤪ ꤒꤣ꤬ꤖꤚꤢꤩ꤬ꤖꤚꤢꤩ꤬ꤔꤣꤧ꤬, ꤢ꤬ ꤒꤥ꤭ꤙꤢꤩ꤬ ꤓꤝꤢ꤭ ꤟꤢꤨ ꤜꤢꤨ꤬ꤜꤢꤩ ꤒꤣ꤬ꤖꤚꤢꤩ꤬ꤔꤣꤧ꤬꤯

²⁷ ꤊꤣꤧ꤬ꤛꤢꤧ꤭ ꤟꤢꤩ꤬ꤋꤢꤨ꤬ꤖꤢꤨ ꤒꤣꤧ꤬ꤟꤢꤩ꤬ ꤒꤣꤧ꤬ꤔꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤥ꤬ꤔꤢꤧ꤭ꤥ꤬ ꤢꤩ꤬ꤏꤢꤩ꤬ꤢꤩ꤬ ꤘꤣ ꤘꤤ꤭ꤚ꤫ꤢꤩ꤬ ꤊꤢꤧ꤭ꤏꤢ ꤔꤣꤧ꤬ꤗꤢ꤬ ꤢ꤬ ꤓꤝꤢ꤭ ꤘꤢꤨ꤬ꤜꤣꤢꤨ꤭ ꤟꤣꤧ, ꤚꤣꤧ꤬ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ ꤙꤥ꤬ꤢꤩ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤔꤢꤧ꤭ ꤢꤩ꤬ꤏꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤢ꤬ ꤓꤝꤢ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤕꤣꤧ꤬ꤒꤤꤜꤣꤢꤨ꤭ ꤟꤣꤧ ꤢ꤬ ꤒꤣꤧ꤬ꤔꤢꤩ꤬ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ ꤗꤢ꤬ꤔꤢꤧꤚꤣꤧ꤬, ꤠꤢꤧ꤭ꤚꤣꤧ꤬ ꤠꤢꤧ꤭ ꤥ꤬ ꤘꤣ ꤞꤤ꤭ꤊꤜꤢꤩ꤭ ꤟꤢꤨ ꤜꤢꤨ꤬ꤜꤢꤩ ꤘꤣ ꤢ꤬ ꤙꤥ꤬ꤢꤩ꤬ꤙꤥ꤬ꤥ꤭ ꤢꤨ꤭ ꤒꤣ꤬ꤖꤚꤢꤩ꤬ ꤔꤣꤧ꤬ꤖꤢꤧ꤯

²⁸ ꤙꤣꤧ ꤠꤢꤧ꤭ ꤋꤢꤧꤙꤢꤩ꤬ ꤒꤢꤩ꤬ꤕ꤫ꤢꤧ꤬ꤒꤢꤩ꤬ꤏꤢꤩ꤭ ꤢ꤬ꤋꤢꤩ꤭ꤔꤣꤧ꤬, ꤞꤤ꤭ ꤥ꤬ꤊꤣꤧ꤭ꤟꤣꤧ ꤔꤢꤧ ꤠꤢꤧ꤭ ꤕꤝꤢ꤭꤮ ꤒꤣ꤬ꤖꤥ ꤟꤣꤧ꤯

²⁹ ꤟꤢꤨ ꤠꤢꤧ꤭ꤖꤢꤩ꤭ ꤔꤢꤪ꤭ꤕꤣ ꤠꤢꤧ꤭ ꤔꤣꤧ꤬, ꤠꤢꤧ꤭ ꤔꤢꤪ꤭ꤕꤣ ꤊꤣꤧ꤭ ꤞꤤ꤭ ꤕꤢ꤭꤯

³⁰ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤢꤩ꤬ꤥ꤭ ꤒ꤫ꤣ꤬ꤊꤣꤧ꤭ ꤔꤢꤧ ꤠꤢꤧ꤭ ꤘꤣ ꤠꤢꤧ꤭ ꤘꤤ꤭ꤚ꤫ꤢꤩ꤬ ꤊꤢꤧ꤭ꤏꤢ ꤘꤣ ꤠꤢꤧ꤭ꤓꤣꤧ꤭ꤠꤢꤧ꤭ꤊ꤫ꤢꤩ꤬ꤊꤢꤨ꤭ ꤕꤢ꤭, ꤓꤥ꤭ꤒꤥ꤬ ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤥ꤬ꤔꤢꤧ꤭ꤥ꤬ ꤒ꤫ꤣ꤬ꤔꤢꤪ ꤊꤣꤧ꤭ꤘꤢꤦ꤬ ꤔꤢꤧ ꤠꤢꤧ꤭ ꤘꤣ ꤊꤢꤨ꤬ꤊꤜꤢꤧꤓꤢꤩ꤭ ꤓꤢꤧ꤬ꤜꤥ꤭ ꤢ꤬ꤋꤢꤨ꤬ ꤕꤢ꤭ ꤚꤣꤧ꤬ ꤞꤤ꤭ ꤊ꤫ꤢꤦ꤬ ꤘꤣꤧꤡꤢ꤭ ꤚꤣꤧꤘꤢꤦ꤬ ꤤ꤬ꤎꤢ꤬ꤚꤢꤩꤜꤢ꤬ꤖꤢꤨ ꤏꤣꤧꤔꤣꤧ꤭ꤗ꤫ꤥ꤬ ꤣꤧ꤭ꤔꤣꤧ꤬ ꤕꤢ꤭꤯

ꤛꤢꤩ꤬ꤏꤛꤢꤨ ꤟꤢꤩꤜꤥ꤭ꤥ꤬ꤔꤢꤩ꤬ ꤔꤢꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤊ꤫ꤢꤦ꤬ ꤓꤢꤩꤙꤤꤊꤢꤧ꤭ ꤜꤢꤨ꤭ ꤕꤢ꤭ ꤢ꤬ꤚꤤ꤬ꤢ꤬ꤊꤢꤧ꤭

