ꤟꤤꤙꤚꤢꤨ 3 - Eastern Kayah Shadaw Dialect

ꤛꤢꤩ꤬ꤏꤛꤢꤨ ꤓꤝꤢ꤭ ꤕꤢꤩ꤬ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪ

¹ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤕ꤫ꤥ꤬ꤠ꤫ꤢꤧ꤬ ꤋꤚꤤꤖꤢꤨ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢꤩ ꤞꤤ꤭ ꤣꤧ꤭ꤒꤣꤧ꤬ꤟꤢꤩ꤬ ꤒꤣꤧ꤬ꤔꤢꤩ꤬ ꤗꤢꤧꤗꤣꤧ꤭ ꤜꤢ꤭ꤋꤢꤧ꤭ ꤛꤢꤩ꤬ꤏꤛꤢꤨ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤢꤪ꤭ꤟꤢꤧ꤭ ꤓꤝꤢ꤭ ꤜꤢꤨ꤭ ꤔꤢꤧ ꤖꤚꤢꤩ꤬ꤟꤢꤩꤏꤥ꤬ꤘꤥ꤬ꤔꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤜꤢ꤭ꤢ꤬ꤍ꤫ꤥ꤬ ꤔꤢꤧ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤘꤢꤨ꤬ꤜꤣ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬꤯

² ꤟꤢꤨ ꤋꤢꤨ꤭ꤗꤢꤪꤎꤢꤧ ꤡꤢꤪ ꤔꤢꤧ ꤢ꤬ꤒꤢꤩ꤬ꤗꤢꤩ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤟꤤ꤬ꤖꤢꤨꤖꤢꤧ꤭ꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ꤔꤣꤧ꤬, ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤣꤧ꤭, ꤢ꤬ꤡꤢꤪ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤢ꤬ ꤘꤢꤧ꤬ꤓꤢꤧ꤬ ꤜꤢꤨ꤭ ꤚꤣꤧ꤬ ꤢ꤬ ꤔꤢꤪ꤭ꤗꤢꤩ꤬ ꤜꤢꤨ꤭ ꤔꤢꤧ ꤢ꤬ꤒꤢꤩ꤬ꤗꤢꤩ꤬ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬꤯

³ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤤ꤬ꤏꤢꤪ ꤟꤤ꤬ ꤣꤧ꤭ꤒꤣ꤬ꤗꤢꤩ꤭ ꤒꤣ꤬ꤖꤚꤢꤩ꤬ꤔꤣꤧ꤬, ꤢꤨ꤭ ꤘꤢꤧ꤬ꤘꤢꤨ꤬ꤘꤢꤧ꤬ꤓꤢꤨ꤭ꤜꤣ ꤢ꤬ ꤔꤢꤧ ꤟꤤ꤬ꤣꤧ꤭ ꤒꤣ꤬ꤗꤢꤩ꤭꤯ ꤟꤢꤨꤔꤣꤧ꤬ꤟꤣꤧ ꤛꤢꤩ꤬ꤏꤛꤢꤨ ꤔꤣꤧ꤬ ꤢꤨ꤭ ꤒꤥ꤭ ꤘꤢꤧ꤬ꤘꤢꤨ꤬ꤘꤢꤧ꤬ꤓꤢꤨ꤭ꤜꤣ ꤢ꤬ ꤔꤢꤧ ꤋꤢꤨ꤭ꤗꤢꤪꤎꤢꤧ꤯

⁴ ꤟꤤ꤬ ꤕꤝꤢ꤭꤮ ꤒꤣ꤬ꤗꤢꤩ꤭ ꤔꤣꤧ꤬ ꤢꤨ꤭ ꤖꤚꤢꤩ꤬ꤤ꤬ꤏꤢꤪꤓꤢꤧ꤬ ꤢ꤬ ꤢ꤬ꤥ꤬ꤔꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤔꤣꤧ꤬ ꤢ꤬ꤗ꤫ꤢ꤬ꤠꤢ꤯ ꤗꤢ꤬ꤔꤢꤧꤚꤣꤧ꤬ ꤖꤚꤢꤩ꤬ ꤘꤣ ꤢ꤬ ꤤ꤬ꤏꤢꤪꤓꤢꤧ꤬ ꤒꤢꤩ꤬ꤕꤝꤢ꤭꤮ ꤒꤣ꤬ꤡꤣ꤬ ꤔꤣꤧ꤬ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤖꤢꤧ꤯

