เพรโด่แนพู๊ เต๊เห่ 9 - Eastern Kayah Shadaw Dialectꤋꤢꤨ꤭ꤎꤢꤪꤜꤢꤨ ꤓꤝꤢ꤭ꤓꤢꤧ꤬ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣ꤬ꤖꤚꤢꤩ꤬ 1 ꤙꤣꤧꤔꤣꤧ꤬ꤢ꤬ꤋꤢꤩ꤭ ꤋꤢꤨ꤭ꤎꤢꤪꤜꤢꤨ ꤟꤢꤩ ꤞꤤꤤ꤬ꤏꤢꤩ꤭ ꤙꤢꤧ꤬ꤡꤢꤩ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ ꤛꤢꤩ꤬ꤞꤤ꤭꤯ ꤢ꤬ ꤡꤝꤢ ꤘꤣ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤘꤢꤨ꤬ꤜꤣ ꤒꤣ꤬ꤖꤚꤢꤩ꤬ ꤢ꤬ ꤥ꤬꤯ 2 ꤚꤣꤧ꤬ ꤢ꤬ ꤡꤝꤢꤊꤝꤤ꤭ꤞꤤꤛꤢꤪ꤬ ꤜꤢꤨ꤭ ꤔꤢꤧ ꤢ꤬ ꤊ꤫ꤢꤦ꤬ ꤚꤢ꤭ꤡꤝꤢꤔ꤫ꤤ꤬ ꤜꤤ꤬ꤋꤢꤧꤟꤢꤩꤏꤥ꤬ꤜꤥ꤭ꤒꤢꤩ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤊ꤫ꤢꤦ꤬ ꤚꤢ꤭ꤡꤝꤢ ꤕ꤫ꤢꤩ꤬ ꤛꤢꤨꤘꤢ꤬ ꤒꤢꤩ꤬ꤡꤢꤪꤙꤢꤩ꤭ꤟꤥ꤭ ꤘꤣ ꤢ꤬ ꤥ꤬ ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤥ꤬꤯ ꤜꤤ꤬ꤋꤢꤧꤟꤢꤩꤏꤥ꤬ꤜꤥ꤭ꤒꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤟꤢꤩ ꤡꤝꤢ ꤛꤢꤩ꤬ꤞꤤ꤭ ꤔꤢꤧ ꤖꤚꤢꤩ꤬ꤗꤢꤪ꤬ ꤙꤢꤩ꤬ꤙꤢꤩ꤬, ꤖꤚꤢꤩ꤬ꤋꤢꤨ꤭ ꤙꤢꤩ꤬ꤙꤢꤩ꤬, ꤢꤨ꤭ꤕꤢꤩ꤭ꤕꤢꤩ꤭꤮ ꤙꤢꤩ꤬ꤙꤢꤩ꤬, ꤘꤢ꤭ ꤋꤢꤨ꤭ꤎꤢꤪꤜꤢꤨ ꤗꤢꤧꤓ꤫ꤣꤧ꤬ ꤔꤢꤧ ꤛꤢꤩ꤬ꤞꤤ꤭ ꤋꤚꤝꤢ꤭ꤗꤢꤩ꤬ꤊꤣꤧ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ꤊꤜꤢꤧ ꤒꤣꤧ꤬ꤟꤢꤩ꤬ ꤟꤢꤩꤔꤣꤧ꤬, ꤢ꤬ ꤊ꤫ꤢꤦ꤬ ꤕ꤫ꤢꤦ꤬ ꤛꤢꤩ꤬ꤞꤤ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤞꤢꤨ꤭ꤊꤢ꤬ꤊꤢꤧ꤭ ꤛꤢꤩ꤬ꤞꤤ꤭ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤕꤢ꤭, ꤢ꤬ ꤚꤢ꤭ꤡꤝꤢ ꤟꤢꤨꤔꤣꤧ꤬꤯ 3 ꤋꤢꤨ꤭ꤎꤢꤪꤜꤢꤨ ꤡꤝꤢ ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤚꤣꤧ꤬ ꤙꤣꤧ ꤢ꤬ ꤖꤢꤦ꤬ ꤡꤝꤢꤒ꤫ꤥ꤬ꤟꤣꤧ ꤠꤤ꤭ ꤢ꤬ꤋꤢꤩ꤭ꤔꤣꤧ꤬, ꤒꤢꤩ꤬ꤜꤤ꤭ꤒꤣꤧ꤬ꤋꤢꤩ꤭ ꤘꤣ ꤗꤢꤪꤋꤢꤨ꤬ ꤏꤢꤒꤣꤧ꤬ꤋꤢꤩ꤭ ꤒꤢ꤭ꤒꤣꤧ꤬ꤠꤢ꤬ ꤘꤣ ꤜꤢꤨ꤭ ꤊꤢꤧ꤭ꤏꤢ꤯ 4 ꤚꤣꤧ꤬ ꤢ꤬ ꤜꤣꤧ꤬ꤋꤢꤦꤒꤢ꤭ ꤘꤣ ꤟꤢꤩ꤬ꤋꤢꤨ꤬ ꤚꤣꤧ꤬ ꤢ꤬ ꤔ꤫ꤤ꤬ꤟꤥ꤭ ꤍ꤫ꤥ꤬ꤖꤚꤢ꤬ꤓꤢꤧ꤬ ꤒꤣ꤬ꤗꤢꤦ꤭ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤋꤢꤨ꤭ꤎꤢꤪꤜꤢꤨ, ꤋꤢꤨ꤭ꤎꤢꤪꤜꤢꤨ, ꤔꤢꤧ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤠꤢꤧ꤭ ꤗꤢꤩ꤬ꤒꤢꤩ꤭?” 5 ꤚꤣꤧ꤬ ꤋꤢꤨ꤭ꤎꤢꤪꤜꤢꤨ ꤘꤣꤧꤟꤣꤧ꤭ꤏꤢꤦ꤬ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬꤮ ꤔꤢꤧ꤬ ꤗꤢ꤬ ꤢꤨ꤭ꤕꤢꤩ꤭?” ꤚꤣꤧ꤬ ꤍ꤫ꤥ꤬ꤖꤚꤢ꤬ ꤣꤧ꤭ ꤟꤢꤩꤊꤢ꤬ꤋꤛꤢ꤬ꤏꤢꤦ꤬ ꤜꤢꤨ꤭ ꤔꤢꤧ, “ꤠꤢꤧ꤭ ꤗꤢ꤬ ꤛꤢꤩ꤬ꤏꤛꤢꤨ ꤘꤣ ꤔꤢꤧ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤢ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ꤯ 6 ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤓꤢꤪ꤬ꤗꤣꤧ꤭ ꤚꤣꤧ꤬ ꤡꤝꤢꤔꤥ꤭ ꤘꤣ ꤠꤤ꤭ꤊꤢꤨ꤭ ꤔꤣꤧ꤬꤯ ꤔꤢꤧ꤬ ꤒꤥ꤭ ꤗꤢꤩ꤬ꤋꤚꤢꤧ꤮ ꤟꤢꤨꤒꤢꤩ꤭ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤟꤢꤩꤏꤥ꤬ꤘꤢꤦ꤬ ꤔꤢꤧ꤬ ꤕꤢ꤭꤯” 7 ꤊꤣꤧ꤬ꤛꤢꤧ꤭ ꤘꤣ ꤢ꤬ ꤋꤚꤝꤢ꤭ꤡꤝꤢꤊꤣꤧ꤭ ꤔꤢꤧ ꤋꤢꤨ꤭ꤎꤢꤪꤜꤢꤨ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤔ꤫ꤤ꤬ꤟꤥ꤭ ꤍ꤫ꤥ꤬ꤖꤚꤢ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬꤮ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤒꤢꤦ꤮, ꤢ꤬ ꤥ꤬ꤊꤥ ꤜꤢꤪ꤭ ꤜꤢ꤭ꤋꤢꤧ꤭ ꤚꤣꤧ꤬ ꤢ꤬ ꤒꤣꤧ꤬ꤔꤢꤩ꤬ꤕꤜꤥ꤭ ꤟꤢꤩꤙꤢꤩ꤬ ꤕꤢ꤬ ꤒꤣ꤬ꤡꤣ꤬꤮ ꤒꤥ꤬꤯ ꤢ꤬ ꤓꤢꤩ꤬ꤒꤣꤧ꤬ꤕꤢ꤬ ꤜꤢꤪ꤭ꤕꤜꤤ꤭ ꤡꤣꤧ ꤛꤢꤩ꤬ꤞꤤ꤭꤯ 8 ꤋꤢꤨ꤭ꤎꤢꤪꤜꤢꤨ ꤊꤣꤧ꤬ꤓꤢꤪ꤬ ꤚꤣꤧ꤬ ꤢ꤬ ꤢꤧꤡꤢꤦ ꤗꤢꤧꤊꤣꤧ꤬ꤜꤢꤪ꤭ꤓꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤒꤣ꤬ꤡꤣ꤬꤮ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤛꤢꤩ꤬ꤞꤤ꤭ ꤡꤝꤤ꤬ꤡꤝꤢ ꤜꤢꤨ꤭ ꤚꤣꤧ꤬ ꤢ꤬ ꤞꤢꤨ꤭ꤔꤥ꤭ ꤜꤢꤨ꤭ ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤊꤢꤨ꤭꤯ 9 ꤚꤣꤧ꤬ ꤞꤥ꤭ꤔꤣꤧ꤭ꤞꤥ꤭ꤞꤢꤩ꤭ ꤢ꤬ꤊꤢꤨ꤭ ꤢ꤬ ꤗꤢꤧꤓꤢꤩ꤬ꤡ꤫ꤢꤧ꤬ꤒꤥ꤬, ꤓꤥ꤭ꤒꤥ꤬ ꤢ꤬ꤢꤩ꤬ꤢ꤬ꤥ꤭ ꤒꤣ꤬ꤡꤣ꤬꤮ ꤒꤥ꤬꤯ 10 ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤊꤢꤨ꤭ꤔꤣꤧ꤬ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤗꤝꤤ꤭ ꤔꤢꤧ ꤋꤢꤨ꤭ꤢ꤬ꤔꤢ꤬ꤔꤤ ꤥ꤬ ꤒꤣ꤬ꤖꤚꤢꤩ꤬꤯ ꤢ꤬ ꤗꤢꤧꤓ꤫ꤣꤧ꤬ꤜꤝꤢꤚ꤫ꤣꤧ꤬ ꤒꤢꤩ꤬ ꤚꤣꤧ꤬ ꤘꤣ ꤢ꤬ ꤒꤢꤩ꤬ꤗꤢꤧꤓ꤫ꤣꤧ꤬ꤜꤝꤢꤚ꤫ꤣꤧ꤬ ꤢ꤬ꤊꤢꤨ꤭ꤣꤧ꤭ꤔꤣꤧ꤬ ꤙꤢꤧ꤬ꤡꤢꤩ꤬ ꤢꤩ ꤢ꤬ ꤔꤢꤧ, “ꤋꤢꤨ꤭ꤢ꤬ꤔꤢ꤬ꤔꤤ!” ꤚꤣꤧ꤬ ꤢ꤬ ꤒꤢꤩ ꤊꤢ꤬ꤋꤛꤢ꤭ꤏꤢꤦ꤬ ꤔꤢꤧ, “ꤙꤢꤧ꤬ꤡꤢꤩ꤬ ꤠꤢꤧ꤭ꤥ꤬ ꤖꤢꤧ꤯” 11 ꤚꤣꤧ꤬ ꤙꤢꤧ꤬ꤡꤢꤩ꤬ ꤟꤢꤩ ꤜꤢꤨ꤭ ꤔꤢꤧ, “ꤥ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤗꤣꤧ꤭ ꤔꤢꤧ꤬ꤔ꤫ꤢꤩ꤬ ꤚꤣꤧ꤬ ꤡꤝꤢ ꤗꤣꤧ꤭ ꤘꤣ ꤊꤜꤢꤧ ꤔꤣꤧ꤬ꤒꤣ꤬ꤙꤥ꤭ ꤘꤣ ꤢꤨ꤭ ꤢꤩ ꤢ꤬ꤗꤝꤤ꤭ ꤔꤢꤧ ꤊꤜꤢꤧꤡꤢꤪ ꤟꤢꤩꤔꤣꤧ꤬ ꤒꤣ꤬ꤙꤥ꤭ ꤚꤣꤧ꤬ ꤡꤝꤢ ꤘꤣꤧꤟꤣꤧ꤭ ꤗꤣꤧ꤭ ꤠꤤ꤭ꤒꤢ꤬ꤎꤢꤨꤖꤢꤨ ꤘꤣ ꤢ꤬ꤗꤝꤤ꤭ ꤔꤢꤧ ꤋꤢꤨ꤭ꤎꤢꤪꤜꤢꤨ ꤘꤣ ꤋꤢꤨ꤭ꤛꤢꤨꤘꤢ꤬ ꤢ꤬ꤟꤤ꤬ꤊꤢꤨ꤭ ꤔꤣꤧ꤬꤯ ꤊꤢꤨꤔ꤫ꤢꤧ꤬ꤚꤣꤧ꤬ ꤢ꤬ ꤊꤝꤤ꤭ꤡꤢꤪꤙꤢꤩ꤭ ꤟꤣꤧ ꤒꤢꤩ꤬꤯ 12 ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ꤜꤝꤢꤚ꤫ꤣꤧ꤬ ꤟꤣꤧ ꤔꤢꤧ, ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤢ꤬ꤑꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ꤗꤝꤤ꤭ ꤔꤢꤧ ꤋꤢꤨ꤭ꤢ꤬ꤔꤢ꤬ꤔꤤ ꤟꤢꤩꤔꤣꤧ꤬ ꤒꤣ꤬ꤖꤚꤢꤩ꤬ ꤟꤢꤧ꤭ ꤘꤣ ꤜꤢꤨ꤭ꤥ꤬ ꤚꤣꤧ꤬ ꤢ꤬ ꤟꤢꤧ꤭ ꤘꤢꤧ꤬ꤓꤢꤧ꤬ ꤢ꤬ꤊꤢꤨꤋꤢꤨ꤬ ꤘꤣ ꤜꤢꤨ꤭ꤜꤥ꤬꤯” 13 ꤋꤢꤨ꤭ꤢ꤬ꤔꤢ꤬ꤔꤤ ꤟꤢꤩꤏꤢꤦ꤬ ꤔꤢꤧ, “ꤙꤢꤧ꤬ꤡꤢꤩ꤬, ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤔꤣꤧ꤬, ꤠꤢꤧ꤭ ꤔ꤫ꤤ꤬ꤟꤥ꤭ ꤢꤨ꤭ ꤢꤩꤖꤚꤢꤩ꤬ ꤟꤢꤩꤓꤥ꤭ꤕ꤫ꤢꤩ꤬ ꤢꤩꤜꤥ꤬ ꤟꤣꤧ ꤠꤢꤧ꤭ ꤔꤢꤧ, ꤢ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤔꤢꤧ꤬ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬, ꤟꤢꤩꤠꤢ꤯ 14 ꤓꤥ꤭ꤒꤥ꤬, ꤢ꤬ ꤟꤢꤧ꤭ ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤟꤢꤧ꤭ ꤘꤣ ꤢ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ꤕ꤫ꤢꤦ꤬ ꤜꤢꤪ꤭ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤢꤪꤙꤢꤩ꤭ ꤔꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤘꤣꤧ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤗꤢꤩ꤭꤯” 15 ꤗꤢ꤬ꤔꤢꤧꤚꤣꤧ꤬ ꤙꤢꤧ꤬ꤡꤢꤩ꤬ ꤟꤢꤩ ꤜꤢꤨ꤭ ꤔꤢꤧ, “ꤡꤝꤢꤗꤣꤧ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤠꤢꤧ꤭ ꤔꤝꤢꤓꤢꤧ꤬ ꤟꤣꤧ ꤢ꤬ ꤘꤣ ꤢ꤬ ꤊ꤫ꤢꤦ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤛꤢꤨꤘꤢ꤬ꤖꤢꤨ ꤗ꤫ꤢ꤬ꤒꤥ꤬ ꤒꤣꤧ꤬ꤟꤢꤩ꤬ ꤔꤢꤧ ꤡꤢꤪꤖꤢꤧ꤬ ꤒꤣꤧ꤬ꤟꤢꤩ꤬, ꤔꤢꤧ ꤤ꤬ꤎꤢ꤬ꤚꤢꤩꤜꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤔꤢꤧ ꤠꤢꤧ꤭ꤚꤤ꤬ꤠꤢꤧ꤭ꤊꤢꤧ꤭ ꤕꤢ꤭꤯ 16 ꤜꤢꤪ꤭ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤘꤣ ꤢ꤬ ꤒꤥ꤭ꤙꤢꤩ꤬ ꤋꤢꤧ ꤘꤣ ꤠꤢꤧ꤭ꤋꤝꤢ꤬ꤠꤢꤧ꤭ꤋꤛꤢ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤠꤢꤧ꤭ ꤊ꤫ꤢꤦ꤬ ꤘꤣꤧꤜꤥ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤡꤣꤧꤘꤢꤦ꤬ ꤜꤢꤨ꤭ ꤔꤢꤧ ꤠꤢꤧ꤭ꤔ꤫ꤢꤩ꤬ ꤕꤢ꤭꤯” 17 ꤟꤢꤨꤔꤣꤧ꤬ꤚꤣꤧ꤬ ꤋꤢꤨ꤭ꤢ꤬ꤔꤢ꤬ꤔꤤ ꤡꤝꤢꤔꤥ꤭ ꤘꤣ ꤟꤤ꤬ ꤙꤣꤧ ꤋꤢꤨ꤭ꤎꤢꤪꤜꤢꤨ ꤥ꤬ ꤚꤣꤧꤘꤢꤦ꤬ ꤔꤣꤧ꤬ꤒꤣ꤬ꤗꤢꤩ꤭ ꤢ꤬ꤊꤢꤨ꤭꤯ ꤓꤥ꤭ꤚꤣꤧ꤬ ꤢ꤬ ꤔꤥ꤭ꤘꤢꤧ꤬ꤓꤢꤧ꤬ ꤢ꤬ꤊꤢꤨꤋꤢꤨ꤬ ꤘꤣ ꤋꤢꤨ꤭ꤎꤢꤪꤜꤢꤨ ꤢ꤬ꤜꤥ꤬ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤕ꤫ꤥ꤬ꤠ꤫ꤢꤧ꤬ ꤋꤢꤨ꤭ꤎꤢꤪꤜꤢꤨ, ꤞꤢꤧꤟꤢꤨ ꤔꤢꤧ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤊꤢ꤬ꤋꤛꤢ꤭ ꤚꤢꤧ ꤋꤛꤢ꤭ꤞꤢꤧ, ꤓꤥ꤭ꤚꤣꤧ꤬ ꤞꤢꤧꤟꤢꤨ ꤔꤢꤧ꤬ ꤊ꤫ꤢꤦ꤬ ꤜꤣꤙꤢ꤭ꤓꤢꤧ꤬ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤢ꤬ꤑꤢꤩ꤭ꤔꤣꤧ꤬, ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤘꤣ ꤢ꤬ ꤥ꤬ꤜꤥ꤭ꤓꤢꤧ꤬ ꤕ꤫ꤢꤩ꤬ ꤓꤥ꤭ꤟꤣꤧ ꤔꤢꤧ꤬ ꤘꤣ ꤊꤜꤢꤧꤜꤥ꤬ ꤔꤣꤧ꤬ꤒꤣ꤬ꤖꤚꤢꤩ꤬, ꤔꤢꤪ꤭ꤟꤢꤧ꤭ ꤠꤢꤧ꤭ ꤘꤣ ꤔꤢꤧ꤬ꤥ꤬ ꤟꤣꤧ꤯” 18 ꤙꤣꤧꤔꤣꤧ꤬ ꤒꤣ꤬ꤖꤥꤒꤥ꤬ ꤒꤢꤩ꤬ ꤘꤣ ꤢ꤬ꤞꤢꤧꤔꤢꤧ ꤒꤢꤩ꤭ꤟꤢꤨꤙꤢ꤬ ꤥ꤬ ꤘꤣ ꤜꤢꤨ꤭ ꤕꤣꤧꤞꤢꤩ꤬ꤕꤜꤢꤪ꤬ꤜꤥ꤬ ꤔꤣꤧ꤬ ꤜꤣꤧ꤬ꤒꤢ꤭ꤊꤢꤧ꤭ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ꤯ ꤣꤧ꤭ꤒꤣ꤬ꤖꤥꤚꤣꤧ꤬ ꤢ꤬ ꤊꤣꤧ꤬ꤓꤢꤪ꤬ ꤚꤣꤧ꤬ ꤢ꤬ ꤡꤝꤢ ꤡꤢꤩ꤬ ꤊꤢ꤬ꤋꤛꤢ꤭ ꤢ꤬ꤔ꤫ꤢꤩ꤬꤯ 19 ꤢ꤬ꤢꤩ꤬ꤢ꤬ꤥ꤭ ꤋꤛꤢ꤭ꤞꤢꤧ ꤚꤣꤧ꤬ ꤢ꤬ꤟꤢꤧ꤭ꤢ꤬ꤚꤢꤩ꤬ ꤥ꤬ꤓꤢꤧ꤬ ꤋꤛꤢ꤭ꤞꤢꤧ꤯ ꤚꤣꤧ꤬ ꤢ꤬ ꤥ꤬ꤊꤣꤧ꤭ ꤔꤢꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤙꤣꤧ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤊꤢꤨ꤭ꤔꤣꤧ꤬ ꤞꤥ꤭ꤜꤝꤤ꤭ꤔꤣꤧ꤭꤯ ꤋꤢꤨ꤭ꤎꤢꤪꤜꤢꤨ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤊꤢꤨ꤭ 20 ꤚꤣꤧ꤬ ꤒꤣ꤬ꤖꤥꤒꤥ꤬ ꤋꤢꤨ꤭ꤎꤢꤪꤜꤢꤨ ꤓꤢꤩ꤬ꤡꤝꤢ ꤒꤥ꤭ꤘꤢꤩ꤭ ꤘꤣ ꤛꤢꤨꤘꤢ꤬ ꤒꤢꤩ꤬ꤡꤢꤪꤙꤢꤩ꤭ꤟꤥ꤭ ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤭ ꤚꤣꤧ꤬ ꤢ꤬ ꤡꤝꤢꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤔꤢꤧ ꤛꤢꤩ꤬ꤏꤛꤢꤨ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭꤯ 21 ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤟꤥ꤭ ꤜꤢꤨ꤭ ꤟꤢꤩꤙꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤓꤢꤩ꤬ꤒꤣꤧ꤬ꤕꤢ꤬ ꤜꤢꤪ꤭ꤕꤜꤤ꤭ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤟꤢꤩ ꤜꤢ꤭ꤋꤢꤧ꤭ ꤔꤢꤧ, “ꤢ꤬ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤝꤢꤜꤢꤦ꤬ ꤗꤢꤩ꤬ꤞꤣꤧ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤢꤪꤙꤢꤩ꤭ ꤛꤢꤩ꤬ꤏꤛꤢꤨ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒꤣ꤬ꤖꤚꤢꤩ꤬ ꤗ꤫ꤢ꤬ꤒꤥ꤬ ꤟꤢꤧ꤭? ꤢ꤬ ꤟꤢꤧ꤭ ꤙꤣꤧꤣꤧ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤟꤢꤧ꤭ꤕ꤫ꤢꤦ꤬ ꤊꤣꤧ꤬ꤛꤢꤧ꤭ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤊ꤫ꤢꤦ꤬ꤚꤢꤩ꤭ ꤞꤢꤨ꤭ꤊꤢ꤬ ꤢꤨ꤭ ꤘꤣ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤢ꤬ ꤥ꤬ ꤠꤢꤧ꤭ꤟꤢꤩꤒ꤫ꤥ꤬?” 22 ꤋꤢꤨ꤭ꤎꤢꤪꤜꤢꤨ ꤢ꤬ ꤒꤢꤩ꤬ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤣꤧ꤭ꤔꤣꤧ꤬ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤘꤢꤨ꤬ꤟꤢꤧ꤭ ꤔꤢꤧ ꤘꤢꤨ꤬ꤟꤢꤧ꤭ ꤡꤣꤧ ꤚꤣꤧ꤬ ꤢ꤬ ꤋꤢꤧꤜꤥ꤭ ꤒꤢ꤭ꤒꤢꤩ꤬ ꤕ꤫ꤢꤩ꤬ ꤢꤨ꤭ ꤔꤢꤧ ꤛꤢꤩ꤬ꤏꤛꤢꤨ ꤗꤢ꤬ ꤋꤚꤤ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤒꤣ꤬ꤖꤚꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤒ꤫ꤥ꤬ ꤡꤣꤧ ꤘꤣ ꤛꤢꤨꤘꤢ꤬ꤖꤢꤨ ꤥ꤬ ꤙꤣꤧ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤢꤩꤏꤢꤦ꤬ꤊꤢ꤬ꤋꤛꤢ꤭ ꤡ꤫ꤢꤧ꤬ ꤕꤢ꤬ ꤡꤣꤧ ꤜꤢꤨ꤭ ꤒꤣ꤬ꤡꤣ꤬꤮ ꤒꤥ꤬꤯ 23 ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤑꤢ꤭ꤟꤢꤧ꤭ ꤟꤣꤧ ꤒꤣꤧ꤬ꤊꤤ꤬ ꤚꤣꤧ꤬ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤥ꤬ꤊꤢꤨ ꤒꤢ꤭ꤏꤢꤦ꤬ ꤚꤣꤧꤘꤢꤦ꤬ ꤜꤢꤨ꤭ ꤚꤣꤧ꤬ ꤢ꤬ ꤒꤣꤧ꤬ꤔꤢꤩ꤬ ꤋꤚꤢꤩ꤬ꤗꤢꤩ꤬ꤞꤣꤧ꤭ ꤋꤢꤨ꤭ꤎꤢꤪꤜꤢꤨ꤯ 24 ꤗꤢ꤬ꤔꤢꤧꤚꤣꤧ꤬ ꤢꤨ꤭ ꤟꤢꤩꤏꤥ꤬ꤜꤥ꤭ ꤞꤤꤑꤢꤩ꤭ ꤕ꤫ꤢꤩ꤬ ꤜꤢꤨ꤭ ꤔꤢꤧ ꤢꤨ꤭ ꤊ꤫ꤢꤦ꤬ ꤋꤚꤢꤩ꤬ ꤗꤢꤩ꤬ꤞꤣꤧ꤭ ꤜꤢꤨ꤭ ꤕꤢ꤭, ꤚꤣꤧ꤬ ꤞꤢꤧꤟꤢꤨ ꤢꤨ꤭ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ꤔ꤫ꤤ꤬ ꤜꤢꤨ꤭ ꤢ꤬ꤑꤢꤩ꤭ꤔꤣꤧ꤬ ꤢꤨ꤭ ꤥ꤬ꤕ꤫ꤢꤪ꤬ ꤙꤣꤧ ꤠꤤ꤭ ꤊꤣꤧ꤬ꤘꤢ꤭ꤊꤢꤨ꤭ꤓꤢꤦ꤭ꤔꤣꤧ꤬ ꤗ꤫ꤢꤪ꤬ꤋꤤꤋꤤ ꤗ꤫ꤢꤪ꤬ꤞꤤ꤭ꤊꤜꤢꤩ꤭ꤊꤜꤢꤩ꤭ ꤡꤣꤧ꤯ 25 ꤗꤢ꤬ꤔꤢꤧꤚꤣꤧ꤬ ꤙꤣꤧ ꤗ꤫ꤢꤪ꤬ꤋꤤ ꤢ꤬ꤋꤢꤩ꤭ꤔꤣꤧ꤬, ꤋꤢꤨ꤭ꤎꤢꤪꤜꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤏꤢꤨ꤬ꤔꤥ꤭ ꤜꤢꤨ꤭ ꤘꤣ ꤞꤢꤨ꤬ ꤒꤣ꤬ꤗꤢꤩ꤭ ꤢ꤬ꤊꤢꤨ꤭ ꤚꤣꤧ꤬ ꤢ꤬ ꤓꤢꤧ꤬ ꤡꤢꤧ꤬ꤒꤢ꤭ ꤜꤢꤨ꤭ ꤘꤣ ꤠꤤ꤭ꤢꤨ꤭ꤓꤢꤧ꤬ꤜꤥ꤭ ꤊꤣꤧ꤬ꤘꤢ꤭ꤖꤢꤨ ꤢ꤬ꤊꤢꤨ꤭ ꤒꤣ꤬ꤊꤢꤨ꤭ ꤚꤣꤧ꤬ ꤢ꤬ ꤡꤢꤧ꤬ꤒꤢ꤭ꤊꤢꤧ꤭ ꤜꤢꤨ꤭ ꤘꤣ ꤠꤤ꤭ꤢꤨ꤭ꤘꤢꤨ꤬ ꤊꤜꤢꤪ꤭ꤒꤣ꤬ꤊꤛꤢ꤭꤯ ꤋꤢꤨ꤭ꤎꤢꤪꤜꤢꤨ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ 26 ꤋꤢꤨ꤭ꤎꤢꤪꤜꤢꤨ ꤊꤢ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤚꤣꤧ꤬ ꤢ꤬ ꤢꤧꤡꤢꤦ ꤙꤢꤧꤞꤝꤢꤋꤢꤩꤋꤥ꤭ ꤢ꤬ꤔ꤫ꤢꤩ꤬ ꤔꤢꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤞꤤꤤ꤬ꤏꤢꤩ꤭ ꤜꤢꤪ꤭ꤕꤜꤤ꤭ ꤜꤢꤨ꤭ꤜ꤫ꤢꤩ꤬꤯ ꤢ꤬ ꤓꤝꤢ꤭ ꤟꤣꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ꤖꤢꤨ ꤒꤣ꤬ꤖꤚꤢꤩ꤬ ꤟꤣꤧ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤛ꤫ꤢꤦ꤬ꤢꤩ꤬ ꤜꤢꤨ꤭ ꤒꤥ꤬꤯ 27 ꤣꤧ꤭ꤒꤣ꤬ꤖꤥꤚꤣꤧ꤬ ꤋꤢꤨ꤭ꤙꤢ꤬ꤔꤢ꤬ꤙꤢ ꤗꤢꤩ꤬ꤡꤝ꤫ꤢ꤬ ꤜꤢꤨ꤭ ꤚꤣꤧ꤬ ꤢ꤬ ꤢꤩꤡꤝꤢ ꤜꤢꤨ꤭ ꤘꤣ ꤖꤚꤢꤩ꤬ꤘꤥ꤬ꤔꤢꤧ꤭ꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤥ꤬꤯ ꤚꤣꤧ꤬ ꤢ꤬ ꤘꤣꤧꤜꤥ꤭ ꤞꤤꤑꤢꤩ꤭ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤔꤢꤧ ꤋꤢꤨ꤭ꤎꤢꤪꤜꤢꤨ ꤗꤢꤧꤓ꤫ꤣꤧ꤬ꤟꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤙꤣꤧ ꤢ꤬ ꤡꤝꤢ ꤘꤣ ꤠꤤ꤭ꤘꤢ꤬ꤗꤢ꤬ꤎꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤓꤥ꤭ꤚꤣꤧ꤬ ꤙꤢꤧ꤬ꤡꤢꤩ꤬ ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ ꤓꤥ꤭ꤟꤣꤧ ꤜꤢꤨ꤭ ꤔꤢꤧ ꤢ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤒꤣꤧ꤬ꤟꤢꤩ꤬꤯ ꤓꤥ꤭ꤒꤥ꤬ ꤋꤢꤨ꤭ꤙꤢ꤬ꤔꤢ꤬ꤙꤢ ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ꤊꤣꤧ꤭ꤕ꤫ꤥ꤬ ꤛꤢꤩ꤬ꤞꤤ꤭ ꤔꤢꤧ ꤋꤢꤨ꤭ꤎꤢꤪꤜꤢꤨ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤋꤢꤦ꤭ꤋꤢꤦ꤭ꤟꤢ꤭ꤟꤢ꤭ ꤡꤣꤧ ꤕ꤫ꤢꤩ꤬ ꤠꤤ꤭ꤘꤢ꤬ꤗꤢ꤬ꤎꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤔꤢꤧ ꤛꤢꤩ꤬ꤏꤛꤢꤨ ꤢ꤬ꤚꤤ꤬ꤢ꤬ꤊꤢꤧ꤭꤯ 28 ꤟꤢꤨꤔꤣꤧ꤬ꤚꤣꤧ꤬ ꤋꤢꤨ꤭ꤎꤢꤪꤜꤢꤨ ꤥ꤬ꤒ꤫ꤣ꤬ ꤊꤣꤧ꤭ꤔꤢꤧ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤡꤝꤢ ꤜꤢꤩ꤭ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤋꤢꤦ꤭ꤟꤢ꤭ ꤡꤣꤧ ꤕ꤫ꤢꤩ꤬ ꤢꤨ꤭ ꤔꤢꤧ ꤙꤢꤧ꤬ꤡꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤊꤢꤨ꤭ ꤕꤝꤢ꤭꤮ ꤒꤣ꤬ꤖꤥ꤬꤯ 29 ꤢ꤬ ꤘꤥ꤬ꤔꤢꤧ꤭ꤕꤜꤥ꤭ ꤊꤢ꤬ꤋꤛꤢ꤭ꤟꤢꤧ꤭ꤑꤢꤩ꤭ ꤏꤢꤦ꤬ ꤔꤢꤧ ꤛꤢꤨꤘꤢ꤬ꤖꤢꤨ ꤘꤣ ꤢ꤬ ꤟꤢꤩꤙꤢꤩ꤬ ꤊꤚꤤꤍ꤫ꤥ꤬ ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤢꤧꤡꤢꤦ ꤗꤢꤧꤕꤢꤨ꤭ ꤊꤜꤢꤧ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ ꤜꤢꤨ꤭꤯ 30 ꤙꤣꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤔ꤫ꤤ꤬ꤟꤥ꤭ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤣꤧ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤢꤩꤓꤢꤩ꤬ ꤡꤝꤢꤊꤢꤧ꤭ ꤋꤢꤨ꤭ꤎꤢꤪꤜꤢꤨ ꤘꤣ ꤠꤤ꤭ꤊꤢꤧꤎꤢ꤬ꤚꤤ ꤚꤣꤧ꤬ ꤞꤢꤨ꤭ꤡꤝꤢꤊꤢꤧ꤭ ꤜꤢꤨ꤭ ꤘꤣ ꤠꤤ꤭ꤒꤢ꤬ꤎꤢꤨ꤯ 31 ꤟꤢꤨꤔꤣꤧ꤬ꤚꤣꤧ꤬ ꤙꤣꤧꤔꤣꤧ꤬ꤢ꤬ꤋꤢꤩ꤭ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ ꤕꤜꤢꤪꤗꤢꤨ꤬ꤖꤢꤨ ꤘꤣ ꤢ꤬ ꤥ꤬ ꤘꤣ ꤛꤢꤨ꤬ꤘꤢ꤬ꤊ꤫ꤢꤩ꤬, ꤊꤢꤧꤜꤢ꤬ꤜꤤ꤬ꤊ꤫ꤢꤩ꤬, ꤏꤛꤢ꤬ꤗꤢ꤬ꤚꤤꤊ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤭ ꤒꤣꤧ꤬ꤟꤢꤩ꤬ ꤥ꤬ꤞꤥ꤬ꤥ꤬ꤋꤚꤢꤩ꤭ ꤔꤢꤪꤊꤣꤧ꤭ ꤔꤥ꤬ ꤢꤨ꤭ ꤖꤢꤧ꤯ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ ꤕꤜꤢꤪꤗꤢꤨ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤟꤢꤧ꤭ꤢ꤬ꤚꤢꤩ꤬ ꤏꤝꤢ꤬ꤓꤢꤧ꤬ꤏꤢꤪ꤭ꤓꤢꤧ꤬, ꤛꤢꤩ꤬ꤞꤤ꤭ ꤔ꤫ꤤ꤬ꤟꤢꤧ꤭ꤔ꤫ꤤ꤬ꤚꤢꤩ꤬, ꤛꤢꤩ꤬ꤞꤤ꤭ ꤥ꤬ꤚ꤫ꤥ꤬ꤥ꤬ꤢꤩꤓꤢꤧ꤬ ꤚꤣꤧ꤬ ꤥ꤬ꤞꤣꤧ꤭ꤖꤚꤢꤩ꤬ ꤜꤢ꤭ꤋꤢꤧ꤭ ꤘꤣ ꤒꤢꤩ꤬ꤘꤢꤧ꤬ꤘꤢꤨ꤬ꤛ꤫ꤢꤦ꤬ꤔ꤫ꤢꤧ꤬ ꤙꤢꤧ꤬ꤡꤢꤩ꤬ ꤢ꤬ꤊꤢꤨ꤭꤯ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤡꤝꤢꤒ꤫ꤥ꤬ ꤘꤣ ꤠꤤ꤭ꤜꤢꤨꤘꤢ꤬ ꤔꤢꤧ ꤠꤤ꤭ꤡꤛꤥꤕꤢ꤬ ꤢ꤬ꤊꤢꤨ꤭ 32 ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤡꤝꤢꤜꤢꤩ꤭ ꤜꤢꤪ꤭ ꤜ꤫ꤢꤩ꤬ꤥ꤬ ꤕꤝꤢ꤭꤮ ꤒꤣ꤬ꤖꤥ꤬꤯ ꤒꤣ꤬ꤖꤥꤕꤢ꤬ ꤚꤣꤧ꤬ ꤢ꤬ ꤡꤝꤢꤥ꤬ꤜꤢꤩ꤭ꤥ꤬ ꤒ꤫ꤥ꤬ꤊꤣꤧ꤭ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ꤖꤢꤨ ꤘꤣ ꤢ꤬ ꤥ꤬ ꤘꤣ ꤠꤤ꤭ꤜꤢꤨꤘꤢ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤥ꤬꤯ 33 ꤚꤣꤧ꤬ ꤢ꤬ ꤡꤝꤢ ꤗꤢꤧꤓ꤫ꤣꤧ꤬ ꤒꤢ꤭ꤏꤢꤦ꤬ ꤔꤢꤧ ꤊꤣꤧ꤬ꤛꤢꤧ꤭ ꤞꤣꤧ꤭ꤡꤤꤊꤛꤢ꤭ ꤘꤣ ꤢ꤬ꤗꤝꤤ꤭ ꤔꤢꤧ ꤋꤢꤨ꤭ꤢꤧꤔꤢꤩꤛꤢ꤬ ꤥ꤬ ꤙꤣꤧꤔꤣꤧ꤬ ꤒꤣ꤬ꤖꤚꤢꤩ꤬, ꤢ꤬ ꤥ꤬ꤗꤣꤧ꤭ꤢꤩ꤭ꤥ꤬ ꤖꤢꤧ ꤘꤣ ꤜ꤫ꤢꤩ꤬ꤗꤣꤧ꤭ꤊꤢꤨ꤭ ꤚꤣꤧ꤬ ꤢ꤬ ꤊꤣꤧ꤬ꤓꤢꤪ꤬ꤙꤢꤩꤒꤥ꤬ ꤔꤣꤧ꤬ ꤢ꤬ ꤥ꤬ ꤟꤣꤧ ꤢ꤬ꤔꤢ꤬ꤜꤝꤤ꤭ꤞꤝꤢ ꤟꤣꤧ꤯ 34 ꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤩ ꤢ꤬ ꤔꤢꤧ, “ꤋꤢꤨ꤭ꤢꤧꤔꤢꤩꤛꤢ꤬꤮ ꤛꤢꤩ꤬ꤏꤛꤢꤨꤋꤚꤤ ꤛ꤫ꤢꤧ꤬ꤥ꤬ꤗ꤫ꤢꤩ꤬ꤟꤣꤧ ꤔꤢꤧ꤬ ꤟꤣꤧ꤯ ꤊꤣꤧ꤬ꤓꤢꤪ꤬ ꤗꤣꤧ꤭ ꤚꤣꤧ꤬ ꤊ꤫ꤢꤩ꤬ꤊꤛꤢꤘꤝꤢ ꤔꤢꤧ꤬ ꤜ꤫ꤢꤩ꤬ꤗꤣꤧ꤭ꤔꤣꤧ꤬” ꤚꤣꤧ꤬ ꤋꤢꤨ꤭ꤢꤧꤔꤢꤩꤛꤢ꤬ ꤊꤣꤧ꤬ꤓꤢꤪ꤬ ꤒꤣꤧ꤬ꤕꤜ꤫ꤥ꤬ꤒꤣꤧ꤬ꤕꤛꤢ꤭ ꤡꤣꤧ꤯ 35 ꤜꤢꤪ꤭ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤠꤤ꤭ꤜꤢꤨꤘꤢ꤬ ꤢ꤬ꤊꤢꤨ꤭ ꤔꤢꤧ ꤏꤛꤢ꤭ꤚꤥ꤬ ꤊ꤫ꤢꤩ꤬ꤘꤢꤦ꤭ꤊꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤒꤢꤩ꤬ꤗꤢꤩ꤬ꤓꤝꤢ꤭ꤓꤢꤧ꤬ ꤟꤢꤨꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ ꤢ꤬ ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ ꤊꤣꤧ꤭ ꤜꤢꤪ꤭ꤕꤜꤤ꤭ ꤙꤢꤧ꤬ꤡꤢꤩ꤬꤯ 36 ꤙꤣꤧ ꤠꤤ꤭ꤡꤛꤥꤕꤢ꤬ ꤢ꤬ꤊꤢꤨ꤭ꤔꤣꤧ꤬ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ ꤛꤢꤩ꤬ꤏꤛꤢꤨ ꤔꤣꤧ꤬ ꤢ꤬ꤥ꤬ ꤒꤣ꤬ꤖꤚꤢꤩ꤬ ꤢ꤬ꤗꤝꤤ꤭ ꤔꤢꤧ ꤗꤢꤪ꤬ꤒꤢ꤬ꤙꤤ꤬ꤞꤢ (ꤊꤚꤤꤍ꤫ꤥ꤬ ꤗꤢ꤬ ꤢ꤬ꤗꤝꤤ꤭ ꤔꤢꤧ ꤗꤢꤪ꤬ꤘꤢꤪ꤬ꤊꤢ, ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬ ꤒꤣꤧ꤬ꤋꤣꤧ꤭ ꤒꤣ꤬ꤘꤥ꤭) ꤢ꤬ ꤒꤢꤩ꤬ꤏꤣꤧꤒꤢꤩ꤬ꤋꤢꤩ꤭ ꤜꤢꤪ꤭꤮ ꤕꤜꤤ꤭ ꤔꤣꤧ꤬ ꤢ꤬ ꤗꤢꤩ꤬ꤙꤝꤤꤗꤢꤩ꤬ꤒꤣꤧ꤬ꤚꤣꤧ꤭ ꤕ꤫ꤢꤩ꤬ ꤢꤨ꤭ꤚꤥ꤬ ꤓꤥ꤭ꤚꤣꤧ꤬ ꤗꤢꤩ꤬ꤡꤝ꤫ꤢ꤬ꤖꤛꤢꤡꤝ꤫ꤢ꤬ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤏꤥ꤭ꤖꤢꤏꤥ꤭ꤚꤢꤧ꤬ꤖꤢꤨ ꤒꤣꤧ꤬ꤟꤢꤩ꤬꤯ 37 ꤙꤣꤧꤔꤣꤧ꤬ꤋꤢꤩ꤭ ꤢ꤬ꤏꤝꤤ ꤚꤣꤧ꤬ ꤢ꤬ ꤞꤣꤧ꤭ꤊꤢꤧ꤭꤯ ꤢ꤬ꤜꤥ꤭ ꤣꤧ꤭ꤔꤣꤧ꤬, ꤢꤨ꤭ ꤤ꤬ꤜ꤫ꤥ꤬ꤕꤜꤤ꤭ꤤ꤬ꤜ꤫ꤥ꤬ꤖꤥ ꤚꤢꤧ ꤓꤥ꤭ꤟꤣꤧ ꤔꤢꤧ ꤓꤣꤧ꤭ ꤚꤣꤧ꤬ ꤢꤨ꤭ ꤘꤢꤧ꤬ꤥ꤬ ꤜꤢꤨ꤭ ꤘꤣ ꤟꤤ꤬ꤘꤢꤪꤊꤢꤨ꤭ ꤘꤣ ꤢ꤬ꤋꤢꤨ꤬ ꤒꤣ꤬ꤒ꤫ꤥ꤬꤯ 38 ꤠꤤ꤭ꤜꤢꤨꤘꤢ꤬ ꤣꤧ꤭ꤔꤣꤧ꤬, ꤢ꤬ ꤥ꤬ꤖꤢꤦ꤬ ꤔꤢꤧ ꤠꤤ꤭ꤡꤛꤥꤕꤢ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤙꤣꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤔ꤫ꤤ꤬ꤟꤥ꤭ ꤔꤢꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤥ꤬ ꤘꤣ ꤠꤤ꤭ꤜꤢꤨꤘꤢ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤔꤢꤪ꤭ꤡꤝꤢ ꤊꤣꤧ꤬ꤛꤢꤧ꤭ ꤞꤤꤔꤣꤧ꤭ ꤘꤣ ꤜꤢꤨ꤭ꤥ꤬ ꤚꤣꤧ꤬ ꤢ꤬ ꤡꤝꤢ ꤊꤝꤤ꤭ꤞꤤꤛꤢꤪ꤬ ꤜꤢꤨ꤭ ꤔꤢꤧ, “ꤋꤢꤧꤞꤤꤘꤥ꤭ ꤗꤢꤩ꤬ꤖꤚꤢꤧ꤭ꤖꤚꤢꤧ꤭ ꤚꤣꤧ꤬ ꤟꤢꤧ꤭ꤖꤚꤢꤧ꤭ ꤘꤣ ꤕꤢꤩ꤬ ꤥ꤬ ꤟꤢꤩꤔꤣꤧ꤭!” 