³¹ “ꤋꤢꤨ꤭ꤏꤛꤤꤗꤥ꤬, ꤋꤢꤨ꤭ꤏꤛꤤꤗꤥ꤬, ꤔ꤫ꤤ꤬ꤘꤢ꤭! ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤡꤝꤢꤊꤝꤤ꤭ꤒꤣꤧ꤬ꤘꤢꤦ꤬ ꤚꤣꤧ ꤟꤣꤧ ꤡꤢꤪꤗꤣꤧ꤬ꤚꤢꤧ꤬ ꤔꤢꤧ ꤢ꤬ ꤊ꤫ꤢꤦ꤬ ꤕꤜꤝꤢ꤭ꤟꤣꤧ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤊ꤫ꤢꤦ꤬ ꤗꤢꤩ꤬ꤗꤢꤧ ꤜꤢꤪ꤭ ꤞꤤ꤭ ꤕꤝꤢ꤭ꤖꤚꤢꤩ꤬ ꤟꤣꤧ꤯ ꤚꤣꤧ꤬ ꤢ꤬ ꤊ꤫ꤢꤦ꤬ ꤗꤢꤩ꤬ꤗꤢꤧ ꤞꤤ꤭ ꤟꤢꤨ ꤖꤚꤢꤩ꤬ꤗꤢꤩ꤬ꤢꤩ꤬ꤜ꤫ꤢꤧ꤬ ꤒꤣꤧ꤬ꤜꤢꤩꤏꤢꤩ ꤚꤣꤧꤘꤢꤦ꤬ ꤢ꤬ꤙꤥ ꤔꤣꤧ꤬ ꤕꤢ꤭꤯

³² ꤗꤢ꤬ꤔꤢꤧꤚꤣꤧ꤬, ꤋꤢꤨ꤭ꤏꤛꤤꤗꤥ꤬, ꤞꤢꤧꤟꤢꤨ ꤔꤢꤧ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤊ꤫ꤢꤦ꤬ ꤕꤛꤢꤊꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤣꤧ꤬, ꤠꤢꤧ꤭ ꤊꤝꤤ꤭ꤡꤢꤪꤙꤢꤩ꤭ ꤕꤢꤩ꤬ ꤘꤣ ꤔꤢꤧ꤬ꤑꤢꤩ꤭꤯ ꤓꤥ꤭ꤚꤣꤧ꤬ ꤙꤣꤧ ꤔꤢꤧ꤬ ꤞꤤꤔ꤫ꤢꤩ꤬ꤜꤢꤧ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤟꤣꤧ ꤔꤢꤧ꤬ꤔ꤫ꤢꤩ꤬ ꤕꤢ꤭ꤔꤣꤧ꤬, ꤔꤢꤧ꤬ ꤒꤥ꤭ꤙꤢꤩ꤬ ꤘꤣꤧꤟꤢꤧ꤭ꤘꤣꤧꤚꤢꤩ꤬ꤚꤣꤧ ꤔꤢꤧ꤬ ꤕ꤫ꤥ꤬ꤠ꤫ꤢꤧ꤬ ꤒꤣꤧ꤬ꤟꤢꤩ꤬ ꤕꤢ꤭ ꤔꤤ꤮꤯”

³³ ꤋꤢꤨ꤭ꤏꤛꤤꤗꤥ꤬ ꤕꤢꤩ꤬ꤒꤢ꤬ꤚꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤠꤢꤧ꤭ ꤒꤥ꤭ꤙꤢꤩ꤬ ꤡꤝꤢ ꤒ꤫ꤣ꤬ꤊꤣꤧ꤭ ꤔꤢꤧ ꤔꤢꤧ꤬ ꤘꤣ ꤢꤨ꤭ ꤜ꤫ꤢꤩ꤬ꤘꤢꤪꤒꤢ꤭ ꤊꤣꤧ꤬ꤛꤢꤧ꤭ ꤢ꤬ ꤕꤥ꤬ꤊꤢꤨ꤭ꤔꤣꤧ꤬ ꤡꤣꤧ ꤙꤢꤩ꤬ꤙꤢꤩ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤠꤢꤧ꤭ ꤒꤥ꤭ꤙꤢꤩ꤬ ꤞꤣꤧ꤭ ꤒ꤫ꤣ꤬ꤊꤣꤧ꤭ ꤡꤣꤧ ꤔꤢꤧ ꤔꤢꤧ꤬ ꤙꤢꤩ꤬ꤙꤢꤩ꤬, ꤠꤢꤧ꤭ ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤟꤣꤧ ꤠꤢꤧ꤭ꤔ꤫ꤢꤩ꤬ ꤟꤣꤧ꤯”

³⁴ ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ, ꤠꤢꤧ꤭ ꤟꤢꤩ ꤔꤢꤧ꤬, ꤣꤧ꤭ꤒꤣ꤬ꤞꤢꤩ꤭ ꤕꤢ꤭, ꤙꤣꤧ ꤏꤢ꤭ꤖꤢꤩ꤭ ꤤ꤬ꤢꤨ꤬ꤓꤢꤧ꤬ ꤒꤢꤧ꤬ꤜꤢ꤭ꤟꤤꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤔꤢꤧ꤬ ꤓꤢꤩꤙꤤꤊꤢꤧ꤭ ꤠꤢꤧ꤭ ꤞꤥ꤭ꤖꤥ ꤕꤢ꤭꤯”

ꤚꤢꤦ꤭ꤓꤢꤪ꤭, ꤕꤛꤢ꤭ꤕꤤ꤬ ꤔꤢꤧ ꤔꤢꤩ

³⁵ ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤘꤣꤧꤟꤣꤧ꤭ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤘꤣ ꤢ꤬ꤚ꤫ꤣꤧ꤬ꤋꤢꤩ꤭ ꤔꤣꤧ꤬, ꤠꤢꤧ꤭ ꤔꤢꤪ꤭ꤡꤝꤢ ꤞꤤ꤭ ꤚꤣꤧ꤬ ꤠꤢꤧ꤭ ꤟꤢꤩ ꤞꤤ꤭ ꤔꤢꤧ, ꤚꤢꤦ꤭ꤓꤢꤪ꤭ ꤙꤢꤩ꤬ꤙꤢꤩ꤬, ꤕꤛꤢ꤭ꤕꤤ꤬ ꤙꤢꤩ꤬ꤙꤢꤩ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤋꤢꤧ꤬ꤖꤢ ꤙꤢꤩ꤬ꤙꤢꤩ꤬ ꤖꤛꤢꤡꤝꤢꤔ꤫ꤤ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮, ꤠꤢꤧ꤭ ꤟꤢꤩ ꤞꤤ꤭ ꤟꤢꤨꤔꤣꤧ꤬꤯ ꤙꤣꤧꤔꤣꤧ꤬ꤋꤢꤩ꤭ ꤞꤤ꤭ ꤜ꤫ꤥ꤬ꤔꤢꤪ ꤕꤢ꤬ ꤔꤢꤧ꤭ ꤒꤣ꤬ꤡꤣ꤬ꤡꤣ꤬ ꤟꤢꤧ꤭?” ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤔꤢꤧ, “ꤕꤢꤩ꤬ ꤜ꤫ꤥ꤬ꤔꤢꤪ ꤒꤣ꤬ꤡꤣ꤬꤮ ꤒꤥ꤬꤯”