⁵ ꤋꤢꤨ꤭ꤗꤢꤪꤎꤢꤧ ꤣꤧ꤭ꤔꤣꤧ꤬ ꤢ꤬ꤡꤢꤪ ꤔꤢꤧ ꤢ꤬ꤒꤢꤩ꤬ꤗꤢꤩ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤟꤤ꤬ꤖꤢꤨꤖꤢꤧ꤭ꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤟꤢꤨ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤒꤣ꤬ꤖꤚꤢꤩ꤬ ꤔꤣꤧ꤬ꤟꤣꤧ꤯ ꤚꤣꤧ꤬ ꤢ꤬ꤒꤢꤩ꤬ꤗꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤘꤣꤧꤜꤥ꤭ ꤙꤢꤧꤙꤢꤦ꤭ ꤥ꤬ꤔꤢꤩ꤬ ꤚ꤫ꤣꤧ꤬ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤒꤣꤧ꤬ꤟꤢꤩ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤘꤣꤧꤜꤥ꤭ ꤢꤨ꤭ ꤏꤢ꤮ ꤔꤥ꤬ꤕꤢ꤭ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤕꤢ꤭꤯

⁶ ꤗꤢ꤬ꤔꤢꤧꤚꤣꤧ꤬, ꤋꤚꤤ ꤣꤧ꤭ꤔꤣꤧ꤬ꤗꤢ꤬ ꤢ꤬ꤞꤢꤧꤔꤢꤧ ꤋꤢꤨ꤭ꤗꤢꤪꤎꤢꤧ ꤘꤣ ꤢ꤬ ꤓꤝꤢ꤭ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤟꤤ꤬ꤊꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤗ꤫ꤢ꤬ꤒꤥ꤬꤯ ꤢ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬꤯ ꤢ꤬ ꤗꤢ꤬ ꤢ꤬ꤡꤢꤪ ꤔꤢꤧ ꤢ꤬ꤒꤢꤩ꤬ꤗꤢꤩ꤬ ꤚꤣꤧ꤬ ꤢ꤬ ꤗꤢꤧꤡꤢꤧ꤬ꤚꤣꤧ ꤢ꤬ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤟꤤ꤬ꤖꤢꤨꤖꤢꤧ꤭ꤖꤢꤨ ꤒꤣꤧ꤬ꤟꤢꤩ꤬꤯ ꤕꤢꤩ꤬ ꤊꤢꤩ꤬ ꤋꤚꤝꤢ꤭ ꤋꤢꤦ꤭ꤋꤢꤦ꤭ꤟꤢ꤭ꤟꤢ꤭ ꤟꤢꤧ꤭ꤑꤢꤩ꤭ꤜꤢ꤭ ꤋꤚꤤ ꤒ꤫ꤥ꤬ꤘꤣ ꤢ꤬ꤒꤣꤧ꤬ꤘꤢꤦ꤬ ꤓꤥ꤭ꤒꤥ꤬ ꤒꤢꤩ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤘꤣꤧ ꤕꤢꤩ꤬ ꤣꤧ꤭ꤔꤣꤧ꤬, ꤕꤢꤩ꤬ ꤊꤢꤩ꤬ ꤗꤢꤧꤏꤢꤦ꤭ ꤟꤢꤧ꤭ꤑꤢꤩ꤭ꤜꤢ꤭ ꤒ꤫ꤥ꤬ꤘꤣ ꤢ꤬ꤒꤣꤧ꤬ꤘꤢꤦ꤬ ꤟꤢꤩꤔꤣꤧ꤬ꤗꤢ꤬, ꤕꤢꤩ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤟꤤ꤬ꤖꤢꤨꤖꤢꤧ꤭ꤖꤢꤨ ꤟꤣꤧ꤯