39 ꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ꤓꤢꤧ꤬ꤚꤣꤧ ꤢ꤬ꤔ꤫ꤢꤩ꤬ ꤚꤣꤧ꤬ ꤢ꤬ ꤓꤢꤩ꤬ꤡꤝꤢ ꤚ꤫ꤥ꤬ꤊꤣꤧ꤭ ꤔꤢꤧ ꤛꤢꤩ꤬ꤞꤤ꤭꤯ ꤢ꤬ ꤡꤝꤢꤒ꤫ꤥ꤬ ꤘꤣ ꤛꤢꤩ꤬ꤞꤤ꤭ꤥ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤢꤩꤓꤢꤧ꤬ ꤜꤢꤨ꤭ ꤘꤣ ꤟꤤ꤬ꤘꤢꤪꤊꤢꤨ꤭ ꤘꤣ ꤢ꤬ꤋꤢꤨ꤬ ꤒꤣ꤬ꤒ꤫ꤥ꤬꤯ ꤚꤣꤧ꤬ ꤜꤢꤪ꤭ ꤖꤚꤢꤩ꤬ꤗꤢꤪ꤬ꤥ꤬ꤋꤚꤢꤧ ꤒꤣꤧ꤬ꤟꤢꤩ꤬ ꤥ꤬ ꤜꤢ꤭ꤋꤢꤧ꤭ ꤙꤣꤧꤔꤣꤧ꤬ ꤚꤣꤧ꤬ ꤛꤢꤩ꤬ꤞꤤ꤭ ꤊꤣꤧ꤬ꤓꤢꤪ꤬ ꤍ꤫ꤥ꤬ ꤒꤣꤧ꤬ꤠꤢ꤬ ꤜꤢꤪ꤭ꤕꤜꤤ꤭ ꤔꤢꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤚꤣꤧ꤬ ꤢ꤬ ꤘꤣꤧꤜꤥ꤭ ꤕ꤫ꤢꤩ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤔꤢꤧ ꤡꤢ꤬ ꤔꤢꤧ ꤡꤢ꤬ꤊꤜꤢꤪ꤭ ꤞꤤ꤭ꤒꤣꤧ꤬ꤟꤢꤩ꤬ ꤘꤣ ꤗꤢꤪ꤬ꤘꤢꤪ꤬ꤊꤢ ꤏꤢꤩ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤙꤣꤧ ꤢ꤬ ꤥ꤬ꤞꤣꤧ꤭ꤖꤚꤢꤩ꤬ ꤒ꤫ꤣ꤬ꤊꤣꤧ꤭ꤕꤢ꤬ ꤔꤢꤧ ꤛꤢꤩ꤬ꤞꤤ꤭ ꤢ꤬ꤋꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯ 40 ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤔꤢꤪ꤭ꤓꤢꤩ꤬ꤊꤢꤧ꤭ ꤜꤢꤪ꤭ ꤢꤨ꤭ ꤘꤣ ꤢ꤬ꤊꤜꤢꤪ꤭ ꤚꤣꤧ꤬ ꤢ꤬ ꤘꤢꤧꤍꤢꤦ꤬ꤜꤢꤧ꤬ ꤊꤝꤤ꤭ꤡꤢꤪꤙꤢꤩ꤭ ꤒꤢꤩ꤬ ꤓꤥ꤭ꤚꤣꤧ꤬ ꤢ꤬ ꤒꤣꤧ꤬ꤚꤤ ꤗꤢꤧꤡꤝꤢ ꤘꤣ ꤗꤢꤪ꤬ꤘꤢꤪ꤬ꤊꤢ ꤜꤥ꤭ ꤜ꤫ꤢꤩ꤬ꤥ꤬ꤔꤣꤧ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤗꤢꤪ꤬ꤒꤢ꤬ꤙꤤ꤬ꤞꤢ꤮ ꤊꤣꤧ꤬ꤓꤢꤪ꤬ꤗꤣꤧ꤭” ꤢ꤬ ꤟꤢꤩ ꤚꤣꤧ꤬ ꤗꤢꤪ꤬ꤒꤢ꤬ꤙꤤ꤬ꤞꤢ ꤗꤢꤧꤊꤣꤧ꤬ꤜꤢꤪ꤭ꤓꤢꤩ꤬ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤢ꤬ꤋꤢꤩ꤭ ꤢ꤬ ꤊꤣꤧ꤬ꤓꤢꤪ꤬ ꤥ꤬ꤔꤢꤧ꤭ꤥ꤬꤯ 41 ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤙꤢꤪꤟꤢꤧ꤭ ꤢ꤬ꤊꤢꤨꤋꤢꤨ꤬ ꤚꤣꤧ꤬ ꤢ꤬ ꤡꤝꤤ꤬ꤊꤣꤧ꤬ꤓꤢꤪ꤬ ꤜꤢꤨ꤭꤯ ꤓꤥ꤭ꤚꤣꤧ꤬ ꤢ꤬ ꤢꤩꤔꤥ꤭ ꤋꤛꤢ꤭ꤞꤢꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤔꤢꤧ ꤖꤚꤢꤩ꤬ꤗꤢꤪ꤬ꤥ꤬ꤋꤚꤢꤧ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤘꤣꤧꤜꤥ꤭ ꤛꤢꤩ꤬ꤞꤤ꤭ ꤔꤢꤧ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ ꤞꤣꤧ꤭ꤖꤚꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤣꤧ꤭ꤒꤣ꤬ꤖꤚꤢꤩ꤬꤯ 42 ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤣꤧ꤭ꤔꤣꤧ꤬, ꤢ꤬ ꤜꤥ꤭ꤕꤣꤧ꤬ꤏꤤ꤭ꤡꤝꤢ ꤒ꤫ꤥ꤬ ꤜꤢꤪ꤭ ꤘꤣ ꤠꤤ꤭ꤡꤛꤥꤕꤢ꤬ ꤒꤣ꤬ꤊ꤫ꤢꤩ꤬ꤜꤢꤩ꤭ ꤚꤣꤧ꤬ ꤢꤨ꤭ ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ ꤢꤩꤜꤥ꤬ꤊꤣꤧ꤭ ꤙꤢꤧ꤬ꤡꤢꤩ꤬꤯ 43 ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤥ꤬ꤑꤢ꤭ꤊꤣꤧ꤭ꤕ꤫ꤥ꤬ ꤔꤢꤧ ꤛꤢꤩ꤬ꤞꤤ꤭ ꤙꤣꤧꤔꤣꤧ꤬ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤑꤢ꤭ꤊꤢꤨꤜꤥ꤬ꤊꤣꤧ꤭ꤕꤢ꤬ ꤏꤢꤜ꤫ꤢꤩ꤬ ꤘꤣ ꤋꤢꤨ꤭ꤏꤛꤤꤗꤥ꤬ ꤟꤤ꤬ ꤙꤣꤧ ꤠꤤ꤭ꤡꤛꤥꤕꤢ꤬ ꤢ꤬ꤊꤢꤨ꤭ ꤔꤣꤧ꤬꤯ ꤋꤢꤨ꤭ꤏꤛꤤꤗꤥ꤬ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤓꤢꤩ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤔꤢꤧ ꤒꤢꤩ꤬ꤗꤤ꤬ꤒꤢꤩ꤬ꤗ꤫ꤢꤧ꤬ ꤢ꤬ꤖꤢ ꤒꤣ꤬ꤖꤚꤢꤩ꤬꤯ |
Wycliffe USA
The Seed Company