³⁶ ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤗꤢ꤬ꤔꤢꤧꤚꤣꤧ꤬ ꤊꤢꤨꤔ꤫ꤢꤧ꤬ꤣꤧ꤭, ꤢꤨ꤭ꤕꤢꤩ꤭ ꤙꤢꤩ꤬ꤙꤢꤩ꤬ ꤘꤣ ꤢ꤬ꤚꤢꤦ꤭ꤓꤢꤪ꤭ ꤗ꤫ꤢ꤬ꤒꤥ꤬ꤚꤣꤧ꤬, ꤢ꤬ꤕꤛꤢ꤭ꤕꤤ꤬ ꤥ꤬ꤒꤣꤧ꤬ꤟꤢꤩ꤬ꤔꤣꤧ꤬ ꤒꤥ꤭ ꤖꤛꤢꤡꤝꤢꤔ꤫ꤤ꤬ ꤜꤢ꤭ꤋꤢꤧ꤭, ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ꤔꤢꤩ ꤥ꤬ꤒꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤒꤥ꤭ ꤤ꤬ꤏꤢꤩ꤭ꤊꤢꤧ꤭ ꤢ꤬ ꤡꤢ꤬ꤊꤜꤢꤪ꤭ꤘꤢꤨ꤬ ꤚꤣꤧ꤬ ꤤ꤬ꤖꤚꤤ꤬ꤡꤝꤢꤔ꤫ꤤ꤬ ꤜꤢ꤭ꤋꤢꤧ꤭꤯

³⁷ ꤠꤢꤧ꤭ ꤟꤢꤩ ꤟꤢꤨꤣꤧ꤭ ꤗꤢꤩ꤬ꤒꤢꤩ꤭ꤟꤢꤩꤔꤣꤧ꤬ꤗꤢ꤬ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤊꤢꤨ꤭ ꤟꤢꤩꤥ꤬ꤔꤢꤩ꤬ ꤠꤢꤧ꤭ꤚꤤ꤬ꤠꤢꤧ꤭ꤊꤢꤧ꤭ ꤣꤧ꤭ꤔꤣꤧ꤬, ꤢ꤬ ꤙꤢꤩ꤬ ꤜꤣꤓꤢꤧ꤬ꤙꤢ꤭ꤓꤢꤧ꤬ ꤕꤢ꤭꤯ ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ, ‘ꤢꤨ꤭ ꤘꤢꤧꤔꤥ꤭ ꤒ꤫ꤣ꤬ꤊꤣꤧ꤭ ꤠꤢꤧ꤭ ꤘꤣ ꤊꤣꤧ꤬ꤛꤢꤧ꤭ꤗꤢꤨꤗ꤫ꤢꤧ꤬ ꤊꤣꤧ꤬ꤛꤢꤧ꤭ꤚꤤ꤬ꤡ꤫ꤢꤧ꤬ ꤒꤣꤧ꤬ꤟꤢꤩ꤬ ꤢ꤬ꤊꤜꤢꤩ꤭,’ ꤠꤢꤧ꤭ ꤟꤢꤩ ꤞꤤ꤭ ꤣꤧ꤭ꤔꤣꤧ꤬, ꤢ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ ꤜꤣꤓꤢꤧ꤬ꤙꤢ꤭ꤓꤢꤧ꤬ ꤟꤣꤧ꤯”

³⁸ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤟꤢꤩ ꤔꤢꤧ, “ꤙꤢꤧ꤬ꤡꤢꤩ꤬, ꤔꤢꤧ꤬ ꤗꤢꤧꤗꤣꤧ꤭! ꤔꤢꤩ ꤥ꤬ ꤙꤣꤧꤣꤧ꤭ ꤔꤣꤧ꤭ꤙꤢꤩ꤬꤯” “ꤙꤢꤔꤣꤧ꤬ ꤗꤢ꤬ ꤢ꤬ꤔ꤫ꤤ꤬ ꤟꤣꤧ,” ꤢ꤬ ꤟꤢꤩꤏꤢꤦ꤬ ꤟꤢꤨꤔꤣꤧ꤬꤯

ꤛꤢꤩ꤬ꤏꤛꤢꤨ ꤊꤝꤤ꤭ꤡꤢꤪꤙꤢꤩ꤭ ꤘꤣ ꤢꤪꤜꤤꤠꤢ꤬ꤏꤥ꤬ꤋꤢꤨ꤬

³⁹ ꤛꤢꤩ꤬ꤏꤛꤢꤨ ꤥ꤬ ꤘꤣ ꤠꤤ꤭ꤊꤢꤨ꤭ ꤚꤣꤧ꤬ ꤓꤢꤩ꤬ꤡꤝꤢ ꤘꤣ ꤢꤪꤜꤤꤠꤢ꤬ꤏꤥ꤬ꤋꤢꤨ꤬ ꤟꤢꤨ ꤢ꤬ꤜ꤫ꤢꤩ꤬ꤊꤜꤥ꤭ ꤡꤝꤢ ꤚꤣꤧꤘꤢꤦ꤬ ꤔꤣꤧ꤬, ꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤋꤚꤝꤢ꤭ꤡꤝꤢ ꤒ꤫ꤣ꤬ꤊꤣꤧ꤭ ꤔꤢꤧ ꤜꤢꤨ꤭꤯