ꤒꤢꤩ꤬ꤥ꤬ꤊꤥ ꤒꤣꤧ꤬ꤙꤢꤩꤞꤤꤖꤚꤢ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭

⁷ ꤟꤢꤨꤔꤣꤧ꤬ꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤟꤢꤩ ꤔꤢꤧ, “ꤣꤧ꤭ꤒꤣ꤬ꤔꤣꤧ꤭, ꤞꤤ꤭ ꤊꤢꤩ꤬ ꤔ꤫ꤤ꤬ꤟꤥ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤍ꤫ꤥ꤬ꤖꤚꤢ꤬ꤓꤢꤧ꤬ ꤟꤢꤩꤚꤣꤧ꤬,

⁸ ꤊꤢꤨ꤬ꤊꤜꤢꤪꤖꤚꤣꤧ꤭ ꤜꤢ꤭ꤋꤢꤧ꤭ ꤒ꤫ꤢꤧ꤬ ꤟꤢꤨ ꤞꤤ꤭ꤖꤣꤧ꤭ꤞꤤ꤭ꤖꤥ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤙꤣꤧ ꤞꤤ꤭ꤖꤣꤧ꤭ꤞꤤ꤭ꤖꤥ꤭ ꤒꤣꤧ꤬ꤟꤢꤩ꤬ ꤥ꤬ ꤘꤣ ꤊ꤫ꤢꤩ꤬ꤏꤢꤩ꤭ꤓꤣꤧ꤭ꤊꤢꤧ꤬ ꤜ꤫ꤢꤪ꤬ꤒꤣꤧ꤬ꤗꤢꤋꤢꤨ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤓꤢꤩꤏꤢꤦ꤬ ꤡꤢꤪꤗꤣꤧ꤬ꤚꤢꤧ꤬ ꤚꤣꤧ꤬ ꤢ꤬ ꤔ꤫ꤤ꤬ꤘꤢ꤭ ꤜꤢ꤭ꤋꤢꤧ꤭ ꤜꤢꤨ꤭ꤍ꤫ꤥ꤬ ꤒꤥ꤬꤯ ꤢ꤬ ꤗꤢꤩ꤬ꤗꤢꤧ ꤜꤢ꤭ꤋꤢꤧ꤭ ꤡꤢꤪꤗꤣꤧ꤬ꤚꤢꤧ꤬꤯

⁹ ꤔꤢ꤬ ꤜꤝꤤ꤭ꤏꤣꤧ꤭ ꤢ꤬ꤊꤢꤨ꤭, ꤠꤢꤧ꤭ ꤗꤢꤩ꤬ ꤕ꤫ꤢꤩ꤬ ꤋꤚꤢꤧ꤮ ꤛꤢꤩ꤬ꤞꤤ꤭ ꤤ꤬ꤒꤢꤩ꤭ ꤔꤣꤧ꤬, ꤛꤢꤩ꤬ꤞꤤ꤭ ꤗꤢꤧꤓ꤫ꤣꤧ꤬ ꤓꤥ꤭ꤟꤣꤧ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤗꤢꤧꤕꤢꤨ꤭ ꤗꤢꤩ꤬ꤗꤢꤧ ꤜꤢ꤭ꤋꤢꤧ꤭ ꤕꤢ꤬ ꤠꤢꤧ꤭ ꤖꤢꤧ꤯

¹⁰ ꤟꤢꤨꤔꤣꤧ꤬ꤚꤣꤧ꤬ ꤠꤢꤧ꤭ ꤞꤤꤕꤜꤢꤪ꤬ꤘꤢꤨ꤬ ꤛꤢꤩ꤬ꤞꤤ꤭ ꤚꤣꤧ꤬ ꤠꤢꤧ꤭ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, ‘ꤛꤢꤩ꤬ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ꤞꤤꤕꤜꤢꤪ꤬ ꤡꤢꤪ ꤊꤣꤧ꤭ ꤜꤢ꤭ꤋꤢꤧ꤭ ꤔꤢꤧ ꤠꤢꤧ꤭ ꤒꤥ꤬ ꤒꤣꤧ꤬ꤟꤢꤩ꤬꤯ ꤛꤢꤩ꤬ꤞꤤ꤭ ꤞꤤꤑꤢꤩ꤭ꤕꤜꤥ꤭ ꤜꤢ꤭ꤋꤢꤧ꤭ ꤒꤢꤩ꤬ ꤘꤣ ꤠꤢꤧ꤭ ꤔꤢꤪ꤭ꤗꤢꤩ꤬ ꤛꤢꤩ꤬ꤞꤤ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒꤥ꤬,’ ꤠꤢꤧ꤭ ꤟꤢꤩ ꤛꤢꤩ꤬ꤞꤤ꤭ ꤟꤢꤨꤔꤣꤧ꤬꤯