⁴⁰ ꤙꤣꤧ ꤢ꤬ ꤡꤝꤢꤒ꤫ꤥ꤬ꤟꤣꤧ ꤘꤣ ꤏꤥ꤬ꤋꤢꤨ꤬ ꤢ꤬ꤋꤢꤩ꤭, ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤡꤝꤢꤔꤥ꤭ ꤒ꤫ꤣ꤬ꤊꤣꤧ꤭ ꤒ꤫ꤢꤧ꤬ ꤘꤣ ꤒꤢꤩ꤬ꤢꤩꤜꤢ꤬ꤢꤩꤕꤜꤢꤩ ꤢ꤬ꤊꤢꤨ꤭ ꤒ꤫ꤢꤧ꤬ꤗꤢꤩ꤬ꤔꤣꤧ꤬, ꤊꤝꤤ꤭ꤡꤢꤪꤙꤢꤩ꤭ ꤜꤢ꤭ꤋꤢꤧ꤭ ꤔꤤ꤮꤯”

⁴¹ ꤓꤥ꤭ꤚꤣꤧ꤬ ꤢ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤛꤢ꤬ ꤔꤢꤧ ꤛꤢꤩ꤬ꤞꤤ꤭ ꤙꤢ ꤢꤨ꤭ ꤠꤤ꤭ꤡꤝꤢꤛꤢ꤬ ꤜ꤫ꤢꤪ꤬ ꤒꤣ꤬ꤗꤢꤩ꤭ ꤔꤣꤧ꤬, ꤚꤣꤧ꤬ ꤢ꤬ ꤡꤝꤢꤘꤢꤧꤍꤢꤦ꤬ ꤊꤝꤤ꤭ꤡꤢꤪꤙꤢꤩ꤭ ꤙꤣꤧꤔꤣꤧ꤬꤯

⁴² ꤢ꤬ ꤊꤝꤤ꤭ꤡꤢꤪꤙꤢꤩ꤭ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤊꤣ꤮ ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬, ꤔꤢꤧ꤬ ꤊꤢꤩ꤬ ꤞꤤꤕꤜꤢꤪ꤬ ꤒꤥ꤭ ꤟꤢꤩꤚꤣꤧ꤬, ꤖꤛꤢ ꤒꤣꤧ꤬ꤖꤢ꤭ꤊꤢꤧ꤭ ꤕ꤫ꤢꤩ꤬ ꤠꤢꤧ꤭ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤙꤢꤩ꤭ꤜ꤫ꤢꤪ꤬ ꤣꤧ꤭ꤒꤣ꤬ꤙꤢꤩ꤬, ꤗꤢ꤬ꤔꤢꤧꤚꤣꤧ꤬ ꤡꤢꤨ꤮ ꤘꤢꤦ꤬ ꤠꤢꤧ꤭ ꤞꤤꤕꤜꤢꤪ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤗ꤫ꤢ꤬ꤒꤥ꤬, ꤡꤢꤨ꤮ ꤘꤢꤦ꤬ ꤖꤢꤧ ꤔꤢꤧ꤬ ꤞꤤꤕꤜꤢꤪ꤬ ꤔꤤ꤮꤯”

⁴³ ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣ꤬ꤖꤚꤢꤩ꤬ ꤟꤢꤧ꤭ ꤥ꤬ꤜꤥ꤭ꤓꤢꤧ꤬ ꤚꤣꤧ꤬, ꤢ꤬ ꤟꤢꤧ꤭ ꤘꤣꤧꤟꤢꤧ꤭ꤘꤣꤧꤚꤢꤩ꤬ ꤜꤢꤨ꤭꤯

⁴⁴ ꤢ꤬ ꤞꤤꤕꤜꤢꤪ꤬ꤊ꤫ꤢꤨ꤬ ꤞꤤꤕꤜꤢꤪ꤬ꤊꤢꤧ꤭ ꤟꤢꤧ꤭ꤏꤝꤢ꤬ ꤚꤣꤧ꤬, ꤢ꤬ ꤜꤢꤦ ꤊꤝꤤ꤭ꤡꤢꤪꤙꤢꤩ꤭ ꤏꤝꤢ꤬ꤜꤣ ꤕ꤫ꤥ꤬ꤕ꤫ꤥ꤬꤯ ꤚꤣꤧ꤬ ꤢ꤬ꤊ꤫ꤢꤨ꤬ꤞꤢ꤭ ꤓꤝꤤꤒꤢ꤭ ꤘꤣ ꤟꤢꤩ꤬ꤋꤢꤨ꤬ ꤚꤣꤧ꤬ ꤢ꤬ ꤞꤢꤧ ꤡꤣꤧ ꤔꤢꤧ ꤞꤝꤤ꤬ꤒꤢ꤭ꤗꤢꤩ ꤔꤣꤧ꤬ ꤡꤣꤧ꤯

⁴⁵ ꤢ꤬ ꤊꤝꤤ꤭ꤡꤢꤪꤙꤢꤩ꤭ ꤓꤥ꤭ꤚꤣꤧ꤬ ꤢ꤬ ꤊꤢ꤬ꤋꤛꤢ꤭ꤒꤥ꤭ ꤋꤛꤢ꤭ꤞꤢꤧ ꤘꤣ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤢ꤬ ꤥ꤬꤯ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤞꤤꤕꤜꤢꤪ꤬ꤊ꤫ꤢꤨ꤬ꤊꤢꤧ꤭ ꤒꤣꤧ꤬ꤜꤝꤢꤏꤢꤦꤜꤢꤦ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤏꤛꤢꤨ ꤊꤢ꤬ꤗꤢꤧꤓ꤫ꤣꤧ꤬ ꤔꤢꤧ ꤛꤢꤩ꤬ꤞꤤ꤭ ꤥ꤬ꤗꤣꤧ꤭ꤒꤣꤧ꤬ꤕꤢ꤬ ꤜꤢꤪ꤭ꤕꤜꤤ꤭ ꤡꤣꤧ ꤕꤝꤢ꤭꤮ ꤒꤣ꤬ꤖꤚꤢꤩ꤬꤯

⁴⁶ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤞꤤ꤭ ꤥ꤬ꤗꤣꤧ꤭ꤒꤣꤧ꤬ꤕꤢ꤬ ꤜꤢꤪ꤭ ꤜꤢ꤭ꤋꤢꤧ꤭ ꤟꤢꤨꤒꤢꤩ꤭? ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤡꤝꤢ ꤜꤣꤧ꤬ꤒꤢ꤭ꤔꤥ꤭ ꤒ꤫ꤢꤧ꤬ ꤘꤣ ꤒꤢꤩ꤬ꤢꤩꤜꤢ꤬ꤢꤩꤕꤜꤢꤩ ꤢ꤬ꤊꤢꤨ꤭ ꤒ꤫ꤢꤧ꤬ꤗꤢꤩ꤬ ꤔꤣꤧ꤬ ꤊꤣꤧ꤬ꤓꤢꤪ꤬ꤊꤝꤤ꤭ꤡꤢꤪꤙꤢꤩ꤭ ꤜꤢꤪ꤭ ꤗꤣꤧ꤭ ꤜꤢ꤭ꤋꤢꤧ꤭꤯”

ꤢꤨ꤭ ꤕ꤫ꤢꤦ꤬ ꤛꤢꤩ꤬ꤏꤛꤢꤨ

⁴⁷ ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤙꤢꤩ꤬ ꤕꤢ꤬ꤖꤢꤧ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤒꤣ꤬ꤗꤢꤨ꤬ ꤟꤢꤧ꤭ꤒ꤫ꤥ꤬꤯ ꤋꤢꤨ꤭ꤛꤢꤨꤘꤢ꤬ ꤘꤣ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤏꤣꤧꤞꤤꤔꤣꤧ꤭ ꤢ꤬ꤊꤜꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤞꤢꤨ꤭ꤟꤢꤧ꤭ ꤛꤢꤩ꤬ꤞꤤ꤭ ꤘꤣ ꤛꤢꤩ꤬ꤏꤛꤢꤨ ꤢ꤬ ꤥ꤬, ꤓꤥ꤭ꤚꤣꤧ꤬ ꤢ꤬ ꤟꤢꤧ꤭ꤒꤥ꤭ ꤛꤢꤩ꤬ꤏꤛꤢꤨ ꤚꤣꤧ꤬ ꤢ꤬ ꤟꤢꤧ꤭ꤔꤥ꤬ꤗꤢꤦ ꤜꤢꤨ꤭꤯

⁴⁸ ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤔꤢꤧ, “ꤋꤢꤨ꤭ꤛꤢꤨꤘꤢ꤬꤮ ꤣꤧ꤭ꤗꤢ꤬ ꤔꤢꤧ꤬ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤟꤣꤧ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ ꤣꤧ꤭ꤔꤣꤧ꤬ ꤔꤢꤧ ꤔꤢꤧ꤬ ꤒꤢꤩ꤬ꤔꤥ꤬ꤗꤢꤦ ꤣꤧ꤭ꤔꤣꤧ꤬ ꤟꤣꤧ ꤟꤢꤧ꤭?”

⁴⁹ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ ꤥ꤬ꤊꤣꤧ꤭ ꤔꤢꤧ ꤜꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤤꤑꤢꤩ꤭ꤟꤣꤧ ꤔꤢꤧ ꤢꤨ꤭ ꤊ꤫ꤢꤦ꤬ꤚꤢꤩ꤭ ꤕ꤫ꤢꤦ꤬ ꤟꤣꤧ ꤛꤢꤩ꤬ꤏꤛꤢꤨ ꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤕꤢꤩ꤬ ꤒꤥ꤭ꤙꤢꤩ꤬ ꤕꤢ꤭ꤏꤢꤦ꤬ ꤔꤢꤧ ꤕꤢꤩ꤬ ꤔꤢꤩꤣꤧ꤭ ꤟꤢꤧ꤭?”

⁵⁰ ꤚꤣꤧ꤬ ꤘꤣ ꤛꤢꤩ꤬ꤞꤤ꤭ ꤢ꤬ꤊꤜꤢꤩ꤭ ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤕꤢ꤭ꤒꤢꤦ꤭ꤊꤢꤧ꤭ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤘꤢꤨ꤬ꤜꤣ ꤢ꤬ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤒꤣ꤬ꤖꤚꤢꤩ꤬ ꤢ꤬ꤊꤢꤨꤜꤢꤩ꤬ꤊꤥ꤬ ꤒꤣ꤬ꤋꤥ꤯

⁵¹ ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤥ꤬ꤊꤥ ꤜꤢ꤭ꤋꤢꤧ꤭, ꤗꤢꤩ꤬ꤕꤢ꤬ ꤒ꤫ꤢꤧ꤬ꤗꤢꤩ꤬ ꤟꤣꤧ” ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤙꤢꤧꤡ꤫ꤢꤩ꤬ꤡꤢꤦ꤭ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤊꤢꤨꤜꤢꤩ꤬ꤊꤥ꤬ ꤚꤣꤧ꤬ ꤢ꤬ ꤛ꤫ꤢꤧ꤬ꤚꤤ꤬ ꤋꤛꤢ꤭ꤞꤢꤧ ꤕ꤫ꤢꤩ꤬ ꤜꤢꤨ꤭꤯

⁵² ꤓꤥ꤭ꤚꤣꤧ꤬ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤥ꤬ꤕ꤫ꤢꤪ꤬ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤊꤢꤨ꤬ꤊꤜꤢꤪ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ ꤛꤢꤨꤘꤢ꤬ꤖꤢꤨ ꤗ꤫ꤥ꤬ꤖꤚꤢꤨ꤭ꤗ꤫ꤥ꤬ꤖꤚ꤫ꤢꤩ꤬ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤘꤣ ꤢ꤬ ꤟꤢꤧ꤭ꤕ꤫ꤢꤦ꤬ ꤜꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤞꤤ꤭ ꤟꤢꤧ꤭ꤕ꤫ꤢꤦ꤬ ꤜꤢ꤭ꤋꤢꤧ꤭ ꤠꤢꤧ꤭ ꤒꤣꤧ꤬ꤊꤝꤢ꤬ꤚꤣꤧ꤬ ꤞꤤ꤭ ꤟꤢꤧ꤭ ꤡꤣꤧ ꤔꤢꤧ ꤔꤢꤩ ꤔꤢꤧ ꤤ꤬ꤗꤢꤦ꤭ ꤞꤤ꤭ꤒꤣꤧ꤬ꤟꤢꤩ꤬ ꤡꤣꤧ ꤚꤣꤧ꤬ ꤠꤢꤧ꤭ ꤗꤢ꤬ ꤊꤣꤧ꤬ꤛꤢꤧ꤭ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤘꤣ ꤢ꤬ ꤡꤝꤢꤕ꤫ꤢꤦ꤬ꤖꤢꤩ꤬ꤛꤢꤩꤕꤜꤢꤩꤢꤩ꤬ ꤢꤨ꤭ꤒꤢꤩ꤬ ꤒꤣ꤬ꤖꤚꤢꤩ꤬ ꤔꤢꤧ꤭ ꤟꤢꤧ꤭?

⁵³ ꤠꤢꤧ꤭ ꤥ꤬ꤊꤣꤧ꤭ ꤔꤢꤧ ꤞꤤ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ ꤟꤥ꤭ꤊꤢꤨ꤭ ꤔꤣꤧ꤬ ꤕꤝꤢ꤭꤮ ꤒꤣ꤬ꤔꤣꤧ꤭ ꤡꤣꤧ ꤚꤣꤧ꤬ ꤞꤤ꤭ ꤕ꤫ꤢꤦ꤬ ꤠꤢꤧ꤭ ꤒꤥ꤬ꤒꤥ꤬, ꤗꤢ꤬ꤔꤢꤧꤚꤣꤧ꤬ ꤙꤣꤧ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤕꤣꤒꤢꤩ꤬ ꤢ꤬ꤋꤢꤩ꤭ꤣꤧ꤭, ꤢ꤬ꤏꤣꤧꤋꤢꤩ꤭ ꤙꤢꤩ꤬ꤟꤣꤧ ꤘꤣ ꤞꤤ꤭ ꤙꤢꤩ꤬ ꤗꤢꤩ꤬ꤔꤢꤧ꤭ ꤟꤣꤧ ꤟꤢꤨꤣꤧ꤭ ꤟꤣꤧ꤯”

ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤓꤢꤩꤙꤤꤊꤢꤧ꤭ ꤛꤢꤩ꤬ꤏꤛꤢꤨ

⁵⁴ ꤛꤢꤩ꤬ꤞꤤ꤭ ꤕ꤫ꤢꤦ꤬ ꤛꤢꤩ꤬ꤏꤛꤢꤨ ꤚꤣꤧ꤬ ꤢꤩꤡꤝꤢꤊꤢꤧ꤭ ꤜꤢꤨ꤭ ꤘꤣ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤘꤢꤨ꤬ꤜꤣ ꤒꤣ꤬ꤖꤚꤢꤩ꤬ ꤢ꤬ꤟꤤ꤬ꤊꤢꤨ꤭, ꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤋꤚꤝꤢ꤭ꤡꤝꤢ ꤏꤢꤔꤢꤩꤜꤥ꤭ ꤊꤣꤧ꤭ ꤜꤢꤨ꤭ ꤘꤣꤋꤛꤢ꤭꤯

⁵⁵ ꤘꤣ ꤖꤚꤢꤩ꤬ꤜꤢꤨ꤭ꤒꤢꤧ꤭ꤘꤢꤨ꤬ꤜꤣ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤟꤤ꤬ ꤠꤤ꤭ꤊꤜꤢꤧ꤭ꤗꤢꤩ꤭ꤊꤢꤨ꤭ꤔꤣꤧ꤬, ꤢꤨ꤭ ꤏꤢꤦꤊꤢꤧ꤭ ꤥ꤬ ꤗꤤ꤬ ꤙꤣꤧꤔꤣꤧ꤬ ꤒꤣ꤬ꤖꤢꤩ꤬, ꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤧ꤭ꤥ꤬ꤔꤢꤧ꤭ꤒꤢ꤭ ꤒ꤫ꤣ꤬ꤊꤣꤧ꤭ ꤔꤢꤧ ꤊꤣꤧ꤬ꤛꤢꤧ꤭ ꤥ꤬ꤔꤢꤧ꤭ ꤤ꤬ꤏꤝꤤꤗꤤ꤬ ꤙꤣꤧꤔꤣꤧ꤬ ꤒꤣꤧ꤬ꤟꤢꤩ꤬꤯

⁵⁶ ꤖꤚꤢꤩ꤬ꤗꤢꤩ꤬ꤒꤢꤩ꤬ ꤖꤚꤢꤩ꤬ꤗꤢꤪ꤬ꤟꤢꤨ ꤒꤣ꤬ꤖꤚꤢꤩ꤬ ꤗꤢꤧꤚꤢꤩ꤭ꤒꤢ꤭ꤒꤢ꤭ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤥ꤬ꤔꤢꤧ꤭ꤥ꤬ ꤙꤣꤧ ꤗꤤ꤬ꤖꤢꤩ꤬ꤏꤢ ꤔꤣꤧ꤬ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤣꤧ꤭ꤒꤣ꤬ꤖꤚꤢꤩ꤬ ꤗꤢ꤬ ꤗ꤫ꤢ꤬ꤟꤣꤧ ꤢ꤬ ꤋꤚꤝꤢ꤭ꤊꤣꤧ꤭ ꤛꤢꤩ꤬ꤏꤛꤢꤨ ꤢ꤬ꤋꤛꤢ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤠꤢ꤮!”

⁵⁷ ꤗꤢ꤬ꤔꤢꤧꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤓꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤖꤚꤢꤩ꤬ꤗꤢꤪ꤬! ꤠꤢꤧ꤭ ꤞꤤꤑꤢꤩ꤭ꤔꤢꤪ ꤜꤢꤨ꤭ ꤒꤥ꤬꤯”

⁵⁸ ꤘꤣꤋꤛꤢ꤭ ꤒꤣꤧ꤬ꤕꤜꤣ꤬ꤟꤢꤨꤔꤣꤧ꤬, ꤖꤚꤢꤩ꤬ꤋꤢꤨ꤭ ꤘꤣ ꤢ꤬ꤚꤥ꤬ꤒꤣ꤬ꤖꤚꤢꤩ꤬ ꤗꤢꤧꤓ꤫ꤣꤧ꤬ꤜꤢ꤭ꤒꤢꤩ꤬ ꤢ꤬ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤔꤢꤧ꤬ ꤗꤢ꤬ ꤒꤣ꤬ꤗꤢꤨ꤬ꤡꤢꤦ꤭ ꤖꤢꤧ ꤔꤢꤧ ꤛꤢꤩ꤬ꤞꤤ꤭ ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ ꤠꤢ!” ꤗꤢ꤬ꤔꤢꤧꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤖꤚꤢꤩ꤬ꤋꤢꤨ꤭, ꤠꤢꤧ꤭ ꤗ꤫ꤢ꤬ ꤔꤢꤧꤒꤥ꤬꤯”