¹¹ ꤟꤢꤨꤔꤣꤧ꤬ꤚꤣꤧ꤬ ꤠꤢꤧ꤭ ꤞꤤꤕꤜꤢꤪ꤬ꤘꤢꤨ꤬ ꤛꤢꤩ꤬ꤞꤤ꤭ ꤚꤣꤧ꤬ ꤠꤢꤧ꤭ ꤟꤢꤩꤒꤢ꤭ꤊꤢꤧ꤭ ꤛꤢꤩ꤬ꤞꤤ꤭ ꤍ꤫ꤥ꤬ ꤒꤣ꤬ꤗꤢꤦ꤭ ꤔꤢꤧ, ‘ꤓꤣꤧ꤭ꤊ꤫ꤢꤩ꤬ ꤘꤣ ꤠꤢꤧ꤭ ꤢꤪꤜꤢꤧ꤬ ꤔꤢꤧ ꤠꤢꤧ꤭ ꤊ꤫ꤢꤦ꤬ ꤘꤣꤧꤕ꤫ꤢꤩ꤬ ꤔꤢꤧ ꤛꤢꤩ꤬ꤞꤤ꤭ ꤜ꤫ꤢꤩ꤬ꤥ꤬ꤊꤥ ꤒꤣꤧ꤬ꤙꤢꤩꤞꤤꤖꤚꤢ ꤣꤧ꤭ꤔꤣꤧ꤬ꤒꤣ꤬ꤖꤥ꤬ ꤔꤣꤧ꤬, ꤛꤢꤩ꤬ꤞꤤ꤭ ꤔꤥ꤭ꤔꤢꤪ ꤕꤢ꤬ꤒꤥ꤬ ꤟꤣꤧ,’ ꤠꤢꤧ꤭ ꤤ꤬ꤏꤢꤪ꤭ ꤒꤢ꤭ꤊꤢꤧ꤭ ꤛꤢꤩ꤬ꤞꤤ꤭ ꤟꤢꤨꤔꤣꤧ꤬꤯”

¹² ꤠꤢꤧ꤭ ꤕ꤫ꤥ꤬ꤠ꤫ꤢꤧ꤬ ꤞꤤ꤭꤮, ꤚꤢꤪ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮꤯ ꤘꤢꤧ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ ꤞꤤ꤭ ꤞꤤꤕꤜꤢꤪ꤬ ꤒ꤫ꤢꤧ꤬ꤗꤢꤩ꤬, ꤞꤤ꤭ ꤘꤢꤧ꤬ ꤞꤤ꤭ ꤞꤤꤕꤜꤢꤪ꤬ ꤔꤢꤧ ꤞꤤ꤭ ꤛ꤫ꤢꤦ꤬ꤢꤩ꤬ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤢ꤬ ꤞꤣꤧ꤭ꤖꤚꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤒꤥ꤬, ꤞꤤ꤭ ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤘꤢꤦ꤬ ꤞꤤ꤭ꤑꤢꤩ꤭ ꤟꤢꤨꤔꤣꤧ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤗꤢꤩ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬ ꤔꤤ꤮꤯

¹³ ꤗ꤫ꤢ꤬ꤟꤢꤩꤗꤢ꤬, ꤊꤢꤨꤔ꤫ꤢꤧ꤬ꤣꤧ꤭ ꤒꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤘꤣꤧ ꤕꤢꤩ꤬ ꤣꤧ꤭ ꤞꤢꤧꤟꤢꤨ ꤒꤢꤩ꤬ꤞꤢꤦ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤒ꤫ꤢꤧ꤬ ꤞꤤ꤭ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬, ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤊꤢꤨ꤬ꤊꤜꤢꤪꤖꤚꤣꤧ꤭ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬ ꤢ꤬ꤑꤢꤩ꤭ꤔꤣꤧ꤬, ꤕꤝꤢ꤭ꤔꤣꤧ꤭ꤔꤣꤧ꤭ ꤘꤣꤧꤟꤢꤧ꤭ꤘꤣꤧꤚꤢꤩ꤬ ꤗꤢꤩ꤬ꤡꤝ꤫ꤢ꤬ꤋꤛꤢ꤭ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤔꤤ꤮꤯

¹⁴ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤕꤢꤩ꤬ ꤒꤢꤩ꤬ꤛ꤫ꤢꤦ꤬ꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤘꤣ ꤊꤣꤧ꤬ꤜꤢꤨꤋꤢꤩ꤭ ꤔꤣꤧ꤬, ꤕꤢꤩ꤬ ꤊꤢꤩ꤬ ꤕ꤫ꤢꤦ꤬ꤗꤢ꤬ꤚꤢꤧꤚꤣꤧ ꤢ꤬ ꤒ꤫ꤥ꤬ꤘꤣ ꤢ꤬ꤒꤣꤧ꤬ꤘꤢꤦ꤬ ꤟꤢꤩꤚꤣꤧ꤬, ꤕꤢꤩ꤬ ꤓꤝꤢ꤭ꤟꤣꤧ ꤖꤚꤢꤩ꤬ꤗꤢꤩ꤬ꤒ꤫ꤣ꤬ꤒꤢꤩ꤬ ꤔꤢꤧ ꤋꤚꤤ ꤟꤣꤧ꤯

¹⁵ ꤒꤢꤦꤚꤣꤧ꤬ ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ, “ꤞꤤ꤭ ꤊꤢꤩ꤬ ꤔ꤫ꤤ꤬ꤟꤥ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤍ꤫ꤥ꤬ꤖꤚꤢ꤬ꤓꤢꤧ꤬ ꤣꤧ꤭ꤒꤣ꤬ꤔꤣꤧ꤭ ꤟꤢꤩꤔꤣꤧ꤬ ꤊꤢꤨ꤬ꤊꤜꤢꤪꤖꤚꤣꤧ꤭ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤟꤢꤨ ꤞꤤ꤭ꤖꤣꤧ꤭ꤞꤤ꤭ꤖꤥ꤭ ꤊꤢꤨ꤬ꤊꤜꤢꤪꤖꤚꤣꤧ꤭ ꤚꤣꤧ꤬ ꤓꤢꤩꤏꤢꤦ꤬ ꤡꤢꤪꤗꤣꤧ꤬ꤚꤢꤧ꤬ ꤚꤣꤧ꤬ ꤔ꤫ꤤ꤬ꤘꤢ꤭ ꤜꤢꤨ꤭ꤍ꤫ꤥ꤬ ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢꤩ꤬ꤔꤣꤧ꤬ ꤒ꤫ꤢꤧ꤬ꤗꤢꤩ꤬ ꤔꤤ꤮,” ꤢ꤬ ꤟꤢꤩ ꤟꤢꤨꤔꤣꤧ꤬꤯

¹⁶ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤟꤥ꤭ ꤓꤥ꤭ꤟꤣꤧ ꤜꤢ꤭ꤋꤢꤧ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤍ꤫ꤥ꤬ꤖꤚꤢ꤬ꤓꤢꤧ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤓꤢꤩꤏꤢꤦ꤬ ꤡꤢꤪꤗꤣꤧ꤬ꤚꤢꤧ꤬, ꤢ꤬ ꤔ꤫ꤤ꤬ꤘꤢ꤭ ꤜꤢꤨ꤭ꤍ꤫ꤥ꤬ ꤒꤥ꤬ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢꤨ꤭ꤕꤢꤩ꤭? ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤗ꤫ꤢ꤬ꤟꤣꤧ ꤋꤢꤨ꤭ꤗꤢꤪꤎꤢꤧ ꤢꤩꤓꤢꤩ꤬ꤊꤢ꤬ ꤛꤢꤩ꤬ꤞꤤ꤭ ꤘꤣ ꤤ꤬ꤡꤛꤤꤊ꤫ꤢꤩ꤬ꤊꤢꤨ꤭ ꤔꤣꤧ꤬ ꤒꤣꤧ꤬ꤟꤢꤩ꤬ꤟꤣꤧ꤯