⁵⁹ ꤓꤥ꤭ꤚꤣꤧ꤬ ꤘꤣꤋꤛꤢ꤭ ꤢ꤬ꤏꤣꤧꤋꤢꤩ꤭ ꤖꤢꤦ꤬ꤑꤢ꤭ꤟꤣꤧ ꤒꤣ꤬ꤗꤢꤦ꤭ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ꤚꤥ꤬ꤒꤣ꤬ꤖꤚꤢꤩ꤬, ꤟꤢꤩꤏꤢꤪ꤭ꤊꤣꤧ꤬ꤘꤣ ꤡꤣꤧ ꤔꤢꤧ, “ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤗꤢ꤬ ꤢ꤬ ꤥ꤬ꤒ꤫ꤣ꤬ꤊꤣꤧ꤭ ꤔꤢꤧ ꤛꤢꤩ꤬ꤏꤛꤢꤨ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ, ꤠꤢꤧ꤭ ꤟꤢꤩꤣꤧ꤭ ꤢ꤬ꤞꤢꤦ ꤔꤢꤧ ꤒꤣꤧ꤬ꤊꤤ꤬꤮ ꤒꤥ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢ꤬ ꤗꤢ꤬ ꤊꤢꤧꤜꤢ꤬ꤜꤤ꤬ꤖꤢꤨ ꤒꤣ꤬ꤖꤚꤢꤩ꤬ ꤖꤢꤧ꤯”

⁶⁰ ꤗꤢ꤬ꤔꤢꤧꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤖꤚꤢꤩ꤬ꤋꤢꤨ꤭꤮, ꤔꤢꤧ꤬ ꤟꤢꤩꤋꤚꤢꤧ꤮ ꤤ꤬ꤒꤢꤩ꤭ ꤔꤣꤧ꤬, ꤠꤢꤧ꤭ ꤞꤤꤑꤢꤩ꤭ ꤒꤥ꤬!” ꤙꤣꤧ ꤢ꤬ ꤟꤢꤩꤙꤢꤩ꤬ ꤕꤢ꤬ꤖꤢꤧ ꤟꤢꤨꤣꤧ꤭ ꤢ꤬ꤋꤢꤩ꤭ꤔꤣꤧ꤬ꤔꤣꤧ꤬ ꤔꤢꤧ ꤏꤢ꤭ꤖꤢꤩ꤭ ꤤ꤬ꤢꤨ꤬ꤓꤢꤧ꤬꤯

⁶¹ ꤙꤢꤧ꤬ꤡꤢꤩ꤬ ꤒꤣꤧ꤬ꤚꤤ ꤗꤢꤧꤡꤝꤢ ꤒꤥ꤭ꤘꤢꤩ꤭ ꤜꤢꤨ꤭ ꤢ꤬ꤋꤢꤩ꤭, ꤢ꤬ ꤒꤣꤧ꤬ꤔꤢꤩ꤬ꤓꤢꤧ꤬ ꤒ꤫ꤥ꤬ꤙꤢꤩ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤥ꤬ꤔꤢꤩ꤬ꤊꤢꤧ꤭ ꤜꤢꤨ꤭ ꤍ꤫ꤥ꤬ ꤔꤢꤧ, “ꤣꤧ꤭ꤒꤣ꤬ꤞꤢꤩ꤭ ꤕꤢ꤭, ꤙꤣꤧ ꤏꤢ꤭ꤖꤢꤩ꤭ ꤤ꤬ꤢꤨ꤬ꤓꤢꤧ꤬ ꤒꤢꤧ꤬ꤜꤢ꤭ꤟꤤꤒꤥ꤬ ꤔꤣꤧ꤬, ꤔꤢꤧ꤬ ꤓꤢꤩꤙꤤꤊꤢꤧ꤭ꤚꤣꤧ ꤠꤢꤧ꤭ ꤞꤥ꤭ꤖꤥ ꤕꤢ꤭,” ꤢ꤬ ꤟꤢꤩ ꤜꤢꤨ꤭ ꤟꤢꤨꤔꤣꤧ꤬꤯

⁶² ꤟꤢꤨꤔꤣꤧ꤬ꤚꤣꤧ꤬ ꤢ꤬ ꤓꤢꤩ꤬ꤡꤝꤢꤊꤢꤧ꤭ ꤘꤣ ꤢ꤬ꤊꤜꤢꤪ꤭ ꤚꤣꤧ꤬ ꤢ꤬ ꤡꤝꤢ ꤍ꤫ꤥ꤬ꤞꤣꤧ꤭ꤍ꤫ꤥ꤬ꤥ꤬ ꤡꤣꤧ꤯

ꤢꤨ꤭ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤛꤢꤩ꤬ꤏꤛꤢꤨ ꤚꤣꤧ꤬ ꤢꤨ꤭ꤗꤢꤦ꤭ꤢꤨ꤭ꤕꤢꤪ꤭ ꤜꤢꤨ꤭

⁶³ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤕ꤫ꤢꤪ꤬ꤗꤢꤧ ꤛꤢꤩ꤬ꤏꤛꤢꤨ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤟꤢꤩꤛꤢꤪꤟꤢꤩꤜꤢꤩ꤭ ꤜꤢꤨ꤭ ꤚꤣꤧ꤬ ꤢ꤬ꤗꤢꤦ꤭ꤢ꤬ꤕꤢꤪ꤬ ꤜꤢꤪ꤭ ꤜꤢꤨ꤭꤯

⁶⁴ ꤛꤢꤩ꤬ꤞꤤ꤭ ꤡꤢꤪ꤭ꤙꤤ ꤛꤢꤩ꤬ꤏꤛꤢꤨ ꤕꤣꤧꤞꤢꤩ꤬ ꤚꤣꤧ꤬ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤗꤢ꤬ꤢꤨ꤭ꤕꤢꤩ꤭ ꤗꤢꤦ꤭ ꤔꤢꤧ꤬ ꤕꤢꤩ꤭? ꤖꤚꤥ꤬ ꤗꤢꤧꤗꤢꤧ!”