¹⁷ ꤡꤢꤪꤗꤣꤧ꤬ꤚꤢꤧ꤬ ꤞꤤꤕꤜꤢꤪ꤬ꤘꤢꤨ꤬ ꤡꤣꤧ ꤛꤢꤩ꤬ꤞꤤ꤭ ꤢ꤬ꤔꤢ꤬ꤜꤝꤤ꤭ꤏꤣꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤢꤨ꤭ꤕꤢꤩ꤭? ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤞꤢꤦ ꤡꤢꤪꤗꤣꤧ꤬ꤚꤢꤧ꤬ ꤚꤣꤧ꤬ ꤢ꤬ ꤔꤢꤪ꤭ꤞꤣꤧ꤭ꤊꤢꤧ꤭ ꤛꤢꤩ꤬ꤞꤤ꤭ ꤘꤣ ꤊ꤫ꤢꤩ꤬ꤏꤢꤩ꤭ꤓꤣꤧ꤭ꤊꤢꤧ꤬ ꤜ꤫ꤢꤪ꤬ꤒꤣꤧ꤬ꤗꤢꤋꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤗ꤫ꤢ꤬ꤒꤥ꤬ ꤟꤢꤧ꤭?

¹⁸ ꤙꤣꤧ ꤡꤢꤪꤗꤣꤧ꤬ꤚꤢꤧ꤬ ꤟꤢꤩꤒꤢ꤭ꤊꤢꤧ꤭ ꤛꤢꤩ꤬ꤞꤤ꤭ ꤔꤢꤧ, ꤓꤣꤧ꤭ꤊ꤫ꤢꤩ꤬ ꤘꤣ ꤠꤢꤧ꤭ ꤘꤣꤧ ꤛꤢꤩ꤬ꤞꤤ꤭ ꤔꤢꤧ ꤢ꤬ ꤜ꤫ꤢꤩ꤬ꤥ꤬ꤊꤥ ꤒꤣꤧ꤬ꤙꤢꤩꤞꤤꤖꤚꤢ ꤢ꤬ꤑꤢꤩ꤭ ꤔꤣꤧ꤬ꤒꤣ꤬ꤖꤥ꤬ ꤗꤢ꤬ ꤢ꤬ ꤔꤥ꤭ ꤔ꤫ꤤ꤬ꤔꤢꤪ ꤕꤢ꤬ꤒꤥ꤬ ꤢ꤬ ꤟꤢꤩ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤢꤨ꤭ꤕꤢꤩ꤭? ꤢ꤬ ꤟꤢꤩꤒꤢ꤭ꤊꤢꤧ꤭ ꤍ꤫ꤥ꤬ꤣꤧ꤭ ꤔꤣꤧ꤬ꤗꤢ꤬, ꤢ꤬ ꤟꤢꤩꤟꤣꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤘꤢ꤭ ꤜꤢꤨ꤭ꤍ꤫ꤥ꤬ ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤣꤧ꤯

¹⁹ ꤟꤢꤨꤔꤣꤧ꤬ꤚꤣꤧ꤬ ꤘꤣ ꤛꤢꤩ꤬ꤞꤤ꤭ ꤛ꤫ꤢꤦ꤬ꤢꤩ꤬ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤞꤤ꤭ ꤔꤥ꤭ꤔ꤫ꤤ꤬ ꤕꤢ꤬ ꤊ꤫ꤢꤩ꤬ ꤔꤣꤧ꤬ꤒꤣ꤬ꤙꤢ꤬ ꤒꤥ꤬ ꤔꤣꤧ꤬ꤗꤢ꤬ ꤕꤢꤩ꤬ ꤞꤤꤑꤢꤩ꤭ꤕꤜꤥ꤭ ꤜꤢꤪ꤭ ꤘꤢꤦ꤬ꤟꤣꤧ꤯