⁶⁵ ꤓꤥ꤭ꤚꤣꤧ꤬ ꤛꤢꤩ꤬ꤞꤤ꤭ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤟꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤜꤢꤨ꤭ ꤔꤢꤧ ꤍ꤫ꤥ꤬ ꤘꤣ ꤢ꤬ꤚꤥ꤬ꤒꤣꤧ꤬ꤟꤢꤩ꤬ ꤔꤣꤧ꤬ ꤢ꤬ ꤥ꤬ ꤢꤩꤜꤥ꤬ꤕꤢ꤬꤯

ꤢꤨ꤭ ꤢꤩꤡꤝꤢ ꤛꤢꤩ꤬ꤏꤛꤢꤨ ꤘꤣ ꤛꤢꤨꤘꤢ꤬ꤖꤢꤨ ꤓꤝꤢ꤭ꤘꤢꤨ꤬ ꤒꤣꤧ꤬ꤟꤢꤩ꤬ ꤢ꤬ ꤜ꤫ꤢꤩ꤬ꤥ꤬ꤕꤜꤢꤪ ꤕꤣꤧꤞꤢꤩ꤬ꤑꤢꤩ꤭

⁶⁶ ꤙꤣꤧ ꤗ꤫ꤢꤪ꤬ꤜꤤ꤭ꤙꤢꤨ꤭ꤟꤣꤧ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤓꤝꤢ꤭ ꤛꤢꤨꤘꤢ꤬ꤖꤢꤨ ꤢ꤬ꤕꤜꤢꤪꤢ꤬ꤗꤢꤨ꤬ ꤢ꤬ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬, ꤔꤢꤧ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭, ꤔꤢꤧ ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤒꤣꤧ꤬ꤟꤢꤩ꤬ ꤟꤢꤧ꤭ ꤥ꤬ꤕꤜꤢꤪꤜꤢꤪ꤭ ꤜꤢꤨ꤭ ꤒꤣ꤬ꤖꤥ꤬ꤒꤥ꤬, ꤚꤣꤧ꤬ ꤛꤢꤩ꤬ꤞꤤ꤭ ꤢꤩꤟꤢꤧ꤭ ꤛꤢꤩ꤬ꤏꤛꤢꤨ ꤘꤣ ꤊꤣꤧ꤬ꤛꤢꤧ꤭ ꤓꤝꤢ꤭ꤘꤢꤨ꤬ ꤒꤣꤧ꤬ꤟꤢꤩ꤬ ꤢ꤬ꤕꤣꤧꤞꤢꤩ꤬ꤑꤢꤩ꤭꤯

⁶⁷ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤔꤢꤧ, “ꤟꤢꤩꤏꤥ꤬ ꤕ꤫ꤢꤩ꤬ꤗꤢꤧ ꤕꤢꤩ꤬, ꤔꤢꤧ꤬ ꤗꤢ꤬ ꤋꤚꤤ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤢ꤬ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧꤟꤢꤧ꤭?” ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤊꤢꤩ꤬ ꤟꤢꤩ ꤕ꤫ꤢꤩ꤬ ꤞꤤ꤭꤮ ꤗꤢ꤬ ꤞꤤ꤭ ꤛ꤫ꤢꤦ꤬ꤢꤩ꤬ ꤔꤢꤧ꤭ ꤔꤢꤧ ꤠꤢꤧ꤭ ꤒꤥ꤬ꤒꤥ꤬꤯

⁶⁸ ꤠꤢꤧ꤭ ꤊꤢꤩ꤬ ꤘꤣꤧꤟꤣꤧ꤭ ꤞꤤ꤭꤮ ꤗꤢ꤬ ꤞꤤ꤭ ꤟꤢꤩꤏꤢꤦ꤬ ꤔꤢꤧ ꤠꤢꤧ꤭ ꤒꤥ꤬ꤒꤥ꤬꤯

⁶⁹ ꤗꤢ꤬ꤔꤢꤧꤚꤣꤧ꤬ ꤡꤢꤓꤢꤧ꤬ ꤊꤢꤨꤔ꤫ꤢꤧ꤬ꤣꤧ꤭ ꤒꤢ꤭ꤟꤢꤧ꤭ꤑꤢꤩ꤭ ꤕꤢ꤭ꤔꤣꤧ꤬, ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤢꤨ꤭ ꤊ꤫ꤢꤦ꤬ ꤘꤣꤧꤥ꤬ꤔꤢꤧ꤭ꤥ꤬ ꤢ꤬ ꤘꤣ ꤒꤢꤩ꤬ꤒꤣꤧ꤬ꤚꤣꤧ꤭ꤘꤢꤨ꤬ ꤒꤣꤧ꤬ꤚꤣꤧ꤭ꤓꤢꤨ꤭ ꤢ꤬ ꤡꤢꤪꤗꤣꤧ꤬ꤚꤢꤧ꤬ ꤊꤢꤨꤋꤢꤨ꤬ ꤡꤢꤓꤝꤢ ꤔꤣꤧ꤬ꤒꤣ꤬ꤊꤛꤢ꤭ ꤕꤢ꤭꤯”

⁷⁰ ꤛꤢꤩ꤬ꤞꤤ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤟꤢꤩ ꤔꤢꤧ, “ꤊꤢꤩ꤬ ꤟꤢꤩꤟꤢꤨꤔꤣꤧ꤬ ꤚꤣꤧ꤬ ꤔꤢꤧ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬ ꤟꤣꤧ ꤔꤣꤧ꤭?” ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤢꤪ꤬, ꤢ꤬ ꤗ꤫ꤢ꤬ꤔꤤꤔꤢꤧ꤬ ꤟꤢꤨ ꤞꤤ꤭ ꤟꤢꤩ ꤔꤣꤧ꤬ ꤟꤣꤧ꤯”

⁷¹ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤜꤢ꤭ꤋꤢꤧ꤭ ꤔꤢꤧ, “ꤕꤢꤩ꤬ ꤡꤝꤢ ꤜ꤫ꤥ꤬ ꤕꤢ꤬ ꤖꤚꤢꤩ꤬ꤋꤢꤧꤟꤢꤩꤏꤥ꤬ꤜꤥ꤭ꤒꤢꤩ꤬ ꤟꤢꤨꤒꤢꤩ꤭? ꤢ꤬ ꤟꤢꤩ ꤕ꤫ꤢꤩ꤬ ꤕꤢꤩ꤬ ꤣꤧ꤭ꤔꤣꤧ꤬, ꤕꤢꤩ꤬ ꤔ꤫ꤤ꤬ꤟꤥ꤭ ꤜꤢꤪ꤭ꤘꤢꤦ꤬ꤟꤣꤧ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤟꤣꤧ꤯”